UKURI LEBE MAKA BELASKEN
Kuan-Kuanen 15:23, 28
Komunikasi
15:23 Seseorang bersukacita karena jawaban yang diberikannya, dan alangkah baiknya perkataan yang tepat pada waktunya!
15:28 Hati orang benar menimbang-nimbang jawabannya, tetapi mulut orang fasik mencurahkan hal-hal yang jahat.
A. PERSIKAPEN
- Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
- Nikapken ingan persembahen.
- Nungkun ras nuratken topik pertoton sapaat.
- Kune i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken pengurus PJJ. Dikune PJJ ilakoken i jabu masing-masing, maka perdalanen PJJ ibabai bapa, nande, bage pe anak.
- Sope benaken PJJ, banci kita rende alu make ende-enden KAKR.
- Janah kerina perdalanen PJJ enda banci iubah (imodifikasi)rikutken perluna.
B. PERPULUNGEN JABU-JABU/ PERPULUNGEN JABU
Rende: KEE No. 319:1,4
Sada soranta muji Dibatanta, IA jine sinjayam kegluhenta
Lalap IA ngkelengi tinepaNa, maler me kap tetap pasu-pasuNa
Sada soranta muji Dibatanta, Kesah Tuhan nemani bas ersaksi
PengasupNa kita e ngelayasi, maler me kap tetap pasu-pasuNa
Ertoto
Nikapken pusuh ngoge Pustaka si Badia alu ngendeken KEE No. 468:2 (iulih 2 kali)
Tuhan demi aku salu kataNdu, Tuhan demi aku salu kataNdu
Pusuhku bagi tambe kubaba ku pancurNdu,
Tuhan demi aku salu kataNdu
Ngoge Pustaka Si Badia (iogeken Nande)
Teks : Kuan-Kuanen 15:23, 28
Tema : Ukuri Lebe Maka Belasken
Kata-kata si ibelasken, cakap, pengerana mbelin mpengaruhi hubungen kegeluhen i bas jabu, sangkep geluh, perpulungen ras i bas negaranta. Ertina i bas kerina hubungen (subuk kekerabaten bage pe relasi si debanna). Ranan ntah cakap banci mpeturah kemalemen ate, keriahen ukur, semangat ras mpehuliken tapi pe banci mpereh persoalen, perubaten, la siangkan, ndele ate ras si debanna. I bas kegeluhenta, budaya ras masyarakat Karo, lit nge kuan-kuan ‘kusik-kusik kuda, guntar sada kuta’ siakap cakapta e guna kita ras temanta saja, tapi enggo man runggunken. Lit ka nge belas-belas ‘ranan pegebukken’. Gebuk, lanai siangkan kalak erkiteken ranan si belasken kita. La sitik pepatah ntah pe kata bijak kerna erbelas : ‘lidah memang tidak bertulang namun lidah dapat menjadi pedang paling tajam di dunia’. Banci sakit pusuh kalak si deban ntah pe enggo tempa iakapna mate erkiteken ranan si la uli.
Genduari enda la sitik kalak si ngerana la saja arah sora si ibelaskenna tapi tapi pe arah isi pusuh ras ukurna si iturikenna arah nuratken erbage hal subuk arah sms, whatshap bage pe i bas status ntah postingen. Kata-kata si suratken desken isi pusuh si ibelasken janah ulihna banci lit kalak la siangkan erkiteken cakap sibage rupa, sabab lit ka nge si ‘hoax’ la tuhu. Lit si seh man runggunken ku pengadilen, iukum penjara ras si debanna. Alu bage kai-kai nge arus si lakoken gelah ngurangi kecibal si bage rupa?
Perlu kal kita erkomunikasi alu mehuli, amin la arus sekolah ilmu komunikasi, tapi si eteh ras lit i bas kita keterampilen erkomunikasi gelah kerinana ratur ras mehuli. Komunikasi i bas kata ‘communicare’ si ertina mpeseh. Jadi komunikasi secara sederhana e me ‘aktivitas penyampaian informasi baik itu pesan, ide, gagasan dari satu pihak ke pihak lainnya yang dilakukan secara langsung ataupun tidak langsung’. Teptep wari geluhta idemi alu kegiaten komunikasi.
Paksa enda ibabai kita arah kata-kata si isuratken penulis kitab Kuan-Kuanen tuhu-tuhu nuriken isi kerina kitab e. Ogenta enda nuriken kuga arusna kita mbangun komunikasi i bas kegeluhenta. Payo kal si isuratkenna e mbages kal iukurina maka ibelaskenna, alu bage kata enda tuhu-tuhu jadi kata persinget man kerina kalak si ngogesa ras si megisa. Sabab tujunna nehken kata gelah sidengkeh dingen si lakoken i bas geluhta. Tentuna belas-belas enda reh i bas situasi si megati jadi i bas kegeluhen. Kepeken la saja genduari enda, kata si ibelasken e banci erbahan perubaten, ngguntari seh maka man runggunken.
- Seh kal riahna adi terbelasken kata si payo i bas paksa sipayo. Luar biasa, iajuk kita nggejabken keriahen ukur i bas melasken kata si payo. Ertina kata sibage la saja simelaskenca si ermeriah ukur tentuna pe si megi ras ngaloken kata e. Kata si ibelasken e payo, la guak, pasti jadi pasu-pasu. Terdauhen, melasken kata si payo enda labo menukah, la saja ndarami kata si pas, tapi pe ngukuri kalak singalokenca rikut ras paksana. Belasken kata si pas, i bas waktu ras man kalak si pas, sabab ranan si mehuli tapi la i bas paksana banci salih.
- Kalak si mehuli, iukurina lebe maka ibelaskenna jababna. Ertina kalak si mehuli, si iukurina tentuna kerina si mehuli alu bage otomatis si ibelaskenna pe si mehuli. Subuk i bas nuriken isi pusuhna bage pe i bas njabab kata kalak si deban, terlepas ranan kalak e mehuli ntah lang, tetap i bas ia ranan si maba kemalemen ate ngenca reh.
Enda arapen, janah labo menukah guna nehisa. Perlukal la saja latihen melasken ranan tapi pe erlajar rukur, ertimbang, ngidah situasi dingen ncibalken ranan alu mehuli. Kerina enda uluna kepentaren i bas Dibata nari. E me si mpeturah ukur si mehuli dingen kengasupen rukur alu payo sope ngerana bage pe ngelakoken sada-sada dampar.
Alu nambahi ketrampilen i bas nehken ras ncibalken isi pusuh ras ukurta reh ulina geluhta. Mari terus erlajar, latihen nehken ras ncibalken kata si jadi tambar, pengapul, semangat, motivasi, imun; ula desken racun ntah pe virus si erbahan sakit kula ntah pusuh kalak. Ijapa pe, subuk i bas jabu, ingan erdahin tetaplah kata sinibelasken kita siukuri ulihna, pasu-pasu ras kemalemen ate man kerina kalak.
Nuriken penggejapen: pegancihen kedungenna irakut Pt/Dk/Pdt
Diskusi:
- Turiken pengangkanndu, erti kata sipayo i bas paksa sipayo ras ukuri lebe maka belasken!
- Turiken pengalamenta, i bas erkomunikasi sedekah enda dingen kai ulihna man banta ras kalak si deban?
Persembahen Rende KEE No. 15:1-2
Kataken bujur min, kam k’rina sinijenda
Man Dibatandu e, singidah kita enda
Singk’lini kita kap, i bas anakNa e
Si m’reken lalap kin, ngaruhNa pemere
Man banNdu o Tuhan, kesahku ras tendingku
Kupersembahkenlah, gegehku ras dagingku
Aloken o Bapa, keleng ateku min
Sabab kueteh tetap, e ngena ateNdu kin
Pertoton Persembahen ras Sapaat
* Persembahen
* Gelah ngawan perpulungen tetap erlajar ras ngasup melasken ranan alu mehuli
* Hubungen i bas jabu ras perpulungen reh ulina alu litna ranan si mehuli
* Kecibal perpulungen
Rende KEE No. 466 (iulihi 3x)
Bujur o Tuhanku bujur o Tuhanku
Terpujilah gelarNdu, Bujur o Tuhanku
Pertoton Tuhan
Momo
Pdt. Suenita br Sinulingga, M. Th.
HP/WA : 0813 9738 0916