PELEPAS KALAK SI NGUDA NDAHI JESUS
TUJUN: Gelah Moria:
- Meteh maka perlu kal nande maba anak-anakna ndahi Jesus.
- Erban komunikasi si mehuli teptep kategorial ku BPMR.
METODE PA: Sharing ras aksi
Kata Penaruh.
Sekalak nande nuriken ukurna nina, “Engkai maka sanga kitik denga nukah kal kuakap ngajarken anakku tapi kenca enggo mbelin, ngerana pe kuakap mesera ras la apal ka ngajarkensa.” Penggejapen enda banci saja lit bas kita. Anak adi enggo mbelin lanai bo banci bagi ate ateta perkadena pe. Enggo lit pilihen, cara rukur ras sura-surana secara mandiri. Megati mesera iakap nande guna ercakap-cakap alu meriah ras ia. Lit perbedan si mbelin antara nande ras anak si enggo jadi PERMATA. Perbedan enda desken embang. Orangtua arah tepi si enda janah anak arah tepi si deban. Mesera dalan jumpa. Gelah banci jumpa ide (sura-sura/maksud/ pengajarenta) man anak, iperluken kite-kite. Relasi (hubungen si mehuli) ras komunikasi (penyampaian ide) eme jadi kite-kitena. Salah sada sura – sura si penting kal lit i bas diri sekalak Moria eme uga gelah anak-anakna nandai Jesus.
Mpebagesi Pengangkan Kerna Ogen.
Bahan PA-nta nuriken kerna uga Jesus tuhu-tuhu ngergaken anak-anak.
Kenca Jesus ngajar i daerah Galilea, lawes IA ku daerah Judea. Enterem kalak ngikutken IA. Kalak Parisi pe njumpai Jesus guna ncubai IA alu nungkun kerna perkara-perkara perjabun. Kenca ijabap Jesus penungkunen kalak enda, i bas ayat 13 ituriken kerna sada kejadin si tempa sepele tapi mbelin antusenna. Piga-piga kalak ndahi IA. Ibabana pe anak-anak man Jesus. Orangtua anak-anak enda mungkin erpengarapes gelah anak-anakna ndatken pasu-pasu i bas Jesus nari. Mungkin lenga itandai orangtua enda kal ise Jesus, tapi ietehna maka Jesus e tokoh si lua biasa emaka ersura-sura ia gelah anak-anakna jumpa ras Jesus. Banci bayangken uga perjuangen orangtua enda guna njumpai Jesus sabap nterem kalak si ngikutken IA. Petembil ras orangtua anak-anak enda, ajar – ajar justru ngambatisa. Labo ituriken i bas ogenta alasen ajar-ajar Jumpa ngerana ras anak-anak tentu la seri bagi ngerana ras orangtua, ngelakoken si enda. Banci saja erkiteken iakapna latih denga iakap Jesus. Iperluken cara komunikasi si kusus maka banci iangka anak-anak e maksud Jesus. Emaka ajar-ajar ngambatisa. Labo nungkun (komunikasi) lebe la man Jesus kerna kecibal anak-anak enda. lakapna seri penggejapenna ras Jesus, kepeken lang.
Nina Jesus i bas ayat 14, “pelepaslah anak-anak e reh ndahi aku, ola ambati ia, sabap man kalak si bagi enda kap Kinirajan Surga.” Kata pelepaslah banci si ertiken, bereken kebebasen man anak-anak guna reh ndahi Jesus. Megati kalak dewasa mbatasi ruang gerak ras cara rukur anak si nguda i bas ersembah man Jesus. Tempa-tempa orangtua ngenca si perlu jumpa ras Jesus anak si nguda lang. Padahal anak si nguda perlu kal mbangun hubungen ras IA i bas masa ngudana nari gelah nteguh palas kinitekenna ndalani wari-wari geluhna i bas paksa si reh. Rehna anak-anak e jadi dalan Jesus mereken pengajaren man kalak dewasa. Kalak si kinitekenna bagi anak-anak nge empuna Kinirajan Surga. Kai ertina enda? Labo maka si enggo dewasa mulihkеn jadi anak-anak maka banci bengket ku bas Kinirajan Surga. Tapi kinitekenta arus bagi anak-anak, bersih perukurenna. Anak-anak la lit kebiarenna (tidak kuatir) janah mbelin kal ketergantungenna man orangtuana sabap ietehna pasti ia ijagaina. Kalak Kristen arus tek alu ukur bersih, la aru ate kerna kai pe, janah ernalem man Jesus. I bas ayat 15, Jesus masu-masu anak-anak e. Tangkas maka Jesus tuhu-tuhu ngergaken anak-anak. Labo kalak dewasa ngenca ipasu-pasuNa tapi anak-anak pe. IA pe ngaloken anugerah keselamaten ras jadi bagin perpulungen kalak Kristen.
Pengkenaina
Selaku nande i bas jabu bagepe Gereja, kita perlu mbangun relasi ras komunikasi si mehuli ras anak si nguda terlebih-lebih i bas kita mabai ia ndahi Jesus. Pengertinta lebe si pepayo. Jesus ngergai anak si nguda emaka kita pe arus bage. Si gejapken maka perlu kal kita mabai anak- anakta nandai Jesus gelah ia pe ngaloken keselamaten. Jadiken anak si nguda temanta gelah tek ia man banta janah lit hubungen si mehuli. Kita pe perlu erlajar kerna “dunia”-na maka si eteh uga cara mbangun komunikasi si pas ras ia. Si perlu ilakoken eme mabai ras ngarak-ngarak ia, labo ngatur. Prinsip si kurang lebih seri pe si pake i bas kecibal PERMATA i tengah Gereja. Penting min iakap Gereja kehadiren ras keterlibaten PERMATA. Tanggungjabap BPMR mereken dahin si banci ilakoken PERMATA, mabai ras ngarak-ngaraksa gelah lit keteraturenna. Ma PERMATA ibereken kebebasen si terarah. Ibereken ruang man bana guna menuangken ide ras kreativitasna i bas pelayanen. Ia labo “igurui” tap idilo guna erdiskusi. Janah si berekenlah kesempaten man anak-anakta fasilitas guna ndatken pengajaren si payo i bas Gerejanta. La pe ia jadi “pengambil keputusen” tapi pang ia muat keputusen maka segedang geluhna nggeluh bas GBKP enda. Alu mereken ruang ras kesempaten man bana maka lanai si ambati ia reh ndahi Jesus.
Sharing ras Aksi:
- Turiken pengalamenndu menjalin relasi ras komunikasi i bas kam mabai anak si nguda ndahi Jesus.
- Bahanlah sada program si melibatken PERMATA secara aktif. I bas rapat kordinasi ntah rapat penyusunen program, Pengurus Moria mpeseh program enda man BPMR.
Pdt. Fransiska br. Sinuraya