Ogen : Jakub 1: 2-8
Tema : Tahan Uji
Tujun Gelah Mamre:
- Meteh lit kesangapen ibas erbage bage percuban
- Tetap mengandalken Tuhan maka perbeben iubah jadi pasu pasu
Metode : Aksi ras Sharing/evaluasi
1:2 Saudara-saudaraku, anggaplah sebagai suatu kebahagiaan, apabila kamu jatuh ke dalam berbagai-bagai pencobaan, 1:3 sebab kamu tahu, bahwa ujian terhadap imanmu itu menghasilkan ketekunan. 1:4 Dan biarkanlah ketekunan itu memperoleh buah yang matang, supaya kamu menjadi sempurna dan utuh dan tak kekurangan suatu apapun. 1:5 Tetapi apabila di antara kamu ada yang kekurangan hikmat, hendaklah ia memintakannya kepada Allah, –yang memberikan kepada semua orang dengan murah hati dan dengan tidak membangkit-bangkit–,maka hal itu akan diberikan kepadanya. 1:6 Hendaklah ia memintanya dalam iman, dan sama sekali jangan bimbang, sebab orang yang bimbang sama dengan gelombang laut, yang diombang-ambingkan kian ke mari oleh angin. 1:7 Orang yang demikian janganlah mengira, bahwa ia akan menerima sesuatu dari Tuhan. 1:8 Sebab orang yang mendua hati tidak akan tenang dalam hidupnya.
KATA PENARUH
Ibas Dibata enggo njadiken manusia si pemena (Adam ras Hawa) minter lit percuban i bas iblis nari. I bas litna percuban e, manusia ndabuh ku bas dosa. Percuban-percuban la perneh ngadi reh engkenai manusia. Tuhan Yesus jine pe kenca erpuasa icubai iblis telu kali. Jesus menang naluken percuban iblis. Bagepe segedang-gedang geluh Jesus i bas ngajar ras ngelai, kalak Parisi megati ncubai Jesus, tapi Jesus tetap ngasup naluken percuban e. Kenca Jesus nangkih ku Surga, Rasul-rasul ras Kalak Kristen nerusken dahin bagi siipedahken Jesus. Perpulungen ngenanami erbage-bage percuban ras kiniseran. I bas kecibal si bagenda rupana me perpulungen ipegegehi segelah ngasup ngalaken percuban ras megenggeng i bas ngalaken percuban-percuban si lit.
URAIAN
Jakub nehken suratna man perpulungen selaku anak-anak Dibata si merap i taneh perlajangen. Ertina man kerina kalak si enggo tek man Jesus Kristus, si enggo merap, mengongsi ras arus nadingken kutana erkiteken kinitekenna man Jesus Kristus. I bas kecibal ngenanami erbage-bage percuban e iajarken Jakub:
1. Sada kesangapen adi reh erbage-bage percuban
Jakub ngajuk perpulungen segelah ola min leben erndele ate, aru ate ntah susah i bas bas litna erbage-bage percuban, tapi ngasup min ngidah percuban-percuban si reh engkenai kita, lit kap ulihna si maba kiniulin. Percuban-percuban pasti lit reh, si perlu man ukurenken eme kuga ngalakenca, labo kuga maka reh percuban e ntah kuga ngelakken percuban e. Adi ibenai alu perukuren si jore (positiff ras optimis) maka paguh me kita ngalaken percuban-percuban si lit.
2. Kiniteken erbahanca kalak jadi megenggeng
Manusia labo ngasup ngalaken percuban, alu penampat Dibata maka kalak si erkiniteken tetap tahan i bas ngalaken erbage-bage percuban si reh. Jadi Jakub ngajuk kalak si erkiniteken maka tetap erkiniteken, ertoto man Dibata, mindo penampat. Ertoto man Dibata alu bulat ukur ras kiniteken si tetap, sabap Dibata kap mereken kepentaren man kerina jelma alu melumbar dingen dem perkuah ate. Tapi ertoto arus tek, maka Dibata kap Si Mada Kuasa si naluken kerina percuban-percuban si reh. Ertoto ola monce-once, kalak si monce-once bali kap ras gelumbang i lawit si ibentuken angin ku jah ku jenda. Kalak si bage ertupang ukurna; la ia ngasup muat keputusen i bas kerina si ibahanna. E maka la pada iarapkenna ndatken kai pe i bas Tuhan nari. Kalak si monce-once ukur ras kinitekenna bali kap ras kalak si kurang kinitekenna.
3. Kalak si megenggengi bas ngalaken percuban kedungenna jadi dewasa
Kinigenggengen i bas ngalaken erbage-bage kiniseran erbahanca kalak si tek jadi paguh, tahan uji ras kedungenna jadi dewasa. Dewasa ertina, anem gia kegeluhenna paksana ngenanami erbage-bage percuban ras kiniseran la aru atena, tek ia maka percuban e pasti lit nge tampukna, ras kedungenna man kalak si tetap setia man Dibata ngaloken upah eme rudang-rudang kegeluhen si rasa lalap. I bas pengajaren Paulus nina “tapi megah pe siakap i bas kiniseranta, sabap sieteh maka arah kiniseran turah saber ate. I bas saber ateta e teridah maka kita enggo menang i bas pengujin, janah erkiteken kita enggo menangi bas pengujin, lit pengarapenta. Pengarapenta enda labo erbahanca kita kecewa, sabap Dibata enggo ncurcurken kekelengenNa ku bas pusuhta arah Kesah Si Badia. la me pemere Dibata man banta” (Roma 5:3-5).
APLIKASI
Kinata i bas kegeluhen enda, nai-nai nari seh paksa enda maka erbage-bage percuban tetap nge lit. Man banta selaku Mamre, percuban-percuban banci saja reh arah erta doni (jadi bayak ntah jadi musil), arah pinakit, ndehara, anak-anak ras sidebanna. Bagi nina Petrus “Tenanglah kam tapi metengetlah! Sabap Iblis imbangndu e gawah-gawah ku jah ku je bagi sada singa si erngaung ndarami si man jerngemenna” (1 Petrus 5:8).
Ibas tanggal 26 Agustus 2020 enda si peringeti me HUT Mamre, jadi perenungen man Mamre kerna kedewasan i bas ngalaken erbage-bage percuban. I bas enggo tambah sada tahun umur kategorial Mamre, reh dewasana lah min i bas kiniteken. bas litna percuban, ola kiam, sabab ku ja pa pe kita kiam iayak-ayakna.
Megati pe kita Mamre kiam ku kede kopi, ntah pe ingan si deban tapi la ndungi kai si jadi percuban e. Si mehulina min, alakenlah percuban e, pindo gegeh man Dibata, tek kita maka ipengasup Na. Alu bage, alu kuasa Dibata maka percuban e nge si kiam, talu erkiteken kuasa Dibata. bas pertoton siniajarken Jesus man ajar-ajaNa lit ije isingetken “…Ola min kami ibaba Kam kubas percuban, tapi olangilah kami idur si ilat nari…” ertina, arah penampat Dibata ngenca maka kita ngasup ngalaken percuban ras la ngelakoken si jahat. Sabab banci jadi, i bas litna percuban-percuban si reh, kita ngelakoken si jahat ntah si ilat.
I bas enggo talu percuban e, maka salih me kiniseran jadi kesangapen, ceda ate jadi keriahen. Enda me pengarapen kalak si erkiniteken sierbahanca kita tetap megenggeng i bas ngalaken erbage-bage kiniseran. Alu dem kiniteken maka anak-anak Dibata pasti isampati Dibata ras kedungenna menang me ngalaken percuban ras ngaloken pasu-pasu idur Dibata nari. Bagi nina Jesus “Ketuahen kalak si ngenanami kiniseran erkite-kiteken nehken peraten Dibata; sabap man bana me Kinirajan Surga. Ketuahen me kam adi erkite-kiteken kam ajar-ajarKu igombang-gombangi, ipesega-sega dingen ipelawes kalak kam janah alu kata guak ipalitkenna si jahat man bandu. Ermengkah dingen meriahlah atendu, sabap enggo isikapken Dibata upahndu simbelin i Surga” (Mat. 5:10-12).
AKSI RAS SHARING/EVALUASI
- Tanggal 26 Agustus eme peringeten HUT Mamre, rayaken HUT Mamre i bas sektor ntah Runggunta.
- Tep-tep anggota Mamre erbahan sharing/evaluasi kerna dirina bagepe anak- anak jabu. Aturken segelah pulung ras kerina anak jabu (ndehara ras anak- anak). I bas pulung e, pindoken man ndehara ras anak-anak segelah nuriken kerna kuga pengakapna kerna bapa sedekah enda ras i bas kai-kai si man pekenan segelah bapa reh dewasana i bas kiniteken. Bapa pe banci nuriken sura-surana si mehuli man anak-anak jabuna. Sharing/evaluasi enda iujungi alu pertoton.
USULEN ENDE-ENDEN
- KEE GBKP No. 289:1, 2
- KEE GBKP No. 222:1, 2
- KEE GBKP No. 234:1-5
- KEE GBKP No. 287: 1-3
Pdt. DR. Kalvinsius Jawak
HP. 081361419249