Bahan PJJ 18 – 24 Juli 2021

JADI PASU-PASU

(GBKP Maba Pasu-Pasu)

Kejadian 12: 1 – 3
Abram dipanggil Allah

12:1 Berfirmanlah TUHAN kepada Abram: “Pergilah dari negerimu dan dari sanak saudaramu dan dari rumah bapamu ini ke negeri yang akan Kutunjukkan kepadamu;
12:2 Aku akan membuat engkau menjadi bangsa yang besar, dan memberkati engkau serta membuat namamu masyhur; dan engkau akan menjadi berkat.
12:3 Aku akan memberkati orang-orang yang memberkati engkau, dan mengutuk orang-orang yang mengutuk engkau, dan olehmu semua kaum di muka bumi akan mendapat berkat.”

Dibata ndilo Abram

12:1 Nina TUHAN man Abram, “Tadingkenlah kutandu, kade-kadendu, ras rumah bapandu, jenari laweslah ku negeri si Kutuduhken man bandu pagi.
12:2 Nterem Kubahan sinursurndu, janah e me pagi jadi sada bangsa si mbelin. Kupasu-pasu kam, janah Kubahan terberita gelarndu gelah arah kam nterem kalak dat pasu-pasu.
12:3 Kupasu-pasu kalak si masu-masu kam, tapi Kusumpahi kalak si numpahi kam. Janah erkiteken kam Kupasu-pasu kerina bangsa-bangsa.”

PERSIKAPEN

• Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
• Nikapken ingan persembahen ras pertoton syafaat
• Adi i bas sektor entah jabu kepkepen perdalanen PJJ ibabai Pt/Dk entah Pengurus Sektor entah sekalak si enggo aturken pengurus PJJ. Adi ilakoken i rumah iaturken bapa entah nande entah sekalak i bas jabu.
• Kerina perdalinenna rikutken situasi janah banci iubah (imodifikasi).
• Sope benaken PJJ banci kita rende Lagu KAKR

RENDE KEE. 374 – Yesus Ulu Kegeluhenku

Yesus ulu kegeluhenku,
Kam me ngenca pengendesenku
Lalap tedeh ate pusuhku,
kupehaga Kam bas geluhku

O Tuhan pernehen pusuhku,
Si ertedeh ate man baNdu
Kugelem pedah ras padanNdu,
Kusembah Kam i bas geluhku

Kusembah Tuhan penebusku,
si mereken kekelengenNa
Alu tutus reh aku Tuhan,
ras kerina isi jabungku Reff :

ERTOTO

NGOGE KATA DIBATA

RENUNGEN

Teks enda nuriken kerna pendilo Dibata man Abram. Pendilo Dibata man Abram enda lit kawitenna ras padan Dibata man Abram gelah jadi pasu pasu man jelma si enterem. Pendilo e seh bana janah iueken Abram sebab tek ia man Dibata si ndilo ia e. Mari sipelajari uga hubungen Abram ras Dibata dingen uga ulih si inanami Abram asum ia enggo nandai Dibata i bas kegeluhenna. Dibata nehken padanNa man Abram “Nterem Kubahan sinursurndu, janah e me pagi jadi sada bangsa si mbelin. Kupasupasu kam, janah Kubahan terberita gelarndu gelah arah kam nterem kalak dat pasu pasu. Kupasu-pasu kalak si masu-masu kam, tapi Kusumpahi kalak si numpahi kam. Janah erkiteken kam Kupasu-pasu kerina bangsa-bangsa.” Abram kalak si erkiniteken man Dibata, teridah arah kepatuhenna ngikutken pendilo Dibata. Kenca umur Abram 75 tahun, berkat me ia i Haran nari bagi si isuruh TUHAN man bana.

Kiniteken Abram enda min jadi usihen man banta. Rasul Paulus i bas nehken pengajaren man perpulungen Galatia nina, “Tek Abraham man Dibata, janah ipasu-pasuNa ia. Bage me pe kerina kalak si tek man Dibata ipasu-pasu bagi Abraham” (Gal. 3:9). Tek kita maka Dibata pe tetap nehken pendiloNa ras pasu-pasuNa man banta selaku kalak si erkiniteken guna jadi pasu-pasu man sekelewetta.

Perpulungen Tuhan, mari kentisik sirenungken maka i bas paksa genduari enda lit kita si rusur gagal i bas jadi pasu-pasu man temanta manusia. Bage pe lit ka kita si mekatep ndarami alasen ntah pe nalahken situasi i bas kegagalenta maba pasu-pasu. Emaka erlajar kita arah perpadanen Dibata ras Abram i bas ayat 3 isingetken “Kupasu-pasu kalak si masu-masu kam, tapi Kusumpahi kalak si numpahi kam. Janah erkiteken kam, Kupasu-pasu kerina bangsa-bangsa”. I bas ayat enda Dibata tuhu-tuhu engkelengi Abram, ertina pasu-pasu Tuhan Dibata e reh belinna dikune Abram pe jadi pasu-pasu. Janah kalak si numpahi Abram isumpahi Dibata.

Perpulungen Tuhan, i bas bagin Kata Dibata enda, Tuhan labo ersura-sura guna mpeltepken hubungen perkade-kaden Abram ras kade-kadena. Labo ka Abram ersura-sura jadi sekalak anak si la mehamat er-orangtua alu nadingken rumah bapana. Tapi i bas konteks enda, Tuhan Dibata sangana erdahin nehi padan Dibata man Abram gelah jadi pasu-pasu man bangsa bangsa. Bage me pe kita i bas kegeluhenta si genduari, jadilah gereja si nggeluh si jadi pasu-pasu man jelma si nterem. Sebab kita pe enggo leben ngaloken pasu-pasu i dur Dibata nari. Amin

NURIKEN PENGGEJAPEN

• SIMADA JABU
• MAMRE
• PERMATA

IRAKUT PERTUA/DIAKEN/PENDETA

DISKUSI

1. Turiken pengangkanndu kerna ogenta : Jadi Pasu-Pasu man jelma sinterem.
2. Adi Dibata ndilo Abram ribun tahun si lepas, kai kira-kira hubungenna ras pendilo Tuhan man banta kalak si erkiniteken genduari enda?

MOMO

RENDE KEE. 343 – Pasu Pasu Bas Tuhan Nari

Pasu-pasu bas Tuhan nari,
gejapken kami teptep wari
Bas paksa-paksa geluh kami,
Kam me kap tetap si ngkawali
Pasu-pasu bas Tuhan nari,
jadi pergegeh tendi kami
Guna ndalani wari-wari,
si rehna bas Kam Tuhan nari

Pasu-pasu dage o Tuhan,
persembahen kami anakNdu
Labo kapen enda metunggung,
persembahen si nggo pepulung
AjariNdu pe kami gelah min,
tetap ngasup mere man Tuhan.

Buaten lit kami o Bapa,
gejapken kami Kam empuna
Tanda ukur kami meriah,
endesken kami baNdu Bapa
Persembahen enda o Bapa,
desken bunga ncole merimna
Persembahen ateNdu ngena,
bagelah akapNdu, o Bapa

PERTOTON PERSEMBAHEN RAS SYAFAAT

• Moria: Notoken Pendeta/Pertua/Diaken/Pengurus PJJ ras Pengurus Kategorial.
• Serayan : Notoken Persembahen, simada jabu, kerina hal si turah i bas perpulungen.

RENDE KEE. 249 – Ajar Aku O Tuhanku

Ajar aku o Tuhanku,
make Kata ras pedah Ndu
Kueteh payo ras sentudu,
kuikutken bas geluhku.

Singikut pedah Dibata,
daten me kerembakenNa
Pedah kata tangkas k’rina,
Em jadi gelementa

Kalak si tegu Dibata.
Em si lembab kin ukurna.
Man si nembah rusur baNa,
ukum ajarkenNa banta.

PERTOTON TUHAN (ibabai sekalak Serayan)

SNACK RAS PENUTUP

Pdt. Diarna Br Sinulingga, M.Th.