(Paskah, HUT GBKP ras HUT KA – KR si pe 132 ken)
Ogen : Roma 6: 4
Tema : Kristus enggo keke i bas kematen nari
Tujun : Gelah Saitun:
- Reh tekna ibas nggeluh ntah mate. Tuhan lalap ras kita.
- Nehken pedah ras jadi usihen simehuli nandangi anak ras kempu.
- Erbahan aksi nandangi KA – KR
BENA KATA
Sekalak Evangelis Inggris C.S. Lewis ngataken maka “Kekeken Kristus e me peristiwa sentral man sejarah doni enda” Peristiwa kekeken Kristus erbahanca ndatken perkuah ate Dibata, kita manusia iselamatken. Bagi pujin i bas KEE GBKP No. 128, syairna nina, “Nggo me talu kematen, iban Tuhan Yesus e: Nggo me keke kepe la, tudu ras padan-Na pe. Haleluya haleluya, nggo me keke Yesus e 2x”
Arah ende-enden enda ituriken maka Yesus enggo mate, janah enggo keke i bas kematen nari. Ertina arah kekekenNa nuduhken maka Yesus enggo keke i bas kematen nari (kekeken Yesus naluken kuasa kematen). Adi la lit kekeken Kristus, la lit kekristenan, perban
kekristenan pajek i bas kekeken Kristus. Kekeken Kristus njadiken Kekistenan riel, erbahanca berbeda, istimewa i bas kerina agama-agama doni si ianut / si ipercayai manusia i bas doni enda. E maka Tema PA Saitun i bas wari enda:”Kristus enggo Keke i bas kematen nari”, jadi hal si menarik ras perlu siakui kuga maknana i bas kegeluhenta selaku kita manusia, khususna Saitun.
MPEBAGESI OGEN
Surat Paulus man perpulungen Roma Bindu 6:4 nina: “I bas kita iperidiken e, enggo kap kita mate dingen ikuburken radu ras Kritus, gelah bagi Kritus ipekeke i bas si mate nari i bas kemulian Bapa, bage me pe kita nggeluh i bas kegeluhen si mbaru”. Arah ayat enda lit 5 bagin si banci si pelajari eme:
- Man kalak si tek erti iperidiken e me kematen ras kekeken kalak si tek radu ras Kristus, alu palas kiniteken man Tuhan Dibata. Erti iperidiken e me penolaken nandangi dosa ras pe i je lit komitmenta man Kristus si erbuahken perkuah ate Dibata si tetap maler man banta ras pe kegeluhen si rasa lalap ibereken man banta.
- Ikuburken ras Kristus arah kematen Na, enda nuriken secara realita, maka Kristus enggo mate, kalak si tek pe mate radu Ia.
- “Bagi Kristus ipekeke i bas si mate nari i bas kemulian Bapa”. Kalimat enda merupaken sada kalimat perbandingan. Kekeken ertina naruhken Yesus Kristus i bas sada cara nggeluh si mbaru. Bage ka me kita ibaba ku bas kegeluhen si mbaru. Perbahan kita ipersadaken radu ras Kristus i bas kematen Na, kita pe ipersada i bas kekekenNa. Man Yesus sebagai Juruselamat, kekeken ertina cara nggeluh simbaru. Kita ikuburken radu ras Kristus segelah kita bali ras la banci nggeluh i bas kegeluhen si mbaru. Paulus nuriken maka lit perbedan kematen manusia ras kematen Kristus. Yesus mate labo erkiteken la erdosa, sebab Yesus si la erdosa nggit mate, gelah manusia banci ngaloken keselamaten. Manusia mate erkiteken dosa-dosana. Kematen Kristus guna nggalari utang dosa manusia man Dibata, perban manusia enggo ngelanggar pedahNa.
- Kata “..bage me pe kita nggeluh i bas kegeluhen si mbaru” (6c). Bagin enda nuriken maka lit relasi si mbaru, la saja man Dibata Bapa ras Kristus Yesus, tapi pe relasi si mbaru ras dirinta. I jenda lanai kíta make manusianta si male. Anem gia kita (manusia) si seri, naturta menjadi natur si berbeda, genduari naturta e me natur manusia si enggo ipelimbarui i bas Kristus.
- Kekeken Kristus i bas si mate nari mereken pengarapen man banta kalak si tek. KekekenNa i bas si mate nari membagi masa, ertina manusia si malenta berakhir i bas Salib Kristus, sejarah barunta ibenaken i bas kekeken Kristus.
PENGKENAINA
Pernah nge turah penungkunen i bas geluhta: “Guna kai aku nggeluh i tengah-tengah doni enda? Mungkin lit si ngatakenca maka ia nggeluh i bas doni enda guna erlajar, sekolah, kuliah, erdahin, erjabu, lit kesusuren, pejabuken anak ras seterusna. Jawabenta e la berujung seh ngayak kita mate. Kenca kita mate ku ja? Arah penungkunen enda kita ibabai gelah paksa kita nggeluh i doni enda banci kita memaknai “erti kegeluhen“, sebab i bas paksana pagi kita arus mate. Kita pe arus ngangkai maka kematen Yesus i kayu persilang. gelah kita manusia banci ndatken kegeluhen ras Kristus,e me geluh si mbaru. Alu bage kegeluhenta si kentisik i bas doni enda banci simaknai gelah lit ertina ntah pe ernanam. Bagi ende-enden “Hidup ini harus jadi berkat“
Selaku kita manusia si perdosa, guna ngertiken kekeken Kristus i bas si mate nari tuhu-tuhu labo terantusi kita, perbahan kita lit i bas kuasa dosa. I je me teridah kerna keleng ate Tuhan man banta manusia si perdosa. Arah pengorbanen Yesus i kayu persilang guna nebusi dosa-dosanta, erbahanca kita reh tekna man baNa. Nggit la ngasamken kesah Na gelah manusia banci selamat. Pengorbanen si bage belinna mahan bana kita pe reh tetapna kinitekenta man Yesus Kristus, janah la pe erpadan maka tetap nemani kegeluhenta seh rasa lalap. Nggeluh tah mate kita tetap ras Kristus.
Selaku orang tua (Saitun), kita banci nehken pedah man anak-anakta/kempunta, bage pe kita banci jadi usihen/ teladan man kempunta kerna erti kekeken Kristus i bas si mate nari. Sebab kekeken Kristus erbahanca kita manusia ndatken perkuah ateNa, ras ndatken kegeluhen si rasa lalap i bas Kristus. Pengorbanen si maba keriahen ras kedamen i bas geluhta. Adi dame i bas pusuh maka kita pe malem ateta nggeluh i bas doni enda.
Selaku ninibulang ras ninitudung (Saitun), kita ngataken “Selamat HUT” man kempunta KAKR pe 132 ken, kita ninibulang ras ninitudung (Saitun) banci mereken pedah/ajar man kempunta KAKR gelah arah HUT 132 enda, anak KAKR banci naksiken ras nuriken erti “nggeluh si mbaru”, alu bage anak KAKR pe malem atena.
PERTOTON
Bujur ikataken kami man baNdu o Bapa kami sini Surga, sebab ibereken Ndu man kami Anak-Ndu Yesus Kristus guna nebusi dosa-dosa kami, si erbahanca kami terkelin arah kematen Yesus i kayu persilang. Meriah dingen malem ate kami selaku kalak si enggo iselamatkenNdu. Pake kami Tuhan, selaku orang tua (Saitun) guna banci nehken keleng ateNdu man anak ras kempu kami, gelah la kami saja si iselamatken Kam, tapi anak ras kempu kami pe iselamatken arah kematen Kristus i kayu persilang. Pake kami Bapa gelah banci jadi teladan, usihen ras penggurun man anak ras kempu kami. I bas gelar Tuhan Yesus reh kami ertoto man BaNdu, Amin.
METODE PA: DISKUSI
1. Ibas ay 6c, nina: “Bage me pe kita nggeluh i bas kegeluhen si mbaru”. Kai nge banci sigejapken erti geluh si mbaru i bas geluhta? Mari si diskusiken?2. Banci nge si idah bedana: “paksa kita nggeluh i bas kegeluhen si male, ras cara kita nggeluh kenca kita nggeluh i bas kegeluhen si mbaru? Turiken kesaksinta!
Kata-kata bijak
Jangan biarkan situasi sulit mengendalikan hidup kita, supaya suka cita dalam diri tidak hilang dengan Sia-sia
Anding-andingen:
Tua-tua si buah kelto, reh tuana reh gatelna landingken kempak kalak si tambah tuana (umurna) tambah ate kalak segat perban lagu langkahna si la payo.