Bahan PJJ 01 – 07 November 2020

IBERE TUHAN KEPENTAREN, KENGASUPEN RAS PENGERTIN

(Evaluasi TI)

Keluaran 35: 30 – 35
Pengangkatan Bezaleel dan Aholiab

35:30 Berkatalah Musa kepada orang Israel: “Lihatlah, TUHAN telah menunjuk Bezaleel bin Uri bin Hur, dari suku Yehuda,
35:31 dan telah memenuhinya dengan Roh Allah, dengan keahlian, pengertian dan pengetahuan, dalam segala macam pekerjaan,
35:32 yakni untuk membuat berbagai rancangan supaya dikerjakan dari emas, perak dan tembaga;
35:33 untuk mengasah batu permata supaya ditatah; untuk mengukir kayu dan untuk bekerja dalam segala macam pekerjaan yang dirancang itu.
35:34 Dan TUHAN menanam dalam hatinya, dan dalam hati Aholiab bin Ahisamakh dari suku Dan, kepandaian untuk mengajar.
35:35 Ia telah memenuhi mereka dengan keahlian, untuk membuat segala macam pekerjaan seorang tukang, pekerjaan seorang ahli, pekerjaan seorang yang membuat tenunan yang berwarna-warna dari kain ungu tua, kain ungu muda, kain kirmizi dan lenan halus, dan pekerjaan seorang tukang tenun, yakni sebagai pelaksana segala macam pekerjaan dan perancang segala sesuatu.

Tukang-tukang si beluh erbahan Kemah si Badia

35:30 Nina Musa man bangsa Israel, “TUHAN enggo milih Besalel, anak Uri, kempu Hur i bas suku Juda nari.
35:31 Ia enggo idemi Dibata alu kesahNa, janah enggo iberekenNa man bana kepentaren, kengasupen, ras pengertin erbahan kerina barang-barang si mejilena,
35:32 guna ngerencanaken potongen barang si mejile, jenari erbahanca i bas emas, pirak ras tembaga nari;
35:33 erbahan permata-permata ras namakenca i bas bingkena; erbahan ukir-ukiren kayu, ras erbage-bage dahin si deban, erbahan barang-barang si mejilena.
35:34 Man Besalel ras man Oholiap anak Ahisamah, i bas merga Dan nari, enggo ibereken TUHAN kengasupen ngajarken kebeluhenna ertukang man kalak si deban.
35:35 Man bana duana enggo ibereken TUHAN pemeteh i bas erbage-bage dahin jadi tukang ukir, ras tukang tenun si ngasup erbahan lenen halus; wool biru, ungu, ras megara; ras uis si deban. Ia ngasup erbahan kai-kai pe janah pentar ka pe ngerencanaken potongen barang si mejile.

Dibata ngkuhi doni enda alu kerina simehuli. Doni itepaNa, manusia ibereNa tanggungjabab guna mpekena-kenasa, janah guna nehi tanggungjabab e manusia ibereNa erbage kepentaren, kengasupen ras pengertin. Emaka i bas sejarah perkembangen doni enda, erbage tahap perkembangen si jadi guna ngkuhi geluh doni enda. I bas paksa ku paksa, tahun ku tahun, geluh manusia reh nukahna erkiteken erbage ‘penemuan’ si banci ikembangken guna kiniulin ras kemajun geluh. I bas sienda me kehadiren kalak sitek, singgeluh erpalasken sura-sura Dibata penting kal guna ngembari, nerangi ras ngarak-ngarak gelah erbage perkembangen enda banci tetap jadi pasu-pasu nandangi doni enda bage pe kemulian man Dibata si meganjangna.

I bas kitab keluaren enda ituriken kerna tukang si beluh erbahan barang si mejile guna ngelengkapi keperlun Kemah si Badia. Tuhan me simereken dahin e, kai ras kuga, IA si nentuken si ndahikenca. Gelarna Besael anak Uri kempu Hur i bas suku Juda nari, guna ndahiken dahin e bage pe si Oholiap anak Ahisamah i bas merga Dan, Dibata me si milih ia. Pemilihen Dibata nandangi kalak si ndahiken sura-suraNa, jelas iperlengkapiNa. Cara Dibata mperlengkapi ia:

• Dibata ndemi kalak si ipilih alu Kesah Na, manusia nggeluh kenca iembuskenNa kesahna ku igung manusia (Kej. 2:7) manusia nggeluh selaku tinepa Dibata. Manusia si ngaloken pendilo ras tugas khusus tole ibereken Dibata kesah Na guna ngkuasaisa gelah payo iantusi dingen idahikenna tugas khusus e. Kalak siidemi kesah Dibata ngenca ngasup ndahiken dahinNa alu mehuli (oge Jes. 61:1) janah adi la iandalkenna kesah Dibata rontang me dahin siidahikenna e (oge. 1 Sam. 16:14)
• Ibereken Dibata man bana kepentaren, kengasupen ras pengertin banci ikataken teluna biak enda jadi sada paket guna ngasup ngelai dingen ndahiken dahin Dibata. La banci manusia la pentar, lit pemetehna janah ngasup makeken pemetehe, ngasup mabasa seh iangkaina kerina sura-sura Dibata. Bagi nina kuan-kuan ‘pengetahuan tanpa iman buta dan iman tanpa pengetahuan akan buta’.
  • Tujun Dibata mere kepentaren, kengasupen ras pengertin e guna:
  • Erbahan kerina barang si mejilena guna Kemah si Badia, tentuna enda hal simbaru man bana sabab sedekah enda langa lit Kemah Si Badia. Emaka kai siibahanna e jadi sipemena dingen isuraken Dibata, siibahan e simejilena termasuk guna pemakenna
  • Pentar ngerancang potongen si mejile, bentuk Kemah e eme karya pertama dingen ikuten kubas masa sireh, ia me arsitek si ipilih Dibata
  • Kengasupen ngajarken kebeluhen ertukang, tentuna labo ngasup ia duana erbahanca kerina keperlun e tapi arus isampati si deban tapi ia me si ngajarken kai ras kuga erbahan sue ras rancangen si enggo ibahanna
  • Pemeteh si ibere man bana termasuk jadi tukang ukir, tenun, kerina siiperluken guna dahin si ibereken Dibata man bana

Bage me i bas perkembangen geluh bangsa Dibata, mulai ndilo Abram nggeluh alu pindah sada ingan ku ingan si deban (nomaden) kenca Israel ndarat i Mesir nari, i bas pedalanen, Dibata ngaturken kegeluhen ersembah simerluken Kemah Si Badia ingan jumpa ras Dibata. Arah kegeluhen si Besael ras Oholiap teridah la saja kepentaren, kengasupen ras pengertin ibereken Dibata tapi seh mendeteil, ketrampilen guna erbahan kai si perluken. Bage me cara Tuhan tetap ngkuhi geluh manusia, tetap IA mereken pemeteh guna ngasup ‘menemukan’ ras erbahan erbage alat (media) guna ngkuhi geluh manusia.

Geluh manusia reh erkembangna arah revolusi industri gelombang pertama (revolisi industry 1.0) si ibenaken i bas abad 17 i Inggris terus ku Eropa ras Amerika. Kenca e gelombang ke dua (revolusi industry 2.0) i bas abad 18 ija enggo idatken dingen ipakeken tenaga listrik guna mpenukah produksi, distribusi ras si debanna. Perkembangen seterusna gelombang peteluken (revolusi industry 3.0) tahun 1970 i Amerika alu idatken sistem teknologi informasi ras komputerisasi janah enda minter kal erkembang lebih pedas ibandingken gelombang 1 ras 2. Kenca e tahun 2000-an gelombang pe empatken (revolusi industry 4.0) penerapen teknologi modern i bas kerina aktivitas ekonomi, produksi seh ku konsumsi. Si erbahanca lanai lit baleng (batas) kerina kegiaten subuk fisik, digital bage pe biologi.

I bas sienda la saja kerina e jadi kiniulin tapi pe turah perbeben ija manusia la terjeng ngkuasai ntah ngaturken kerinana tapi manusia enggo iatur, ikuasai ulih si ia jine erbahanca. Manusia iperbudak kepentarenna enggo kecandun teknologi, lanai merhat erteman ras kalak si deban secara nyata enggo riahen iakapna i bas dunia maya (dumay) janah la sitik simakekenca guna kejahaten (nipu). Manusia si arus makeken kepentaren, pengertin ras kengasupen si ibere Dibata guna meteh, nandai apai si salah, si maba ku kebenen ntah apai si payo maba ku kegeluhen singena ate Dibata. Nandai apai sura-sura Dibata, apai sura-sura dagingta.

Emaka kerina ulih kepentaren ras kengasupen manusia i bas ndatken erbage alat ntah pe media informasi teknologi arus idemi pengertin si mbages kerna kegeluhen ras sura-sura Dibata guna kiniulin kerina tinepa Dibata subuk i bas jabu, tole mpersadaken jabu, i bas ingan erdahin nampati guna erdahin bage pe hubungenta sapih – sapih manusia ras Dibata pe mpedeher. Emaka erbage kejahaten si turah alu makeken sie kerina arus si tadingken alu makeken kepentaren, kengasupen ras pengertin i bas Dibata nari.

EVALUASI:
Kai nge enggo si ban i bas rangka kebersaman secara oikumene?

DISKUSI:

1. Turiken pengangkandu kerna Dibata mereken kepentaren, kengasupen ras pengertin i bas konteks jamanta sigenduari man banta!
2. Diskusikenlah ulih perkembangen teknologi man banta, jabunta ras perpulungenta subuk positif ras negatifna!

AKSI:
Si bahan i bas jabuta waktu ija kita la pegeluh HP ras-ras.

USULEN LAGU:

1. KEE. 020 – Reh Kam Min, Reh Kam Min
2. KEE. 381 – Sura – Sura Yesus Bangku
3. KEE. 323 – Sura – Sura Daging Lawanlah
4. KEE. 338 – Ulu Tuah Kam Kusembah

TOPIK PERTOTON SYAFAAT:

1. Ngawan perpulungen GBKP nggejabken maka Dibata simere kepentaren, kengasupen ras pengertin man bana.
2. Ngasup niksiki simehuli ras si la mehuli ulih dampak perkembangen revolusi industry i bas kegeluhen.
3. Ngawan GBKP njadiken kerina perkembangen jaman jadi pasu – pasu man bana.

Pdt. Suenita br Sinulingga, M.Th.