[Minggu Sexagesimal)
Ogen : Titus 2:6
Tema : Jadi Usihen Ibas perbahanen si mehuli
Tujun : Saitun:
- Reh tambahna pengangkan ras penggejapen Saitun kuga belinna tanggungjabab ibas ngajari, nehken dahin simehuli, ketutusen, ngerana alu payo, amin pe enggo Saitun
- Nuriken pengalamenna jadi usihen ibas perbahanen semehuli gelah Saitun sideban pe ngasup ngelakokensa.
2:6 Demikian juga orang-orang muda; nasihatilah mereka supaya mereka menguasai diri dalam segala hal
- BENA KATA
Biasana ibas kalak enggo metua lit pengarapen kalak sienterem banci min jadi usihen entah pengajaren si mehuli man anak kempuna bage pe kalak si lit isekelewetna. Apaika adi orangtua e marenda lit sekolahna, entah lit ertana, bage pe enggo metua tetap ia sehat, mis pindo kalak ia ngajari pe mere kata-kata ajar (pedah) Bagenda me pengarapen Rasul Paulus man Titus, gelah ipersingetina kalak si tading I Pulau Kreta kerna pengajaren si tuhu-tuhu man kerina masyarakat, subuk man kalak enggo metua, nguda denga bagepe budak.
2. URALAN TEKS
Titus eme sekalak sinampati Rasul Paulus ibas meritaken Berita Simeriah (Injil), ia labo kalak Jahudi. Itadingken Rasul Paulus ia i kuta Kreta guna nerusken pelayanen man anak kuta e si ibas paksa e terberita jahat. Emaka perlu kal isehken pengajaren si payo alu tutus ras tegas man anak kuta e. terlebih-lebih man kalak si enggo metua, banci min jadi usihen.
Man dilaki si enggo metua ikataken gelah: jore min ukurna, mehuli min lagu langkahna dingen ngasup min ngkuasai diri, bage pe tuhu sehat kinitekenna, erkeleng ate dingen megenggeng
Man diberu si enggo metua ikataken gelah: bersih min lagu langkahna, ula percikurak, ula nagih minem anggur (sabab banci erbahan mabuk), ngasup ngajarken simehuli khususna man diberu diberu si nguda denga gelah keleng atena jabuna, ngasup ngelai ras ngkelengi perbulangenna, beluh ia ngurus anak itengah jabuna, mereken simehuli man keluargana.
Ayat 6: Titus pe i suruh mperdiateken anak-anak singuda gelah ngasup ngkuasai diri, sabab ibas kegeluhen anak singuda, mekatep turah biak mesunah mberontak, merawa, la gedang perukurenna, adi la pas iakapna mis ia murkas. Titus isuruh mereken kata ajar entah pe persinget man anak singuda, gelahna min biak-biak si la mehuli ibas anak-anak singuda banci min salih jadi mehuli.
Ayat 7: Ibas ayat enda ipersingeti man Titus gelah selaku pengajar, labo terjeng ngajarken entah pe ngerana ngenca, tapi pe banci jadi usihen ibas simehuli, ibas ketutusen nggeluh. Sabab lit penungkunen, uga maka sekalak pemimpin entah pe si mehamat, tapi la lit si man usihen ibas geluhna? lbas sienda tentu perlu kal kita rukur kerna geluhta si arus jadi usihen. Bagi nina kata-kata bijak “Lebih baik 1 perbuatan baik yang bisa menjadi contoh daripada 1000 kata-kata”.
Ayat 8: sekalak pengajar arus pentar, ula asal ngerana, asal merawa. Adi ngajar arus pake kata-kata si payo, si la banci ipandang kalak. Ibas ngajar arus ilumbaken maka lalit si salah, lalit si man pandangen. Sabab isekelewetta melala imbang-imbang si ndarami kesalahen ras kekurangenta. Arah e nari me ibahan imbang-imbang e jadi senjata guna ngelawan ras ndabuhken kerina kalak si jadi pengajar. Kalak si jadi pengajar bali ras lampu sitamaken i datas uruk, kerina kalak banci ngidahsa. Emaka ija pa pe ras katawari pe arus megermet ras metenget Emaka ise pe si atena mandang entah ndabuhken kita, mela iakapna.
3. PENGKENAINA
Adi ikataken enggo Saitun, tentu enggo metua entah pe enggo ndatken umur si gedang. Ibas umur si gedang, enggo melala pengalamen subuk si bagi ukur entah pe lang Emaka situhuna, ibas melalana pengalamen e, mbelin pengarapen kalak sideban gelahna banci min Saitun jadi singajari ras jadi usihen man anak singuda. Umpamana man Moria, Mamre, Permata ras anak KAKR bage pe teman sapih-sapih Saitun. Pengalamen geluh banci jadi bahan pengajaren, subuk keberhasilen bage pe kegagalen.
Marilah si pake kesempatan si ibereken Tuhan man banta, siukuri engkai maka ipegedang Dibata umurta? Pastilah lit maksud Tuhan, salah sada eme, jadi singajari. Ngajar arah pengerana, cara rukur ras perbahanen. Sicidahken contoh man anak kempunta njaga pusuhta, njaga emosi, ula pergelut, ula murah merawa. uga ngalaken persoalen ras sidebanna. Si cidahken usihen kerna kegeluhen sierkemalangen man Dibata, tutus ibas kai pe, ertanggungjabab, lagu langkah pe simehuli.
Bagenda me belinna tanggungjabab ibas ngajari, nehken dahin simehuli, ketutusen, ngerana alu payo amin pe engo Saitun. Emaka ibas nehken tanggungjabab sibagenda rupana erbahanca Saitun sideban pe ngasup ngaloken ras ngelakokenca
4. PERTOTON
O Tuhan ulu pemeteh kami, sampati-Ndulah kami guna makeken kesempatan si lit gelah banci jadi usihen si mehuli man turang senina, anak-anak ras kempu bagepe sangkep geluh kami. Ngajari anak-anak ras kempu kami erbahana si mehuli ras rukur simehuli kerinana guna kemulian gelarNdu, Amin.
5. DISKUSI
Saitun ibagi ibas kelompok, tep-tep kelompok 3 – 5 kalak.
- Ogelah Titus 2:7, turiken pelajaren kai siidatndu arah ayat enda.
- Turiken pengalamenndu jadi usihen ras erbah an si mehuli ibas kegeluhen sitep-tep wari, lit nge kendalana?
Kata-kata bijak:
Hargai dia yang membenci kamu, karena dia adalah
penggemar yang telah menghabiskan waktunya
hanya untuk melihat setiap kesalahanmu
Adi tengah berngi mata pe madat
lawes ku tiga inangkihi lanta
Adi ersaksi si pakeken adat
Terpuji gelar Dibata malem ka ateta