(HUT PERMATA GBKP)
Ogen : 1 Samuel 2:22-26
Tema : Ajar Bapa Si Meherga
Tujun : Gelah Mamre:
- Meteh kai sebabna pengajaren Eli lanai meherga.
- Mereken ukumen man si salah ras pujin nandangi simehuli
2:22 Eli telah sangat tua. Apabila didengarnya segala sesuatu yang dilakukan anak-anaknya terhadap semua orang Israel dan bahwa mereka itu tidur dengan perempuan-perempuan yang melayani di depan pintu Kemah Pertemuan, 2:23 berkatalah ia kepada mereka: “Mengapa kamu melakukan hal-hal yang begitu, sehingga kudengar dari segenap bangsa ini tentang perbuatan-perbuatanmu yang jahat itu? 2:24 Janganlah begitu, anak-anakku. Bukan kabar baik yang kudengar itu bahwa kamu menyebabkan umat TUHAN melakukan pelanggaran. 2:25 Jika seseorang berdosa terhadap seorang yang lain, maka Allah yang akan mengadili; tetapi jika seseorang berdosa terhadap TUHAN, siapakah yang menjadi perantara baginya?” Tetapi tidaklah didengarkan mereka perkataan ayahnya itu, sebab TUHAN hendak mematikan mereka. 2:26 Tetapi Samuel yang muda itu, semakin besar dan semakin disukai, baik di hadapan TUHAN maupun di hadapan manusia.
KATA PENARUH
Sekalak bapa tentu memiliki peran si mbelin i bas tumbuh kembang anak-anakna. Peran e arus nge ilakoken ras ituduhkenna alu mehuli gelah anak-anak e banci ngikutken kai si enggo iajarken ras ituduhken orangtua ntahpe bapana man bana. Sebab kai siilakoken anak-anak e, mbelin kitikna tentu teridah ka nge arah perbahanen si ilakoken orangtuana man bana. Aminna pe labo kerina kal bage. Sebab lit ka nge orangtuana labo kalak si tutus kal erkiniteken man Tuhan, tapi anak-anakna banci jadi kalak si tutus i bas dahin-dahin gereja. Janah lit ka nge orangtua si tutus erkiniteken, tapi anak-anakna labo ka tutus i bas erkiniteken. Ertina maka lit nge faktor si deban si mpengaruhi kiniteken anak e. Faktor e banci saja arah lingkungen, arah teman-tamanna bagepe hal-hal sideban si banci mpengaruhi kegeluhenna. Guna ngatasi sie kerina, la banci lang sekalak bapa (orangtua) banci min encibalken dirina jadi usihen man anak-anakna. Seh maka igejapkenna lit kemalemen ate kune ndeher kenca ia ras bapa (orangtuana).
URAIAN TEKS/TAFSIREN
Salah sada perbeben si mberat si igejapken Imam Eli i bas kegeluhenna e me I bas ngajarken anak-anakna. Terberita kal maka anak-anak iman Eli seh kal gutulna. Kinigutulenna e labo terjeng kinigutulen biasa-biasa saja. Tapi kinigutulenna e enggo seh kal mekelekna. Adi i bas 1 Samuel 2:12 ituriken maka anak-anak Eli la diatena Tuhan. Pang ia muat persembahen tutungen si ibereken man TUHAN. Si kin arusna bagin imam e itutung lebe, minter ipindona aminna pe matah denga. Bagem perbahanen si ilakokenna man bangsa Israel si reh nehken persembahen ku Silo. Tambah tole kinigutulenna teridah medem ka pe ia ras diberu-diberu si erdahin i bas dalan bengket ku bas Kemah perjumpan ras TUHAN. Kerina perbahanen si ilakokenna e erbahanca nembeh kal ate Dibata man bana. Sebab enggo mbelin kal iakap Dibata dosa-dosa si ilakoken anak imam Eli enda. Kinigutulenna la terjeng la mehamat nandangi pedah ajar orangtuana, tapi kinigutulenna pe teridah arah kinilahamatenna nandangi Dibata.
Kinigutulen anak-anak imam Eli enda banci jadi erkiteken isalahgunakenna peranna ras peran bapana sebage imam i bas rumah pertoton. Labo ingetna maka sekalak imam e arus nge jadi usihen man kalak si nterem. Imam labo banci ngelakoken hal si la mehuli. Sebab sekalak imam ipilih Dibata lako ngaturken kerina persembahen tutungen man Tuhan, lako notoken ras mereken pasu-pasu man kerina bangsa Israel si reh ku Rumah Pertoton Tuhan. Arah dahin sie arusna sekalak imam e erlagu langkah si mehuli. Lalit perbahanen si jahat ilakokenna apaika perbahanen si la ngena ate Dibata. Sebab imam e merupaken kelang-kelang antara kalak si erkiniteken ras Dibata. la me jadi penghubung antara manusia ras Dibata. E maka mbelin kal peran si ilakokenna i bas kegeluhenna.
Janah enda me si la ilakoken anak-anak Eli. Aminna pe enggo isehken Eli pengajaren ras persinget man bana, tetap nge ilakokenna si jahat. Cara rukur si egois si mementingken dirina jine, erbahanca maka enggo tertutup mata ras pemegina nandangi pengajaren si isehken bapana (imam Eli) man bana. Si penting man bana eme kerincuhen dagingna saja ngenca. Seh maka lupa pe ia nandangi jabatennna selaku imam itengah-tengah bangsa Israel. Tapi i bas situasi si bage, Eli ngasup denga nuduhken peranna sebage sekalak bapa man anak-anakna. Labo ipediatna anak-anakna e ngelakoken perbahanen si la ngena ate Dibata. Tapi tetap nge ipersingetina ras iberekenna pengajaren. lajukna anak-anakna e gelah jera dingen robah. Ituduhkenna kinigenggengenna guna nehken pengajaren si mehuli man anak-anakna. Iturikenna pe adi kalak si ersalah man temanna manusia banci lit Dibata si nampati ia. Tapi kalak si ersalah man Dibata tentu lanai lit si banci nampati ia. Ertina maka mbelin kal resikona adi erdosa man Dibata. Bagem pengajaren moral ras kiniteken si iajarken Eli man anak-anakna gelah robah dingen jera.
Hal si berbeda igejapken Samuel i bas geluhna. Samuel mulai kin kitik-kitikna nari enggo tading ras imam Eli. Ertina maka banci jadi anak-anak imam Eli radu mbelin ras Samuel. Tapi hal si berbeda terjadi i bas ia. Samuel justru jadi anak-anak si mehuli ilebe-lebe Dibata. Tentu pengajaren ras kata persinget si ipeseh Eli man bana, icikepna alu nteguh i bas geluhna. E maka tambah wari tambah belinna, reh ngenana ate jelma si nterem man bana. La tejeng jelma si nterem e, Dibata pe erngena ate kempak Samuel erkiteken kinibujuren si ituduhkenna bas kegeluhenna. Arah pengalamen geluh Samuel enda tentu teridah maka pengajaren Eli sebage sekalak “bapa rohani Samuel” nggeluh tuhu-tuhu i bas pusuh Samuel.
APLIKASI
I bas jaman si cukup berkembang enda, banci jadi melala kal tantangen-tantangen si man alanken anak-anakta. Tantangen pe erbage-bage, pergaulen bebas, obat-obat terlarang, budaya hedonisme, budaya hidup instan si erbahanca ja lanai megenggeng bas kegeluhenna. Tentu i bas kerina proses e arus nge sekalak bapa banci jadi teman man anak-anakna. Tantangen geluh si semakin maju arus nge iseimbangken ras peran orangtua si sentral bas kegeluhen sekalak anak. Ertina maka orangtua banci min jadi sekalak teman ntahpe sahabat man anak-anakna. Ngasup pe ia nehken pengajaren kerna si mehuli man anak-anakna. Gelahna pengajaren e banci ka min jadi asam anak-anak e ndalani kegeluhenna. Adina megegeh ibahan palas kiniteken anak-anak e, pasti ka nge megegeh kinitekenna man Dibata. E maka sekalak bapa arus ngasup mereken pengertin man anak-anakna maka kerina si iajarken orangtuana pasti nge si mehuli. Bagi nina i bas Kuan-kuanen 1:8-9: “o anakku, perdiatekenlah kai si ikataken nande bapandu man bandu, sebab ajarenna e nambahi lagu langkah si mehuli kap, si desken rudang-rudang ibabo takalndu ntahpe bura-bura i bas kerahungndu si erbahanca kam mejile”. Bagem mbelinna kal nilai-nilai pengajaren si isehken orangtua man anak-anakna. Tentu Mamre pe ngasup nge nehken pengertin si mehuli man anak-anakna. Aminna pe perlu iinget Mamre, tupung anak e salah turikenlah kesalahenna, tupung ia benar sehkenlah pengataken bujur i bas kebenarenna e.
DISKUSI
- Selaku sekalak bapa, enggo nge ilakoken imam Eli peranna alu mehuli man anak-anakna? Lit nge kekurangen imam Eli i bas ia mpersingeti ras ngajarken anak-anakna? Diskusikenlah!
- Rikutken pengalamenta sekalak-sekalak, kuga nge caranta ngajarken anak-anakta dikune lit perbahanenna si la ngena ate Dibata? (Sharing pengalamen I bas Mamre)
USULEN ENDEN-ENDEN
- KEE GBKP No. 204: 1,4
- KEE GBKP No. 249: 1,4,5
- KEE GBKP No. 385: 1,- Kolekte
- KEE GBKP No. 309: 1-3
Pdt. Dicky A. Bangun, M.Th