NATANG-NATANG ANAK SI NGUDA
(Hari Ulang Tahun PERMATA GBKP)
TUJUN: Gelah Moria:
- Meteh semangat ras keriahen tupung paksa nguda dingen ngajarkensa man anak singuda.
- Ikut ndukung program-program PERMATA.
METODE PA: Diskusi & Aksi
Pengerana 11: 9, 12: 1
Ajar man kalak si nguda
11:9 O kalak si nguda denga, meriahlah atendu! Meriahlah atendu tupung kam nguda denga. Lakokenlah kai si atendu ilakokenndu, dingen ikutkenlah sura-sura pusuhndu. Tapi inget maka Dibata kap si ngadili kerina kai si ibahanndu.
12:1 Tupung paksa ngudandu, ingetlah si Nepa kam, ope denga seh tahun-tahun si dem alu kiniseran. Tupung si e pagi bagenda nge nindu, “La kal meriah nggeluh enda.”
Kata Penaruh.
Adi ngerana kerna paksa nguda, melala hal-hal si meriah banci si inget. Umpamana nginget-nginget masa erteman-teman ras bapa i tengah – tengah jabu, banci cirem-cirem kita si sada. Uga maka bage? Erkiteken paksa nguda melala si mehuli man ingeten, gawah-gawah ku jah – ku je, masa erjile-jile, masa jatuh cinta, ngenanami keriahen ras semangat si luar biasa. Lit belas-belas ‘nanamilah geluhndu tupung kam nguda denga, ola sia-siaken sabap lanai kari terulihi adi kita enggo metua. Selain erjile-jile, paksa nguda pe eme paksa nentuken sura-sura, paksa nimba ilmu, paksa nikapken diri ras paksa nentuken pilihen. Emaka la banci lang, kalak nguda pe arus metenget nggunaken masa ngudana gelah ola salah pilih ras erkadiola. Sabap “penyesalan selalu datang terlambat.” Alu kata sideban, aminna pe i bas sada dampar kalak nguda bebas atena ras ndarami keriahen ukur, tapi tetap perlu pengajaren, arahen ras dukungen i bas kalak sideban nari gelah banci sukses i bas kegeluhenna, kususna orangtua. Enda me si jadi oraten i bas PA-nta, uga carana selaku nande tengah-tengah jabu bagepe i bas Gereja banci ergiah-giah “Natang-Natang Anak Si Nguda” kususna PERMATA GBKP i bas peringeten HUT-na si pe- 73- tahunken sendah. Uga kin cara natang-natang anak si nguda enda? Kai kin gunana natang-natang ia? Mari si pebagesi i bas Pengerana 11:9-12:1
Mpebagesi Pengangkan Kerna Ogen.
Kitab Pengerana ntahpe Pengkhotbah, isina kerna ulih perukuren sekalak guru hikmat si igelari Pengerana ntah pe Perpilsapat. Pengerana enda eme sekalak jelma si enggo rukur alu mbages kerna uga gendekna ras gulutna kegeluhen manusia, si dem alu kinilabujuren ras kecedan ate. Emaka kedungenna ibahanna sada kesimpulen maka “sia-sia nge geluh enda.” I bas PA-nta sendah kita mbahas topik i bas kitab Pengerana enda (Peng.11:9 12:1) eme kerna ajar man kalak si nguda, katawari paksa si payo man bana guna ermeriah ate ras uga carana. Mari si gargari ras-ras:
- Si pemena, Pengerana ngatakensa maka anak si nguda arus ermeriah ate tupung ia nguda denga. Sabap e kin paksa si cocok i bas kegeluhen manusia. Adi lit anak si nguda la ermeriah ate tupung ngudana, sia-sia me masa ngudana. Emaka meriahlah atena tupung ia nguda denga. Lakokenlah kai si atena ilakokenna dingen ikutkenlah sura-sura pusuhna, tapi kerina lit batasenna. Arus iinget maka Dibata kap si ngadili kerina kai si ibahanna. Alu kata sideban, kai pe banci ilakoken guna ermeriah ate tupung nguda tapi si la erbahan reh rawa Dibata man bana (bebas tapi payo). Banci isimpulken maka kerina si ilakokenna arus ipertanggungjabapkenna man Dibata, sabap i bas kesalahen turah kap penyesalen. Emaka ula pelepas anak si nguda i bas aru ate ras ukur gulut, sabap paksa nguda la kap ndekah (ay. 9- 10).
- Si peduaken, Pengerana mereken kata ajar si payo man kalak nguda eme, nginget si nepa ia tupung ia nguda denga. Sabap labo lalap ia nguda. Kalak nguda pe dungna metua ka nge. Reh me tahun-tahun si dem kiniseran. I bas tahun-tahun e matana pe enggo seleng, tanna nggirgir, nahena lanai ergegeh, ipenna enggo naktak janah lanai ngasup cingatngat, sora megang lanai ibegina, pertunduhna pe lanai entabeh ras melala denga sidebanna. Kerina enda erbahansa maka lanai meriah akapna geluh enda.(12:1).
Alu kata si deban, kalak nguda iajuk guna metenget i bas makeken paksa ngudana alu mehuli. Ia arus ermeriah ukur tupung ngudana tapi daraminalah keriahen si la mpeturah erkadiola tapi si banci memajuken ia i bas masa depan. Alu bage ipergunakenna me masa ngudana alu mehuli.
Pengkenaina.
Tema PA-nta sendah eme “Natang-Natang Anak Si Nguda” enda sue kal ras semangat tahun pelayanen Gerejanta i bas tahun 2021 enda, eme segelahna “Anak Si Nguda Jadi Pasu-Pasu” kususna i bas paksa HUT PERMATA GBKP pe-73 tahunken enda. Sadar la sadar kita, cara rukurta (mindsetta) kerna anak si nguda situhuna enggo ndekah me arus ipelimbarui. Enda me si iarapken Gerejanta i bas tahun enda gelahna sadar kita maka PERMATA labo saja calon pemimpinta tapi pe pemimpin Gerejanta i bas masa si gundari ras masa depan. Emaka ula nai ia si ban bagi belo la ertangke. Anak si nguda arus si ikutken i bas muat keputusen bagepe ibereken tanggungjabap i bas perkara si mbelin. Kita arus tek, maka PERMATA enggo siap jadi duta GBKP. Kita arus tek maka anak si nguda enda banci jadi pasu pasu. Erkiteken si e, la banci lang kalak nguda arus ncidanken (berdampak) subuk arah pendidikenna, pendahinna ras pelayanenna.
Emaka perlu ka nge ia arahen ras dukungenta. Sabap lit ka nge kelemahen kalak nguda enda, i je me teridah peran Moria selaku nande, eme natang natang anak si nguda. Secara psikologis, sekalak anak ndeher kal ras nandena, emaka meriah akapna nuri-nuri man nande. Enda me si jadi dalan ras peluang Moria guna natang-natangsa alu nuanken prinsip-prinsip nggeluh si mehuli. Igejapna min belinna dukungen i bas kita nari. Ola nai min usuren ibegina kata-kata penolaken si merendahken ntahpe meremehken ia. Tapi ibegina min kata-kata motivasi ras dukungen i bas kita nari segelah reh semangatna ia jadi pasu-pasu. Enggo paksana PERMATA GBKP si dorong guna jadi kalak si erpengaruh i bas negerinta enda. Enggo paksana PERMATA jadi pemimpin. Tapi alu catatan jadi pemimpin si berintegeritas. Natang-natang anak PERMATA enda banci ibenaken Moria alu cara ndukung program PERMATA i bas Runggunna, banci erkolaborasi ras PERMATA i bas mensuksesken program enda. Mari dage si dukung PERMATA GBKP jadi pasu-pasu man doni enda. Selamat Ulang Tahun PERMATA GBKP si pe-73 tahunken. Selamat jadi pasu-pasu man doni enda.
Diskusi ras Aksi.
- Kai nge si arus ilakoken kalak si nguda i bas masa ngudana erpalasken ogenta!
- Cuba daftarken keriahen-keriahen masa ngudata:
a. Si la man usihen anak PERMATA
b. Si mehuli si banci iusih anak PERMATA - Pilih sada program PERMATA si banci ikolaborasiken ras program Moria, gelah banci idahiken ras-ras!
Pdt. S. Jonathan Meliala, M. Th
“Dukunglah Anakta, Adi la kita, Ise Nari?”