(Kesadaran tentang lingkungan: Kreativitas merawat lingkungan)
Teks : Jesaya 43:18-21
Tema : MPEPALER LAU MAN SINURSURTA
Tujun : Gelah Mamre:
- Ngidah uga ulina ras pentingna lau si itepa Dibata guna keperlun kerina tinepa
- Mpekena-kena lau tetap lit ras bersih erguna man sinursur
Metode : Diskusi
43:18 firman-Nya: “Janganlah ingat-ingat hal-hal yang dahulu, dan janganlah perhatikan hal-hal yang dari zaman purbakala! 43:19 Lihat, Aku hendak membuat sesuatu yang baru, yang sekarang sudah tumbuh, belumkah kamu mengetahuinya? Ya, Aku hendak membuat jalan di padang gurun dan sungai-sungai di padang belantara. 43:20 Binatang hutan akan memuliakan Aku, serigala dan burung unta, sebab Aku telah membuat air memancar di padang gurun dan sungai-sungai di padang belantara, untuk memberi minum umat pilihan-Ku; 43:21 umat yang telah Kubentuk bagi-Ku akan memberitakan kemasyhuran-Ku.”
- KATA PENARUH
I bas kegeluhenta tep-tep wari, umumna lit dua hal si erbahanca tumpat kal ukurta, pemena e me mate listrik (pemadamen listrik) janah sipeduaken e me mate lau (la erdalan lau). Adi isuruh kita milih, asangken la erdalan lau kuakap madin siakap mate listrik, sebab adi kune erdalan denga lah lau melala hal si banci silakoken, misalna ridi, nuci, nangger teh, niram bunga, erdakan, rsd. Tapi, gundari kegeluhenta i doni enda iderpa persoalen krisis lau. I bas doni inganta nggeluh gundari enda banci sinen uga lau jadi barang si meherga gundari enda. Adi kune, la erdalan lau ntah lego si cukup ndekah terpaksa kita nukur lau. Melala konflik ras persoalen antar masyarakat, perusahaan, erkiteken kepentingen nandangi lau. Lau lanai jadi barang gratis gundari enda. Menurut Bank Dunia, lebih sada miliar jelma i doni enda mesera kel akapna ndatken lau bersih, janah lebih sada miliar jelma i doni enda sakit erkiteken nginem, make lau si enggo tercemar limbah zat kimia, rsd.’ Itepa Dibata doni enda alu mehuli. rikut ras lau maler i bas doni enda, tapi melala kepeken kecedan jadi i bas doni enda seh maka turah erbage-bage kiniseran. E maka i bas minggu enda ateta guna ngidah uga peran dingen tanggungjabab Mamre guna njagai tinepa Dibata, gelah lau maler e tetap banci iwarisken guna kiniulin kegeluhen sinursurta ras kerina doni enda i bas wari-wari si reh enda.
2. URAIAN TEKS/ TAFSIREN:
Kitab Jesaya e me kitab profetik ntahpe kitab si nuriken/menyuarakan suara kenabian man bangsa Israel. Kitab enda terbagi i bas dua bagin mbelin. Pasal 1-39 e me bagin si pemena (proto Jesaya) si nuriken kerna dosa ras kejahaten bangsa lsrael bagepe nubuat kerna penghukumen/ pembuangen si nandangi jadi man bangsa Israel Pasal 40-66 e me bagin peduaken (Deutero Jesaya) si nuriken kerna nubuat kebebasen, pengarapen, bagepe pemulihen sI nandangi ilakoken Dibata man bangsana.
Bagin perikop si jadi bahan oratentai bas minggu enda e me bagin deutero Jesaya si nuriken kerna pengarapen maka Dibata mulahi bangsa Israel i bas pembuangen i Babel nari dingen Dibata nikapken masa depan si mbaru si dem alu kiniulin man bangsaNa. Gambaren kerna Israel i bas pasal enda e me lanai gambaren selaku terhukum, tapi gambaren kerna anak si ikelengi dingen ialemi salahna.
Dibata ndilo bangsaNa guna lanai nginget si enggo ndekah jadi, kerna kejadin si nai-nai. Kejadin si ndekah, si nai-nai enda e me pengalamen bangsa Israel tupung ndarat i Mesir nari ibabai Musa. Paksa sie, bangsa Israel erdalan i bas dalan i tengah lawit, tentera Mesir reh guna ngayak bangsa e, tapi kerina tentera e ras gereta perangna kernep itelen lau e.
Gundari, Dibata nikapken sada pengalamen si mbaru man bangsaNa guna mulih, pulah i bas pembuangen i Babel nari. Pemulihen Israel enda ikuti sada pembaharuan alam si njamini kegeluhen bangsa Israel banci sikap ras mehuli. Adi nai, tupung bangsa Israel erdalan I taneh mesawang tuhu melala perbeben ras kiniseran si inanamina. Misalna saja, dalan si mesera ras la tentu arah i bas gurun pasir, termasuk uga serana ndatken lau inemen i bas taneh mesawang e. Tapi gundari perdalanen si mbaru si sikapken Dibata seh kel ulina, isikapken Dibata pasar i bas gurun pasir e janah lau belin maler i bas gurun pasir e. Erkiteken sie bangsa pilihen Dibata la kekurangen lau guna kegeluhena, bagepe la terjeng manusia, tapi rubia-rubia si meliar bagepe biang kerangen ras perik unta pe ermeriah ukur ras mpehaga Dibata erkiteken litna lau si njaga kegeluhen kerina tinepa.
Perikop i datas nuduhken maka Dibata enggo njadiken lau guna kiniulin kerina tinepa i doni enda. Lau e me kebutuhen kerina tinepa, janah Dibata ersura-sura maka arah litna lau si maler keseimbangen alam tinepa Dibata enda banci terjaga alu mehuli (harmonis). Lau e la terjeng sikerajangen manusia, tapi pe rubia-rubia, batang kayu, ras kerina sinuan-sinuan si turah guna banci nggeluh alu mehuli. Ertina, lau e ibere Dibata secara adil man kerina tinepa.
I bas teologi Kristen, lau e me simbol kegeluhen ras keselamaten. Kita iperidiken alu lau, tanda kita enggo ikut i bas kematen ras kekeken Tuhan Jesus Kristus. Mujizat pertama Tuhan Jesus pe berkenaan ras lau, e me sanga isalihken Jesus lau jadi anggur i bas sada kerja perjabun i Kuta Kana. Janah si mbelinna, Jesus nuriken maka IA me ulu lau kegeluhen, ise si nginem lau e lanai muas seh rasa lalap sebab lau si bereken Jesus e, e me kegeluhen situhu-tuhu. Alu dasar pemahamen enda ibabai kita guna njagai kegeluhen doni enda, khususna i bas make bagepe mpekena-kena lau si lit i sekelewetta sebagai bentuk tanggung jawab kinitekenta man doni enda.
3. APLIKASI
Sada ungkapen ngataken “jangan wariskan air mata bagi anak cucu kita, tapi wariskanlah mata air bagi anak cucu kita.” Ungkapen enda mpersingeti kita maka kai silakoken kita gundari menentuken kegeluhen sinursurta pagi. I bas minngu enda Mamre iajuk guna ngkelengi ras njagai doni enda, khususna lau ras ulu-ulu lau guna masa depan anak kempunta pagin. Ertina, kegeluhenta genduari la terjeng keperlunta jine tapi pe arus ngukurken paksa-paksa si nandangi reh. Bayangken, sada paksa pagi erkiteken lanai lit lau bersih si banci ipakeken, lanai banci erdahin, rsd erkiteken lanai lit lau bersih si banci ipakeken, tuhu-tuhu e jadi sada hal si mengeriken.
Salah sada persoalen si perlu sibenahi guna nikapken lau maler man sinursurta e me caranta nggeluh (gaya hidupta). Caranta nggeluh (gaya hidupta) e me ulu persoalen krisis lau i bas doni enda gundari. Sebagian besar gaya hidupta lanai ertanggung jawab nandangi kegeluhen i sekelewetta. Kerangen ras batang kayu itabahi, pemaken pupuk, pestisida, zat kimia alu la erngadi-ngadi si mencemari lingkungen, sampah plastik dem i sekelewetta, pemborosen pemaken lau. E maka selaku kalak si erkiniteken, selaku Bapa si merdiate dingen ertanggung jawab, tentu njagai lau i bas doni enda jadi sada tanggung jawabta man Dibata, sebab di kune lau lanai lit erkiteken pengkebet manusia, kegeluhen kerina tinepa i doni enda lit i bas kiniseran si mbelin, janah ulihna tentu kiniseran ka man kerina sinursurta. Kai si banci silakoken? Melala hal banci silakoken, janah kerina e ibenaken i bas dirinta, jabunta, sektorta, runggunta. Misalna saja memulai geraken hemat make lau (make lau alu secukupna), ula pediat lit kran lau tah pipa si ceda si erbahanca lau terbuang sia-sia, Mamre aktif ngelakoken program nuan batang kayu, ngkurangi pemaken plastik ras zat-zat kimia berbahaya, erbahan pengolahan limbah, bank sampah, ras cara-cara kreatif si deban gelah tuhu-tuhu kegeluhen doni enda ras kerina isina mulihi harmonis, seimbang, bagi tantangna itepa Dibata doni enda.
4. DISKUSI
- Oge ulihi kejadin 43: 19-20, kai nge sura-sura Dibata mpepaler lau i bas gurun pasir e?
- Cuba turiken kai-kai saja nge si banci ilakoken Mamre subuk i bas jabu, perpulungen, ras masyarakat guna njagai dingen mpekena-kena lau dingen ulu lau i bas kegeluhenta?
Usulan Lagu
- KEE GBKP No. 372: 1-2
- KEE GBKP No. 354: 1-2
- KEE GBKP No. 262: 1-2
- KEE GBKP No. 343: 1- (Pers.)
Pdt. Ebeneser Karo Sekali
HP. 0812 2371 8778