Megenggeng ngalaken kiniseran ras ngalaken adaptasi kebiasaan baru
Ogen : 1 Petrus 5:8-11
Tema : Teneng Tapi Metenget
Tujun : Gelah Mamre:
- Tetap paguh ngalaken kiniseran ras serta kedungenna.
- Pang ngubah sikapna i bas ngalaken adaptasi kebiasan si mbaru.
5:8 Sadarlah dan berjaga-jagalah! Lawanmu, si Iblis, berjalan keliling sama seperti singa yang mengaum-aum dan mencari orang yang dapat ditelannya. 5:9 Lawanlah dia dengan iman yang teguh, sebab kamu tahu, bahwa semua saudaramu di seluruh dunia menanggung penderitaan yang sama. 5:10 Dan Allah, sumber segala kasih karunia, yang telah memanggil kamu dalam Kristus kepada kemuliaan-Nya yang kekal, akan melengkapi, meneguhkan, menguatkan dan mengokohkan kamu, sesudah kamu menderita seketika lamanya. 5:11 Ialah yang empunya kuasa sampai selama-lamanya! Amin.
KATA PENARUH
Tema PA Mamre-nta sekali enda e me “Teneng tapi Metenget” menarik jadi sada bahan percakapen i bas PA bagepe bas kegeluhen. Menurut KBBI, kata “teneng” mengarah ku bas erti kata diam, tidak bergerak, tidak berombak (air, laut), tidak berubah, tidak gelisah; tidak rusuh; tidak kacau, tidak ribut; aman dan tentram. Sementara kata “metenget”, i bas bahasa Indonesia “waspada” si ertina berhati-hati dan berjaga-jaga; bersiap siaga. Alu pengertin si bage rupana, Tema enda ngajuk kita Mamre kususna gelah “teneng ras metenget” I bas ndalani kegeluhenta selaku Mamre, bapa i bas jabu, bage pe i bas pendahinnta si tep-tep wari. I bas keadan susah entah senang, arus kita tetap teneng ras metenget. Sabab banci perban kesusahen nggeluh entah pe kesenangen geluh erbanca kita bene. Misalna, lit deba perban la lit pendahinna erbanca ia ndauh i bas Tuhan nari, dungna salahkenna Tuhan. Lit deba ban sibukna erdahin, lanai ka ia sempat ndahi Tuhan. Erkiteken si e, Tema PA Mamrenta sekali enda mpersingeti si lupanta gelah kita bijaksana i bas ndalani kegeluhen enda, terutama alu ngandalken gegeh Tuhan maka ngasup kita teneng ras metenget ngalaken perbeben geluhta.
URAIAN TEKS/TAFSIREN
Bahan PA Mamre-nta ibuat i bas 1 Petrus 5:8-11. Isi Surat 1 Petrus enda e me guna mpegegehi kiniteken kalak Kristen ijapa pe si sangana ngenanami kiniseran. Kiniseran si inanami kalak Kristen masa si e erkiteken erbage-bage hal seh maka kalak Kristen iayak-ayak, isiksa, ibunuh perban ianggap kalak Kristen berbeda cara geluhna ras ielma si enterem si nembah dewa-dewa. Tole pe lit tuduhen maka kalak Kristen man dareh si ipantangken masa si e, itambah ka tuduhen Kaisar Nero maka kalak Kristen me si nutung kota Roma, sementara jelas kal perintah nutung kota Roma rehna i bas Kaisar Nero nari. Kalak Kristen ipersalahken (jadi “kambing hitam”) gelah Nero tetap ipuja rakyatna.
I bas keadan si bage rupana ipegegehi Petrus me kerina kalak Kristen si lit i bas kondisi perbeben si mberat gelah tetap erkiniteken man Jesus ras njagai prilakuna si mehuli. Bagi nina Izaak Walton kerna Surat 1 Petrus: “Surat ini keluar dari hati seorang gembala yang penuh cinta kasih demi menolong umatnya yang sedang dan akan mengalami hal-hal yang buruk.” Ertina, Petrus nggejapken ras banci jadi ngidah perbeben si inanami kalak Kristen masa si e. E maka icidahkenna tanda keleng atena alu tetap mpegegehi ras mereken dorongen semangat man kalak Kristen si teraniaya.
Salah sada si jadi perhatianta e me 1 Petrus 5:8-11. Kai nina Petrus?
- Tenenglah kam tapi metengetlah! (ay. 8). I bas keadan terancam kesah, iayak- ayak, anjuren Petrus “teneng” ras “metenget”. Ula panik, ula sangsi. Petrus ngakui maka tantangen e mberat. gambarkenna alu “iblis imbangndu e gawah-gawah…bagi sada singa si erngaung..” si ngayak-ngayak kalak Kristen ibarat “singa lapar” si sangana ndarami mangsana si man panganenna, si man bunuhenna. Si penting nina Petrus teneng ras metenget. Sabab adi tetap teneng ras metenget turah ukur erlayas gelah pulah i bas ancamen nari.
- Tetaplah paguh kinitekenndu janah lawanlah imbangndu e (ay. 9). Kalimat enda tempa kita iajuk erbalas. E maka perlu si nen terjemahen ayat enda i bas Bahasa Indonesia, nina: Lawanlah dia dengan iman yang teguh. Enda me terjemahen si payo. Jadii bas ngalaken musuh e, ilawan alu “iman yang teguh”. Petrus labo ngajuk kalak Kristen angkat senjata entah maba kelewang entah pe tumbuk lada ngelawansa, tapi alu kiniteken si paguh.
- Tapi kenca kam ngenanami kiniseran kentisik (ay. 10). Kiniseran e labo permanen, kentisik ngenca. Arah ayat enda, Paulus mereken pengarapen man kalak Kristen maka dikune megenggeng i bas ngenanai kiniseran si sifatna sementara (kentisik), lit ulih si bakal ialoken kalak Kristen e me: sipemena: Serta me kami bahan Dibata; sipeduaken: Ipetetapna dingen ipegegehiNa kam; ras sipeteluken: IberekenNa palas si nteguh.
- Dibata kap erkuasa seh rasa lalap (ay. 11). Petrus nekanken maka kalak si nindas e sementara ngenca, sanga ia erkuasa ngenca, bage la nai lit kuasana, gegehna pe reh urakna reh dekahna. Tapi, Dibata si sembah kita erkuasa seh rasa lalap. Dibata erkuasa labo lit batas waktuna (periodena). Kaisar Nero banci erkuasa nuduh kalak Kristen si lang-lang, lit kuasana nehken perintah man pasukenna munuhi kalak Kristen. Tapi kuasana e sementara ngenca, e me tupung ia erkuasa (tahun 54-68). Tapi kuasa Dibata tahan seh rasa lalap. Ayat 11 enda itutup alu kata Amin ertina ya dan pasti.
APLIKASI
Lit kuan-kuan i bas kita kalak Karo, nina “Kiniseran kite-kite ku si jore.” Kiniseran inanami kerina jelma. Erbage-bage bentuk kiniseran jelma i doni enda. Penungkunenna, apai nge si menangi bas geluhta, kiniseran entah kinigenggengen? Paguh kita naluken kiniseran entah menyerah? Adi menyerah, berarti lanai jore. Geluhta itempa (ibentuk) alu erbage-bage tantangen. Tantangen erbahanca kita naik kelas. Selaku Mamre GBKP, kita arus tahan uji, tahan ngalaken tantangen sabab tantangen e entah si peturah tantangen e, sementara ngenca. Lit limitna. Pengalamen Petrus ras kalak Kristen perdana arus jadi pelajaren si penting man banta kerina.
Termasuk i bas kita kinigenggengenta ngalaken situasi pandemi Covid 19. Enggo situduhken kita teneng ras metenget. Janah enggo sigejapken maka ibereken Dibata gegeh man banta seh maka kita megenggeng ngalaken kiniseran e. Ikawali Dibata nge kita ras isi jabunta. Cukupina nge kebutuhen jabunta. Erkedungen nge pagi sekolah anak-anakta. Sahun nge erjabu anakta. Idatna nge pagi dahinna. Bagi nina i bas Pustaka Si Badia: “Endesken aru atendu man Tuhan, gelah kam ipegegehiNa. Sabab la pernah ipediatNa kalak bujur italuken,” (Msm. 55:23). Si penting maka patuhi kerina proses adaptasi kegeluhen si mbaru. Tetaplah pake masker, jaga jarak ras cuci tangan. Enda cara si banci silakoken guna mengatasi pandemi enda. Cidahken adaptasi kebiasaan baru e i bas kegeluhen social masyarakatta. Ibabo sie kerina, alaken kerina alu kiniteken si paguh, tentu menang kita.
DISKUSI
- Oge mulihi ayat 10. Kai ertina ayat enda?
- I bas suasana Adaptasi kebiasaan Baru enda, selaku Mamre, kai nge arus silakoken gelah geluhta erguna ras ernanam baik ku bas gereja, jabunta ras masyarakat (dahin peradaten)?
USULEN ENDE-ENDEN
- KEE GBKP No. 249:1,5
- KEE GBKP No. 202:1,3,5
- KEE GBKP No. 357 (Banci iulihi 2-3x)
- KEE GBKP No. 354:1-3
Pdt. Jekson Barus M.Th
| CATATAN: Adi lit kita erbahan PA Mamre wari /Tanggal, Kamis 13- Sabtu, 15 Mei 2021 gelah simajuken ku wari tanggal Minggu, 09 – 12 Mei 2021 erkiteken wari Kamis 13 – Sabtu, 15 Mei 2021 ilakoken 10 wari GBKP ertoto |