(Kesadaran diri Mamre terhadap diri sendiri)
Teks : 1 Korinti 6:19-20
Tema : MULIAKEN DIBATA ARAH KULANDU
Tujun : Gelah Mamre:
- Meteh maka kula e me Rumah Pertoton si arus ijaga ras irawat.
- Ngasup ras erkomitmen guna njaga kesehaten, sabab kula e me Rumah Pertoton.
Metode : Diskusi
19 Atau tidak tahukah kamu, bahwa tubuhmu adalah bait Roh Kudus yang diam di dalam kamu, Roh Kudus yang kamu peroleh dari Allah, – dan bahwa kamu bukan milik kamu sendiri?
20 Sebab kamu telah dibeli dan harganya telah lunas dibayar: Karena itu muliakanlah Allah dengan tubuhmu!
- KATA PENARUH
Kula e me sada pemere Dibata si sangat istimewa man manusia. Itepa i bas taneh nari, iembusken Tuhan kesah kegeluhen seh maka manusia nggeluh. Berbeda ras tinepa si deban, si labo ibereken Dibata kesahNa. Manusia ngenca si itepa sentudu ras tempas Dibata. Alu fakta enda, manusia (kula ras tendina) ijadiken Dibata guna ndahiken peranna I bas doni enda, “ngusahai ras njagaisa” (Kej. 2:15). Kerina tinepa Dibata e tetap terjaga mehuli (Kej. 1:31), termasuk kula manusia. Alu bage teridah kemuliaan Dibata arah tinepaNa e.
Guna nehi peranta selaku Mamre, gelah arah kulanta banci kita mpermuliaken Dibata, mari kita erlajar arah bahan PA Mamrenta sendah! Kegeluhenta si enggo itetapken Tuhan pitu puluh, adi megegeh seh waluh puluh tahun enda (Msm. 90:10), gelah banci min mpermuliaken Tuhan.
- URAIAN TEKS/ TAFSIREN
Surat 1 Korinti enda isuratken rasul Paulus guna ngelayasi erbage persoalen si turah i bas perpulungen Korinti. Perpulungen enda pantek arah pelayanen rasul Paulus ras temanna sekitar sepulu waluh bulan dekahna (Perb. 18:1-17). Bagi informasi si banci ioge kita, Korinti e me sada kota pusat budaya Helenis ras Asia Barat. Nterem pendudukna si seh kal bayakna, kesenian berkembang maju, si teridah arah ukiren/patung ntah pe desain bangunen si berseni tinggi ras mejile. Ilmu pengetahun pe berkembang maju. Melala agama-agama turah ras ipraktekken i bas kota enda. Ingan olah raga ras kompetisi olah raga si terkenal lit i jenda ras si debanna. Anem bage gia, lit pendapat si ngataken, “Kota Korintus menjadi kota yang angkuh secara intelek, kaya secara materi dan bejat secara moral. Segala macam dosa merajalela di kota ini yang terkenal karena perbuatan cabul dan hawa nafsunya” (Alkitab Penuntun Hidup Berkelimpahan, hlm. 1877).
Kegeluhen ras moralitas penduduk kota Korinti tentu saja ikut mewarnai cara pandang kalak Kristen kerna pengajaren kata Dibata (Berita si Meriah) si isehken rasul Paulus. Mungkin jadi perkatan rasul Paulus, “Bebas kap aku ngelakken kai pe” (ay. 12, bnd. 2 Kor. 3:17), isalah pahami oleh sebagin perpulungen. Lit si erpengakap maka erlua-lua termasuk perbahanen si banci ilakoken ngawan perpulungen. Desken man guna nambari melihe, bage me erlua-lua guna nambari sura-sura
daging (hasrat seksualitas).
Guna mpepinter pemahamen si salah i bas perpulungen Korinti, Paulus ngingetken maka kebebasen kalak Kristen ibatasi ku bas perbahanen-perbahanen si mehuli ngenca. “Labo tuhu maka kula manusia guna erlagu la mehuli, tapi guna Tuhan, janah Tuhan guna kula” (ay. 13). Pangan ras beltek terbatas. Sada masa denggo lesapken Tuhan kerina. E maka pangan e, gia perlu bas geluhta, tapi labo penting kal, sabab seh me paksana manusia lanai perlu pangan, i bas kegeluhen si rasa lalap. Adi erlua-lua beda ras pangan. Erlua-lua labo sue ras peraten Tuhan. Sabab kula ijadiken Tuhan jadi bagin kula Kristus, “La kin ietehndu maka kulandu e me ring-ring Kristus” (ay. 15). Manusia si enggo itepa as itebusi Tuhan i bas dosana nari, njadiken ia sikerajangen Kristus ras nggeluh guna Kristus. E maka kula e enggo jadi ingan Kesah si Badia (ay. 19). Kula enggo jadi alat guna nehken peraten Tuhan. Erlua-lua enggo ertentangen ras sura-sura Tuhan, larangen pe-7-ken I bas Sepuluh Pedah Dibata. Kalak si ngelakokensa ia lanai jadi sekerajangen Tuhan ras la dat bagin i bas Kinirajan Dibata (1 Kor.6:11).
Selaku kalak si enggo itepa sentudu ras tempas Tuhan, ras selaku kalak si enggo itebusi Tuhan Jesus alu meherga kal e me dareh Jesus, lanai patut kalak si tek makeken kulana guna hal-hal si la mehuli, termasuk erlua-lua. Kegeluhen manusia aruslah mpermuliaken Dibata bas kerina dampar geluhna. “Muliakenlah Dibata arah kulandu!” (ay, 20).
- APLIKASI
I bas perkembangen jaman ras teknologi, enggo melala pemeteh (ilmu, science) ras fasilitas si mengarahken manusia gelah nggeluh sehat, baik bersifat preventif (pencegahan), kuratif (pengobatan) ras rehabilitatif (operasi). Alu kemajun pemeteh ras teknologi, oratna min kegeluhen manusia reh sehatna. Faktana, tetap denga nterem jelma si sakit. Engkai maka enda jadi? Salah sada kemungkinenna, pemahamen si salah, bagi kai si jadi i perpulungen Korinti. Misalna, lit ungkapen Karo nina: “Bagi menci rani” Istilah enda nuriken maka lit kalak si man (makan) asa besurna sanga lit, tapi enggo lumben tupung la lit. Ertina, la mampu njaga keseimbangen ras konsistensi i bas man ntah ngaturken geluhna. Istilah si deban, “Adi ban buahna maka penggel, penggellah ia”. Enda iumpamaken man kalak si ngikutken sura-surana, perkara arah pudi. Ras melala denga istilah si debanna. Tentu pengangkan si salah irangguti (berimplikasi) ku praktek kegeluhen si salah. Pengangkan si salah e me si erbahan kalak la mediate nandangi kesehaten kulana: Ngisap (merokok) si lanai terkendali, pola makan si la sehat, waktu istirahat si lanai mencukupi (rusur begadang) ras si debanna. Enda kerina tentu ncedai kula, si kedungenna erbahan kita sakit ras jadi beban man keluarga, gereja ras negara. Ertina, ola min si legi pinakitta alu la mperdiateken kulanta. Perlu si renungken nina Steve Job, “Saat kamu masuk ruang operasi, kan baru sadar bahwa kesehatan itu betapa berharganya.
Selaku kalak si tek man Tuhan Jesus, arus si pahami maka kulanta e meherga. Kita enggo itepa Tuhan sentudu ras tempasNa. Kita enggo itebusi alu dareh Jesus. Kita enggo si kerajangen Tuhan. Kita enggo jadi ringring Kristus. E maka, kita arusna nggeluh guna ndalanken dahin-dahin si ngena ate Tuhan. Kulanta e arus si jaga kesehatenna ras arus si pakeken guna hal-hal si mehuli (bnd. Kol. 3:17, 23). Alu bage, arah kulanta e termulia Tuhan.
- DISKUSI
- Arah palas bahan PA Mamrenta, uga nge kita make kulanta gelah termulia Dibata?
- Sedekah enda, apai nge si cenderung mendorong kita njaga kesehatenta: Kinitekenta (malang man Tuhan) ntah alasen praktis (mbiar mesui, mbiar ndarat sen, rsd)?
- USULEN LAGU
- KEE GBKP No. 317:1-2
- KEE GBKP No. 334:1-2
- KEE GBKP No. 381:1-2
- KEE GBKP No. 182:1-2
Pdt. Arapen Peranginangin, MTh
HP. 0813 6212 0955