(Okuli)
Ogen : 2 Korinti 4:16
Tema : Ola Lesek Atendu
Tujun : Gelah Saitun
- Tetap ertedeh ate guna mpelimbarui pertendinna guna ndatken kemenangen.
- Tetap semangat ras ngataken bujur (la lesek atena) amin pe melala perubahen ibas daging kulana.
4:16 Sebab itu kami tidak tawar hati, tetapi meskipun manusia lahiriah kami semakin merosot, namun manusia batiniah kami dibaharui dari sehari ke sehari.
- BENA KATA.
Ibas kegeluhen manusia melala kal sierbahanca meriah ukur, tapi la ka kurang sierbahnca lesek ate. Emaka lesek ate ras meriah ukur pegancih-gancih reh ibas kegeluhen enda. Reh ganjangna umur reh Buena pengalamen, reh buena pengalamen keriahen ras pengalamen lesek ate. Kai kin “lesek ate” (ibas Bahasa Indonesia ikatakenna alu istilah ‘tawar hati’). Erbage-bage pengangkan kerna lesek ate, umpamana lanai lit sura-sura, pasrah, la ersemangat, lanai erdiate, mbergeh pusuhna, lanai lit pengarapenna. Ise pe banci ngenanami situasi sibagenda rupana, sabab manusiawi ras wajar kal. Tapi adi pusuh sibagenda ipediat janah tetap lit, maka akibatna ncedai ku kesehaten bage pe ku kinitekenta, bage pe lit pengaruhna ku kalak sideban si lit isekelewetta.
Emaka mari kita erlajar arah nasehat Rasul Paulus kerna “lesek ate”.
2. MPEBAGESI OGEN.
2 Korinti 4:16, nina: “Enda me sababna maka la kami erleja-leja dingen la lesek ate kami. Aminna pe kula kami enda reh burukna reh dekahna, tapi ukur kami tep-tep wari ipelimbarui” Ayat enda isina eme kata nasehat ras persinget man perpulungen i kota Korinti. Kegeluhen perpulungen bali ras kegeluhen Rasul Paulus, emaka iajuk Rasul Paulus gelahna mín perpulungen e rukur ras nehken perbahanen bagi Rasul Paulus. Emaka kata “KAMI” banci iganti alu kata “KITA”.
Lesek ate (tawar hati) banci erbahanca kita kebenen hal-hal simehuli, kesempaten simehuli, pasu-pasu ibas Dibata nari. Bagi Abrabam tupung ikataken Dibata man bana kerna kejahaten manusia si lit i kota Sodom ras Gomora, ibas percakapenna lit tawar menawar gelahna min e la ikernepken. Mulai ibas 100, 50, seh ku 10, La pasrah Abraham. Bage pe Sarai. tupung ipadanken Dibata man bana maka i bas tahun si reh ipupusna sekalak anak, tawa Sarah, la itulakna kata e, la ia merawa megi padan e, tapi meriah ukurna. Emaka jadi padan ibas geluhna.
Lesek ate ibas pusuh banci ngganggu perdalanen kegeluhen si positip, sabab kalak si lesek atena, bene semangat geluhna. Carana rukur kerna dirina jine, kalak sideban, termasuk perukurenna kerna Tuhan pe negatip. Kai pe itarikna rusur ku dirina, la erdiate nandangi sekelewetna, janah la erdiate nandangi dirina. Nina Rasul Paulus “…Ia kami erleja-leja dingen la lasek ate Kami. Aminna pe kula kami enda reh burukna reh dekahna, tapi ukur kami tep-tep wari ipelimbarui”
Salah sada sierbahanca lesek ate eme kap ‘kulanta reh burukna’ Sabab ibas kula si reh burukna teridah ibas kulanta eme reh ringutna, reh mejinna, mesui tiwen, murah masuk angin, mesui awak, mesui takal, la tahan mbergeh, lanai ngasup gawah-gawah, enggo melala pantangen ras sidebanna. Tapi ibas sie pe nina Rasul Paulus la lesek atena, tapi ukurna pe tep-tep wari ipelimbarui. Perukuren sibagenda me siiarapken Rasul Paulus lit ibas perpulungen e janah nasehat enda pe sehku kita genduari.
3. PENGKENAINA
Kai sijadi ibas kulanta genduari, banci saja jadi alasen man banta gelah lesek ateta. Tapi nen dingen pergermetkenlah maka Dibata enggo nampati kita alu gegeh Na guna ngalakenca. Gegehta e gelarna ‘KINITEKEN’. Ingetlah bagi kai sikataken Rasul Paulus: “Kerna percuban si reh man bandu e, bali nge biakna ras percuban si biasa… Iabo pelepasNa kam icubai ngelebihi asa gegehndu…” (1 Korinti 10:13).
Megegeh kula la jadi jaminen megegeh kiniteken. Erkiteken sie maka Rasul Paulus ngataken rahasia, kunci gegeh ibas dirina, la lesek atena aminna pe kulana reh burukna. La aru atena aminna pe kulana reh burukna, sabab kinitekenna, pertendinna tetap ipelimbarui arah gegeh Tuhan.
Kata situhu-suhu enda banci jadi kunci gegeh man kerina kalak guna ngalaken situasi kula si reh dekahna reh burukna, erdandanken pinakit, nggo kurang jilena, lanai megegeh ras sidebanna, seh maka lit kebiaren, aru ate, lesek ate.
Erdandanken sie maka perlu kal kita tutus er-Dibata, mpebelin kiniteken, ngelebihi asa perukuren sinatap ku situasi daging kulanta. Hukum alam la banci ilawan, ija gegeh daging kulanta, kinijilenta, kesehatenta pasti reh urakna reh dekahna. Tapi tek kita nandangi PadanNa arah KataNa, maka ibas Perkuah AteNa si Mbelin, ibahanNa gegeh kinitekenta reh warina reh gegehna seh ibas sada paksa pagi kita ngadap man baNa kenca kulanta sirehna ibas abu taneh enda mulihken ku taneh. Emaka ula lesek ate, tetaplah ngataken bujur man Tuhan aminna pe daging kulanta enggo berubah. Pebelinlah gegeh sirehna ibas Tuhan nari, sitetap ipelimbarui ibas geluhta.
4. PERTOTON
Bujur Tuhan, sabab enggo ibereken Ndu man kami umur si gedang seh Saitun. Ajari kami gelah tetap ngataken bujur ras ermeriah ukur aminna daging kula kami reh burukna. Pegegehi kiniteken kami ngasup kami makeken gegeh si lit denga ibas kami, gelah geluh kami tetap erguna. Amin
5. DISKUSI
1. Oge alu ras-ras 3 kali ogenta ndai eme 2 Korinti 4:16, renungken she 2 menit. Turiken uga penggejapenndu kenca ngoge ayat end!
2. Kai tekadndu siatendu ibahanndu gelah reh paguhna kinitekenndu. Turikenlah!
Kata Mutiara:
Ubahlah hidup anda hari ini. Jangan berspekulasi
di masa depan, bertindaklah sekarang tanpa penundaan
Suan markisah itepi jumanta
Melala buahna minter idayaken
Ula si tadingken adat ras budayanta
Selaku kita kalak si erkiniteken