Ogen : Matius 19: 16 – 19
Tema : Perbahanen Si Mehuli.
Tujun : Gelah Mamre:
- Meteh kerna perbahanen si mehuli si arus ilakoken.
- Ncidahken perbahanen si mehuli i bas kegeluhenna.
19:16 Ada seorang datang kepada Yesus, dan berkata: “Guru, perbuatan baik apakah yang harus kuperbuat untuk memperoleh hidup yang kekal?” 19:17 Jawab Yesus: “Apakah sebabnya engkau bertanya kepada-Ku tentang apa yang baik? Hanya Satu yang baik. Tetapi jikalau engkau ingin masuk ke dalam hidup, turutilah segala perintah Allah.” 19:18 Kata orang itu kepada-Nya: “Perintah yang mana?” Kata Yesus: “Jangan membunuh, jangan berzinah, jangan mencuri, jangan mengucapkan saksi dusta, 19:19 hormatilah ayahmu dan ibumu dan kasihilah sesamamu manusia seperti dirimu sendiri.”
KATA PENARUH
Ibas kinata kegeluhen, umumna manusia ersura-sura ras berusaha erbahan si mehuli. Selaku Mamre pe kita idilo guna erbahan perbahanen si mehuli. Saja, i bas kita erbahan si mehuli e, kai nge palasna ras kai ka tujunta? Seri nge perayaken kalak Kristen ras si la Kristen i bas ndalanken perbahanen si mehuli enda? Mari kita erlajar arah bahan PA Mamrenta sendah!
URAIAN TEKS/TAFSIREN
I bas nats PA-nta, nuriken sekalak dilaki njumpai Jesus. Kalak enda nguda denga (ay. 20), ia bayak (ay. 22) ras sekalak pemimpin (Luk. 18:18). Alu kinata enda, arah sukat-sukat (ukuran) doni, dilaki enda ndai enggo menam kuh (sempurna): I bas ia lit harta, tahta ras wanita (istilah si rusur iakap ukuren kesuksesen sekalak dilaki). Janah kecibal kegeluhenna si bage la erbahan ia puas. Lit akapna si kurang, e me kerna kegeluhen si rasa lalap. E sababna idahina Jesus guna nungkun, “Perbahanen si mehuli si kuga nge arus ku bahan gelah aku dat kegeluhen si tuhu-tuhu si la erkeri- kerin? “Arah penungkunen enda banci iertiken, pengangkanna kerna keselamaten e seri ras pengangkan kalak Jahudi umumna, e me alu ndalanken perbahanen si mehuli, ntah pe ndalanken Undang-Undang Tuhan (bdk. Luk.18:9-14). Keselamaten e iakapna idatken arah usaha manusia.
Jesus njabab penungkunen anak perana e,..Ikutkenlah kerina pedah Dibata adi bengket atendu ku kegeluhen si tuhu-tuhu si la erkeri-kerin” (ay. 17), Dilaki e mindo penjelasen tole nari, “Pedah siapai kin?” E maka ituriken Jesus piga-piga bagin Sepuluh Pedah Dibata, si terkait ras hubungen ku sapih-sapih manusia, “Ola munuh, ola erlua-lua, ola nangko, ola ersaksi la tuhu, mehamat man nande ras bapandu, Kelengi teman manusia bagi ikelengindu dirindu” (ay.19). Rikut pengangkan anak perana e, enggo akapna kerina idalankenna, e maka nina, “Kerina e enggo kudalanken. Kai nari si kurang?” (ay. 20). Secara aturen (legal formal), banci jadi enggo idalankenna aturen-aturen agama. Umpamana, beribadah, nehken perpuluhen, erpuasa, labo ia erbahan kejahaten ras sidebanna. Secara umum banci jadi ia iakap kalak si mehuli.
Erjabab Jesus, “Adi atendu gelah kam serta, laweslah, dayaken kerina erta-ertandu, jenari bereken duitna man kalak musil, alu bage ialokenndu me erta Surga; je nari reh kam ngikutken Aku” (ay.21). Bage ikataken Jesus sebab ietehNa maka anak perana enda ndai tuhu-tuhu enggo itaban (terpenjara) ertana, si erbahan ia lupa erkeleng ate man orangtua ras teman sekelewetna. Aminna pe i bas aturen anak perana enda ndai enggo ndalanken 10 pedah Dibata, tapi arah uruten jabab Jesus,
“Mehamat man orangtua” (Pedah si pe-5-ken) ijadiken Jesus uruten akhir, banci saja kalak enda lanai erdiate man orangtuana. Umpamana penampat si arusna ibereken man orangtua, enggo jadikenna jadi persembahen, gelah idah kalak ia kalak si melumbar (dermawan). E maka lanai isampatina orangtuana e. Adi orangtuana pe labo diatena, uga ka ia banci erdiate man kalak sideban? Ras terbukti, megi jabab Jesus, gulut ukur anak perana e, itadingkenna Jesus.
Ise atena bengket ku bas kegeluhen si la erkeri-kerin (Kinirajan Surga), “…dayaken kerina erta-ertandu, je nari bereken duitna man kalak musi… je nari reh kam ngikutken Aku” (ay.21). Kata “kegeluhen si tuhu-tuhu si la erkeri-kerin” (ay. 16), bahasa aslina aionios‘, antusenna nggeluh bagi Dibata ntah pe jadi sekerajangen Dibata. Ciri khas Dibata si mulia eme ngkelengi, e maka ibereken Na anakNa si Tonggal. Alu e, si imaksudken kegeluhen si la erkeri-kerin e labo idat alu ndalanken aturen-aturen alu cermat ras ketat, tapi nggeluh alu perkuah ate ras erkeleng ate, seh ngasup erdiate ras erpemere man kalak sideban. Perbahanen si mehuli bukti ketetapen ukur (komitmen) ngikut Jesus. Erdiate man kalak musil, mehamat man orangtua, ola munuh, ola nangko, ola jadi saksi si la tuhu ras ngkelengi kalak sideban eme buah ngikut ras ngusih Jesus. Jadi, perbahanen si mehuli e labo gelah masuk Surga, tapi ulih (dampak, buak) ngikut Jesus.
APLIKASI
Arah penjelasen nats PA Mamrenta, lit piga-piga pokok perenungenta:
- Merhat ku Surga. Perlu kal i bas Mamre lit sura-sura si mbelin merhat ndatken kegeluhen si la erkeri-kerin (Surga) ras mbiar ku Neraka. Adi bene sura-sura si bage, maka kiniteken, perbahanenta si mehuli tujunna terjeng doni saja. Adi payo kin kita merhat ku Surga, arusna njemba kita guna nandai Tuhan ras ngikutken la (bdk. Ay. 21).
- Pemahamen si salah. Melala denga kalak Kristen si erpengakap, syarat a maka banci ku Surga e me alu perbahanen si mehuli: Ngikut aturen agama ntan e alu melala erbahan perbahanen si mehuli. Situhuna, man kalak Kristen, perbahanen si mehuli labo guna mpepulung ngaruh (pahala, kredit sorgawi) gelah banci masuk Surga, tapi perbahanen si mehuli e, e me buah (dampak) kalak si enggo ngaloken keselamaten i bas Jesus nari. Ertina, kiniteken man Tuhan mpeturah perbahanen si mehuli (moralitas, etika) nggeluh si mehuli.
- Tema: Perbahanen si mehuli. Kai perbahanen si mehuli e, e me kerina pedah Dibata. Maka ngasup kita ndalanken perbahanen si mehuli alu payo, aruslah sioge kata Dibata. Gelah si eteh kai sura-suraNa, kai perbahanen si mehuli i bas mata Dibata. Kenca enggo sieteh, e maka ngasup kita ndalankensa. Tuhan erpadan guna nemani ras mpengasup kita ndalankensa (bdk. Mat. 28:20b; Joh.15:5; Pil. 4:13). Seh min pengangkanta kerna perbahanen si mehuli e enggo “mendarah daging” Menjadi orat geluhta (karakter), bagi kalak si nampati kalak musil, tapi lanai ingetna e sada perbahanen si ibahanna guna Tuhan (bdk. Mat. 25:37-40).
DISKUSI
- Rikut bahan PA-nta senda, uga nge ikataken perbahanen si mehuli?
- Selaku Mamre (perbapan kalak si tek), kai nge arusna jadi palas i bas kita ndalanken perbahanen si mehuli?
USULEN ENDE ENDEN
- KEE GBKP No. 66:1-2= https://www.youtube.com/watch?v=qvKF1j44yyM
- KEE GBKP No. 62:1,5= https://www.youtube.com/watch?v=u7IG5Sa8WaM
- KEE GBKP No. 282:1- (Persembahen)= https://www.youtube.com/watch?v=7UJInVw2Fp4
- KEE GBKP No. 286:1,4= https://www.youtube.com/watch?v=8gqMxhxSIKI
Pdt. Arapen Peranginangin, MTh
(081362120955),
GBKP Rg. Sei Padang