(Jubilate)
Ogen : Daniel 6:19-24 (Bahasa Indonesia Daniel 6:20-25)
Tema : La Sia-sia Patuh man Dibata
Tujun : Gelah Saitun:
- Tetap tek ras nggejab maka kepatuhen man Dibata labo sia-sia.
- Tetap patuh man Dibata tupung ngalaken keblaren si mesangat.
BENA KATA.
Mekatep sibegi kata, “Erkiniteken e labo bagi siengketep lacina ulihna” ertina nggeluh ibas erkiniteken man Dibata, labo genduari sipindo genduari iberekenNa, entah pe genduari sinanami padan Dibata.
Tapi nggeluh erkiniteken lit ibas proses, janah si penting ije eme kepatuhen ras kesetiaan man Dibata. Ndatken ulih, enggo pasti sabab Dibata nandai kita seh ku bas pusuhta simbagesna, iangkaNa maka kita perlu kekelengen ras penampatNa.
Tapi mekatep turah kekecewaan ras la ka iakap pasti ulih kepatuhen ibas erkiniteken man Dibata sabab, mekatep jadi enggo me paksana penampat e reh man bangku ateta, tapi lang. ibas situasi enda banci saja urak kepatuhenta. Guna empetetap ukurta, mari kita erlajar arah pengalamen geluh Daniel, anak Dibata si patuh erkiniteken man Dibata.
MPEBAGESI OGEN.
Daniel eme sekalak situtus dingen patuh erkiniteken man Dibata, disiplin ertoto eme kebiasanna. Ertoto, erjimpuh ras muji Dibata 3 kali sada wari, la pernah tading, subuk lit entah la lit dahinna, subuk sibuk entah la sibuk, tetap ia ertoto. Emaka ituriken rikutken kesaksin Pustaka Sibadia, Daniel 10 kali lipat pentaren asangken kerina kalak si pentar ras lit ilmuna i belang-belang kerajaan e (Daniel 1:20). Ituriken maka kepentaren Daniel melebihi 120 wakil Raja ras pejabat sidebanna. Empat kali raja lengser, ser, tapi Daniel tetap jadi pejabat. Kinata enda jadi bukti maka Daniel beda, sabab ia idemi Kesah (Daniel 6:4). Kepatuhen, ketutusen ras kesetianna ertoto mbelin kal ngaruhna ku kegeluhenna. Erdandanken sie maka pejabat ras wakil Raja cemburu, cian atena emaka idaram-daramina kesalahen Daniel.
Kenca ipedarat aturen la banci nembah kai pe, ise pe, seakatan Raja, Daniel la mbiar, la urak ukurna guna tetap ertoto bagi sibiasa ilakokenna, la ibahanna cara gelah tempa-tempa ia la ertoto tapi ertoto, entah pe cebuni-cebuni ia ertoto gelah ula ise pe ngetehsa. Kai siibahan Daniel, encidahken uga belinna kiniteken, kepatuhen ras ketutusen er-Dibata. Sabab enggo ipedarat undang-undang, emaka la banci lang Daniel itamaken ku gua singa. Tapi Daniel selamat, la sitik pe kula Daniel ikenai singa-singa e
Erpagi-pagi lampas keke Raja, pedas-pedas ia ku lubang e, alu nggirgir lebuhna Daniel, nina “O Daniel suruh-suruhen Dibata si nggeluh…” arah kata enda teridah maka Raja pe ngakui maka Dibata siisembah Daniel eme kap Dibata singgeluh. Erjabab Daniel alu nuriken kerna perbahanen Dibata simbelin man bana, uga Dibata nampati ia, uga ia la ersalah man Raja (ayat 19-22). Lanai kal lang-lang riahna ukur Raja, ersurak pusuhna erdandanken penampat Dibata tangkas teridah ibas kegeluhen Daniel, sabab aru kal atena tupung Daniel itamaken ku lubang e, itandaina Daniel eme kalak si patuh ras tutus er-Dibata dingen pentar. Emaka Daniel itarik ibas lubang e nari, janah kalak singaduken ia itamaken ku lubang singa e rikut ras ndehara bage pe anak-anakna. Ope denga seh pe enggo leben irigep singa e janah iripukken tulan-tulanna
Daniel selamat erdandanken kiniteken ras kepatuhenna, tupung lit perbebenna reh ia ku Tuhan, tenang ia janah ertoto man Dibata. Tupung ia lit ibas ancamen kematen, tetap ia erpengendes tuhu-tuhu man Dibata, emaka alu meriah ukur isaksikenna man kalak sienterem kerna kuasa ras gegeh Dibata si nelamatken ia. Emaka kalak sienterem e pe ngidah perbahanen Dibata simbelin ibas kegeluhen Daniel. Kiniteken ras kepatuhenna la sia-sia, ialokenna keselamaten ras kegeluhen.
PENGKENAINA
Tupung kita ngenanami erbage persoalen, lit si cian atena man banta, kita ifitnah, ituduh ngelakoken si la silakoken, kuja kita mindo penampat? banci saja kita ngarap ku gegehta, la kita sabar emaka sidarami serpang pulah alu caranta, alu akalta, maun-maun reh dauhna kita ras Tuhan ibas ndarami serpang pulah.
Erlajar arah pengalamen Daniel, kita arus tetap patuh man Dibata, erkiniteken, ngendesken kerina kegeluhenta alu bulat ukur janah tetap tutus ertoto (Jakub 5:16b), Dibata siisembah kita ngasup nampati ibas kiniseran siugapana pe, termasuk si la mungkin pe, ibas IA la lit simetahat. Dibata siisembah kita ergegeh ras erkuasa, sabab IA me si mada gegeh ras kuasa e.
Selaku anak-anak Dibata si enggo Saitun, ingetlah, enggo melala kal pengalamen geluh siidalani, meriah entah ndele ate, ibas sie teridah Dibata enggo mereken pemere si mbelin, eme seh kam ku Saitun. Emaka tetaplah patuh man Tuhan, bicara kai pe jadi ibas geluhndu ku lebe enda sabab kepatuhen man Dibata labo sia-sia. Adi lit kebiaren erdandanken anak-anak, kesehaten, ekonomi, gegeh si enggo kurang, tetaplah patuh man Tuhan. Sabab ibas gegehta si kurang, ije me gegeh Dibata erdahin ibas kita. Emaka ibebaskenNa kita ibas kerina mara nari. Dahilah Tuhan tupung kiniseran ras perbeben engkenai kita.
PERTOTON.
Tuhan simada kuasa, bujur ikataken kami man baNdu, sabab itandai kami Kam Tuhan kami. janah kami enda anak-anakndu si enggo ndatken umur si gedang, Pengasup kami gelah patuh ibas erkiniteken, siteridah ibas kengasupen kami ngalaken kerina persoalen kegeluhen si engkenai kami. Ibas Jesus Kristus iendesken kami geluh kami man baNdu. Amin.
- DISKUSI:
- Cuba turiken tanda-tanda kepatuhen Daniel man Dibata, janah kal ulihna.
- Rikutken pengakapndu, ibas kai-kai saja kam enggo encidahken kepatuhenndu man Dibata? Turikenlah alu terus terang
Adi lawes kam pagi ku tiga, Baba luah si buah galuh Kalak si tetap patuh man Dibata, Malem me ate ras sangap nggeluh
Mutiara Kata: Kemujuran menunggu orang yang mau menerima peluang