BUJUR I BAS PENDAHIN
(Hari Anti Korupsi, 9 Desember)
Amsal 16: 8, 11; 17: 23
16:8 Lebih baik penghasilan sedikit disertai kebenaran, dari pada penghasilan banyak tanpa keadilan.
16:11 Timbangan dan neraca yang betul adalah kepunyaan TUHAN, segala batu timbangan di dalam pundi-pundi adalah buatan-Nya.17:23 Orang fasik menerima hadiah suapan dari pundi-pundi untuk membelokkan jalan hukum.
Kuan-Kuanen 16: 8, 11; 17: 23
16:8 Madin rulih sitik tapi alu bujur, asangken rulih mbue tapi nipu.
16:11 Ate TUHAN maka bujur min kalak i bas perbinagan, subuk i bas make sukat-sukat bage pe timbangen.17:23 Hakim si korupsi erbuni-buni ia ngaloken sogok, e me sabapna la banci jumpa keadilen.
PERSIKAPEN
- Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
- Nikapken ingan persembahen ras pertoton syafaat
- Adi i bas sektor entah jabu kepkepen perdalanen PJJ ibabai Pt/Dk entah Pengurus Sektor entah sekalak si enggo aturken pengurus PJJ. Adi ilakoken i rumah iaturken bapa entah nande entah sekalak i bas jabu.
- Kerina perdalinenna rikutken situasi janah banci iubah (imodifikasi).
- Sope benaken PJJ banci kita rende Lagu KAKR
Rende KEE. 321 – Sisembahlah Min Tuhan Si Mbelin
Si sembahlah min, Tuhan si Mbelin
Endekenlah min, ende-nden pujin
Tuhan Dibatanta ingan cicio
Sembahlah IA ola kita menggoSi sembahlah min, Tuhan si Mbelin
Endekenlah min, ende-nden pujin
Tuhan Dibatanta ingan cicio
Sembahlah IA ola kita menggo
Ngoge Kata Dibata Kuan-kuanen 16:8,11 ras Kuan-kuanen 17:23 (si mada jabu)
- Nuriken penggejapen pegancih-gancih iaturken pengurus PJJ, entah Jabu Kepkepen (Penggejapen uga menurut kita erti korupsi, ulih ntah pe akibat korupsi, situriken pe uga erdahin alu bujur, transparan i bas ngaturken pendahin ras keuangan i bas jabu, i bas ingan erdahin bage pe i bas Gereja)
- Setiap dung nuriken penggejapen ibabai rende.
Pengelayasi i bas sekalak Serayan si enggo iaturken Sektor (Kuankuanen 16:8, 11 ras Kuan-Kuanen 17:23).
Guna mbangun bangsa si erdolat bage pe masyarakat si sejahtera tantangen si man alanken cukup mbue ras perlu usaha si mbelin alu palas moralitas si mehuli. Salah sada biak si la mehuli si njadiken rakyat musil e me korupsi. Kata enda enggo menjadi kata si biasa si begi, khususna megati si saksiken arah berita si ilakoken oknum-oknum pejabat. Korupsi enggo ngkenai kerina dampar kegeluhen masyarakat, labo i bas pejabat saja tapi pe banci terjadi i bas dunia usaha, keluarga bage pe i bas lembaga keagamaan termasuk pe gereja. Korupsi ilakoken i bas bentuk penyelewengen duit, penyelewengan jabatan bage pe waktu. Ilakoken praktik kinilabujuren (nipu) guna ndatken keuntungen pribadi ntah kelompok. Enda me encidahken moral si la mehuli janah ulihna enterem kalak rate mesui.
Kejahaten entah pe perbahanen la payo rikutken kitab Kuankuanen e me perbahanen si ngelawan kebenaren Dibata. Adi si pepayo isi Kitab Kuan kuanen e me pengajaren kerna cara nggeluh si payo alu palasna erkemalangen man Tuhan, ngelakoken kebujuren, ngkuasai diri, mejingkat rsd. Arah pengajaren e ituduhken perbandingen antara kalak pentar ras kalak bodoh. Si ikataken kalak pentar eme kalak si ngaloken pengajaren si mehuli si ncidahken lagu langkah bujur, adil ras benar i bas Tuhan. Siikataken bodoh eme kalak si la megiken ajar janah la ngit ndalanken kebujuren i bas geluhna. Jadi, labo soal IQ tapi soal lagu langkah.
Bahan PJJ enda ikawitken ras tema eme kejahaten korupsi. Teologi kitab Kuan-kuanen seri ras kitab Ulangen e me Dibata mereken pasu-pasu man kalak si setia dingen benar ras mereken sumpah man kalak jahat. Alu palas enda penulis kitab enda ngajarken maka korupsi entah uga gia cara ras modena e me perbahanen si la ermoral janah ngelawan kebenaren Dibata. Emaka arah pengajaren enda la banci la iukum.
Dibata ngajarken kalak si ersembah man baNa nggeluh i bas kekelengen. Nggeluh i bas kekelengen salah sada eme alu ngelakoken si bujur man kalak si deban. Kuan-kuanen 16 : 8 ras 11 e me ningetken kerna kebujuren i bas ndatken ulih pendahin, bujur i bas perbinagan eme alu make sukat sukat si benar. Jadi, tenah si isehken i jenda e me BUJUR I BAS PENDAHIN, guna ndatken kai si perluken kita, ula korupsi entah nebu-nebu kalak si deban.
Pengakap lalap kurang, la erpuas-puas ras merangap eme tantangen si erbahanca kita banci tergoda ngelakoken cara si la bujur. Selaku kalak Kristen, tentu si eteh maka Dibata la ateNa kita ngelakoken perbahanen si bage rupa. Adi si oge Matius 6:33 nina, Tapi, si pentingna kal, daramilah lebe KinirajanNa, janah dalankenlah si ngena ateNa, maka icukupiNa kai si perlu man bandu.
Kuan-kuanen 17:23 eme salah sada contoh kebodohan. Selaku hakim tentuna enggo cukup pemetehna i bas dahinna. Tapi i jenda penulis Kuan -kuanen ningetken uga kalak si erpemeteh ngelakoken perbahanen si la bujur i bas adep-adepen Tuhan alu ngaloken sogok. Ulihna maka banci iputarbalikkenna si benar jadi salah ras si salah jadi benar. Ngaloken sogok ras mereken sogok eme perbahanen korupsi, e maka secara hukum lit ukumen si isehken. Ngaloken sogok eme perbahanen si nggesuh, ncedai janah mpalitken kebujuren jadi kinilabujuren bage pe sebalikna.
Arah enda ibabai kita guna nggeluh i bas Kata Dibata si mpengasup kita ngelakoken kebenaren i bas pendahinta, jabunta, gerejanta janah kita kerina jadi jabu si anti korupsi. Kata Dibata si ban jadi palas kegeluhenta. Sidahiken dahinta alu bujur ras mehuli alu pengarapen pasu-pasu Tuhan mereken lebih asa kengasupenta ndahiken dahinta.
Diskusi
- Erkiteken korupsi tempa enggo jadi perbahanen si biasa i bas bangsanta, kai nge upaya i bas jabunta njaga isi jabunta gelah ula ndabuh ku bas perbahanen korupsi?
- Kai si akap peran Gereja si banci ilakoken menuju masyarakat anti korupsi?
Rende KEE. 323 – Sura-Sura Daging Lawanlah (Persembahen)
Sura-sura daging, lawanlah tetap
Je ‘di la kam talu, tambah gegehndu
Sura-sura jahat, simbaklah tetap
Ngaraplah man Jesus, tentu kam menang
Pindo gegeh man Tuhan
Gelah kam lalap paguh
Ib’reNa kita menang
Menahang ras senang
Pertoton Persembahen ras Persembahen:
- Persembahen (ibabai KAKR)
- Kata Dibata (ibabai Mamre)
- Si turah i bas perpulungen (ibabai Moria)
- Perbeben bangsa ras pertoton Tuhan (ibabai Serayan)
Momo ras Jeda
Pdt. Agustinus Pengarapen Purba, S.Th., MA