Bahan PJJ 31 Oktober – 06 November 2021

KERINA ERDAHIN
(GOTONG ROYONG)

(Garis-Garis Besar Pelayanen GBKP)

Keluaran 17: 10 – 16

17:10 Lalu Yosua melakukan seperti yang dikatakan Musa kepadanya dan berperang melawan orang Amalek; tetapi Musa, Harun dan Hur telah naik ke puncak bukit.
17:11 Dan terjadilah, apabila Musa mengangkat tangannya, lebih kuatlah Israel, tetapi apabila ia menurunkan tangannya, lebih kuatlah Amalek.
17:12 Maka penatlah tangan Musa, sebab itu mereka mengambil sebuah batu, diletakkanlah di bawahnya, supaya ia duduk di atasnya; Harun dan Hur menopang kedua belah tangannya, seorang di sisi yang satu, seorang di sisi yang lain, sehingga tangannya tidak bergerak sampai matahari terbenam.
17:13 Demikianlah Yosua mengalahkan Amalek dan rakyatnya dengan mata pedang.
17:14 Kemudian berfirmanlah TUHAN kepada Musa: “Tuliskanlah semuanya ini dalam sebuah kitab sebagai tanda peringatan, dan ingatkanlah ke telinga Yosua, bahwa Aku akan menghapuskan sama sekali ingatan kepada Amalek dari kolong langit.”
17:15 Lalu Musa mendirikan sebuah mezbah dan menamainya: “Tuhanlah panji-panjiku!”
17:16 Ia berkata: “Tangan di atas panji-panji TUHAN! TUHAN berperang melawan Amalek turun-temurun.”

17:10 Ilakoken Josua bagi si iperentahken Musa man bana, e maka lawes ia ndarat erperang ngelawan bangsa Amalek, sedangken Musa, Harun ras Hur lawes ku datas uruk.
17:11 Adi iangkat Musa tanna ku datas, menang bangsa Israel, tapi adi ipesusurna tanna, bangsa Amalek mulai ka menang.
17:12 Kenca enggo latih iakap Musa natang tanna, ibaba Harun ras Hur batu man ingan Musa kundul. Ia duana tedis arah kawes ras kemuhenna ngangkat tan Musa; bage me ibahanna terus ngadi-ngadi ben.
17:13 Alu bage keri kal italuken Josua bangsa Amalek.
17:14 Kenca bage nina TUHAN man Musa, “Suratken lah turi-turin kemenangen enda gelah jadi peringet-ingeten. Kataken man Josua maka ateKu ngkeriken kerina bangsa Amalek.”
17:15 Ipajekken Musa sada batar-batar ingan persembahen janah ibahanna gelarna, “TUHAN kap Panji-panjingku.”
17:16 Nina, “Angkat meganjang-meganjang panji-panji TUHAN! TUHAN la banci lang terus erperang ngelawan bangsa Amalek seh rasa lalap.”

PERSIKAPEN

• Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
• Nikapken ingan persembahen ras pertoton syafaat
• Adi i bas sektor entah jabu kepkepen perdalanen PJJ ibabai Pt/Dk entah Pengurus Sektor entah sekalak si enggo aturken pengurus PJJ. Adi ilakoken i rumah iaturken bapa entah nande entah sekalak i bas jabu.
• Kerina perdalinenna rikutken situasi janah banci iubah (imodifikasi).
• Sope benaken PJJ banci kita rende Lagu KAKR

Rende “I bas Jesus Kita Ersenina” (iulih-ulihi 2-3 kali)

I bas Jesus, kita ersenina,
i bas Jesus, kita ersenina
I bas Jesus kita ersenina,
gundari seh rasa lalap
I bas Jesus, kita ersenina

RENDE KEE. 290 – “Labo Erkiteken Beluhku”

Labo erkiteken beluhku,
labo erkiteken pentarku
Tapi perbahan penampatNdu,
mbelin tergejap bas ngasupku

Labo erkiteken dahinku,
labo erkiteken pangkatku
Tapi perbahan perkuahNdu,
malem ateku tuhu-tuhu

ERTOTO (IBABAI SIMADA JABU/Bapa)

NGOGE KATA DIBATA: Keluaren 17: 10 – 16 (Iogeken anak itengah-tengah jabu)

RENUNGAN

Salah sada si arus isadari kalak Kristen i bas geluhna eme kerna pemere ras pengkawali Dibata man bana. Labo kepe ijadiken Dibata sekalak ntah pe dua kalak jelma si megegehna asangken kalak si deban. Tapi ipakeken Dibata kepeken kerina manusia i bas ndahiken dahin si enggo ibenakenNa ndube arah Jesus Kristus. Ertina maka labo kepe dahin e iberekenNa man kalak si tertentu saja ngenca. Tapi ibereken Dibata man teptep jelma pemere si erbage-bage gelahna banci alu ersada ia ndahiken dahin si iampeken Dibata man bana. Teridah i je maka Dibata njadiken manusia nggeluh ersada dingen saling membutuhken sada ras si debanna. La ijadikenna sekalak manusia si serta gelahna banci ndahiken dahin e. Tapi ibahanna manusia e lit kekurangenna, gelah kiniersadanna me si erbahansa ia serta bas kegeluhenna.

Penggejapen si bagenda me si kurang teridah i bas kinata kegeluhen si genduari enda. Perkembangen jaman enda banci erbanca manusia jadi kalak si nggeluh ntah pe rukur kerna dirina jine ngenca (individualis). Emaka megati enggo lit kalak si erbelas: ula ndarami page tutun. Cukup urus diri sendiri ras keluarga sendiri. Janah lit ka pe enggo turah pengangkan maka erkiniteken e pe urusen pribadi nge ras Dibata. Emaka masing-masing urus kinitekenna janah lit ka pe si erpengakap masing masing urus runggun (gerejana). Si enda me si perlu ipekena i bas kegeluhen kalak si erkiniteken. Sebab kiniteken tuhu urusen pribadi ras Dibata. Tapi ulih kiniteken e arus ka nge ituduhken man kalak si deban. Emaka kalak Kristen arus nge tetap turah biak sisampatsampaten (bdk. Gal. 6:2). Alu litna biak sisampat-sampaten e, tergejap me man bana keleng ate Kristus si enggo kin leben ialokenna i bas geluhna.

Pengalamen si bagenda me si igejapken Musa i bas geluhna tupung ia arus erperang ras bangsa Amalek. La terjeng tentera Israel saja ngenca si erperang e. Tapi ikut pe Musa ras dua kalak temanna eme si Harun ras Hur. Teluna ia nuduhken peranna masing-masing i bas nampati bangsa Israel naluken kalak Amalek e. Sabap adina iangkat Musa tanna kudatas maka menang bangsa Israel. Tapi adi ipesusurna tanna kuteruh, talu bangsa Israel (Kel. 17:11). Emaka kiniersadan Harun ras Hur ikut njaga gelahna Musa banci tetap megegeh ngangkat tanna. Emaka lanai bo inehen ije ise si paguhna ntah pe ise si megegehna. Tapi kerina muat bagin gelahna banci ndatken sada kemenangen. Tentu bage ka nge i bas kegeluhen si idalani kalak si erkiniteken. Kemenangen e lanai bo itentuken ise si megegehna ntah pe ise si la megegehna. Sabab banci jadi si la megegeh e ibahan Dibata jadi pemenang. Si penting ije kuga ia tetap setia ras tutus ndalanisa.

I bas perdalinen pelayanen gereja, ibereken Dibata pemereNa si erbage-bage man teptep jelma. Tujunna gelahna lit kiniersadan, kerjasama ntah pe “sinergisitas” i bas ndahiken dahin Dibata e. Jadi labo man serayan saja ngenca dahin e iendesken Dibata. Tapi man kerina jelma nge ibereken Dibata. Alu bage, aruslah lit kerjasama si mejile. Salah sada tradisi si enggo mengakar i bas kegeluhen manusia eme gotong royong. Ertina maka ras-ras ndahiken dahin e gelah banci dung. Tentu tradisi enda banci denga ilakoken i bas situasi si genduari. Budaya gotong royong enda arus terus ilakoken i bas tengah-tengah gereja. Guna mpeturahsa ras njagaisa, arus lit kesadaren i bas kalak si tek. Kesadaren e eme angkana maka ia meherga ras penting ilebe-lebe Dibata. Janah kalak si meteh maka ia meherga ras penting, pasti ertanggung jawab. Emaka perlu ituduhken kiniersadan ras sinergitas i bas perpulungen, serayan ras kepengurusen si deban. Gelahna kerina sepengodak sepengole i bas ndahiken dahin Dibata bas doni enda.

NURIKEN PENGGEJAPEN (ibabai Moderator)

• SIMADA JABU
• MAMRE
• SAITUN

IRAKUT PERTUA/DIAKEN/EMERITUS/PENDETA

AKSI

Bahanlah aksi bersama i bas jabu bage pe PJJ sektor guna mbersihken gereja ras lingkungen sekitarna. Jenari alu ersada arih lakoken ka pe aksi guna nampati kalak si medanggel geluhna subuk arah jabu bage pe PJJ sektor. Kegiaten enda ikoordinir Diaken sektor ras pengurus PJJnta.

MOMO (Pengurus PJJ entah jabu kepkepen)

RENDE KEE. 471 – “Ermengkah Ukurku”

Ermengkah ukurku, ras ngataken bujur Tuhan
Kelengi min aku, Kam empu geluhku
Enda ngenca Tuhan persembahenku,
kerina geluhku kesah ras kulangku,
La kap lit bas aku erta kebayaken,
si cukup meherga lah ku persembahken,
Sada ngenca Tuhan, lit pemindonku,
aloken min Tuhan persembahenku
Pakeken geluhku jadi perkakasNdu, segedang geluhku

PERTOTON SYAFAAT

• Notoken kegeluhen kiniteken, kesehaten bage pe pendahin perpulungen (ibabai Bapa/Mamre)
• Notoken perpulungen si kegeluhenna lit i bas kesusahen (ibabai Nande/Moria)
• Notoken pemerintah i bas bangsa ras negara Indonesia (ibabai Permata)
• Persembahen (ibabai KAKR)

RENDE KEE. 255 – “TALENTA”

Talenta si ni b’reken Dibatanta,
jadi min erlipat ganda
Tutus ateta ndahiken dahinNa,
amin pe mberat tapina ermulia

Reff: Kalak si malang nandangi Tuhan,
la kap nggit nimbak labo nggit nogan
Maka dahikenlah alu tutus,
ola lakoken alu mekarus

Ulihta lit kap bas Tuhan Dibata,
mulia rikut mehaga
Adi perkisat la kel lit gunana,
jelma mejingkat maka ngena ateNa

Reff: Kalak si malang nandangi Tuhan,
la kap nggit nimbak labo nggit nogan
Maka dahikenlah alu tutus,
ola lakoken alu mekarus

PERTOTON TUHAN (ibabai Bapa/Mamre)

JEDA RAS PENUTUP

Pdt. Dicky A. Bangun, M.Th.