“MBANGUN I BAS PALAS SI ENTEGUH”
Matius 7: 24 – 27
Dua kalak si majekken rumah24 “Ise megi katangKu enda dingen ngikutkenca, ia bali ras kalak pentar si majekken rumahna i babo batu.
25 Rumah e labo runtuh aminna gia reh banjir ras angin si meter nderpasa, sabap rumah e ipajekken i babo batu.
26 Ise si megi katangKu enda tapi la ikutkenna, ia bali ras kalak lenge si majekken rumahna i babo kersik.
27 Asum reh banjir ras angin meter, minter runtuh dingen sontar rumah e.”Dua macam dasar
7:24 “Setiap orang yang mendengar perkataan-Ku ini dan melakukannya, ia sama dengan orang yang bijaksana, yang mendirikan rumahnya di atas batu.
7:25 Kemudian turunlah hujan dan datanglah banjir, lalu angin melanda rumah itu, tetapi rumah itu tidak rubuh sebab didirikan di atas batu.
7:26 Tetapi setiap orang yang mendengar perkataan-Ku ini dan tidak melakukannya, ia sama dengan orang yang bodoh, yang mendirikan rumahnya di atas pasir.
7:27 Kemudian turunlah hujan dan datanglah banjir, lalu angin melanda rumah itu, sehingga rubuhlah rumah itu dan hebatlah kerusakannya.”
TUJUN: Gelah Moria:
- Meteh maka si megiken ras ngikutken Kata Dibata eme kalak pentar desken kalak si majekken rumah i babo batu.
- Pang ngalaken tantangen i bas jabu alu megiken ras makeken Kata Dibata.
METODE PA: Kolase
Kata Penaruh
Adi kita mbangun sada bangunen perlu kal si eteh ketahanen palasna, sabap palas e nentuken ketahanen bangunen e. Sumpama mbangun sada bangunen tingkat 3 palasna terjeng gegeh guna bangunen tingkat sada ngenca, pasti bangunen e la enteguh, murah goyah ras runtuh anem udan ras angin si meter ngenca nderpasa. Bagepe i bas kita erkiniteken man Tuhan, perlu kal palas si enteguh, sabap palas si enteguh erbahansa ngasup kita ngalaken perbeben ras tantangen si reh nderpa kegeluhenta, la murah ngelabuh ras tetap megenggeng. Emaka menaken kitik-kitik nari sipajekkenlah palas si enteguh man anak-anak tengah jabunta gelah anak- anakta e la mobah i bas erkiniteken man Tuhan sabap tantangen ku bas wari si reh enda seh kal buena erbagena, subuk si reh i bas dirina nari bagepe i bas darat dirina nari.
Mpebagesi Pengangkan Kerna Ogen
Nggo megati si begi kerna dua kalak si majekken rumah erpalasken Matius 7: 24-27 enda, iandingken kerna kalak si megiken Kata Dibata, e me kalak pentar si majekken rumahna i babo batu ras kalak si lenge si majekken rumahna i babo kersik. I Palestina lit musim perlego si gedang (kemarau panjang) tep-tep tahunna. Tupung paksa perlego, taneh seh kal piherna erkiteken la pernah kena udan erbulan-bulan. Janah adi ikurak taneh e lit piga-piga lapisenna eme, kenca taneh, kersik, batu kerikil, maka jumpa ka batu mulihi. Emaka adi lit sura-sura mbangun rumah si paguh perlu kal melala waktu ras biayana. I bas ngkali taneh e perlu melala tenaga sabap taneh piher desken batu, apai ka gelah seh ku lapisen peempatken si banci ijadiken batu palas. Reh bagesna taneh ikurak reh dekahna perlu waktu ras biaya mbangun bagepe upah si mbagunsa. Tapi bangunenna terjamin sabap enteguh palas bangunen e. Melala pe tantangen si reh nderpa rumah e la runtuh sabap paguh palasna. Bage me Jesus ngandingken kerna kalak si megiken Kata Dibata, la terjeng ibegikenna tapi ipakekenna i bas geluhna (ay. 24). Kalak si megiken Kata Dibata ras si ngelakokensa, em palas si enteguh, kai pe tantangen ras godan si reh la mobah erkiteken palas si enggo mbages isuanken, bali ras batang kayu si isuanken mbages uratna, melala pe tantangen las matawari, angin meter, udan meder la murah morus erkiteken uratna enggo megegeh.
Kalak si megiken Kata Dibata tapi la makekensa i bas geluhna e desken kalak lenge si majekken rumah i babo kersik (ay. 26). Enda igambarken Jesus erkiteken ikurak la mbages minter jumpa kersik lapisen si pemena denga tentu waktu pe kentisik, la ka melala dana ras tenaga siniperluken minter ibangun rumah, emaka palasna pe la enteguh. Di kune reh tantangen angin meter ras banjir minter runtuh rumah e erkiteken palasna la enteguh (ay. 27). Bage pe kalak si megiken Kata Dibata adi la kin ipakekenna i bas geluhna, adi terjeng megi-megi saja, murah tergoda ras olah joleken pengajaren doni enda, kalak si bage dua kali rugi, nggo latih erdahin ngurkuri taneh, waktu pe keri, tenaga pe latih ras duit pe keri, reh tantangen banjir ras angin meter minter runtuh rumah e. Jadi perlu kal ipepaguhi palas si nteguh subuk i bas mbangun rumah bagepe mbangun rumah pertendin (kiniteken man Tuhan) gelah kai pe tantangen si reh tetap paguh, la mobah erkiteken palas si enggo enteguh. Palas e erkawiten kal ras uga paguhna rumah si ni ibangun e. Bage pe kiniteken si nibangur nggeluh i bas Kata Dibata, la terjeng nggeluh eragama tapi nggeluh i bas Kata Dibata, ibegiken dingen ipakeken jadi palas si enteguh.
Pengkenaina
Tuhan ngajari kita gelah nggeluh pentar ras dem pengertin ndalar kegeluhenta, la menggo i bas ngelakoken kai pe, sabar ras megenggen ngelakoken Kata Dibata seh maka tahan uji, la murah putus asa di kune reh perbeben, la murah tergoda nandangi tawaren doni, si eteh denga mehuli erkiteken paguh palas kinitekenta man Dibata. Tetaplah bangu jabunta si erpalaken Kata Dibata! Alu nuanken Kata Dibata teptep wa man anak jabu, pagin pe paguh ia i bas erkiniteken man Tuhan. Tantang bas geluhta; udan meder, banjir, angin meter bagin si mawen-mawen terelakken, si banci erbahansa kita sakit ras gedap. Tapi kegeluhen erkualitas sabap tetap kita megiken ras makeken Kata Dibata tiap wa Nggeluh erkualitas teridah arah paguhna rumah tangganta, la runtuh an iderpa perbeben. Bapa, nande ras anak bahu membahu ngalaken perbeben, ersada arih, la murah si juru jurun entah ndarami salah anggota abuna. Kerina anggota jabu bebas i bas kebiaren ras intimidasi erkiteken nggo paguh palasna nggeluh i bas pengepkepen Tuhan. Jadi palas si enteguh ndai nentuken uga rumah kiniteken si ibangun kita i bas kegeluhenta. Nggeluh bas Tuhan, ngelakoken kataNa eme cara nggeluh si erbahansa aman ras tenang geluhta, dingen terjamin pe masa depanta. HDS-ta tahun enda arah negara Republik Vanuatu nari, arah e pe banci melala kita erlajar kerna mbangun kegeluhen alu palas si enteguh, seh maka la terundu anem gia melala tantangen ras perbeben nderpa kegeluhenta.
Metode PA: Kolase/Klipping
Lit piga-piga si banci ilakoken: (banci pilih salah sada si no. 1 entah no. 2)
guna ilakoken kerjasama ras kreatifitasta
- Pepulung lebe kai saja si perluken guna mbangun rumah, bahanna banci arah kertas koran entah majalah. Ban kerjasamandu guna nusunsa! Iperluken kesabaren ras kreatifitas.
- Banci ka pe ibanndu permainen anak-anak (bongkar pasang kertas) puzzle emaka ibagi Moria i bas piga-piga kelompok. Lakoken permainen alu kerja sama.
- I bas kerja sama si ibahanndu subuk no.1 entah no. 2 kai pelajaren si idatndu?
- Kai nge iakapndu perlu palas guna mbangun rumah tangga gelah paguh?
Pdt. Natalidna Tarigan, MTh