NGUDA TAPI PENTAR
(HUT PERMATA 12 September 2020 pe 72 tahunken)
1 Raja-raja 3: 4 – 9
3:4 Pada suatu hari raja pergi ke Gibeon untuk mempersembahkan korban, sebab di situlah bukit pengorbanan yang paling besar; seribu korban bakaran dipersembahkan Salomo di atas mezbah itu.
3:5 Di Gibeon itu TUHAN menampakkan diri kepada Salomo dalam mimpi pada waktu malam. Berfirmanlah Allah: “Mintalah apa yang hendak Kuberikan kepadamu.”
3:6 Lalu Salomo berkata: “Engkaulah yang telah menunjukkan kasih setia-Mu yang besar kepada hamba-Mu Daud, ayahku, sebab ia hidup di hadapan-Mu dengan setia, benar dan jujur terhadap Engkau; dan Engkau telah menjamin kepadanya kasih setia yang besar itu dengan memberikan kepadanya seorang anak yang duduk di takhtanya seperti pada hari ini.
3:7 Maka sekarang, ya TUHAN, Allahku, Engkaulah yang mengangkat hamba-Mu ini menjadi raja menggantikan Daud, ayahku, sekalipun aku masih sangat muda dan belum berpengalaman.
3:8 Demikianlah hamba-Mu ini berada di tengah-tengah umat-Mu yang Kaupilih, suatu umat yang besar, yang tidak terhitung dan tidak terkira banyaknya.
3:9 Maka berikanlah kepada hamba-Mu ini hati yang faham menimbang perkara untuk menghakimi umat-Mu dengan dapat membedakan antara yang baik dan yang jahat, sebab siapakah yang sanggup menghakimi umat-Mu yang sangat besar ini?”3:3 Salomo erkeleng ate man TUHAN janah iikutkenna kerina pedah bapana Daud, tapi igelehna ka pe asuh-asuhen jenari ibahanna e jadi persembahen i datas erbage batar-batar si pedauh-dauh.
3:4 Sekali jadi lawes raja ku Gibeon nehken persembahen sabap i je me batar-batar si terberitana kal. I bas paksa-paksa si enggo lepas isehkenna i je piga-piga ratus persembahen tutungen.
3:5 I bas berngi e teridah TUHAN man bana i bas nipi, janah isungkunNa raja, “Kai atendu Kubereken man bandu?”
3:6 Ngaloi Salomo, “Enggo rusur icidahkenNdu kekelengenNdu si mbelin man bapangku Daud, suruh-suruhenNdu, janah mehuli ia, patuh, ras bujur man bandu, janah terus nge icidahkenNdu man bana kekelengenNdu si mbelin dingen tetap, alu mereken sekalak anak dilaki man bana si sendah enggo jadi raja nggantiken ia.
3:7 O TUHAN Dibata, enggo ibereNdu aku nggantiken bapangku jadi raja, aminna gia aku nguda denga kal janah la kueteh kuga ndalanken dahin raja.
3:8 Enda aku ringan i tengah-tengah bangsa si enggo ipilihNdu jadi sikerajangenNdu, bangsa si teremna la terkira.
3:9 E maka berekenlah man bangku kepentaren ngerajai bangsaNdu alu kebujuren ras kebeluhen mbedaken si bujur ras si jahat. Adi la bage, i ja nge aku ngasup ngaturken bangsaNdu si mbelin enda?”
1 Raja-raja 3 nuriken catatan sejarah kerna pemerintahan raja Salomo i Kerajaan Israel, terbagesen i turiken ije kerna pertoton Salomo mindo hikmat/kepentaren. Paksa sie, kerina raja iarapken segelahna mbelin kesetiaanna nandangi Tuhan sabab kesuksesan ntah keberhasilen bangsa inehen arah kuga kesetiaan raja nandangi Dibata, janah ise sinembah gana gana ras lalit ketaatenna maka sinandangi reh emekap bencana.
Milih siterpenting si ilebeken Salomo nentuken kegeluhenna. Daud selaku bapa enggo mereken usihen kiniteken si mehuli nandangi anakna Salomo, seh makana Salomo pe ngasup ncidahken kegeluhen kiniteken alu taat nandangi Dibata. Salomo mbenaken masa kepemerintahenna alu kiniteken ras kekelengen kempak Dibata (bdk.ay.3). Salomo selaku kalak sierkiniteken ncidahken kinitekenna alu perbahanen si nyata, salah sadana nehken persembahen tutungen man Dibata. I bas paksa si e ernipi Salomo janah ercakap-cakap ras Dibata, i sungkun Dibata kempak Salomo kai atena ibereken man bana, emaka nina Salomo ngaloisa alu dem kesadaren kerna keleng ate Dibata si tetap igejapkenna mulai arah pemasu-masu Dibata kegeluhen bapana, ibereken kebujuren kepatuhen, simehuli ras ibereken ka anak dilaki eme Salomo tanda kekelengen Dibata man Daud seh ku keputusen njadiken Salom gancih bapana Daud selaku raja. I bas umur singuda denga kepercayaan ntah pe tanggung jawab si mbelin iendesken man Salomo. Emaka sinipindokenna i bas toto eme kebujuren ras kebeluhen mbedaken si bujur ras si jahat. Sabab Salomo sadar adi labo ibereken Dibata sie kerina man bana, labo ia ngasup ngaturken bangsa simbelin e.
Salomo selaku kalak singuda denga ipilih Dibata guna nerusken pendahin bapana Daud selaku raja Israel. Enda banci jadi erkiteken Salomo la kurang kekelengen ras usihen kiniteken sinialokenna arah bapana. Salomo nggit iajari bapana ras nggit ngusih perbahanen simehuli si enggo iajarken bapana. Subuk kerna nggeluh sapih sapih manusia bage pe nggeluh erkiniteken alu payo sabab arah sie kerina, kekelengan Dibata me mpengasup ia ndahiken dahin kepemimpinen e.
“Kecil-kecil sicabe rawit” nina kin enda antusenna maka amin gia kitik rupana cina cur tapi meser kel nanamna. Nandangi anak-anak PERMATA iarapken gia nguda umurna tapi pentar min perukurenna. Kai nge ndia sibanci erbahanca enda jadi? PERMATA arus ersembah ras ertoto alu tutus man Dibata, sabab ije ulu kepentaren e, bagi si enggo ilakoken Salomo ia nggit ngikutken kata ajar orangtuana janah idalankenna siniajarken orangtuana. Labo ue-ue pangumbat, iueken kerina gelah ula rubat tapi la idalanken sia-sia me penguekenta e. Selaku orangtua, tedeh ate ngidah anak-anak sikap geluhna bagi Salomo (labo berarti arus jadi raja kesuksesen e, tapi dikune meteh mehuli ras tutus ersembah man Dibata pe enggo me mehuli).
Ulang tahun PERMATA GBKP si pe 72 tahunken enda ngajuk PERMATA GBKP banci njadiken kado ulang tahunna eme ngasup meteh si bujur ras si benar janah ndalankenca sebage aksi kinitekenna. Reh tutusna ersembah ras ertoto man Dibata. PERMATA GBKP ngusih si mehuli si i bas orangtua nari bagi Salomo ngusih bapana si Daud. PERMATA GBKP nggit njadiken orangtua teman labo imbang. Dibata mereken kepentaren man PERMATA GBKP i bas kininggitenna ngusih si mehuli ras bujur. Dibata si perkeleng tetap njagai ras ngarak-ngarak, dingen mereken ulih si mehuli, Tutus i bas sekolah ras erdahin, pengerana ras perbahanen bagi si ngena ate Tuhan. Jadi rudang-rudang si mejile i tengah – tengah jabu, masyarakat ras gereja. Si enda banci jadi adi selaku orangtua kita pe jadi usihen nandangi PERMATA ras ndukung PERMATA i bas dahin-dahin gereja. Mereken kesempaten man bana guna ikut makeken kengasupenna gelah banci rasil masa depanna. Bage pe mereken kesempaten ikut ndahiken dahin-dahin Gereja. Runggun gereja pe ngelitken dingen ndukung kai si jadi keperlun PERMATA i bas mpegegehi kinitekenna ras persadanna i tengah-tengah gereja.
Gawah-gawah ku Jakarta. Ula lupa sibaba luahta cimpa.
Muat malem pusuh nande ras bapa. Kebeluhenta rukur nge banci erbahanca.
EVALUASI
Kai nge si ban dukungenta nandangi dahin PWG bas gerejanta?
DISKUSI
- Turikenlah tanda-tanda kalak si nggeluh i bas kepentaren Dibata!
- Kai si enggo ilakokenndu mabai anak nggeluh i bas kepentaren
Dibata?
AKSI
I bas HUT PERMATA GBKP si pe 72 tahunken enda, mari sibereken kado ulang tahun man anakta PERMATA GBKP berupa alat musik (misalna gitar) si banci ipakena guna mendukung PA PERMATA. Pengendesenna banci sibereken ku Pengurus PERMATA.
USULEN LAGU
- KEE. 182 – O Tuhan Kam Tetap
- KEE. 273 – Ingetlah Min Gelar Yesus
- KEE. 201 – Malem Ate Tuhu Tuhu
- KEE. 287 – Kune Bas Geluhta Mara Reh Nderpa
TOPIK PERTOTON SYAFAAT
- Notoken jabunta gelah ngasup setia i bas erkiniteken
- Notoken anak PERMATA GBKP gelah ngasup mbedaken si bujur ras si jahat, nggit iajari ku simehuli ras tetap ersembah man Dibata alu setia.
- Notoken kerina kepengurusen anak PERMATA GBKP tingkat Pusat, Klasis, Runggun, bage pe sektor gelah tutus i bas pelayanan ras megegeh ndalankenca.
- Siturah i bas perpulungen.
Pdt. Oktaria Br. Surbakti, M.Th.