“Ngergaken Perbahanen Nande”
“Ulang Tahun MORIA GBKP ke-64 Tahun (16 Oktober 1957-16 Oktober 2021)”
Gelah PERMATA GBKP:
- Nuriken perbahanen nande rikutken nas
- Ngergaken ras nehken keleng ate man Moria
Amsal 31: 26 – 31
31:26 Ia membuka mulutnya dengan hikmat, pengajaran yang lemah lembut ada di lidahnya.
31:27 Ia mengawasi segala perbuatan rumah tangganya, makanan kemalasan tidak dimakannya.
31:28 Anak-anaknya bangun, dan menyebutnya berbahagia, pula suaminya memuji dia:
31:29 Banyak wanita telah berbuat baik, tetapi kau melebihi mereka semua.
31:30 Kemolekan adalah bohong dan kecantikan adalah sia-sia, tetapi isteri yang takut akan TUHAN dipuji-puji.
31:31 Berilah kepadanya bagian dari hasil tangannya, biarlah perbuatannya memuji dia di pintu-pintu gerbang!31:26 Alu manjar-anjar ngerana ia, janah dem alu kepentaren.
31:27 Mejingkat ia, janah tetap iperdiateken keperlun jabuna.
31:28 Kerina anakna ngataken bujur man bana, dingen perbulangenna pe mujiken ia.
31:29 “Nterem diberu si mehuli,” nina perbulangenna, “tapi i babo si e kerina kam si mehulina.”
31:30 Rupa si mejile la terteki, dingen kinijilen bene me, tapi diberu si erkemalangen man TUHAN patut ndatken pujin.
31:31 Ergakenlah ulih bekas tanna, sabap ia diberu si patut ndatken kehamaten i japa pe!
I. BENA KATA
Lit rusur pernyataan si ngatakenca “nanam lit e la kap tempa terakap, nanam la lit e kepe maka tergejap/medanggel”. Pernyataan enda njemba kita guna makeken waktu ras kesempaten alu mehuli i bas ngkelengi kalak terdekat-ta, secara khusus orang tuanta (nande). Sabab ‘mekatep si terjadi asum nggeluh denga nandenta, banci jadi kurang siergal, kurang sikelengi, la sibegiken cakapna, rsd. Tapi kenca enggo lawes e tergejap kel bas kita, enggo lit si kurang, ternande-nande ateta rusur. Mulihi arah bahan PA-nta sekali enda sekaligus bas Ulang Tahun Moria GBKP pe64 ipersingeti kita uga luar biasana kehadiren nande inganta tunande.
II . ISI
Bahan PA-nta sekali enda merupakan bagin í bas sada perikop kerna ndehara si cerdik (TB-LAI Puji-pujian untuk istri yang cakap). Sada pengarapen sekalak nande nandangi anakna si dilaki eme Raja Lemuel (Kua. 31:1), gelah pentar ibas ndarami kemberahen. Nandena mpersingeti kerna figur ndehara si banci menghancurken perbulangen, maka i bas Kuan-kuanen 31:10, kerna pasu-pasu si idatken i bas jabu erkiteken ndehara si erkemalangen man Tuhan. Ibas ayat 10 ibenai alu kata maka labo murah ndatken nderaha si cerdik ija ndauh ergan asangken permata si erndilap. Jenari ibas ayat 11-27 icidahkеn kerina hal si mehuli si idalanken sekalak ndehara/nande enda; mehull perbahanenna, mejingkat subuk urusen rumah tangga ntah pe nampati guna uang tambahen keluarga. Labo terjeng je saja, ia pe kalak si melumbar mere, mehuli perbahanenna man kalak si kekurangen.
Janah secara khusus ibas ayat 26-31 ije ituriken maka i bas pengeranana pe iukurina lebe maka ibelaskenna. Manjar-anjar ia ngerana janah dem alu kepentaren. Ietehna kel maka arah ngerana banci mpegegehi, memotivasi, mereken kata ajar ras e la banci siempet-empet tapi arus manjar-anjar si penting seh kutujunna. Asangken merawa-rawa ras mejungut, enggo ka nande e latih mperdarat energi, la begiken anakna ndai cakapna. Enggo pasti labo gampang ngerana alu lemah lembut, apai ka adi mbue pergumulen keluarga. Tapi i bas si e enggo beluh langkuasai diri, tarik napas gedang biasana beligai 3x maka enggo ka banci ilepasken. Jenari manjar-anjar ia ngerana.
Mejingkat jelmana Urusen si utama eme kap penuhina kebutuhan keluarga. Medak erpagi-pagi ras melawen ka makana tunduh Mula urusan domestik seh ku urusen belanja, antar jemput anak sekolah, bimbingaa erlajar i rumah, negalar pajak, urusen mpesikap ledeng ntah atap rumah bocor e pe asa ngasup Ipesikapna Maka rusur ikataken peran sekalak nande e desken: manager man perbulangan ras anak-anakna, ia me dokter keluarga, chef keluarga, guru les anakna, perencana keuangen aminna pe labo lulusen akutansi, tukang serba bisa sebage contoh mpesikap peraboten rumah si ceda, masang lampu seh mpesikap kran air si bocor, designer interior, ras melala denga si deban Kerina kiniulin, tanggung jawab nande tuhu-uhu iapresiasi, iergai, ipujiken kerina anggota keluarga sideban. I ja ikataken Firman Tuhan, kerina anakna ngataken bujur man bana dingen perbulangenna mujiken ia. Ertina lit je sada bentuk penghargaan, kekelengan man nande sierbahanca mereken semangat tole man nande guna ndalanken tanggungjawabna, sabab tuhu perbahanenna la sia-sia. Bahkan perikop enda itutup alu kata “ergakenlah ulih bekas tanna sabab ia diberu si patut ndatken kehamaten ijapa pe (ay. 31).
III. PENGKENAINA
Adi si idah bahan perikopta banci kataken seh kel sempurna kehadiren sekalak nande i tengah-tengah jabu, tempa la lit kekurangenna Firman Tuhan sekali enda labo ngerana soal kesempurnaan sekalak nande ntah ndehara sabab labo lit manusia si sempurna. Sehebat-hebatna kalak pasti lit kekurangenna termasuk sekalak nande si man isi jabuna sangat luar biasa, pasti lit ka kekurangenna. Umumna si mejingat jelmana agak mejungut ka, lit ka mehuli jelmana, melumbar man ise pe tapi kurang ka beluhna erdakan. Ras melala denga contoh-contoh sideban si banci si idah sendiri i bas pribadi nandenta masing masing. Tapi paling tidak, Kata Dibata i bas wari enda ncidahken perbedaan diberu/ nande si erkemalangen man Tuhan ras si lang. Nande si ngutamaken kinijelen rupa ras nande si lebih ngutamaken Kinijilen pusuh (inner beauty).
Sikataken bujur man Tuhan, ibereken Tuhan nande si luar biasa man banta masingmasing (ntah lit PERMATA GBKP si nandena enggo leben lawes ku Tuhan, tapi paling tidak tetap denga si inget kiniulin nandeta ndube). Si jadi bahan refleksi (perenungen) genduari rusur nge siapresiasi, siergai perbahanen nande i tengah- tengah jabunta ntah kebalikenna. Pernah lit istilah bagenda ibelasken sekalak nande, “kutahanken melihe gelah banci man anak-anakku, kenca enggo aku metua, ku kurangi nakanku erkiteken pinakit gula.” Sideban ka, sekalak nande si enggo itadingken perbulangenna, banci ngepkep pitu kalak anak-anakna, tapi kenca enggo metua, 7 anak rikut permain ras kela enggo si dalih-dalihen ngkelengi nande ndai. Pernah ras rusur nge sikataken bujur man nandenta i bas kai sienggo bahanna man banta Sipes-pesi nge dagingna ras sitemani nge ia asum ia sakit? Siikutken nge katana nasehatna sebab e pasti si mehuli guna kita ras e bagin i bas kita ngergai ia? Adi lenga bo maksimal kekelengen ta man bana, pengerganta man bana, lit denga waktu ibereken Tuhan banta (si lit denga nandena). Bereken apresiasi/pujian, kekelengen asa patut idatken nandenta. Ula sempat erkadiola i bas pudi wari erkiteken kurang kita ngkelengi la. Secara organisasi, salut kita man Moria GBKP. Moria GBKP jadi tiang doa, nggit mpersingeti pemimpin gelah ndalanken pemerentahen bagi si ngena ate Dibata dingen guna kesejahteraan masyarakat Karo Tenda biru ingan kalak erjudi banci tutup erkiteken Moria GBKP, aron I daerah gugung tersampati, erkiteken geraken ras keperpihaken Moria GBKP nandangi aron diberu si mekatep imarginalkan, rsd melala gerakan Moria GBKP guna perubahan ku si mehuli. Selamat Ulang tahun Moria GBKP si pe 64-ken jadilah ingan tertande, tiang doa keluarga, jadilah pasu-pasu man si nterem.
IV. STUDI KASUS DAN DISKUSI
Nande Jingkat seh kel kelengna ras ertanggungjawab man empat kalak anakna kenca enggo itadingken perbulangenna (Bp. Jingkat idilo Dibata asum anak singuda kelas 3 SD). Dahin kai pe la ia mela ndahikenca (si bujur) gelah banci sekolah anak-anakna. Suanna jong, kopi, cina, kentang, ras sinuan si deban si menghasilken. I rumah bukana kedai kitik-kitik gelah ei pe nambahi guna kebutuhen keluargana. La pernah ia mengeluh Dahin gereja gereja pe ikutina, amin mbue ka bolong-bolongna erkiteken kesibukenna. Tetap dukungna dahin gereja secara khusus Moria. Malem kel atena, dua kalak anakna sintua ras nomor dua enggo erdahin i Jakarta. Si nomor telu SMA denga, ras singuda nandangi tamat SMP. Tapilit si jadi perbebenna, anak si dilaki si nomor telu, si tergelar Njulmit mesera man katanken, piga-piga kali ilebuh guru sekolahına erkiteken anakna enda rusur bolos ras terdat sangana ngisap i sekolah. Bahkan situhuna Njulmit enggo make narkoba. Sada persada barang i rumahna idayakenna. Nandena ras kakana enggo rusur mpersingetisa, tapi tetap la ibegiken Njulmit. Nina nandena sada paksa, “nakku, kita kalak mesera, kupalal-palai ngelakoken si e kerina gelah banci sukses kam kerina anakku, gelah ula nari meserasa rasa lalap geluhta. Robah kam nakku” “Cerewet kali pun Mamak ini”, nina ka Njulmit njawabsa. Sada paksa, sakit Nd. Jingkat, kepeken cukup mekelek ras arus irawat i RS Anak si nomor sada ras dua pe mulih ku kuta mindo ijin bas dahinna nari. Termasuk Njulmit pe i rumah sakit kenca enggo cukup latih kakana ras agina singuda ndaramisa. “Mamakta sakit mekelek” nina Ulin agina. “Nande, salah kel aku nina Njulimit asum seh i rumah sakit. “Robah aku nande, kubegiken katandu. tutus aku sekolah nde huhuhuh…amina Njulmit ngadung La ndekahsa berkat Nd. Jingkat lawes ngadap ku Tuhan. Pingsan Njulmit tupung itehna nandena ndal enggo berkat ku Tuhan.
DISKUSI:
- Kenca enggo ogendu studi kasus i datas, turiken pendapatndu. Adi kita lit bas posisi Nd. Jingkat, uga kira-kira perasaan Nd. Jingkat ngidah perbahanen si Njulmit?
- I bas rangka HUT Moria GBKP si-pe 64 ken, diskusiken ras daftarken perbahanen-perbahanen si mehuli ras konkrit (arus silakoken) man nandenta bage pe Moria GBKP. Rekam kerina perbahanen-perbahanen e bas video janah ipostingndu bas media sosial (IG, FB, WA, rsd).
V. USULEN LAGU
- KEE. 414 – “Ndiko Ulina Padan Tuhan E”
- Di Doa Ibuku Namaku Disebut
- Bahasa Cinta
- Kasih Pasti Lemah Lembut
Pdt. Larena br. Sinuhaji M. Th
