Amsal 23: 24 – 25
23:24 Ayah seorang yang benar akan bersorak-sorak; yang memperanakkan orang-orang yang bijak akan bersukacita karena dia.
23:25 Biarlah ayahmu dan ibumu bersukacita, biarlah beria-ria dia yang melahirkan engkau.Kuan-kuanen 23: 24 – 25
23:24 Malem ate bapa adi anakna erkemalangen man Dibata; ersurak pusuhna adi pentar anakna.
23:25 Bahanlah maka megah iakap nande bapandu; malemlah ate diberu si mupusken kam.
BAHANLAH MEGAH AKAP ORANGTUA
(HUT Saitun GBKP)
TUJUN: Gelah Moria:
- Meteh maka malem kal ate orangtua adi anakna mpehaga ia.
- Reh beluhna ngergaken orangtua.
METODE PA: Nonton bareng & aksi.
Kata Penaruh
Lit si ngatakenca maka umur jelma reh gedangna reh dekahna adi rusur malem atena, megah akapna dingen ersurak pusuhna. Tapi kebalikenna adi rusur ia rukur gulut, tersinggung, megelut (kecewa) erbahanca urak semangatna nggeluh. Kerina orangtua termasuk Moria terlebih Saitun pe ersura-sura kal gelah datca keriahen ras kemalemen ate i bas geluhna kususna reh arah anakna nari. Sura-sura si enda jadi adi anakna bagi ukurna. Tapi rikutken kiniteken kristen, kalak si tek arusna mehamat, ngergaken orangtuana alu engkelengisa erdandanken anakna mbiar man Dibata.
PA-nta sendah si kawiten ras HUT Saitun, kuga kalak Jahudi si nuria arus erlagu langkah si payo dingen benar nandangi orangtuana.
Mpebagesi Pengangkan Kerna Ogen.
Kuan-kuanen 23:24-25 enda, emekap kata-kata bijak si biasa kal ibelasken dingen ilakoken i tengah-tengah kalak Jahudi. Kata bijak enda itujuken man kerina kalak Jahudi kuga ia arusna erlagu langkah nandangi orangtuana.
Rikutken ogenta, kalak si ngasup mpehaga, ngergai dingen mehamat man orangtua emekap kalak si erkemalangen man Dibata. Enda me orat geluh kalak Jahudi. Malem ate bapa adi anakna erkemalangen man Dibata, ersurak pusuhna adi pentar anakna. Malem ate bali ertina ras ketuahen, simpar pasu-pasu. Jadi, adi anak malang man Tuhan, orangtuana pe dat pasu-pasu. Banci kataken anak e me dalan Dibata masu-masu orangtuana. Emaka ikataken ersurak pusuh orangtua adi anakna pentar. Bahanlah maka megah iakap nande bapandu, malemlah ate diberu si mupusken kam. Enda sada pengajaren man kerina anak-anak kalak Jahudi gelah tetap erkemalangen man Tuhan, si ituduhken alu mahamat dingen mehaga orangtuana. Ibegikenna kata ajar orangtuana, idalankenna i bas kegeluhenna, ikelengina orangtuana asa gegeh ras kepentarenna. Emaka i bas sepuluh hukum torat pe, iajarken erkemalangen man Dibata, kenca e hubungen sapih-sapih manusia, ibenaken alu kata, “mehamatlah man orangtua gelah gedang umur i taneh si ibereken Tuhan man bangsa e (Ket.20:15).” Tupung ayat enda isuratken enterem kal kalak si la erkemalangen man Dibata (Israel ibuang ku Babil, erkiteken la erkemalangen man Dibata.) Banci ikataken maka kalak Jahudi seh kal ngajarken anakna gelah min ia erkemalangen man Dibata. Sabap mbelin hubungenna erkemalangen man Dibata ras mehamat man orangtua.
Pengkenaina.
Kerina Moria tentu lit orangtuana janah kerina Moria meteh maka mehamat man orangtua eme sada kearusen. Salah sada syarat maka umur ipegedangken Dibata enda i bas kalak Jahudi emekap mehamat ras ngkelengi orangtua. Sabap bagi kata ogenta ndai gedang kap umur jelma adi rusur malem atena. Emaka labo salah adi gedang ateta umur orangtuanta, bahanlah maka melem atena rusur si bahan. Payo adina umur geluh Dibata si merekenca dingen nentukenca, tapi umur ras dekahn nggeluh i doni enda, la terjeng wari ras tahunna tapi pe kualitas geluh si ibentasi. Dem keriahen ras jadi pasu-pasu man doni enda. Nai, ope lit pelayanen Lansia si gelarna Saitun, kerina urusen Lansia iurus alu arihken ras Runggun Gereja. Tapi genduari enggo lit organisasi pelayanen si ngelayani Lansia, adi i bas GBKP igelari Saitun. Bujur ninta man Dibata sabap nggo lit Pengurus Saitun i bas Gerejanta. Bage gia selaku Moria labo salahna adi si darami lalap perbahanen si erbahanca malem atena, megah akapna dingen ersurak-surak pusuhna gelah gedang umur. Enggo pe kita orangtua, tugasta denga nge erbahanca malem ate orangtuanta.
Nonton Bareng:
Judul: Kisah Inspirasi menghargai orangtua terutama ibu
Film: https://www.youtube.com/watch?v%3DIKP3N7-mfhg
Diskusi: Ugange penggejapenndu adi malem ate orangtuanta si ban?
Pdt. Phestanta Surbakti