(Ulu Kepentaren E me Erkemalangen Man Tuhan)
Ogen : Kuan kuanen 2:1-6
Tema : Ngajarken Kepentaren Dibata
Tujun : Gelah Mamre:
- Meteh maka sada ngenca dalanna gelah anak jadi pentar e me erkemalangen man Dibata.
- Ncidahken arah pengerana, perukuren ras perbahanenna maka ia bapa si pentar.
Faedah dari pada menuntut hikmat
2:1 Hai anakku, jikalau engkau menerima perkataanku dan menyimpan perintahku di dalam hatimu, 2:2 sehingga telingamu memperhatikan hikmat, dan engkau mencenderungkan hatimu kepada kepandaian, 2:3 ya, jikalau engkau berseru kepada pengertian, dan menujukan suaramu kepada kepandaian, 2:4 jikalau engkau mencarinya seperti mencari perak, dan mengejarnya seperti mengejar harta terpendam, 2:5 maka engkau akan memperoleh pengertian tentang takut akan TUHAN dan mendapat pengenalan akan Allah. 2:6 Karena Tuhanlah yang memberikan hikmat, dari mulut-Nya datang pengetahuan dan kepandaian.
KATA PENARUH
Lit sada pendapat si ngatakenca maka Hikmat artinya hidup dan berfikir sesuai dengan kebenaran, jalan dan pola Allah. Ertina si banci siangkai e me, Kepentaren ntah pe hikmat ertina e me nggeluh ras rukur sentudu ras kebenaren, dalan ras pengaturenken Tuhan. Kepentaren si bagenda me si mereken pengangkan ras kengasupen lako milih apai si benar ras apai si lang, apai si ngena ate Tuhan ras apai si lang. Erkiteken si e maka kepentaren si rehna i bas Dibata nari e jadi sada-sadana standart i bas kita nggeluhken kegeluhenta rikutken si ngena ate Tuhan. Kepentaren si bage Dibata kam si mpunasa (bdk. Jop 12:12-13; Jes. 31:2; Dan 2:20-23). Uluna dingen jadi dalanna maka banci jadi sikerajangen jelma e me dikune jelma e nggeluh erkemalangen man baNa (bdk. Jop 28:28; Msm 111:10; Kuan 1:7; 9:10). Kepentaren si rehna i bas Tuhan e nari terus ipakeken i bas kegeluhen dingen igejapken maka si e labo erkiteken beluhta tapi erkiteken perkuah ate Tuhan (karunia) kap man banta (bdk. Mat 12:42; Luk 11:31). Dage, kepentaren e igelari kap kepentaren Dibata dingen iberekenNa jadi tanda perkuah ateNa man kalak si tek. Si e labo erkiteken teori-teori jema tapi erkiteken ulih kerembaken ras Dibata i bas kerina dampar kegeluhen.
Nggeluhi bas doni enda tentu si perluken kel kepentaren e, maka kita selaku Mamre ntah pe bapa i bas jabu la lalar dingen tetap nggeluh rikutken si ngena ate Tuhan. Mamre GBKP iarapken tetap erdiate nandangi kegeluhen jabu bage pe sekelewetna alu ncidahken kerina si mehuli dingen tetap erpemere, kususna sekali enda e me mereken pengajaren kerna kepentaren Dibata arah pengerana, perukuren ras perbahanen maka anak-anakta bage pe kalak si deban tetap malang man Dibata.
URAIAN TEKS/TAFSIREN
I bas Kitab Kuan-kuanen enda me ipersadaken kerna ajar ntah pe telah (pedah) si berkembang paksa si e lako jadi kitab si isina kerna ngajarken cara nggeluh si mehuli. Ajar e lit kawitenna ras persoalen-persoalen si turah i bas kegeluhen tep-tep warina. E maka iarapken arah kitab enda banci nampati kalak gelah pentar dingen ngaloken pengajaren si mehuli (1:2) ras ertambah-tambah pe kepentaren e (1:5). Payo tuhu kai siisuratken Salomo enda, sabab ulih kepentaren sibereken Dibata man bana maka banci ilitkenna kuan-kuanen (amsal) buena 3000 ras 1005 ende-enden. Erkiteken si e, enggo tangkas kap man banta engkai maka ikataken Salomo maka guna ndatken pemeteh, si pemenana si la banci la lit i bas kalak e me mehamat dingen erkemalangen man TUHAN (1:7). Janah, enda ka me pe siikataken i bas ogen PA nta sendah si man pelajaren kerina Mamre GBKP selaku anak-anak Dibata, janah ola kal sada pe ngelupaken si ituriken man Mamre sendah dingen si man sehenken Mamre lako jadi pengajaren kegeluhen kiniteken man isi jabu bage pe kalak si deban. I bas la ngelupaken kata ajar si erpalasken Kata Dibata kedungenna tetap kita erlajar guna nggeluh alu pentar (bijaksana) ras benar.
Kata Dibata pe ngingetken kita maka megermetlah kita nandangi kepentaren jenari sicubakenlah ngantusisa pe. I bas bahasa Indonesia ikatakenna, sehingga telingamu memperhatikan hikmat, dan engkau mencenderungkan hatimu kepada kepandaian. Si banci si ertiken i jenda, lako ndatken kepentaren Tuhan e arus ka nge pe kita makeken perukurenta, panca indera nta, pusuhta bage pe kininggitenta. I bas kita ngantusi pengajaren Tuhan e, maka si litken waktunta lako megiken kata Na alu ratur dingen tutus. Arah kita megiken kataNa e kap kita mindo pemeteh i bas Tuhan nari, si sekseki ndatken pengertinna maka banci ipakeken i bas kegeluhen.
Kepentaren e tuhu-tuhu meherga kap e maka iandingken pe desken ndarami emas bage pe desken ndarami erta si terbuni. Tentu, labo gampang ndarami erta si terbuni i bas paksa si e. Membutuhken perjuangen berat dingen la banci nukah surut. La banci erleja-leja sebab pasti labo i bas ingan si mesunah ndatkenca ibunikenNa kepentaren e. Si e nuduhken tuhu-tuhu meherga kepentaren e. Arah prosesna enda me iarapken maka sieteh kai ertina erkemalangen man TUHAN, jenari sidat me pemeteh kerna Dibata. Malang man Tuhan erbahanca la kita pang lako ngelanggar perentahNa.
Kedungenna, tetap kel ukurta lako ngataken maka TUHAN kap si mereken kepentaren e, i bas IA nari kap manusia ndatken pemeteh ras pengertin lako ndalani kegeluhenNa. Enda me si man ajarenken man anakta e.
Ulih PA Mamre i bas paksa enda si banci siaplikasiken i bas kegeluhenta, e me:
- Kita meteh maka sada ngenca dalanna gelah anak jadi pentar e me erkemalangen man Dibata.
Pengalamen nggeluh Salomo bage pe pengalamen geluhta enggo banci jadi dalan-dalanta guna nehken pengajaren si payo man anak-anakta. La bias terjeng pemeteh otakna (intelektual) si man pesikapen tapi pe arus ka si ajari anakta e maka nggeluh erkemalangen man Dibata. Malang man Dibata nge erbahanca anak-anakta pentar, anak-anakta meteh mehuli, nggit megiken ajar dingen nggeluhken kegeluhenna sue ras si ngena ate Tuhan.
- Marilah sicidahken arah pengerana, perukuren ras perbahanenna maka kita sekalak bapa si pentar.
Guna ngajarken kepentaren Tuhan tentuna kita selaku Mamre ntah pe bapa arus nge leben enggo erlajar kerna si e dingen sicidahken maka kita enggo terajar kerna si e. Sicidahkenlah arah pengerana, perukuren ras perbahanenta selaku sekalak si erkemalangen man Tuhan. Arah si e pe kita enggo nehken pengajaren man anakta. Tentu la bias terjeng si e saja, mehuli kel nge dikune ita pe jadi pengajar kerna kata Dibata man anakta.
SHARING/STUDY KASUS
I bas jabu Bp. Gegehina ipelimiken Tuhan 2 kalak anak si tergelar Gegehina (dilaki) ras Kuhina (diberu). Duana pupus kekelengenta enda tutus ku KAKR dingen Nd. Gegehina pe sekalak Moria si tutus ras tetap muat bagin i bas dahin-dahin gereja. Bp. Gegehina bagi si kurang tutus bas dahin gereja e.
Sekali jadi reh Mama Tua ras Mami Tua Gegehina ku jabu anak beruna e, erberngi ia i je. Asum man berngi, enggo isikapken Bp. Gegehina bengkau guna man e me Tengkode Durin ras Manuk igule. Si Gegehina enggo leben ertoto i bas ukurna (doa dalam hati) emaka itamana nakan ras gulenna, janah minter atena idahupkenna nakanna. Nina Bp. Gegehina man anakna e, “Ola bage nakku, ertoto kita lebe sope man”. Rempet ialoi si Gegehina bapana, janah nina: “Bapak.. adi ije Mamna Tua ras Mami Tua… Ertoto… tapi adi la i je Mama Tua ras Mami Tua.. La pernah kita ertoto …”
- Si Gegehina ngerana tangkas ukur tangkas kata. Kai nge iakapndu salah benana maka bage pengerana si Gegehina?
- Tentu mesikel kita maka anak-anakta pe nggeluh pentar erkiteken ia malane man Tuhan. Perbahanen kai nge si enggo si bahan sedekah enda guna nehi kesikel ta e?
USULEN ENDE-ENDEN
- KEE GBKP No. 20:1-3
- KEE GBKP No. 482:1
- KEE GBKP No. 108: 1 –
- KEE GBKP No. 307:1, 2
Pdt. Agustinus Ginting Manik
HP/WA: 0852-6111-9971