UMUR SI GEDANG
Masmur 91:16
(HUT Kategorial : KAKR, PERMATA, MORIA, MAMRE ras SAITUN)
91:16 Dengan panjang umur akan Kukenyangkan dia, dan akan Kuperlihatkan kepadanya keselamatan dari pada-Ku.”
A. PERSIKAPEN
- Pengurus PJJ ngaturken perdalanen PJJ subuk kune ilakoken ibas sektor, jabu kepkepen, entah i bas jabu ngawan perpulungen erkiteken situasi.
- Nikapken ingan persembahen.
- ungkun ras nuratken topik pertoton sapaat.
- e i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken pengurus PJJ. Dikune PJJ ilakoken i jabu masingmasing, maka perdalanen PJJ ibabai bapa, nande, bage pe anak.
- Sope benaken PJJ, banci kita rende alu make ende-enden KAKR.
- Janah kerina perdalanen PJJ enda banci iubah (imodifikasi) rikutken perluna.
B. PERPULUNGEN
RENDE KEE No. 368:1,3 (Ibabai Pengurus PJJ/Anak)
Sipuji Tuhan Dibatanta, kataken bujur baNa
Sabab IA simerekenca, pasu-pasu man banta
Reff : Mbelin ras mulia, kekelengen Tuhan I bas doni enda
Ajari o Tuhan, kami k’rina anakNdu
Naksiken kerina, perbahanenNdu
Iinget kami padan Tuhan, bas kegeluhen kami
Kam simereken kegeluhen, mpetetap ukur kami
Reff : …
ERTOTO: (Ibabai sekalak anggota jabu)
NGOGE KATA DIBATA: Masmur 91:16 (ibabai anak)
RENUNGEN (ibabai Nande)
Tema : Umur Si Gedang
Perpulungen jabu-jabu Minggu enda e me mpersingeti Hari Ulang Tahun kerina persekutuan kategorial si lit i bas gerejanta GBKP. Adi megermet kita banci nge si ertiken maka teptep reh ulang tahun reh tambahna nge umur persekutuan kategorialta (Mamre, Moria, Permata, KAKR, Saitun). Ertina reh gedangna masa si idalanina, si ipakekenna, bage pe si igeluhkenna. Janah alu tambahna umur enda pasti mereken tenah ras pengajaren man banta.
Umur si Gedang tuhu mbages kal pengertinna; banci iertiken “lanjut umur” ertina langa erkedungen umur, masa, kesempaten, si ibereken man sesekalak jelma entah pe man kiniersadaan (organisasi). Selain si e banci ka iertiken “ndekah nggeluh” ertina la meter-meter iujungi geluhna entah kecibalna. Adi ipersada pengertin i datas banci isimpulken maka umur gedang eme kesempaten si ndekah si ibereken man banta guna nerusken kegeluhen ras dahinta.
Bahan PJJ-nta nuriken kerna umur si gedang e me salah sada upah si ibereken Dibata man kalak si cicio dingen ringan i bas ginemgem Dibata. Adi siperdiateken Masmur bindu 91 menaken ayat 1 nari, si idah melala kal kiniulin Dibata banci inanami kalak si Dibata
ibahanna inganna cicio, janah kerina kiniulin ndai iujungi alu mereken upah e me umur si gedang. Alu bage umur si gedang e me pemere i dur Dibata nari. Tambah si e, ikataken Pemasmur maka la terjeng umur si gedang ngenca ibereken Dibata tapi pe ikeliniNa i
bas ndalani umur si gedang e. Alu bage banci si ertiken maka umur gedang e banci iangkai jadi upah adi i bassa lit pengkelini Dibata. Sabab adi la ikelini Dibata, umur si gedang banci jadi kiniseran man banta.
Si jadi penungkunen man banta; ngkai maka ibereken Dibata umur si gedang man banta kerina persekutuan kategorial? Piga-piga makna si banci sirenungken e me :
- Gelah kerina umur banci ielai dingen ngelai i bas gerejanta. Arah umur si gedang kerina persekutuan kategorial secara organisasi banci makeken kesempaten nerusken dahin pelayanenna nandangi anggotana bage pe kalak si deban.
- Gelah kerina anggota jabu (perbapan, pernanden, orang tua, anak) banci ipegegehi sue ras fungsina i bas jabu. Alu bage kerina anggota jabu megegeh i bas persadanna naksiken kula Kristus, lanai talu i bas ngalaken tantangen jaman. Nggeluh i bas kiniersadan si enteguh paguh seh teridah maka jabu-jabunta e me gereja si kitik ija Dibata ringan.
- Alu litna kesempaten si ibereken Dibata, reh buena si banci ibahan gereja arah limana persekutuan kategorial si lit i bas gerejanta nandangi doni enda. Subuk teptep persekutuan kategorial entah pe i bas persadaanna (program bersama).
Selain secara organisasi, lit ka makna umur si gedang nandangi pribadi-pribadinta. Adi ibereken Dibata umur si gedang man banta, berarti ibereken Dibata denga kesempaten man banta guna makeken waktu si lit ndalani kegeluhen dingen makekenca alu perbahanen si mehuli. Janah kesempaten enda e me pemere Dibata man banta guna si pakeken alu mehuli i bas geluhta, jadi kesangapen man banta bage pe man kalak si lit isekelewetta.
NURIKEN PENGGEJAPEN
- Bapa
- Nande
- Anak
- Saitun
IRAKUT: salah sada PERTUA/DIAKEN/EMERITUS/PANDITA
DISKUSI:
- Turiken pengangkanta kerna makna umur si gedang si ibereken Dibata man banta!
- Kai responta kerna umur gedang (HUT) si ibereken Tuhan man banta! Teptep kategorial si lit i bas perpulungen e erbahan sada respon berupa komitmen (banci slogan, banci yel-yel, banci sada lagu, banci pantun, ras si debanna).
RENDE KEE No. 293: 1,3
Meriah ukur kami o Tuhan, lias ateNdu si nggo tersuan
Igejap kami kuasaNdu mbelin, si erban kami k’rina terkelin
Kam me kap si pegedangken umur, man baNdu kami ngataken bujur
Kam kapen si pegedangken umur, man baNdu kami ngataken bujur
ItampekenNdu umur sigedang, rikut ka pe ras ukur si senang
Bas dalin gelap ib’reNdu terang, Kam si erbanca kami pemenang
Keleng ateNdu la kap nggo sirang, kuasaNdu la kal kapen teralang
Keleng ateNdu la kap nggo sirang, kuasaNdu la kal kapen teralang
PERTOTON SAPAAT (ibabai serayan Tuhan/bapa)
- Kerna persembahen
- Kerna kerina persekutuan kategorial i bas tambahna umurna secara organisasi ras secara pribadi tetap ngasup encidahken peningkaten kualitas geluh ras pelayanen
- BP Majelis i bas wilayah pelayanen tetap ermediate dingen kerjasama ras persekutuan kategorialna.
- Siturah i bas perpulungen
RENDE KEE No. 334:1, 2 (ibabai serayan Tuhan/nande)
Tuhan kap si empuna geluhta, gegehta IA simerekenca
Kiniteken pe ras pemetehta, epe IA sinjujurkenca
IA kap erbanca kita sangap, tetaplah man IA kita ngarap
Di reh susah b’reNa serpang pulah, tendi kula mejuah-juah
Dage tetaplah bulat ukurta, geluhta pe lalap min erguna
Lagu langkah pe la sia sia, gelar Tuhanlah ermulia
Adi jumpa kita si mesera, pengarapen ula kal min pera
Kune riah ukur kita jumpa, nehken bujur ula kal lupa
PERTOTON TUHAN (ibabai serayan Tuhan/bapa)
MOMO
C. JEDA RAS PENUTUP
Pdt. Liza Selvina br Tarigan, S.Th., M.M.
HP/WA : 0813 70442166