ALOKENLAH TEMANNDU
(Oikumene)
Roma 15: 7 – 13
15:7 Sebab itu terimalah satu akan yang lain, sama seperti Kristus juga telah menerima kita, untuk kemuliaan Allah.
15:8 Yang aku maksudkan ialah, bahwa oleh karena kebenaran Allah Kristus telah menjadi pelayan orang-orang bersunat untuk mengokohkan janji yang telah diberikan-Nya kepada nenek moyang kita,
15:9 dan untuk memungkinkan bangsa-bangsa, supaya mereka memuliakan Allah karena rahmat-Nya, seperti ada tertulis: “Sebab itu aku akan memuliakan Engkau di antara bangsa-bangsa dan menyanyikan mazmur bagi nama-Mu.”
15:10 Dan selanjutnya: “Bersukacitalah, hai bangsa-bangsa, dengan umat-Nya.”
15:11 Dan lagi: “Pujilah Tuhan, hai kamu semua bangsa-bangsa, dan biarlah segala suku bangsa memuji Dia.”
15:12 Dan selanjutnya kata Yesaya: “Taruk dari pangkal Isai akan terbit, dan Ia akan bangkit untuk memerintah bangsa-bangsa, dan kepada-Nyalah bangsa-bangsa akan menaruh harapan.”
15:13 Semoga Allah, sumber pengharapan, memenuhi kamu dengan segala sukacita dan damai sejahtera dalam iman kamu, supaya oleh kekuatan Roh Kudus kamu berlimpah-limpah dalam pengharapan.Berita Si Meriah isehken pe man kalak si labo Jahudi
15:7 Bagi Kristus enggo ngaloken kam, kam pe alokenlah temanndu sapih-sapih kam gelah terpuji Dibata.
15:8 Sabap kukataken man bandu maka Kristus enggo erdahin guna kalak Jahudi lako encidahken maka Dibata setia i bas nehken padanNa man nininta nai.
15:9 Janah gelah kalak si labo Jahudi pe banci muji Dibata erkiteken perkuah ateNa. Bagi lit tersurat i bas Pustaka Si Badia, “E maka kukataken bujur man baNdu, i tengah-tengah bangsa-bangsa si deban, rende me aku muji gelarNdu.”
15:10 Tole nina, “O kam kalak si labo Jahudi, meriahlah atendu ras bangsa pilihen Dibata.”
15:11 Lit ka pe tole tersurat, “Pujilah Tuhan o kam kerina kalak si labo Jahudi; pujilah IA o kerina bangsa.”
15:12 Bage pe nina Nabi Jesaya, “Turah me tunas i bas urat Isai nari, keke me IA pagi guna merentah kalak si labo Jahudi, janah man baNa me kalak si labo Jahudi e erpengarapen.”
15:13 Dibata sumbul pengarapen, IAlah ndemi kam alu keriahen ras kemalemen ate, erpalasken kinitekenndu man baNa, gelah erkiteken gegeh Kesah Si Badia reh tambahna pengarapenndu man baNa.
Oikumene, banci i ertiken i bas dua kata Junani nari, eme ‘oikos’, si ertina rumah entah pe ingan tading, ras ‘menein’, si ertina ngiani, tading. Alu bage erti oikumene eme ngiani rumah alu ras-ras. Ise singiani rumah e, tentuna labo kalak Kristen saja tapi pe penganut agama, suku ras bangsa si deban rikut pe tinepa Dibata si deban, umpamana sinuan-sinuan, rubia-rubia, deleng ras si debanna.
Mula-mulana nari gereja enggo ngalaken persoalen kerna kinierbagen, umpamana eme masalah Jahudi ras non Jahudi. Pokok persoalenna eme “arus kin adat istiadat Jahudi ilakoken man kalak Kristen si labo Jahudi?” Guna ndungi persoalen enda, rasul-rasul ngelakoken sidang i Jerusalem, janah ndatken sada keputusen si ngataken maka kalak Kristen si labo Jahudi, labo iwajibken ngelakoken adat istiadat Jahudi (bdk. Perb. 15). Amin bage gia i bas perkembangen gereja selanjutna, perpecahen tetap labo banci ihindari. Perbedan pandangen kerna sada persoalen ras perbedan tafsiren i bas sada teks jadi pemicu perpecahen. I bas abad si pemena enggo mulai lit erbage-bage aliren i bas gereja, terus pe ku abad pertengahen bage pe ku zaman reformasi.
Secara garis besar, lit piga-piga aliren gereja i doni enda, eme Gereja Ortodoks Timur, Gereja Katolik Roma, Gereja-gereja Protestan, bage pe Gereja Injili si beraliren kharismatik. Kinierbagen denominasi gereja si lit i doni enda kedungenna seh ku Indonesia. Kinierbagen e megati kal erbahanca lit pengkotak – kotaken, janah megati pe sada denominasi gereja erpengakap maka ia me sibenarna, ia si mehulina ras ia si badiana asangken denominasi gereja si debanna. Em sababna maka seh kal perluna geraken oikumene guna tetap njaga kiniersadan gereja-gereja ija Tuhan Jesus sebagai Kepala Gereja.
Arah bahan renungenta enda Paulus ngingetken mulihi man perpulungen Roma gelahna ulanai lit pengelompoken antara Jahudi ras Non Jahudi. Paulus ngingetken uga Kristus enggo ngaloken perpulungen e i bas kerina kecibalna, si labo kin pe ndai atan tapi iatankenNa. E maka selaku manusia si enggo leben ialoken Jesus, patutlah min ia pe ngasup ngaloken kalak si deban aminna pe la seri ras ia. Kata enda pe seh man banta, bagi Kristus enggo leben ngaloken kita i bas kerina kekurangenta, kita pe patut nge ngaloken kalak si deban aminna pe pelain-lain suku, bangsa ras denominasi gerejanta. Adi Tuhannta Jesus Kristus pe ngidah kerina jelma seri ras perlu iselamatken, engkai maka kita milih-milih jelma? Engkai maka kita ngotak-kotakken jelma? Adi Tuhanta Jesus Kristus pe ngit ngaloken kerina jelma si reh man banNa, engkai maka mesera siakap ngaloken kalak si berbeda ras kita? Kinierbagen labo jadi alasen la ngaloken kalak si deban. Tapi kinierbagen e nge si erbanca mejile, la obahna bagi paduan suara, sora si pelain-lain ipadu jadi sada sora, ndauh lebih sikap megisa, asangken sada jenis sora saja ngenca. Emaka semangat oikumene ibenaken i bas dirinta sekalak-sekalak si mpeturah semangat keesaan, semangat kiniersadaan si palasna eme kiniteruken ukur.
Sibukalah dirinta man kerina suku, bangsa ras agama si deban bage pe kerina tinepa Dibata gelahna banci ras-ras erdahin guna mpekena-kena kuta, lingkungen, negara, bage pe doni enda. Erbage-bage hal si banci ilakoken i bas “memerangi” pinakit sosial (judi, penyalahgunaan Narkoba, korupsi, kerusaken lingkungen, ras si debanna.) Adina kin kita ersada dingen erdahin ras-ras. Bahanlah maka arah kita nehken kekelengen, keadilen, kebenaren i tengah – tengah kinierbagen, kerina bangsa banci muji Dibata. Jesus me si jadi usihenta, emaka tetaplah kita ersada ras la alu njaga hubungenta ras la segelah ipengasupNa kita guna njagai hubungenta ras kerina manusia bage pe tinepa Dibata si deban.
Isingetken Paulus terdauhen maka Dibata tetap setia i bas perpadanen Na. Dibata enggo nepati padanna man Abraham i bas Kejadin 12, ras iulihi bas Kejadin 17, tupung Dibata mereken Taneh Kanaan, Bage pe padan keselamaten i bas Dibata nari si igenepi arah Jesus Kristus, tujunna em gelah kerina bangsa-bangsa muji Dibata, subuk kalak Jahudi bage pe si labo kalak Jahudi. Alu litna semangat bage pe kegiaten oikumene, banci jadi kesaksin man kalak si deban kerna perbahanen Dibata. Paulus nutup bagin surat enda alu pasu-pasu: “Dibata sumbul pengarapen, la lah ndemi kam alu keriahen ras kemalemen ate, erpalasken kinitekenndu man baNa, gelah erkiteken gegeh Kesah Si Badia reh tambahna pengarapenndu man baNa.” Enda ngingetkenca man banta segelah tetap ngeluh erpengarapen man Dibata. I bas erpengarapen e, kita idemi alu keriahen ras kemalemen ate. Amin kai pe sekali jadi bas geluhta genduari enda, tek kita adi tetap erpengarapen man Dibata, Kesah Si Badia si mereken gegeh man banta gelah reh tambahna pengarapenta nangdangi kegeluhen si terulin i bas Jesus Kristus, janah reh ngasupna kita ngaloken kalak si deban si berbeda ras kita.
EVALUASI:
Kai dage enggo silakoken aksi guna ngelitken dana Pl i bas sektor entah runggunta?
DISKUSI:
- Kai nge sierbahanca maka megati kita la ngasup ngaloken temanta si la bali ras kita?
- Kai nge si bahan gelah kita banci nggeluh erdame ras kerina jelma bage pe ras tinepa Dibata si debanna?
AKSI:
I bas rapat kuta entah rapat oikumene siusulken ngelakoken kegiaten gotong royong bersama antar gereja ras antar agama mbersihkеn daerah ntah pe lingkungenta.
USULEN LAGU:
- KEE. 209 – Perpulungen Ersadalah
- KEE. 281 – Kek’lengen Yesus Kempak Manusia
- KEE. 257 – Siberitaken Berita Si Meriah
- KEE. 254 – Isuruh Dibata
TOPIK PERTOTON SYAFAAT:
- Gelah kerina ngawan perpulungen ngasup ngaloken kerina jelma si lit bas sekelewetna aminna pe la seri agama, suku, bangsa ras si debanna.
- Gelah gereja-gereja si lit bas Doni, khususna i bas Indonesia enda ngasup encidanken keleng ate Kristus arah kekelengenna man kerina tinepa Dibata.
- Gelah kerina pemimpin-pemimpin gereja ibere Tuhan hikmat guna tetap ndarami dalan menuju kiniersadan gereja-gereja guna encidahkеn keleng ate Kristus man doni enda.
Pdt. Ebenezer Karo Sekali, S.Si