BİMBINGEN PA MAMRE
Tanggal 23- 29 Mei 2021
(Keteladanen Mamre nandangi anak)
Ogen : Jeremia 29: 4-9
Tema : Jadilah Usihen I bas Erdahin ras Ertoto
Tujun : Gelah Mamre:
- Jadi usihen man anak ipupusna bage pe anak-anak Gereja i bas erdahin dingen ertoto guna kiniulin kegeluhen.
- Ngajarken anak-anakna i bas nikapken diri ku kegeluhen perjabun.
Jeremia 29: 4-9
29:4 “Beginilah firman TUHAN semesta alam, Allah Israel, kepada semua orang buangan yang diangkut ke dalam pembuangan dari Yerusalem ke Babel: 29:5 Dirikanlah rumah untuk kamu diami; buatlah kebun untuk kamu nikmati hasilnya; 29:6 ambillah isteri untuk memperanakkan anak laki-laki dan perempuan; ambilkanlah isteri bagi anakmu laki-laki dan carikanlah suami bagi anakmu perempuan, supaya mereka melahirkan anak laki-laki dan perempuan, agar di sana kamu bertambah banyak dan jangan berkurang! 29:7 Usahakanlah kesejahteraan kota ke mana kamu Aku buang, dan berdoalah untuk kota itu kepada TUHAN, sebab kesejahteraannya adalah kesejahteraanmu. 29:8 Sungguh, beginilah firman TUHAN semesta alam, Allah Israel: Janganlah kamu diperdayakan oleh nabi-nabimu yang ada di tengah-tengahmu dan oleh juru-juru tenungmu, dan janganlah kamu dengarkan mimpi-mimpi yang mereka mimpikan! 29:9 Sebab mereka bernubuat palsu kepadamu demi nama-Ku. Aku tidak mengutus mereka, demikianlah firman TUHAN
KATA PENARUH
Nabi Jeremia sekalak nabi si cukup ndekah guna mpeseh sora Dibata man bangsaNa. Lit kira-kira empat puluh tahun ia erdahin i bas masa lima kalak Raja merintah e me Raja Josia, Joahas, Joyakim, Joyakin ras Sedekia. I bas lima kalak raja enda maka Raja Josia ngenca ndalanken si ngena ate Dibata. Erdandaken si e maka mesui nge ate Jeremia i bas ndahiken dahinna selaku sekalak nabi. Ise pe la megiken ia, janah rusur iperankenna kai si bakal jadi nandangi bangsa Israel paksa sie.
Si jadi tantangenna tole ndahiken dahinna jadi sekalak nabi e me erdandanken lit ka nabi palsu si erdahin. Umpamana Nabi Hanania, ia rusur ngerana I bas gelar Dibata, padahal labo bage peraten Dibata. Banci si oge sope perikop bahan PA nta enda maka nina “TUHAN si mada kuasa Dibata nu Israel enggo melasken kata enda nina” Kuasa Babilon enggo kuperperken. 1. bas dua tahun enda ku baba mulihken kerina ugas-ugas Rumah Pertoton si enggo iangkut Nebukatnesar (Jer. 28:2-3). Tentu berita enda meriah iakap Raja ras kalak Juda megikenca, padahal labo bage nina Dibata. Uga kin nina Dibata? Enda me si suratken Jeremia man kalak Juda si enggo iangkut ku pembuangen Babil termasuk nabi-nabi, pemimpin-pemimpin bangsa termasuk Raja Joyakin ras nandena. Janah suratna enda me jadi bahan PA nta sendah.
Si tuhuna secara kula, labo mesuisa ate bangsa e ringan i pembuangen Babilon. La bali ras sanga bangsa enda iperbudak i Mesir, adi i je maka subuk kula ras perukurenna mesui kal atena. Tapi i Babilon lit nge kebebasen kalak enda guna erusaha, erdahin rsd. Tapi secara perukuren tuhu mesui atena erkiteken enggo akapna talu Dibatana janah iuru-uru kalak maka labo ergegeh Dibata si sembahna sedekah enda. Jenari pe enggo metedeh atena banci ersembah i Jerusalem bagi si gelgel. Erdandanken sie, kurang ter akapna banci mulih ku negerina. Janah kata-kata nabi palsu Hanania ndai tentu jadi “harapan palsu” man bana. Jadi, cukup berhasil Nabi Palsu Hanania mereken PHP (Pemberi harapan palsu) man kalak si ibuang enda,
I bas kecibal bagenda me maka nina nabi Jeremia arah suratna man kalak enda “pajekken rumahndu janah tetaplah kam ringan i je. Enda nuduhken maka ndekah nge kari ia ringan i Babil, janah isingetken Jeremia dekahna eme pitu puluh tahun (ay. 10). Banci ikataken, sada generasi me dekahna bangsa enda pagin ringan I Babilon. Emaka rumah me si ipajekken labo sapo entah tenda. Adi dua bulan mindai banci tenda saja isuruhna guna ipajekken. Jenari nina tole suani peken jenari pan ulihna. Sinuan-sinuan (tanamen keras) menda si isuan si nimai erbuah saja banci piga-piga tahun, apai paksa si e lenga lit bibit unggul.
Tole isingetken nabi Jeremia gelah erjabulah dingen mupuslah bangsa enda i taneh pembuangen. Emaka seh ka masana pejabuken anak ka me ia, janah anak-anakna e pe banci ka nerusken sinursurna. Alu bage arapen Dibata arah surat Jeremia enda gelah ertambah-tambah bilangenna, labo reh urakna. La terjeng guna dirina ipesikapna arah dahin, arah jabuna ras sinursurna tapi pe arus ka ia erdahin ras notoken i ja kuta inganna i buang. Sada prinsip nggeluh si peseh Dibata i jenda arah nabina maka adi kita pesikap kalak mahan bana kita pe sikap. Enda me prinsip si mehuli (pro aktif) si ajarken Jeremia man kalak enda. Janah ayat 8-9 mulihi ipersingeti Dibata arah surat Jeremia enda gelah metenget man nabi-nabi si penipu, maka adi erlawanen ras kai si kataken Jeremia maka e palas ras nipu atena.
APLIKASI
Adi si oge surat Jeremia enda, banci si dat sada dampar tenahna e me maka pembuangen bangsa enda ku Babil desken sada persekolahen man bana. Amin gia i negeri kalak alu erbage perbeben si lit la banci ngkurangi carana nggeluh uga arusna ia nggeluh alu mehuli. Subuk i bas ndahiken dahinna la banci la mehuli dingen tutus atena ndahikenca. Bage pe i bas pesikap jabuna ras kerina sinursurna la banci la arus idalankenna alu mehuli. Emaka la ateta mamang ngenen kinatana kenca mulih kalak enda ku negerina jine, kerina kegeluhen kiniteken ras budayana selaku kalak Jahudi labo reh lunturna tapi reh ulina. I bas masa pembuangen e nari maka enggo kari lit ingan ersembah selain i Jerusalem sinigelari sinagoge. Bage pe enggo lit sada tim erlajar Taurat si mehuli gelah ula nari mulihken kinitekenna nilah kempak berhala-berhala bagi nini-ninina.
Bage me man banta Mamre (bapa) i bas jabu ras gereja, perbebenta piga paksa perpudi enda labo reh urakna, bagi kecibal batu burbar, sikalangen sitindihen rehna man banta kerina. Rindih-indih reh perbeben e man banta alu la pernah si arap. Tapi arah bahan PA enda ngajari kita maka la alasen kai pe reh urakna kiniulin geluhta subuk arah pendahinta, jabunta ras nikapken generasinta ku lebe. Gelah kune lepas kerina masa-masa kiniseran si ndempar kegeluhenta reh ulina kualitas kiniteken, pendahin ras sinusurta kerina. ldah anak-anakta uga ketutusenta erdahin janah e banci jadi usihen man bana. Bage pe i bas masa depanna termasuk teman geluhna tetap sitoto ken gelah jumpa ia kalak si erkiniteken, si tutus atena ndahiken dahinna ras tentuna pe rikut ras ngepkep jabuna. Labo kita italuken situasi ras kecibalta, tapi kita sinalukenca erpalas gegeh toto ras kiniteken bage pe pendahinta si sikap dingen ratur.
DISKUSI
- Uga nge carana mbedaken ajaren palsu entah lang i bas jamanta enda?
- Uga carana gelah reh tambahna tetap ketutusen Mamre ertoto ras erdahin?
USULEN ENDE-ENDEN
- KEE GBKP No. 270:1-2
- KEE GBKP No. 255:1-3
- KEE GBKP No. 471:1 – Kolekte
- KEE GBKP No. 212:1,5
Pdt. Yunus Bangun, M.Th