HUT MORIA
Ogen : Kuan-kuanen 12:4, 18:22
Tema : Ndeharaku Kesangapenku
Tujun : Gelah Mamre
- Meteh maka ndehara e me kemulian ras kesangapen perbulangen
- Ngataken bujur man Tuhan ras ngergai ndehara (Moria) selaku pemere Tuhan
Amsal 12:4
12:4 Isteri yang cakap adalah mahkota suaminya, tetapi yang membuat malu adalah seperti penyakit yang membusukkan tulang suaminya.
Amsal 18:22
18:22 Siapa mendapat isteri, mendapat sesuatu yang baik, dan ia dikenan TUHAN.
KATA PENARUH
Kesangapen i bas masyarakat Karo jadi sada perayaken si mbelin. Emaka belas-belas ntah pe toto si megati ibelasken ‘sangap encari, sangap erjabu’. Kata sangap secara sederhana ertina beruntung, bangga, i bas ngelakoken ntahpe ndatken sada sada hal. Ngerana kerna kata sangap megati iperhadapken ku kata “liah’ si paksa genduari jarang ibelasken. Kuga relasi perbulangen ras ndehara i bas kegeluhen jabu. Duana nge nggejabken dingen ngenanami kesangapen kenca erjabu. Ntah piga tahun enggo kita erjabu ras ndeharanta, iarapken wari kuwari seh tahun tahun perjabun si ibentasi reh sangapna min siakap kita selaku perbulangen. Amin kegeluhen jabu la tersilahi i bas proses pengenalen sada ras sidebanna si megati ibumbui alu perubaten ras la siangkan sie kerina erbahansa kita lebih sitandan terbagesen.
URAIAN TEKS/TAFSIREN
Kitab Kuan-kuanen nehken ukur penulisna si mbages nuriken kerna kalak pentar ras lenge. Emaka persinget si isehkenna mabai singogesa meteh dingen ertimbang dalan siapai siatena ipilihna. Selain nuriken kerna kepentaren ras kebodohen ikut pe isehkenna kerna ulih milih ras ngelakoken persinget e. Pedah man anak singuda, kegeluhen erjabu, ermasyarakat bagepe hubungen ras kalak sideban, kerina e arus igeluhken alu pentar, adi lang sitik pe labo jadi kemalemen ate.
Ogen i bas PA enda e me dua ayat i bas kitab Kuan-kuanen si mabai Mamre ngidah kesangapen geluhna selaku dilaki, perbulangen i bas jabu.
- Kuan-kuanen 12:4, Tradisi masyarakat lbrani kuno, pengkebet sekalak ndehara bagepe anak-anak mbelin ngaruhna kubas reputasi ntah pe status perbulangen tengah masyarakat (bdk. Kuan 31:10-31). Masyarakat patriarkhi ngergai sekalak dilaki jadi peminpin i bas masyarakat. Kengasupen sekalak dilaki si jadi bapa ras perbulangen i bas jabu, kehaganna ras kesuksesenna dikune isi jabuna nggeluh alu ratur, mehamat, mehuli si nuriken maka kiniraturen ras kiniulin isi jabuna e tanda kengasupenna minpin ras mabai isi jabuna alu mehuli. Bagepe kesangapen sekalak dilaki selaku perbulangen ntah pe bapa teridah arah kegeluhen jabuna, kerina mehuli, kuh pasu-pasu ras kemalemen ate (bdk. Msm. 128).
- Kuan-kuanen 18:22, Isingetken ibas teks enda kalak si enggo ndatken ndehara ertina enggo erjabu, kalak si bage me sindatken kesangapen. Alu bage arah teks enda, dilaki si erjabu, enggo ialokenna teman si cocok ras ia, penampat siman tare-tarenna. la lanai dua tapi sada, i bas kiniteken ia ipersada Dibata jadi sada keluarga. i bas perjabun e sada kesangapen kepe sabab ialokenna sekalak diberu jadi ndeharana. Penulis kitab kuan-kuanen nuratken maka si erjabu, ndatken ndehara e tanda kesangapen dingen nuriken tanda-tanda kalak sikeleng ate Tuhan.
Arah duana teks enda mabai sekalak si enggo erjabu, si lit ndeharana arus me ngaku maka ia kalak si sangap. Tandana ia sangap arus ijagaina kai si enggo ibere Dibata man bana, e me sekalak ndehara. Tentuna kalak si ijagaina, kelengina, ergaina nge ndehara e maka tangkas igejabna keleng ate Dibata man bana ras isi jabuna. Sabab keleng ate i bas Dibata nari me si mpengasup perbulangen ras ndehara sikeleng-kelengen. Bagepe kesangapen si lit e tentuna inanami ras igejabken pekepar. Amin secara umum i bas Pustaka Si Badia ituriken maka dilaki me alamat kata ras kesangapen e. Tapi labo ndigan pe sembelah ngenca ngenanami ras nggejabken kesangapen ras keleng ate Dibata e, arus duana ngenanamisa. Sabab jabu e ibangun dua kalak e me sekalak dilaki jadi perbulangen dingen sekalak diberu jadi ndehara. Pasu-pasu, kedamen, kemalemen ate ntah pe kesangapen e sikerajangen jabu si ije la saja sekalak perbulangen ngenca ngenanamisa tapi rikut ndehara ras anak-anak.
APLIKASI
Selaku Mamre, pernah nge kita rukur kenca erjabu, jadi perbulangen, turah i bas ukur, sangap kal aku ndatken sekalak diberu sijadi ndeharandu paksa enda? Kalak singgejab sada kesangapen i bas ndatken ntah pe, memiliki sada sada hal, selain bangga pasti ijagana kal kesangapenna e. Tuhu-tuhu kal ngataken bujur i bas kai si enggo ialokenna. Enda sekalak ndehara si kin itepa Dibata jadi teman geluh, berbagi dingen radu ras ndalani, ngenanami kegeluhen siibere Dibata. i bas dampar sideban kegeluhen i bas jabu, perbulangen ras ndehara, arus pekepar nggejabken. Radu ras bahagia, ermeriah ukur janah jadi teman ndalani kegeluhen sue ras perpadanen perjabun, ngaloken ras ngergaí teman geluhi bas paksa senang ntah susah, sakit ntah sehat meriah ukur ntah pen dele ate. Kengasupen ngaloken i bas kerina paksa, jadi kesangapen man kalak sierjabu.
Secara umum, budaya masyarakat patriarkhi, bengket pe ije budaya Karo kegeluhen sekalak perbulangen selaku bapa tuhu mehaga. la ihagaken dingen kerina sukat-sukat (standart) kegeluhen si mehuli, perbulangen nentukenca ntah pe ngenanamisa. Ndehara ras anak megati jadi pelengkap ntah pe singkuhi kegeluhen jabu saja. Sangap me perbulangen dikune anak ras ndehara tuhu-tuhu ndukung kegeluhenna simehuli. lbas dampar sideban maka kesangapen endape jadi sikerajangen ndehara ras anak, la banci lang sekalak perbulangen pe arus tetap erjuang jadi bapa, perbulangen ras imam si ertanggungjabab alu mehuli nandangi kegeluhen jabu ras masyarakat. Arah erbage simehuli si ilakokenna sekalak ndehara pe nggejab sangap iakapna bana bagepe sekalak anak pe sangap ka iakapna bana (Kuan 20:7). Sangap min siakap er ndeharaken ‘ndeharata irumah’.
I bas HUT Moria tahun enda, selaku perbulangen, Mamre marilah siergai uga litna ndeharata, turah min ukur singataken bujur i bas pemere Dibata man banta sekalak diberu jadi ndehara man Mamre. Alu bage pang kita ngatakenca man kalak sideban ndeharaku kesangapenku. Man ndehara pe pang Mamre ngakuken man bana alu ngataken: kam kesangapenku. Maka seh pengakun e siidah erbage simehuli i bas ia, amin banci saja melala si kurang mehuli tapi la sie sipebelin. Seh maka bagi si isuratken i bas Kuan-kuanen 31:29 ‘.. nterem diberu simehuli tapi ibabo si e kerina kam simehulina‘.
AKSI
Tentuna, selaku perbulangen ras ndehara, enggo me sitandan janah si betehen kerna kelebihen ras kekurangen. Mari sisuratken 5 hal sijadi kelebihen ntah pe hal si positif si idah kita i bas ndeharata, si perlu sidukung gelah reh belinna i bas dirina. Situlis i bas kertas, sibereken man bana. Sanga Mamre mere man ndeharana nina: kam kesangapenku nande…. (sue ras beruna: karo, iting, tigan, biring, nangin)
USULEN ENDE-ENDEN
- KEE GBKP No. 424:1,2
- KEE GBKP No.227:1,3
- KEE GBKP No. 2821-
- KEE GBKP No. 56:1-3
Pdt. Suenita Sinulingga, M.Th