PERDIATEKENLAH PENGAJAREN-NDU!
(Lalap ngajarken pelajaren si benar)
TUJUN: Gelah Moria:
- Meteh pengajaren si mbaba keselamaten.
- Nehken pengajaren si payo erpalasken Kata Dibata.
METODE PA: Evaluasi ras Aksi
1 Timotius 4: 15 – 16
4:15 Perhatikanlah semuanya itu, hiduplah di dalamnya supaya kemajuanmu nyata kepada semua orang.
4:16 Awasilah dirimu sendiri dan awasilah ajaranmu. Bertekunlah dalam semuanya itu, karena dengan berbuat demikian engkau akan menyelamatkan dirimu dan semua orang yang mendengar engkau.4:15 Dalankenlah si enda kerina alu tutus, gelah kerina kalak ngidah kemajunndu.
4:16 Jagalah dirindu ras kai si iajarkenndu. Tetaplah dalanken si enda sabap i bas kam ndahiken dahin e iselamatkenndu me dirindu bage pe kalak si deban si megiken kam.
Kata Penaruh.
Pengajaren e seh kal perluna i bas kegeluhenta. Banci si idah pe kerna cara pelayanen Tuhan Jesus maka ku ja pe ia niar-niar daerah pelayanenNa tetap si ilakokenNa lebe eme mereken pengajaren. Subuk i bas perdalanen, subuk i tepi dano, subuk i uruk, i mbalmbal ras sidebanna. Enda nuduhken maka cara mereken palas ras mereken perubahen i bas kegeluhen enda eme arah ngajar. Surat Paulus si pemena man Timotius eme nuriken penjemba ras pengajarenna temanna sada aron. leteh dingen igejap Paulus uga beratna sada tantangen i bas ngepkep perpulungen. Tupung e Timotius nguda denga janah enggo lit tanggungjabapna si mbelin si ibereken man bana eme ngepkep Perpulungen Epesus. I bas ngepkep perpulungen tentu erbage i je persoalen si turahKerina enda man alanken dingen arus idungi alu payo bagi si ngena ate Dibata. Erdandanken si e maka ikirim Paulus suratna si pemena enda gelah banci nampati Timotius i bas ndahiken dahin pelayanenna.
Mpebagesi Pengangkan Kerna Pengogen.
Ayat 15 nina Paulus, “dalankenlah si enda kerina alu tutus”. Kata si enda kerina eme erpalasken kai si enggo leben ituriken Paulus i bas suratna enda. Adi si oge terdatasen perikop bahan PA enda maka piga-piga si imaksudken Paulus eme mpegegehi pertendin alu Kata Dibata, nirangi turi turin si la erguna, ula pelepas kalak mapas man bana erkiteken ia nguda denga, jadilah usihen man kerina kalak si tek, pakeken paksa guna ngogeken Pustaka Si Badia, ula nia-niaken pemere Dibata si lit. Enda me piga-piga pertenget ras penjemba si ibere Paulus man Timoitus. Janah si enda kerina me si patut ras perlu idalanken Timotius i bas pelayanenna i Epesus.
Tujun si isehken Paulus man Timotius i bas ndalanken si enda ndai kerina eme “gelah kalak ngidah kemajun Timotius.” Kemajun si imaksudken Paulus eme kemajun i bas pengerana, lagu langkah, nehken keleng ate, kiniteken ras ukur bujur. La jadi batu antuken kegeluhen Timotius erkiteken nggeluh i bas pengajaren si isehken Paulus man bana.
Ayat 16 ipersingeti Paulus tole Timotius eme guna njaga diri ras kai si iajarkenna. Ertina maka sekalak si ngajar banci ajarkenna bagi akapna payo saja. Selaku sekalak si ngepkep perpulungen arus rusur nungkun Kepala Perpulungen e jine e me Kristus Tuhan gelah ula papak entah lepak pengajarenna. Erdandanken si e maka Timotius arus rembak ras Tuhan alu megiken pengajaren Tuhan si isehken temanna (seniorna) eme Rasul Paulus. Uga carana njaga diri, tole eme arah ngelatih diri alu setia ndalanken kerina pedah-pedah enda ndai, i je me Timotius latihen. I bas ia ndahikenca eme bagin kinitekenna, janah perban perbahanenna e buah kinitekenna eme dalanna idatna keselamaten. Man teptep kalak si megikenca pe idatna keselamaten erkiteken ia pe nggeluh i bas pengajaren si payo bagi si ngena ate Dibata.
Pengkenaina.
Arah bahan PA enda sada pengajuk man Moria gelah ngelitken waktu ngajari anak-anak i tengah jabu. Situhuna orangtua me pengajar pemena ras si paling ertanggungjabap nandangi pengajaren man anak-anak. Saja i bas kinatana enggo rusuren tanggungjabap ngajar iendesken ku lembaga si lit, subuk guru sekolahna entah guru KAKR i Gereja. Waktu guna ngajar pe maun lanai lit i bas orangtua, waktu guna merawa ngenca maun lit Alasen megati ka ipake sibuk. Erti sibuk situhuna eme penting (prioritas) si akap. Pernah sekalak si enggo sikap jabatenna, janah ku ja pe itenahken ngataken sibuk rusur. Termasuk ku Gereja pe la sempat Sada wari kena kanker ia, janah nina dokter dua kali sada minggu reh ku praktekna guna cek-up \ kesehatenna. La pernah ia ngataken sibuk, lit lalap waktuna Engkai penting akapna kesehatan can keselamatenna. Bage me ngajar man anak-anakta, adi lenga si akap penting melala banci alasenta. Sendah maka lanai kita ndarami alasen janah si litken waktunta guna mereken pengajaren man bana.
Melala curak isi pengajaren si bancise man anak-anakta genduari, Kotbah pe banci ibegikenna arah Gereja sideban naribas internet (virtual), bage pe pengajaren jaman enda banci ngelanketi ia, umpamana perayaken kegeluhen senang saja ngenca daramina (hedoniseme) entah rukur gendek gendek saja (pragmatis) entah pengaruh iklan-iklan arah tv ras androitna si mbabai ia erbelanja atena rusur (konsumerintis) ras sidebanna. Jenan kita jine selaku nande, pengajaren kai si semal si ajarken man anakta? Me labo seri ras doni enda? Arusna kita ngenen dininta ras pengajarenta gelah anak-anakta ula sempat la lit palas kegeluhenna si payo. Adi erteman teman anakta maka kiniteken temanna e lah lebe si gargari gelah ula sempat temanna kalak si la erkiniteken man Jesus. Adi tutus ia erkiniteken maka enggo jadi sada palas si nteguh guna si debanna pe mehuli pengelakona.
Desken sinuan kacang panjang ndai, maka si banlah ajek-ajekna turah anakta e, gelah ula ililitina kayu si deban. Adi enggo liletna kayu (ajek-ajek) si deban maka mesera mindahkenca ku sinisuraken kita. Pangen maun ia penggel asangken pindah. Emaka berekenlah pengajaren erpalas Pustaka Si Badia si jadi gelemenna gelah i je ia nggeluh bagi si ngena ate Dibata.
Evaluasi:
- Lit nge sedekah enda waktunta guna ngajarken anakta kema kiniteken?
- Kai saja nge pengidahta genduari pengajaren si banci encedai perukuren ras kegeluhen anak-anakta?
Aksi:
Litkenlah waktunta guna ngajari anak-anakta kera erkiniteken man Dibata
Pdt. Yunus Bangun, M.Th