(Judika)
Ogen : Johanes 15:15-17
Tema : Kam TemanKu
Tujuan : Gelah Saitun:
- Nggejabken maka kita enggo ipelimbarui arah juak-juak jadi teman Dibata
- Nggit erteman ras ise pe i bas kegeluhenna
15:15 Aku tidak menyebut kamu lagi hamba, sebab hamba tidak tahu, apa yang diperbuat oleh tuannya, tetapi Aku menyebut kamu sahabat, karena Aku telah memberitahukan kepada kamu segala sesuatu yang telah Kudengar dari Bapa-Ku. 15:16 Bukan kamu yang memilih Aku, tetapi Akulah yang memilih kamu. Dan Aku telah menetapkan kamu, supaya kamu pergi dan menghasilkan buah dan buahmu itu tetap, supaya apa yang kamu minta kepada Bapa dalam nama-Ku, diberikan-Nya kepadamu. 15:17 Inilah perintah-Ku kepadamu: Kasihilah seorang akan yang lain.”
- BENA KATA
Selaku makhluk sosial, kita la banci nggeluh si sada, tapi harus erteman. Teman e me si nemani kita i bas mentasi ras ngalaken erbage-bage keadaan, subuk meriah ukur ntah pe kepiceten, subuk sehat ntah pe sakit. Teman situhu-tuhu la biar-biaren guna ngkoreksi perbahanen si la mehuli, sebab la atena temanna e juru. Teman si mehuli ngelakoken pertemanen alu pusuh si bersih, labo gelah runtung saja, ntah pe erteman adi sangana teman e sukses saja. Palas pertemanen e me kap sikeleng-kelengen, Erteman e me salah sada biak Dibata si nuduhken kelengateNa kempak manusia.
2. MPEBAGESI OGEN
Pengogenta wari enda ngerana kerna prinsip kiniersadan ajar-ajar ras Jesus siiumpamaken arah Batang Anggur ras dahan-dahanna. Dahan si ersada ras batang anggur e tentu erbuah meramis. Erkiteken leket ia ku batang anggur e, e maka ialokenna pangan arah sumberna. Dahan si erbuah meramis nuriken kerna ajar-ajar si ndalanken perentah Dibata ras mpermuliaken gelarNa. la sekalak si enggo ibebasken Dibata, lanai igelari juak-juak. Konsep juak-juak (Yunani doulos) si ipahami masyarakat i bas paksa si e, e me sekalak si imiliki ntah ikuasi kalak si deban, si posisina labo pernah sejajar ras tuanna. I bas zaman Jesus, lit deba jadi budak erkiteken keturunen, tawanen perang, kalak si musil, seh maka idayakenna dirina jadi budak. Budak labo lit kebebasenna, sabab tuanna banci rate-ate ngelakoken kai-kai saja nandangi budakna, termasuk ndayakenca ka man kalak s ideban. Memang, kenca rumur 30 tahun, nterem budak si banci ngaloken status “merdeka”, tapi lit denga kewajiben-kewajiben si arus ilakokenna kempak tuanna. Lit ka deba adi enggo ngasup ia nggalar sen man tuanna, banci ia ibebasken.
Konsep budak enda iidah Jesus, janah la make pemahamen si berkembang i bas masyarakat alu nekanken kuga kelengateNa nandangi manusia. KekelengenNa e icidahkenna alu ngasamken kesahNa teman-temanNa. Penebusen si ilakoken Jesus, enggo mbebasken kalak si tek, janah ia igelari teman-teman Jesus. I jenda teridah hubungen si setara antara Jesus ras ajar-ajarNa. Janah sekalak teman tentu enggo ngangkai sura-sura temanna. E maka perentah Jesus terdauhen nina, “Tapi Kugelari kam teman-temanKu, sabab enggo Kupeseh kerina si enggo kubegi i bas BapangKu nari” (ay. 15). Kai kin si enggo ibegi e? E me perentah gelah erbuah meramis, e me buah si tahan rasa lalap (ay. 16). Perentah enda nurikenkerna dahin meritaken Berita Si Meriah, si tahan rasa lalap, si mabai kemalemen ate man kalak si megikenca, si mereken pengarapen man kalak si kelsehen, si ncidahken keleng ate man kerina manusia, Bage me Jesus nuriken pengajaren enda kerna status ajar-ajar si enggo ipelimbarui Dibata, e me jadi teman Dibata.
3. PENGKENAINA
Saitun jadi teman Dibata ibas nehken Berita Si Meriah. Enda tuhu-tuhu sada status si meherga. Si enda ngatakenca maka Saitun meherga adep-adepen Dibata. Umur si nggedang si enggo ibereken Dibata ras pengalamen si ntebu/pagit i bas ndalani kegeluhen, banci jadi kesaksin Saitun guna nuriken penenami Dibata geluhna. Gia labo kerina kondisi erdalan bagi sini sura, tapi Saitun si jadi teman Dibata la pernah bene pengarapenna. Bage me Saitun nggejabken kemalemen ate jadi teman Dibata, segedang-gedang geluhna gejabna penemani Dibata, si erbahanca ia pe nggit erteman ras kalak si deban, e me tandana ia erbuah meramis.
Tentu i bas masa Saitun megati lit turah perasaan kesepian, apai ka anak-anak enggo erjabu, tading i bas ingan si ndauh, ras lit ka kesibukenna tersendiri. Saitun si nggit jadi teman kalak si deban, makeken dirina mereken semangat, jadi teman ercakap-cakap, jadi teman si mereken dukungen kune kenca lit temanna si nggejabken kelungunen ras meherga akapna bana. Ertina, Saitun ei jadi teman si nggit kepate ras mediate nandangi teman-temanna sesama Saitun, ntah pe jadi teman si nggit berbagi pengalamen nandangi generasi si lebih nguda. Alu bage tangkas kap kal si ipadanken Jesus man ajar-ajar-Na, “Sikeleng-kelengenlah kam” (ay. 18).
4. PERTOTON
O Tuhan Dibata., bapa kami sini surga. Bujur isehken kami man baNdu, erkitekenNdu AnakNdu si Tonggal e me Yesus Kristus jadi teman kami si enggo cawir metua enda. O Tuhan Yesus, teman kami i bas masa tua kami, sampati kel kami gelah sanga lit denga gegeh kami iberekenNdu, banci denga kami jadi pasu-pasu man kalak si deban, terlebih jadi teman si keleng-kelengen sapi-sapih kami si enggo metua enda. O Kesah si Badia, demi kam tetap pusuh kami, gelah tetap igejapken kami penemani Tuhan Yesus seh ngayak sidik kami. Amin.
5. METODE PA: DISKUSI
- Kai-kai saja keistimewaan sekalak teman adi ibandingken ras sekalak juak-juak arah pengogenta sendah?
- Turiken i bas dampar si apai saja Saitun enggo jadi teman si mehuli man kalak sideban!
- Kai si jadi tekadndu adi kam igelari teman Dibata?
Kata-kata mutiara:
“Ada yang mengukur hidup mereka dari hari dan tahun, yang lain dengan denyut jantung, gairah, dan air mata; tetapi ukuran sejati di bawah matahari adalah, “Apa yang telah aku lakukan dalam hidup ini untuk orang lain” (Confusius)
I Bulan Julu isuan tomat
Lawes ku tiga nukur gurami
Adi erkalimbubu arus mehamat
Eranak beru arus kita metami