(Pandangan PB: Apa kata PB tentang lingkungan dan Tokoh PR tentang lingkungan)
Teka : Kolose 1:15-20
Tema : KERINA ITEPA ARAH KRISTUS
Tujun : Gelah Mamre:
- Meteh maka Dibata nepa doni enda quna kemulian Kristus
- Meteh tanggungjabap kinitekenna lako njagai tinepa Dibata
Metode : Diskusi
Keutamaan Kristus
1:15 Ia adalah gambar Allah yang tidak kelihatan, yang sulung, lebih utama dari segala yang diciptakan, 1:16 karena di dalam Dialah telah diciptakan segala sesuatu, yang ada di sorga dan yang ada di bumi, yang kelihatan dan yang tidak kelihatan, baik singgasana, maupun kerajaan, baik pemerintah, maupun penguasa; segala sesuatu diciptakan oleh Dia dan untuk Dia. 1:17 Ia ada terlebih dahulu dari segala sesuatu dan segala sesuatu ada di dalam Dia. 1:18 Ialah kepala tubuh, yaitu jemaat. Ialah yang sulung, yang pertama bangkit dari antara orang mati, sehingga Ia yang lebih utama dalam segala sesuatu. 1:19 Karena seluruh kepenuhan Allah berkenan diam di dalam Dia, 1:20 dan oleh Dialah Ia memperdamaikan segala sesuatu dengan diri-Nya, baik yang ada di bumi, maupun yang ada di sorga, sesudah Ia mengadakan pendamaian oleh darah salib Kristus.
1. KATA PENARUH
Doni ras kerina isina tinepa Dibata kap. Tinepa si encidahken kuga belinna kuasa ras kemulian Dibata selaku si nepasa. Em dalanna maka kerina si lit bas doni enda arus encidahken kuasa ras kemulian Dibata si mbelin e. Aminna pe i bas kinata si genduari enda megati lanai teridah kemulian Dibata e arah tinepa si lit e. Sabab lit nge tinepa e enggo ceda, erkite-kiteken perbahanen si ilakoken kalak si la ertanggungjabab. Si ndube melala kiniulin banci teridah arah kerina tinepa Dibata e, genduari megati enggo urak dingen tempa bene pe. Banjir bandang, longsor ras bencana-bencana alam si deban tempa-tempa nuduhken maka alam enda jadi sada kebiaren man manusia. Si kin arusna labo bage. Sebab pertibi enda jadi dalan manusia ngidah pendahin Dibata si mbelin e. Seh maka ngasup pe ia nurikensa man kerina jelma si langa tek man Dibata.
2. URAIAN TEKS/ TAFSIREN
Paulus mpeseh suratna enda man perpulungen Kolose lako mpetandaken Kristus. Tangkas kal ituriken Paulus maka Kristus me kap rupa Dibata si teridah. Kata rupa Dibata si teridah nuriken ras mpetangkas pemahamen si sedekah enda lit i bas kalak Jahudi. Sabap i bas pemahamen kalak Jahudi, Dibata e la teridah, lit i bas ingan si labo terjangkau manusia (Transenden). Kehadiren Kristus ku bas doni enda nuduhken maka Dibata e pe banci inehen manusia i bas rupa si teridah. Janah rupa si teridah e emekap Jesus Kristus. Ertina maka arah Jesus Kristus teptep jelma banci ngidah Dibata si mbelin e. Jesus emekap Dibata si la teridah e.
Jenari kata rupa (gambar) nuriken maka lit sada kesatuan antara Jesus ras Dibata. Ertina maka Jesus Kristus labo terpisahken ras Dibata Jesus Kristus emekap representasi ras manifestasi Dibata i bas doni enda. Rupa Dibata i bas Kristus nuduhken sada fungsi si mbelin si icidahken Jesus man doni enda. E maka rupa enda ngertikan maka dolat Dibata lit i bas Jesus Kristus. Kerina si ilakoken Jesus Kristus e me perbahanen Dibata. Erkiteken labo terpisahken Dibata ras Jesus Kristus. Teptep kekelengen si isehken Kristus man doni enda kekelengen Dibata kap e. Bagem Paulus mpetangkas maka Kristus e mekap rupa Dibata si teridah e. Bagem Paulus nuriken sada pengangkan man jelma si nterem gelah reh tangkasna penandaina kerna Kristus. E maka hal si itekanken Paulus ije e me kiniteken manusia kempak Kristus. Pusat kiniteken manusia e me Kristus. Sabap Kristus e mekap Dibata si mada ras si nepa doni enda. Dibata si erkuasa nandangi kerina tinepa si lit bas doni enda. Bagem cara kalak si erkiniteken nandai Kristus i bas geluhna.
E maka hal si penting si ituriken Paulus emekap: “kerina sinasa lit ijadiken Dibata arah Kristus guna Kristus” (ay. 16b). Ungkapen Paulus enda mpetangkas kerna posisi Jesus i bas kerina tinepa e. Jesus labo bagin i bas tinepa e. Tapi Jesus emekap subjek sinepa e. Proses penciptaan la terlepas I bas Jesus Kristus erkiteken kerina si itepa e jadi i bas Kristus. Penciptaan enda pe labo ilakoken terjeng i bas Kristus saja ngenca, tapi arah Kristus. Ras kerina tujun kerina itepa e e me guna Kristus. Alu bage tangkas kedungenna maka pusat penciptaan enda e me guna Kristus. E maka kerina tinepa e pe arus ka nge tunduk man Kristus. Ras perbahanen si ilakoken manusia pe arus perbahanen si mehuli nandangi kerina tinepa Dibata e. Sebab ibereken Dibata man manusia sada tanggungjabab guna njagai ras ngusahai kerina tinepa e (Kej. 1:26-28). Janah mandat si ibereken Dibata e arus ilakoken manusia arus ertanggungjabab secara kiniteken.
Jenari ipetangkas Paulus pe maka tinepa enda enggo iperdameken bas Jesus Kristus. Enda nurikensa maka labo hanya terjeng manusia si erdame ras Dibata. Tinepa si deban pe enggo iperdameken ras Dibata arah Jesus kristus. Pengorbanen Jesus i kayu persilang labo hanya guna kiniulin manusia, tapi ikut pe kerina tinepa ndatken keterkelinen i bas Dibata nari. Si ndube kerina iukum Dibata erkiteken dosa si ilakoken manusia, kedungenna mulih kempak Dibata erkiteken Jesus Kristus enggo mereken diriNa guna kiniulin kerina tinepa e. I bas Jesus kap kerina tinepa e ipersada, Jadi kiniersadan tinepa e teridah guna kemulian Dibata. Janah keberlangsungen tinepa Dibata e teridah i bas Jesus Kristus. Jadi i bas Kristus kerina tinepa e ijaga, ikawali bagepe ipelihara. E maka kalak si erkiniteken pe ertanggungjabab lako njagai kiniulin tinepa Dibata e sebage bagin tanggungjabab kinitekenna man Dibata.
3. APLIKASI:
Kerina tinepa enda erkawiten sada ras si debanna. Lalit sada pe i bas si itepa Dibata banci ndalanken kegeluhenna sisada. Kerina tinepa e saling membutuhken sada ras si debanna. Umpamana: sinuan-sinuan perlu nge ia matawari, lau ras si debanna. Rubia-rubia ras asuh-asuhen perlu nge ia sinuan-sinuan jadi panganna. Bagepe manusia perlu nge ia sinuan-sinuan ras asuh-asuhen guna geluhna. Bagem hubungen i bas kerina tinepa Dibata e. E maka kerina nge ertanggungjabab lako njagai kiniulin tinepa Dibata e. Janah tergejap min man Mamre, i bas tanggungjababna lako ngusahai ras njagai kerina tinepa e jadi bagin tanggungjabab kiniteken man bana. Ertina maka la banci mekarus dingen rate-ate i bas makeken tinepa Dibata e. Si ingetlah maka sie kerina ipertanggungjababken man Dibata. Tentu adi bage, perbahanenta pe nandangi kerina tinepa Dibata e banci reh ulina. Sebab kiniulin tinepa e me rupa kiniulin Dibata. E maka adi mehuli perukurenta man DIbata, tentu teridah ka min arah kiniulin perbahanenta nandangi kerina tinepaNa.
4. DISKUSI
- Turikenlah pengertinta maka kerina sinasa lit ijadiken Dibata arah Kristus guna Kristus (Bnd. Ay. 16).
- Suratken dingen lakoken perbahanen-perbahanen si banci ilakoken Mamre tanda keleng ate Mamre kerina tinepa Dibata e. Secara khusus i bas lingkungen sekitar gereja.
5. USULEN LAGU
- KEE GBKP NO. 61:1,3
- KEE GBKP NO. 298:1-3
- KEE GBKP NO. 343:1,2
- KEE GBKP NO. 381:1-3
Pdt. Dicky A. Bangun, M.In
HP. 0812 6323 1231