HUT Kategorial Saitun
Ogen : Masmur 92: 13-16
Tema : “Tetap Paguh Ras Erbuah”
Tujun: Gelah Mamre
- Gelah Mamre meteh kalak si nggeluh i bas Dibata enggo pe umurna metua tetap paguh ras erbuah.
- Gelah Mamre mereken semangat man Saitun i bas umur si enggo metua.
KATA PENARUH
Reh ulina pelayanen kesehaten i bas teptep negara, reh gedang arapen nggeluh masyarakatna. Negerinta Indonesia pe reh ulina tingkat kesehaten masyarakatna, erkiteken pelayanen kesehaten enggo reh ulina. Erkiteken sie, ulihna reh teremna kalak si umur meganjang tapi sehat denga bas gerejanta GBKP pe teridah kinata si enda. Reh teremna anggota Saitun si “berusia lanjut,” janah sehat-sehat ka. Itengah-tengah kalak si enggo metua (lanjut usia) enda, lit si rukur positif nandangi kinituanna ras tetap produktif, tapi lit ka deba rukur negatif kerna umurna si enggo metua, ianggapna dirina lanai erguna ras lebih pasif I bas ndalani kegeluhenna si teptep wari. Cara rukur kalak si enggo metua si pelain-lain endam mbue sitikna ipengaruhi lingkungen ija ia nggeluh, entah pe keluarga (lingkungenna si paling ndeher).
Kalak si enggo metua i bas gerejanta GBKP enggo lit organisasina si igelari Saitun. Iarapken gelah min organisasi Saitun banci membina kalak si enggo metua gelah berpikir positif nandangi geluhna gelah tetap semangat ras produktif ras erbuah. GBKP jadi lingkungan positif min man kerina anggota Saitun. Selaku generasi si lebih nguda i bas ukuren usia, anggota-angota Mamre iarapken berperan i bas mereken pikiran positif man kalak si enggo metua, mendorong ras mere semangat man anggota-anggota Saitun gelah tetap semangat ras merasa dirina erguna denga. Mamre erbahan aksi min i bas HUT Saitun i bas runggun-runggun, tentu mere semangat man anggota Saitun. Kai bentukna, tergantung kreatifitas masing-masing Mamre Runggun. Perayaken aksi enda gelah min anggota Saitun GBKP jadi bali ras si tersinget i bas Pustaka si Badia Masmur 92:13-16.
URAIAN TEKS/TAFSIREN
Masmur 92 mulai ayat 1-16 (keseluruhan) e me ende-enden si iendeken i bas i Sabat. Wari Sabat la saja wari pengadi-ngadin (istirahat), tapi pe wari erdahin e dahin kusus sabat e me dahin muji-muji Dibata. Arah ende-enden iberitaken kerna keleng ate Dibata nandangi bangsaNa. Emaka guna muji Dibata kerina rende janah engkuit gitar si sepuluh tinali, gambus ras kulcapi. Kerina alat musik si lit i bas budaya setempat ipake guna muji Dibata. Ende-enden i bas Masmur 92 enda isina:
- Meritaken kerna perbahanen Dibata si erbahanca gedang ukur bangsaNa.
- Kerna kuga bagesna perukuren Dibata, seh maka kalak bodoh la ngasup ngantusisa, bagepe kalak longor la ngasup ngertikenca.
- Kerna kekecewaan nandangi kenyataan bahwa kalak jahat reh enteremna, bagepe kalak si ilat /si la bujur reh bayakna dingen sikap pergeluhna.
- Tapi kekecewaan enda la engkuasai perukuren permasmur, sabab Tuhan nge sierkuasa, janah kalak jahat pasti la ndekah kemakmurenna, lit pagi paksana maka meripuk ia kerina.
- Kalak jahat imbang Dibata kap, ikernepkenNa me i bas paksa si iakapNa payo. Dibata si mada kuasa guna ngukumsa, la perlu siukurken.
- Ayat 13-16 sebagai bahan PA nta Mamre sekali enda, e me jaminen i bas Dibata nari bahwa kalak si erkemalangen man baNa ikawaliNa, ipasu-pasuNa seh metua ibabo doni, bagepe iberekenNa kegeluhen si rehna i bas la nari, kegeluhen sirasa lalap si la erkeri-kerin.
- Kalak bujur ertunas desken batang kurma: megegeh ras galang batangna natang dahan ras buahna. Kalak si megegeh i bas mbaba baban si mberat.
- Kalak bujur mehumur perturahna bagi batang cemara Lebanon: Uratna mbages ku taneh janah batangna meganjang ku langit, banci ka mbelang ingan cicio iteruhna, kayuna pe megegeh jadi bahan bangunan. Kalak si tegas prinsip geluhna, erguna ka man kalak sideban, ngasup jadi pasu-pasu ras jadi teladan.
- Bali ia ras kayu siisuan i rumah Tuhan. Biasana kayu labo isuan i bas rumah, tapi enda iertiken maka kalak si bujur si erkemalangen man Tuhan nggeluh i bas perkuah ate Tuhan, geluhna pe guna kemulian Tuhan.
- Lalap ia meratah dingen paguh, aminna pe enggo metua tetap erbuah: Kalak si bujur ras erkemalangen man Tuhan, enggo pe metua tetap ngasup nggeluhken geluhna alu ceria, segar, bijak (pentar), bagepe tetap njadiken dirina erguna (erbuah).
- Geluhna lalap naksiken kuasa ras kiniulin Dibata.
APLIKASI
Enterem anggota Saitun, amin pe secara kula megegeh denga (ngasup denga produktif), secara perukuren (mental) lanai ersemangat. Megati ipekitikna bana, nina: aku lanai bo ngasup, kena sajalah si lebih nguda. Deba ka nina, aku enda dah kena ‘askar-askar tak bergune’, la padah aku ikut, rsd. Cakap sibagenda rupana encidahken bahwa kalak si metua menganggap dirina kurang berguna. Memang enggo kurang gegehna secara pisik, tapi me banci denga ia erguna i bas hal-hal sideban sicocok ras keadaanna.
- Erkiteken si e, bahan oraten PA Mamre sekali enda arus isehken man kalak si enggo metua (Saitun) antara lain:
- Tetap ndalanken kebujuren i bas geluhna, ertina erpalasken erkemalangen man Dibata idalankenna “keadilen” nandangi anak-anak ras kempuna, ula rayo-ayo.
- Amin pe kula enggo lanai megegeh, tapi prinsip-prinsip nggeluh arus megegeh ras enteguh bagi batang cemara Lebanon. Tetap mereken ajar si mehuli nandangi kerina generasi penerusna, gelah sinursurna kerina sikeleng-kelengen, ersada.
- Tetap optimis, melihat ke depan (ula dekahen bernostalgia) kai si erguna, bulungna meratah ras erbuah seh metua. Ula mbuesa menuntut anak-anakta gelah meriah akapna rusur jumpa ras kita.
DISKUSI
- Cubaken diskusiken terbagesen ayat 13, secara khusus, kai maksudna “kalak bujur” ijenda? Kinibujuren nandangi Dibata ras teman manusia?
- Cubaken turiken pengalamenndu bergaul ras kalak si enggo metua, apal nge teremen Lansia (Saitun) si berpikir positif kerna dirina asangken si berpiki negatif? Si merasa dirina lanai erguna?
AKSI UNTUK MAMRE
Kenca PA Mamre Minggu enda, mis ibahan aksi e me ndahi PA Saitun, pilih 2-3 kalak Mamre reh ku PA Saitun, janah mengucapkan Selamat HUT Saitun, mereken semangat ras gegeh, bahwa kerina anggota Saitun tetap erguna man Dibata ras teman manusia. (Banci ka nge darami bentuk aksi sideban si sesuai ras kondisi setempat).
USULEN ENDE-ENDEN
- KEE No. 307:1-2
- KEE No. 270: 1 +3
- KEE No. 381: 1 -2
- KEE No. 282:1+3 (Persembahen)
Pdt. M.P.Barus, M.Th