MENGAYAK MPEHAGA TEMAN
(HUT MORIA GBKP)
TUJUN: Gelah Moria:
- Ngangkai orat nggeluh kalak si erkiniteken arah mpehaga teman.
- Nulisken kata-kata mpehaga teman man teman si debanna ka.
METODE PA: Sharing & Aksi
Roma 12: 9 – 10
Nasihat untuk hidup dalam kasih12:9 Hendaklah kasih itu jangan pura-pura! Jauhilah yang jahat dan lakukanlah yang baik.
12:10 Hendaklah kamu saling mengasihi sebagai saudara dan saling mendahului dalam memberi hormat.12:9 Keleng ate ola min alu pekulah-kulah. Cigalah atendu si jahat janah persadalah dirindu ras si mehuli.
12:10 Sikeleng-kelengenlah kam bagi si ersenina. Silebe-lebenlah kam i bas mpehaga teman.
I. Kata Penaruh
Tep-tep manusia pasti nggejapken meriah kal ukurna adi ngaloken pujin i bas temanta nari, bage me pe sebalikna temanta e pe meriah kal ukurna adina si pujiken ka ia. Bage me biak manusia itepa Dibata, eme nggeluh erteman, la kuh adi sekalak, kita kuh bas perbedan tapi saling melengkapi. Carol Dweck, Lewis ras Viginia Eaton eme para profesor Psikologi, i Universitas Standford, i bas penelitianna nurikenca: pujian dominan erdampak positif anemgia lit sisi negatifna. Adi pujin ibereken la terjeng ngidah ulih si idat tapi rikutken proses si man bentasen. I bas dampak positifna, emekap banci mbangun rasa percaya diri, nciptakan rasa puas si mbages (batin), ndorong motivasi guna ningkatken kreatifitas si terulin, mbangun diri gelah megenggeng ras la murah medu. Tapi lit ka dampak negatifna e me: minter puas akapna i bas ulih si enggo ibahanna dingen lanai atena tole ningkatken lebih asa si enggo ibahanna. Adi bagenda me luar biasana dampak pujin, iajuk kita gelah radu ras mereken pujin sada ras sidebanna man teman-temanta, sabap banci jadi kesehaten ras nambahi keriahenta ras.
II. Mpebagesi Pengangkan Kerna Ogen
I bas oratenta enda rasul Paulus negasken maka pelayanen kempak sapih – sapih manusia labo lit ertina adi la erpalas ku bas kekelengen. Janah kekelengen e min ilakoken kalak si erkiniteken alu enggo leben nggejapken kekelengen Dibata. Kekelengen agape i bas Dibata nari man manusia si la ngarapken balas. Kekelengen sapih manusia (ipake kata philia) jadi tentuna kekelengen si ilakokenna lanai bo alu pekulah-kulah, labo terjeng biber ngenca. Kata la pekulah-kulah, erkawiten ras sejarah e me topeng si biasa ipakeken i bas pertunjuken teater Romawi kuno. Pemainna rusur kal meranken tokoh si beda kal ras karakterna tep-tep wari. Bahkan igejapken si pemeranna e la sejahtera guna ngelakokenca. Jadi isingetken Paulus perpulungen gelah ula bagi pemain teater enda.
Kekelengen e arus teridah i bas perbahanen. Kekelengen e labo pasif, tapi kata kerja aktif (lebih berarti bila dilakukan/ dijalankan). Si mehulina lit min keseimbangen antara penggejapen, dorongen/ motivasi ras perbahanen. Erciga ate kempak si jahat dingen mpersada diri ras si mehuli enda ibenaken arah penggejapen maka lanai erngena ate kempak si la mehuli, emaka ipedauh me si la mehuli e ibas kegeluhen enda. Terjemahen LAI (Lembaga Alkitab Indonesia) ipake kata menjauhi i bas terjemahen Inggrisna: membenci iterusken ku Bahasa Karo: cigalah. Bahasa aslina (Junani) ipake kata apostygeo maknana emekap: sangat membenci atau menganggap jijik, seh maka lanai pe lit sura-sura guna ngelakokenca. Janah kalimat mpersadaken diri ras si mehuli enda iertiken bagi persadan dilaki ras diberu si ipasu-pasu Tuhan (band. Mat. 19:5). Perbahanen si mehuli e enggo leket lanai terpisahken i bas dirinta nari. Kekelengen bagi ersenina turang enda banci igejapken kalak si erkinteken si enggo itegu-tegu kesah Si Badia. Jadi lanai lit perbedan i bas suku, status ekonomi, status sosial, umur ras sidebanna kerina enggo ipersada i bas kiniteken guna ndahiken perbahanen si mehuli guna sikeleng – kelengen.
I bas ayat 10b tangkas kerna uga kita mereken pengergan sapih kita kalak si erkiniteken. Silebe-leben i bas nehken kekelengen. Sada dampar mengarah ku bas waktu leben mpehaga teman ras ku bas hal si utama, si pentingna eme kita leben mpehaga teman. Pengergan ras penghormaten, apresiasi ras pujin eme bentuk kekelengen. Labo idasarken ku bas talenta, erta, prestasi bahkan posisi (enda perlu jadi perhatin!) emaka ola sada pe nimai guna iergaken/ipehaga, dingen ola sada pe si ngidoi bas ukurna adi ia la ipehaga.
III. Pengkenaina
Selamat Ulang Tahun Moria GBKP! Tepatna i bas tanggal 16 Oktober 2021 Moria reh dewasana, 64 tahun, kin min mabaisa Moria secara pribadi pe reh ngasupna ndalanken si mehuli bagi si ngena ate Dibata. Kata Dibata wari sendah enda ngajuk kita tuhu-tuhu makeken dirinta enda subuk arah perukuren, pengerana ras perbahanen ncidanken kekelengen nandangi senina turangta, keleng ateta e la terjeng icakapken ngenca, tapi tuhu – tuhu ngena ateta ndalanken perbahanen si mehull. Lit inisiatif i bas kita mahanca ate temanta e ermeriah ukur. Ersuruh ukur lako erbahan si mehuli katawari paksa pe i japa pe ras man ise pe , sabap perbahanen si mehuli eme buah kinitekenta man Tuhan. Ertina Moria GBKP enggo tuhu- tuhu nadingken biak-biak si erbahan kalak sidetan la mehaga, alu ncekuraki, naling-naling, erpengakap dirina lebih ulin asangken kalak sideban. Sabap kerina biak-biak e la erpalasken keleng ate, enggo sirang biak si jahat. Bangga kita di kune temanta e ‘erprestasi’. Alu bage i bas kita mpehaga temanta, kita pe nggejapken kemalemen ate i bas kegeluhenta.
IV. Diskusi & Aksi:
- Uga nge sedekah enda, menahang dage ukur rikut pengerananta i bas mujiken teman? Turiken alu jujur misalna i bas hal kai ____________
- Bicara menahang ukurta guna mpehaga teman, kai alasenna ____________
- Bicara sedekah enda lenga menahang ukurta mpehaga teman, kai ka alasenna ____________
- Genduari buatlah kertas ras pulpenta (masing-masing).
Situlisken arah datasna gelar temanta si kundul arah kemuhenta, misalna: Nd. A Br. Sembiring. Emaka kita lebe nuliskenca sada hal si positif kerna ia, emaka si pedalan ka ku kawesta gelah temnanta ka nulissa, kita situlis i bas kertas si enggo ipedalan ka seh ku kita. Bage kari terus seh kertas si ertulisken Nd. A Br. Sembiring ndai seh bas tanna.
Pdt. Kristiani F. br. Tarigan, M.Th
