KINITEKEN RAS PENGARAPEN SIPAGUH
(Nilai Alkitab tidak pernah berubah)
TUJUN: Gelah Moria:
- Meteh maka kiniteken man Kristus si ngerembakken kita man Dibata.
- Nulisken kesaksianna i bas erkiniteken man Kristus.
METODE PA: Diskusi
Filipi 3: 7- 11
3:7 Tetapi apa yang dahulu merupakan keuntungan bagiku, sekarang kuanggap rugi karena Kristus.
3:8 Malahan segala sesuatu kuanggap rugi, karena pengenalan akan Kristus Yesus, Tuhanku, lebih mulia dari pada semuanya. Oleh karena Dialah aku telah melepaskan semuanya itu dan menganggapnya sampah, supaya aku memperoleh Kristus,
3:9 dan berada dalam Dia bukan dengan kebenaranku sendiri karena mentaati hukum Taurat, melainkan dengan kebenaran karena kepercayaan kepada Kristus, yaitu kebenaran yang Allah anugerahkan berdasarkan kepercayaan.
3:10 Yang kukehendaki ialah mengenal Dia dan kuasa kebangkitan-Nya dan persekutuan dalam penderitaan-Nya, di mana aku menjadi serupa dengan Dia dalam kematian-Nya,
3:11 supaya aku akhirnya beroleh kebangkitan dari antara orang mati.3:7 Tapi kerina si nai kuakap untung, genduari kinirugin kuakap erkiteken Kristus.
3:8 Labo kerna si e saja, tapi kai pe kinirugin kuakap rimbangken si meherga e, e me penandai kerna Jesus Kristus Tuhanku. Erkiteken Kristus, enggo kuambekken kerinana, janah kupedirep si e kerina sampah-sampah, gelah banci kudat Kristus dingen.
3:9 Tuhu-tuhu ersada aku ras IA. Lanai bo kuusahaken ngerembakken diringku man Dibata arah ndalanken Undang-undang. Tapi aku enggo rembak ras Dibata arah kinitekenku man Kristus. Dibata jine si enggo ngerembakken aku kempak diriNa erkiteken kinitekenku.
3:10 Sada ngenca sura-surangku e me gelah kutandai Kristus dingen kugejap kuasa kekekenNa janah ikut aku ngenanami kiniseranNa, dingen bali ras IA i bas kematenNa,
3:11 alu pengarapen maka aku ipekeke Dibata i bas si mate nari ku kegeluhen.
Kata Penaruh.
Lit ungkapen ngatakensa perubahan adalah keniscayaan, ertina la lit si gel- gel. Apai ka i bas era kemajun teknologi enda, perubahan menam jadi i bas teptep dampar kegeluhen manusia. Subuk i bas sosial, budaya, ekonomi, pendidiken, fashion, kebiasen geluh seh pe cara eribadahta. Jelma si gundari merhat meteh erbage si mbaru. Lenga pe ndekahsa ipetandaken si mbaru, enggo merhat ka si terbarun. Janah la pernah cukup. Enda me si jadi keriahen i bas jaman enda. Jaman i ja tingkat persaingen nggeluh reh belinna ras kebenaren pe lanai ‘mutlak’ sifatna. Payo akapndu lenga tentu payo kuakap, janah enda sah-sah saja. Uga dage i bas dampar kiniteken ras pengarapenta man Dibata? Arus kin epe berubah? Ntah enggo berubah? Mari dage si pebagesi i bas PA Morianta sendah erpalasken Pilipi 3:7-11.
Mpebagesi Pengangkan Kerna Ogen.
Surat Paulus man jemaat i Pilipi eme surat si ituliskenna i bas penjara nari, seri ras suratna man perpulungen i Epesus, Kolose bagepe man Pilemon. Aminna pe i bas penjara Paulus tetap ngataken bujur ras notoken perpulungen e. lajukna pe perpulungen e gelah tetap i bas kinitekenna ras pang ngaloken kiniseran i bas Kristus. Sabap i bas Kristus reh dewasana me kinitekenta. Kerina banci sambar tapi kiniteken ula kal bene. Enda me si ituriken Paulus i bas Pilipi 3:7-11 si jadi ogenta sendah. Mari dage si gargari ras-ras:
- Nai Untung, Gundari Kinirugin (ay.7)
Enda me si belasken Paulus menaken ayat 7. Ikatakenna maka “kerina si nai si kuakap untung, genduari kinirugin kuakap erkiteken Kristus.” Ngkai maka sempat bage? Kai kin si ilakokenna nai? Si eteh ras-ras maka ope nandai Kristus, Paulus si igelari Saulus eme sekalak si ngayak-ngayak kalak Kristen. Ia kalak Jahudi si patuh man Undang-Undang agamana bagi enterem kalak Jahudi si debanna. Janah ilakokenna me si jadi keuntungen/perayaken i bas pengangkan si e, eme ndalanken adat-adat si teridah, umpamana: ia enggo isunatken asum umur 8 wari, tubuh selaku kalak Israel, suku Benyamin, kalak Heber asli, ndalanken Undang-Undang, ras sekalak Parisi (ay.5). Perban tutusna atena ndalanken Undang-Undang e, igasgasina pe pengikut Jesus. Emaka, bicara lit sekalak jelma banci rembak ras Dibata arah ndalanken Undang-Undang, ia me si labo pernah ersalah (ay.6). Kerina enda igelari Paulus keuntungen paksa si nai si erbahansa ia ndatken status sosial/keduduken si mbelin i tengah-tengah kalak Jahudi, terpandang, ihamati kalak ras ijadiken usihen. Labo saja Paulus, kalak Jahudi si deban pe merhat bagi Paulus enda. Saja ngenca perlu i catat, Paulus pe maka ayakina kalak Kristen erkiteken lenga itandaina Kristus. Kenca itandaina Kristus, lit perubahen kiniteken si mbelin man bana, emaka nina dungna ngerana, kerina si kuanggap untung nai, kinirugin kuakap kerina gundari. - Keuntungen si tuhuna (ay. 8-9).
Kenca ngaloken Kristus, jadime perubahen si mbelin i bas kiniteken Paulus. Sadar ia maka si nai si untung iakapna kerina sia-sia janah kinirugin man bana. Emaka labo ia sinik saja, tapi iambekkenna kerinana, janah ipedirepna si e kerina sampah-sampah, gelah banci idatna Kristus e (ay.8). Dingen tuhu-tuhu ersada ia ras. Emaka labo nari arah ndalanken Undang- Undang ia ngerembakken diri ras Dibata tapi arah kinitekenna man Kristus. Janah Dibata jine si ngerembakken ia kempak DiriNa erkiteken kinitekenna (ay. 9). Enda me keuntungen si tuhuna. Keuntungen si gundari. - Sura-Sura Si Mbaru (ay. 10-11)
I bas pengujungna seh me Paulus ku sada pengangkan si mbaru. Kai nari kin si belinen asangken penandai kerna Kristus? Lit denga kin belinen asa si e? Jabapenna lanai bo lit. Adi bage, sada nari ngenca sura-surana eme gelah nandai Kristus dingen nggejap kuasa kekekenNa janah ikut ngenanami kiniseranNa dingen bali ras IA i bas kematenNa (ay. 10). Alu pengarapen si mbelin maka ipekeke Dibata i bas si mate nari ku kegeluhen (ay.11). Enda sura-sura si mbaru. Janah enda me sabapna Paulus nadingken kai si iakapna ndube untung, sabap kerina e i darat Kristus; status sosial, kehamaten, terpandang ras sidebanna la lit ertina ibandingken nandai Kristus alu payo. Enda me si igelari erkiniteken man Dibata. Aminna melala si banci salih, tapi kiniteken man Dibata ola kal sempat bene, sabap la lit belinen asa si e.
Pengkenaina.
Enggo si eteh maka i bas era kemajun teknologi enda, menam kerina dampar geluhta lit perubahenna. Labo saja kebiasan-kebiasan si ndekah tapi si mbaru reh pe enggo ipelimbarui ka. Aminna pe perubahen e sada kepastin, tapi labo kerina hal arus berubah ras banci berubah. Lit sada lagu anak sekolah minggu ngatakansa, “Tuhan Yesus Tidak Berubah, Tidak Berubah, Tidak berubah selama-lamanya” e ngatakensa maka Dibata e bagi si gel-gel denga, tapi labo ngataken Kristus e tidak up to date. Perlu i catat, maka kerina si berubah berarti lenga sempurna, tapi Kristus enggo kap sempurna/kuh ras lanai perlu ipelimbarui. Termasuk pe Pustaka Si Badia. Adi pemeteh la keri-kerin tapi Pustaka Si Badia enggo cukup. Sabap biak surga la bali ras biak doni. Biak surga mereken kegeluhen si tuhu-tuhu tapi adi biak doni eme kepuasen si kentisik ngenca. Emaka adi taren ngayaki biak doni si tadingken biak surga, kita me si liahna i doni enda. Erlajarlah i bas Paulus nari, ia enggo ngambengken biak doni enda desken sampah sabap tehna la lit ergana sie kerina adi i bandingken ras nandai Kristus alu payo. Emaka sempat ibelaskenna, kerina si kuakap untung nai, kinirugin kuakap gundari. Mari si tanemken prinsip Paulus enda i bas pusuhta ras man isi jabunta. Si penting si la banci la lit i bas isi jabunta eme erkiniteken ras erpengarapen man Dibata alu payo. Sabap e maba kegeluhen jabunta ku kegeluhen si tuhu-tuhu. Inget, “Daramilah lebe kinirajan Dibata, maka kerina itambahkеn man banta.” Enda me palas kegeluhenta si tuhu-tuhu. Emaka, aminna pe melala sura-suranta i bas doni enda, tapi kiniteken ras pengarapenta man Dibata ula kal bene. Gelah seisi jabunta tetap ngeluh.
Diskusi:
- Kai nge si ianggap Paulus keuntungen nai tapi genduari kinirugin!
- Daftarken biak-biak doni si sedekah enda si ayaki i bas kegeluhenta?
- Turiken kesaksianta i bas erkiniteken ras erpengarapen man Kristus!
Pdt. S. Jonathan Meliala, M.Th
“Kerina Banci Salih,
Tapi Kiriteken ras Pengarapenta Man Dibata,
Ula Kal Bene”
Inget ras ersikaplah….minggu si reh kita nonton bareng