HUT PERMATA GBKP 12 September 2021 (73 Tahun)
Ogen : Kuan-kuanen 4:20-27
Tema : Ukuri Alu Mbages
Tujun : Gelah Mamre:
- Ngasup ngukuri alu mbages Kata Dibata
- Ngajari ras jadi usihen man PERMATA GBKP nggeluhi bas kebenaren
4:20 Hai anakku, perhatikanlah perkataanku, arahkanlah telingamu kepada ucapanku; 4:21 janganlah semuanya itu menjauh dari matamu, simpanlah itu di lubuk hatimu. 4:22 Karena itulah yang menjadi kehidupan bagi mereka yang mendapatkannya dan kesembuhan bagi seluruh tubuh mereka. 4:23 Jagalah hatimu dengan segala kewaspadaan, karena dari situlah terpancar kehidupan. 4:24 Buanglah mulut serong dari padamu dan jauhkanlah bibir yang dolak-dalik dari padamu. 4:25 Biarlah matamu memandang terus ke depan dan tatapan matamu tetap ke muka. 4:26 Tempuhlah jalan yang rata dan hendaklah tetap segala jalanmu. 4:27 Janganlah menyimpang ke kanan atau ke kiri, jauhkanlah kakimu dari kejahatan.
KATA PENARUH
Ibas dampar kegeluhen enda, katawari paksa pe kita iperhadapken i bas pilihen-pilihen si harus ipilih guna silakoken. Manusia bebas memilih, tapi I bas muat keputusen i bas pilihenta e ola min asal pilih. Harus lebe iukuri alu mbages, lit pertimbangen, harus iuji maka sipilih, sicikep janah silakoken. Sebab pengukuri alu mbages dem pertimbangen rikut pe i bahan pengujin, eme sada tindaken si mengarahken kita kubas sada kiniteken ibas kai ateta sipilih janah siputusken guna ilakoken. Sibenar dingen berkualitas janah teruji min ateta sicikep janah silakoken. Segelah ula salah pilih dingen ula salah kai ateta sibelasken dingen silakoken, harus iukuri lebe alu mbages. Si eteh kai si payo janah si dalanken si bujur. Emaka harus megiken kata ajar si mehuli dingen tetap Kata Dibata e jadi palas ibas kai-kai pe, seh maka kai pe silakoken tuhu mehuli jadina.
URAIAN TEKS/TAFSIREN
Kitab Kuan-kuanen nuriken kerna ajaren agama dingen ajaren kegeluhen si payo. Pengajaren e icidahken i bas pedah, perumpaman dingen ajar. Isina mbue nuriken kerna cara nggeluh i bas kegeluhen si tep-tep wari. Kuan-kuanen bindu 4 nuriken kerna pengajaren man anak kerna dalin kalak si bujur ibandingken ras dalin kalak si la bujur. Pengajarene ibenaken alu nehken penjelasen kerna kuga pentingna kata-kata guru hikmat (ayat 10-13), persinget gelah ula erteman ras kalak jahat (ayat
14-19) jenari itutup alu pengajuk gelah anak e megiken ras mbuniken pengajaren e I bas pusuh (ayat 20-27) janah ngelakokensa jadi gayai bas geluhna. Rikutken nats ogenta enda, lit piga-piga hal ituriken kerna pedah orangtua man anak e me: megermet dingen megiken kai si ikataken orangtua. Inget dingen buniken pengajaren e i bas pusuh, maka datme kegeluhen dingen kejuah-juahen (ayat 20-22).
Janah selaku anak, lit 4 hal si man jagan tandana ia megiken dingen muniken pengajaren e i bas pusuhna, e me:
- Manjar-anjar Rukur (Jaga Hati)
“Manjar-anjar kam rukur, sabab perukurenndu kap simabai dalan kegeluhen”(ayat 23) “Ukurkenlah mbages-mbages ope denga idalankenndu maka kai pe si ilakokenndu tuhu mehuli jadina” (ayat 26). Perukurenndu bali min ras perukuren Kristus Jesus (Pilipi 2:5). Ertina: kai si idalanken kita harus lebe siukuri alu mba mbages, manjar-anjar rukur/ penuh pertimbangen dingen mindo petunjuk arah Dibata nari. Seh maka kai si idalanken kita e jadi keriahen ukur man Dibata.
- Ula belasken kata la tuhu (Jaga Mulut)
“Ola ndigan pe belasken kata la tuhu; pedauhlah i bas kam nari kata guak dingen ranan si mahanca kalak papak “ (ayat 24).
- Jaga Mata/ Pengenehenen
“Teridahlah min arah matandu sinalsal kinibujuren ukurndu; tatap ku lebe alu la pada mela-mela” (ayat 25). Tentu saja mata sinimaksudken i jenda la sebatas kai si inen kita i lebe-lebe matata, tapi menatap ku lebe/menatap seh ku masa depan si irencanaken kita sue ras sura-sura Dibata. Nggeluh alu bujur dingen mbiar man Dibata.
- Jaga Kaki/ Perdalan
“Sada jingkang pe ola kam nilah i bas dalan si benar nari” (ayat 27). Ertina: tetap ndalanken sura-sura Dibata.
Tangkas itulisken i google (aplikasi internet), maka ibas kegeluhen kalak Karo pe lit si man jagan/ larangen sinigelari SUMBANG SIWAH. Sumbang Siwah e berupa orat nggeluh kalak Karo si man jagan, lit kesopanan (la njuruken). Sipemena: sumbang perkundul, sipeduaken: sumbang pengerana, sipeteluken: sumbang pengenen, sipeempatken: sumbang perpan, sipelimaken: sumbang perdalin,
sipeenemken: sumbang pendahin, sipepituken: sumbang perukuren, sipewaluhken: sumbang peridi, sipesiwahken: sumbang perpedem. Ajaren/ orat nggeluh i bas Sumbang Siwah e pe lit 4 bagin si man jagan sue ras nats ogenta enda, e me: Sumbang Pengerana, Sumbang Pengenen, Sumbang Perdalin, ras Sumbang Perukuren. Kerina harus ilakoken alu pentar sue ras sura-sura Dibata.
APLIKASI
Tema: Ukuri alu mbages. Ajaren entahpe pedah enda labo saja lit I bas Pustaka Si Badia (nats ogenta), tapi pe lit i bas ajaren nggeluh selaku kita kalak Karo s i gelari Sumbang Siwah (siman jagan). Berupa pengajaren kerna njaga ras makeken ukur (hati) si teridah arah pengerana ras perbahanen sue ras sura-sura Dibata. Selaku bapa sebagai Imam i tengah jabu si semalna pengambil keputusen, harus lebe ngukurisa alu mbages sope ibuat keputusen dingen dalankenca. Kuga carana makana Mamre banci muat keputusen alu lebe ngukurisa alu mbages? Tentu saja mindo pergegeh ras petunjuk arah Dibata nari, Emaka selaku Mamre harus ngasup ngukuri alu mbages Kata Dibata. Erlajar terus arah Kata Dibata, nggeluh sue ras Kata Dibata dingen ngajarkensa man isi jabuna. Seh maka Mamre e jadi usihen man isi jabuna khususna pe man PERMATA GBKP segelah nggeluh i bas kebenaren.
Sue ras HUT PERMATA GBKP tanggal 12 September 2021 si pe 73 tahunken, mari tetaplah jadi usihen si mehuli man PERMATA GBKP. Baik i bas cara rukur (ayat 23, 26), cara erbelas (ayat 24), cara ngenen/ lit sura-sura ku lebe enda jadi lebih mehuli (ayat 25), ras tetap erdalin sue ras sura-sura Dibata (ayat 27). Pengajaren si ipeseh orangtua man anak, tuhu meriah ukur anak ngelakokensa sebab enggo idahna leben ilakoken orangtua (Mamre). Seh maka Mamre tetap jadi idola man isi jabuna khususna man PERMATA GBKP. Maka nina anak-anakta PERMATA GBKP “aku bangga man Bapaku, aku bangga man Mamre”. Janah lakokenna si mehuli i bas geluhna.
DISKUSI/ AKSI
- Sue ras nas oratenta sendah, kai pedah si ipeseh orangtua man anakna janah pedah e ibunikenna bas pusuhna dingen ilakokenna?
- Bahanlah aksi (si banci idalanken/ ibereken) man PERMATA GBKP i bas perayaan HUT PERMATA GBKP si pe-73 tahunken i bas tahun enda!
USULEN ENDE-ENDEN
- KEE GBKP No.201: 1, 4
- KEE GBKP No.124: 2, 3
- KEE GBKP No.202: 1-2
- KEE GBKP No.309: 1-2
Pdt. Mira Mutianta Br. Sinulingga, S.Th
Pendeta PERMATA GBKP