Konfesi GBKP tentang Lingkungan dan Keputusan Gereja
(Kalpataru)
Teks : Kejadin 1:31; Masmur 24:1-2
Tema : TUHU-TUHU MEHULI
Tujun : Gelah Mamre:
- Meteh maka Tuhan njadiken doni enda tuhu-tuhu mehuli
- Meteh maka GBKP erdahin njagai doni gelah tetap mehuli
Metode :Diskusi
Kej 1:31 Maka Allah melihat segala yang dijadikan-Nya itu, sungguh amat baik. Jadilah petang dan jadilah pagi, itulah hari keenam.
Maz 24:1 Mazmur Daud. Tuhanlah yang empunya bumi serta segala isinya, dan dunia serta yang diam di dalamnya.
Maz 24:2 Sebab Dialah yang mendasarkannya di atas lautan dan menegakkannya di atas sungai-sungai.
- KATA PENARUH
Dari kesempurnaan mengalirlah kesempurnaan, dari kuasa jadilah yang indah, dari kasih bermaknalah segalanya. Dibata si isembah kita si ndube enggo i sembah Abraham, Isak ras Jakub e me Dibata si kuh (sempurna), dem kuasa ras kekelengen (kasih). Erdandanken si e ulih pendahinNa tuhu-tuhu kuh, mejile ras mbelin kal ertina. I bas ndahiken dahinNa, Dibata njadiken manusia jadi aronNa. I bas Kejadin 1:27-28 isingetken: E maka ijadiken Dibata manusia, si sentudu ras tempasNa; dilaki ras diberu ijadikenNa. Ipasu-pasu Dibata manusia ndal, niNa, “Ertuahlah kam jadi nterem, demi dingen taluken doni enda, kuasai kerina nurung, perik-perik i awang-awang, bage pe kerina rubia-rubia I daraten.Tangkas maka Dibata njadiken manusia sentudu ras tempasNa e me guna ngkuasai tinepaNa si deban. Ngkuasal i bas erti makeken, njaga ras nerusken kerina tinepa Dibata. Enda me orat geluh manusia i bas doni enda.
- URAIAN TEKS/TAFSIREN
Kata “tuhu-tuhu mehull” e me kata penutup tep-tep Dibata dung nepa doni enda ras isina i bas wari pemena seh wari peenemken. E maka lit 6 (enam) kali tersurat kata tuhu-tuhu mehuli i bas kitab kejadin bindu 1 (ayat 3, 10, 12, 18, 25 ras 31). Tuhu-tuhu mehuli (Ind. Sungguh amat baik, Ibrani. tôb m’öd), tupung Tuhan mperdiateken kerinana (lengkap) ulih perbahanenNa (karya) nepa langit, doni ras kerina isina, icidahkenNa maka tuhu-tuhu meriah ukurna ras puas. Kerinana sijadikenNa bas doni enda, menaken kin bintang simbelinna seh dukut si kitikna mpereh keriahen ukur man Dibata.
Tuhu-tuhu mehúli ertina lengkap, kuh (sempurna), mejile ras ratur Emaka ikataken Dibata si nepa langit, doni ras kerina isina e me Dibata si mbelin kuasa (mejin). Erdandanken itepaNa doni enda ras isina i bas lalit nari jadi lit. Perbahanen sibagenda Dibata ngenca ngasup ngelakokenca
- Lengkap, kuh e maka tinepa Dibata lalit sada pe kurangna guna kiniulin, kiniraturen ras keseimbangen doni enda.
- Mejile (indah), e maka doni enda seh jilena man tatapen dingen jadi ingan tading si mehuli sinuan-sinuan, rubia-rubia ras manusia. Guna keperlun geluhna pe kerina cukup.
- Ratur, kerina pas i bas inganna e maka kerina erguna dingen saling ngkuhi.
Pengakun kerna TUHAN kap simada doni ras isina kerina, TUHAN kap si mada pertibi ras si nggeluh i je ibelasken Daud i bas masmurna. Tole pe ibelaskenna ipajekkenNa palasna i bas lawit si mbagesna, IpantekiNa i babo lau si mbages si lit i teruh doni. Masmur e me ende-enden si isina banci pujin, pengataken bujur, pemindon, pengakun, tekad ras sidebanna. Rende e me bentuk ekspresif arah terdi manusia si icidahken i bas kata-kata siisusun radu ras melodi si mbentuk ende-enden. Erkiteken si e pengakun Daud reh i bas pusuh si mbagesna nari. Sinuriken maka pengakun enda tuhu dingen perlu niakapna i peseh man jelma si enterem.
Pengakun pemasmur enda mpertegas maka Dibata kap si nepa doni enda ras kerina isina. Dingen la terjeng i tepaNa saja tapi ipajekkenNa palasna i bas lawit si mbages, ipantekiNa i babo lau si mbages (Cataten, endam mungkin si erbahanca maka megati linur (gempa) tektonik pusatna i dasar laut). Perkatan enda nuriken maka Dibata njadiken doni enda alu palas si enteguh. E maka kai pe labo banci si ngugursa seyakatan Dibata ngenca (bandingken ras Konfesi GBKP kerna tinepa poin 1: Tinepa Dibata e me kerina si nasa lit: langit ras doni bagepe kerina isina, subuk si teridah bagepe si la teridah (Kej. 1-2; Mas. 24:1-2; 89:12: Jes. 27:5; Kol 1:16). Kerina tinepa e seh kai ulina (Kej. 1:31) ras dolat Dibata teridan I bas mula-mulana seh pendungi i bas merentah, njagai ras maba kerina tinepaNa alu keleng ate si la erkeri-kerin ras kebujuren (Mas. 145:9:146:6)).
- APLIKASI
Tema Penelahen Alkitab (PA) Mamre GBKP paksa enda e me “tuhu-tuhu mehuli”. Tema enda nuriken maka kerina tinepa Dibata tuhu-tuhu mehuli. Erkiteken si e kita manusia selaku aron Dibata guna njagai kerina tinepa Dibata arus muat bagin alu aktif. Bagi nina salah poin i bas Konfesi GBKP: Tinepa Dibata e me sada kiniersadan si kuh sinibereken Dibata man manusia selaku teman Dibata sada aron guna nguasai: ngusahai, mpekena-kena ras makeken tinepa gelah tetap kuh (Kej. 1:28; 2:15). Erdandanken si e gerejanta pe tetap erbahan program njaga dingen pekena-kena lingkungen. Enggo terbukti i bas 6 Juni 1985 GBKP erkelangken Parpem GBKP enggo ngaloken Kalpataru. Kalpataru enda ialoken erdandanken GBKP enggo muat bagin njaga lingkungen khususna i bas kerina program ula ncedai lingkungen umpamana i bas pembangunen pembangkit listrik tenaga air (PLTA) Si melala ibangun Parpem i kuta-kuta.
Secara khusus i bas tahun 2022, sasaren pelayanen GBKP e me Kreatif Merawat Lingkungan. Arah sasaren pelayanen GBKP enda nuate ngawan ni perpulungen GBKP reh ngasupna encibalken dirina ersada tinepa Dibata si deban, ngawan perpulungen enggo ngasup njaga tinepa Dibata gelah tetap mehuli dingen si enggo ceda banci mulihi mehuli.
Rikutken bahan PA Mamre paksa enda iarapken Mamre jadi njagai kiniersadanna nandangi tinepa Dibata si deban. E maka si jadi tanda Mamre tuhu-tuhu ersada dingen la banci sirang ras kerina tinepa Dibata maka Mamre ikut jadi pelopor Konfesi GBKP kerna njagai lingkungan hidup bagepe mengkampanyekan jagai doni gelah tetap mehuli.
- DISKUSI:
- Oge mulihi Kejadin 1:31. Payo nge niakapndu perkatan e? Turiken alasenndu.
- Bahanlah program Mamre i bas sektor ntah runggun, s ilakoken i bas bulan Maret enda jadi tanda Mamre ikut njaga ras mpekena-kena doni enda. Umpamana mpekena taman Rumah Pertoton, gotong royang. Jenari usulken pe man Pengurus Mamre Runggun erbahan sada spanduk isina kerna jagai doni gelah tetap mehuli.
- USULEN LAGU
- KEE GBKP No. 1:1-2
- KEE GBKP No, 262:1-2
- KEE GBKP No. 306:1-2
- KEE GBKP No. 263:1-2
Pdt. Christopher Sinulingga, M.Th
HP. 0813 7629 1768