SIRA RAS TERANG DONI
(Konfesi GBKP Bab IX: Gereja)
Matius 5: 13 – 16
Garam dunia dan terang dunia5:13 “Kamu adalah garam dunia. Jika garam itu menjadi tawar, dengan apakah ia diasinkan? Tidak ada lagi gunanya selain dibuang dan diinjak orang.
5:14 Kamu adalah terang dunia. Kota yang terletak di atas gunung tidak mungkin tersembunyi.
5:15 Lagipula orang tidak menyalakan pelita lalu meletakkannya di bawah gantang, melainkan di atas kaki dian sehingga menerangi semua orang di dalam rumah itu.
5:16 Demikianlah hendaknya terangmu bercahaya di depan orang, supaya mereka melihat perbuatanmu yang baik dan memuliakan Bapamu yang di sorga.”Sira ras terang
5:13 “Bagi sira si seh kal perluna guna pangan, bage pe kam nandangi kerina manusia. Tapi adi sira e lanai masin, lanai banci ibahan masin mulihi. Sira e lanai erguna, e maka iambekken jenari idedehi kalak.
5:14 Bagi terang si seh kal perluna i bas gelap, bage pe kam nandangi doni enda. Kuta si lit i das uruk la banci lang teridah.
5:15 Labo isagani kalak lampu kenca bage itutupina alu tumba; tapi itamakenna ku datas nahe pertendangen, gelah terang iakap kalak kerina si lit i bas rumah e.
5:16 Dage, ersinalsal lah min terangndu i lebe-lebe kalak si nterem gelah adi idahna perbahanenndu si mehuli, ipujina Dibata, Bapandu si i Surga.”
PERSIKAPEN
- Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
- Nikapken ingan persembahen ras pertoton syafaat
- Adi i bas sektor entah jabu kepkepen perdalanen PJJ ibabai Pt Dk entah Pengurus Sektor entah sekalak si enggo aturken pengurus PJJ. Adi ilakoken i rumah iaturken bapa entah nande entah sekalak i bas jabu.
- Kerina perdalinenna rikutken situasi janah banci iubah (imodifikasi).
- Sope benaken PJJ banci kita rende Lagu KAKR
Rende KEE. 020 – Reh Kam Min, Reh Kam Min
Reh Kam min, reh Kam min
Dahi Tuhan simbelin.
B’reken baNa ras pujin.
Dahi min, dahi min, dahi min.Inget min, inget min
Ngaruh Tuhan bandu kin
PemereNa la ‘rkerin
Inget min, inget min, inget min.
Ertoto (ibabai anak)
Ngoge Kata Dibata i bas Teks : Matius 5: 13 – 16 (iogeken sekalak nande)
Renungan (Adi i bas PJJ ibabai Serayan Tuhan, adi i bas Jabu ibabai sekalak orangtua)
Renungenta wari enda erkawiten ras renungennta minggu si enggo lepas. Tetap denga kita ercakap kerna konfesi GBKP bab IX eme kerna gereja. I je ituriken kerna gereja eme persekutuan orang percaya yang dipanggil menjadi milik Allah dan Yesus Kristus menjadi kepalaNya (I Pet. 2:9; Ef.1:22), terus menerus diperbaharui oleh Roh Kudus menjadi garam dan terang dunia (Mat.5:13-16). Jadi, gereja si enggo ipilih Dibata jadi sikerajangenna lalap ipelimbaruiNa gelah banci jadi sira ras terang man doni enda. Arah Gereja, Dibata ngutus kita guna ndalanken tri tugas gereja, (bersaksi, bersekutu ras melayani). Alu ngelakoken dahin-dahin gereja e tangkas me kerajan Dibata bas doni enda.
Si perlu si pergermetken eme uga kin biak sira ras terang, maka e ipake Jesus jadi sada perumpaman man ajar-ajarNa ras man gerejaNa.
Sira, e mereken nanam sintabeh man pangan ras banci ka jadi pengawet pangan gelah ula macik ntah mbau. Sira e biakna larut, adi ipersada ia ras gulen, ia lanai teridah tapi ernanam bahanna gulen e. Bageme kehadiren kalak Kristen bas doni enda, kita tading ras ersada ras doni, tapi banci min kita mereken nanam si mehuli, si erguna. Dalanna arah kita nggit ngelai, mpekena-kena doni enda, nampati si mesera baban geluhna, la rayo-ayo, i bas nampati la perlu gelarta teridah, tapi igejapken doni enda keleng ate Dibata arah gerejana.
Terang, e mereken sinalsal si jelas teridah guna nerangi si gelap. Doni enda lit i bas kegelapen, ras kalak Kristen tading ije. Kita min si maba terang e, gelah lit perubahen si mehuli bas doni enda. Nina Paulus bas kitab Roma 12:2, Ola pelepas dirindu jadi seri ras doni enda tapi berelah maka perukurenndu ipelimbarui Dibata. Adi pusuhta tetap ipelimbarui Dibata, kita tetap erdalan bas kebujuren, ras ertanggungjawab. Pang kita ngerana adi la payo, ngelawan korupsi, perjudin, politik uang, nogok ras si debanna. Gereja iarapken pang maba sora Dibata guna perubahen kegeluhen si mehuli i bas doni enda.
Emaka ipersingeti Jesus tetap ajar-ajarNa bage pe gerejaNa gelah tetap erguna bagi sira ras terang e. Adi kita lanai erguna, iambekken ras idedeh dedeh kalak, janah banci gelar Tuhan pe tercurna. Tapi labo bage si iarapken bas kita nari. Kita enggo ipilih Dibata jadi sikerajangennNa, ras iperlengkapiNa alu kepentarenNa, gelah ngasup kita nehken berita si meriah man doni enda. Emaka nina Jesus, Ersinalsallah min terangndu i lebe-lebe kalak si enterem gelah adi iidahna perbahanenndu si mehuli, ipujina Dibata, Bapandu si i surga.
Jadi, identitas gereja eme ‘Sira ras Terang.’ Gereja me pelaksana misi Dibata nandangi doni enda lako mpeseh keleng ate Tuhan man kerina tinepa. Si jadi evaluasi bas runggunta sekalak-sekalak, piga persen program runggun e guna dahin kesaksin, persekutuan, ras pelayanen. Apai belinen guna man anggota gereja e jine entah man kalak si deban? Si arusna terjadi kuga pelayanen ku bas ras ku darat gereja banci radu mehuli iaturken (rikut ras anggarenna) sue keperlun. Erti sipekena (pembinaan) ku bas guna banci ngelai ku darat gereja.
Kalak si banci jadi sira ras terang doni enda eme kalak si ngasup nggejapken ketuahen si tuhu-tuhu i bas kerina dampar ras situasi, jadi sira ras terang i bas paksa susah entah senang. Siinget lebe kerna gerejanta GBKP enda si enggo banci jadi sira ras terang i sekelewetna arah kiniseran bencana alam deleng Sinabung ras pe situasi tanggap darurat covid-19. I ja kita iajuk gelah banci ncidahken keleng ate si tergejap nandangi kalak si deban, labo ban lebih i bas kita maka kita mere tapi i bas keleng ate maka ngasup kita mere. Terlebih sipenting kel man banta kita banci jadi sira ras terang si tangkas man sekelewetta i bas nehken kata Dibata arah kegeluhenta si teptep wari, jadi usihen si mehuli seh maka reh teremna kalak simuji Tuhan labo mujiken kita.
Marilah tetap kita jadi sira ras terang isekelewetta, gelah ula ndele ise pe sinatapsa, tapi mehulilah min tambah kinitekenna, Tuhan Dibatanta lah min ipujina.
Nuriken Penggejapen
- Mamre
- Moria
- Anak
Diskusi / Sharing:
- Mari sisiksiki perdalinen gerejanta bas kerina wilayah pelayanen rungun, klasis ras sinodal. Bas kai-kai saja pelayanennta si enggo ernanam man sekelewetta ras doni enda?
- Secara pribadi bage pe bas jabunta, kai tole nari si bahan gelah perbahanenta ernanam man sekelewetta!
MOMO
Rende KEE. 108 – Mbelang Me Kap Man Peranin (Persembahen)
Mbelang me kap man peranin.
Tapina kurang si ranisa pe
O Tuhan iahken Kam gelah min
KawanNdu ku bas peraninNdu e.
O Tuhan iahken Kam gelah min
KawanNdu ku bas peraninNdu e.
Pertoton Sapaat:
- Kerna persembahen (ibabai sekalak Moria)
- Gelah ngasup tetap nggeluh jadi sira ras terang (ibabai sekalak Mamre)
- Gelah banci jadi usihen i bas kegeluhen siteptep wari (ibabai sekalak anak)
Rende KEE. 086 – Tuhan Yesus Si Permakan
Tuhan Yesus si Permakan.
aku biri-biriNa
Yesus si ndemi pusuhku,
ku ikutken IA nge. (2x)
Ku ikutken IA nge,
ku ikutken IA nge.
Yesus si ndemi pusuhku, ku ikutken IA nge.
Pertoton Tuhan ibabai serayan Tuhan / sekalak orangtua
Jeda ras Penutup
Pdt. Oktoria Br. Surbakti, M. Th