(Pentakosta I – “Kreatif Merawat Lingkungan”)
Ogen : Mazmur 104: 1-4
Tema : Dibata Simada Tinepa
Tujun : Gelah Saitun
- Ngaku maka doni ras kerina isina Dibata kap nepasa ras simadasa
- La nalahgunaken tinepa Dibata, umpamana jadi perubaten, mpeturah pinakit, tapi jadi keriahen. Ras dana siniiperluken
Kebesaran TUHAN dalam segala ciptaan-Nya
104:1 Pujilah TUHAN, hai jiwaku! TUHAN, Allahku, Engkau sangat besar! Engkau yang berpakaian keagungan dan semarak, 104:2 yang berselimutkan terang seperti kain, yang membentangkan langit seperti tenda, 104:3 yang mendirikan kamar-kamar loteng-Mu di air, yang menjadikan awan-awan sebagai kendaraan-Mu, yang bergerak di atas sayap angin, 104:4 yang membuat angin sebagai suruhan-suruhan-Mu, dan api yang menyala sebagai pelayan-pelayan-Mu,
- BENA KATA
Tep-tep tanggal 5 Juni, siperingeti me “Hari Lingkungan Hidup” sitetapken PBB (Perserikatan Bangsa-Bangsa) menaken tahun 1972 si lewat. Tujunna eme “Meningkatkan kesadaran masyarakat global kerna kondisi lingkungan. Masyarakat diharapkan mampu mengambil atau mencetuskan tindakan positif demi melindungi lingkungan, alam sekitar dan bumi sebagai planet yang dihuni” (Wikipedia).
Janah ibas GBKP, tahun 2022 enda, fokus pelayanenta eme “Kreatif Merawat Lingkungan”. Meriah ukurta maka kerina anggota GBKP termasuk Saitun, ikut muat bagin ibas mperingeti “Hari Lingkungan Hidup” enda alu merawat lingkungenta. Adi kerina ngawan GBKP erbahan Perawatan lingkungan mulai ibas jabuna nari, maka GBKP nggo ikut muat bagin merawat doni inganta tading enda.
- MPEBAGESI OGEN
Dibata nepa doni enda alu mehuli
Adi sioge kerina ayat ibas Mazmur 104 enda, pelin-pelin nuriken kerna perbahanen Dibata si mbelin, kerina tinepaNa si itamaken Na ibas ingannna alu payo. Erdandanken si e, ipujiken Permazmur kal Dibata si nepa langit ras doni enda. Nina Permazmur ibas ogenta (ay 1-4): Andiko seh kal Kam muliana O Tuhan Dibatangku, Kam ruisken kiniulin dingen kemulian. Kam icabini terang si ersinalsal, ikimbangken Ndu langit desken kemah, i babo lau, i das langit, ipajekken Ndu rumahNdu. Embun ijadiken Ndu man geretaNdu, kabeng anginna iersakNdu. Angin ijadiken Ndu man persuruhenNdu, kilap jadi sierdahinNdu”. Erkiteken Dibata empuna kerina. emaka Dibata ka singaturkensa guna kai ateNa kerina tinepaNa e ipakeNa.
Man manusia pe ibereken Dibata dahin guna njagai ras ngusahai kerina tinepaNa e bagi tersurat ibas Kitab Kejadin 2:15. Janah arah ogenta enda ndai, la kepe man manusia ngenca ibereken Dibata tugas guna mpekena-kena doni enda, tapi pe man tinepa e jine. Terang e jadi cabinNa, langit jadi kemah, embun jadi gereta Dibata, angin jadi persuruhen Dibata, kilap jadi sierdahin Dibata. Alu kata si deban, kerina tinepa Dibata erdahin guna njaga kiniulin Doni enda ras ipercayaken Dibata ndahiken dahinna sue ras fungsina masing-masing.
- PENGKENAINA
Doni si ndube mehuli kal itepa Dibata, enggo melala ceda. Manusia ndai la tutus njagaisa, deba merangap. Kayu kerangen itutung itabahi piah jadi me banjir, longsor, kerah. Ibas bidang pertanian, mawen-mawen mbuesa ipake pupuk kimia, memang ulih sinuan e tupung rani mejile ras mbue ulihna, tapi banci e jadi pinakit tah racun man kalak si manca, sebab mbuesa zat kimiana, janah tanah e pe ceda. La sibar e saja, melala ka nge jadi perubaten ibas jabu seh sirang perkaden-kaden erkiteken taneh. tempa-tempa ergan taneh asangken kekelengen, asangken senina turang si tubuh bas sada bertin nari.
Tema PA-nta wari enda, ngataken maka simada tinepa eme Dibata. Man manusia ibereken Dibata hak guna mpekena-kenasa, ngusahai ras njagaisa ngenca. Selaku Saitun, melala sibanci silakoken guna njagai doni enda amin pe umurta enggo meganjang. Umpamana, nuriken man anak kempunta, kuga nai orangtuanta, njagai ras mpekena-kena tinepa Dibata. lja nai ibas tep-tep kuta lit igelari “Kerangen Kuta”, kerangen siijaga ras-ras la banci ate-ate nabah batang kayuna. Biasana iduru kerangen kuta eme ibahan tapin kuta, ulu launa i bas kerangen nari. Launa pe meciho kal kerina rubia-rubia si lit i kerangen e pe labo banci bebas ibuat tah pe iburu perburu. Ranting kerangen pe bage ka, amin pe nai umumna masyarakat erdakan pakai ranting. tapi masyarakat la pernah nabah batang kayu i kerangen guna jadi rantingna. Kiranting anak kuta ku kerangen, ipepulungna ranting si enggo nartar sitik-sitik tep-tep wari Bagepe tupung nuan-nuan, labo melala ipake pupuk kimia. Emaka gedang umurna ras sehat kal orangtuanta nai. Pengalamen sibagenda perlu situriken man isi jabunta.
Tole sijemba keluarganta guna erbahan “kerangen jabu” atau “taman produktif”, i sekelewet rumahta. Kalak Karo terkenal sebagai suku si rajin nuan seh ku kesain rumahna, seh ku taneh deherken parik rumahna pe. Isuanina sinuan produktif, bagi bulung pere, daun sop terung, cina cur ras sidebanna. Emaka adi lit dengan gegehta, pakelah kesempaten si lit, bahanlah gerakan peduli lingkungan. Adi la lit tanehta, pakai saja plastik bekas, tah botol aqua guna nuan-nuan sinuan-sinuan produktif tah pe nuan bunga. Adi lit sibanci ngajari kita, suruh ajarina kita erbahan tanaman Hydroponik. Reh buena sinuan-sinuan bas sekelewetta, reh sehatna kita sebab sirkulasi oksigen cukup guna nampati pernafasenta. Sampah-sampahta sipeserap sampah platik ras si la plastik. Sijaga kebersihan lingkungenta. Perpanta pe si atur, pan lah pangan si sehat, labo arus meherga.
Mari dage sibenaken, gelah Saitun banci jadi motivator (penjemba) bas sektor, guna njemba keluarga singuda denga, anak permata ras danak-danak gelah semangat mpekena-kena doni enda. Arah kegiaten enda, teridah Saitun GBKP engo ikut muat bagin mperingeti “Hari Lingkungan Hidup se Doni” sekaligus pe ikut ibas gerakan Kreatif Merawat Lingkungan se GBKP tahun 2022 enda. Saitun enggo ikut ibas ngusahai ras njagai doni enda bagi sinisuruh Dibata.
- PERTOTON
Bujur ikataken kami man baNdu Tuhan, sebab enggo itepaNdu doni ingan kami tading, ajariNdu kami mpekena mulihi tinepaNdu si enggo ceda, bereken kengasupen man kami guna ngkelengi kerina tinepaNdu e. Ibas gelar Jesus, dengkehken min pertoton kami. Amin.
- DISKUSI:
- Adi ikataken maka Dibata nge Si Mada tinepa e, kai saja dage tanggungjababta guna njagai ras ngusahai tinepa Dibata e?
- Bahanlah rencanandu guna erbahan kegiaten “kreatif merawat lingkungan”. Umpamana: tep-tep Saitun nuan sada tah dua sinuan bas rumahta, tah pe erbahan gerakan pepulung sada tah dua bibit bunga, tanaman apotik hidup, tah buah tah batang kayu guna isuan I halaman Gerejanta. Ntah kegiaten si debanna sue ras situasi li lit.