Si Man Ogen
1 Korintus 15: 22
15:22 Karena sama seperti semua orang mati dalam persekutuan dengan Adam, demikian pula semua orang akan dihidupkan kembali dalam persekutuan dengan Kristus.15:22 Sabap bali ras kerina manusia mate erkiteken persadanna ras Adam, bage me pe kerina manusia ipegeluh mulihi erkiteken persadanna ras Kristus.
1 Korintus 15: 51 – 58
15:51 Sesungguhnya aku menyatakan kepadamu suatu rahasia: kita tidak akan mati semuanya, tetapi kita semuanya akan diubah,
15:52 dalam sekejap mata, pada waktu bunyi nafiri yang terakhir. Sebab nafiri akan berbunyi dan orang-orang mati akan dibangkitkan dalam keadaan yang tidak dapat binasa dan kita semua akan diubah.
15:53 Karena yang dapat binasa ini harus mengenakan yang tidak dapat binasa, dan yang dapat mati ini harus mengenakan yang tidak dapat mati.
15:54 Dan sesudah yang dapat binasa ini mengenakan yang tidak dapat binasa dan yang dapat mati ini mengenakan yang tidak dapat mati, maka akan genaplah firman Tuhan yang tertulis: “Maut telah ditelan dalam kemenangan.
15:55 Hai maut di manakah kemenanganmu? Hai maut, di manakah sengatmu?”
15:56 Sengat maut ialah dosa dan kuasa dosa ialah hukum Taurat.
15:57 Tetapi syukur kepada Allah, yang telah memberikan kepada kita kemenangan oleh Yesus Kristus, Tuhan kita.
15:58 Karena itu, saudara-saudaraku yang kekasih, berdirilah teguh, jangan goyah, dan giatlah selalu dalam pekerjaan Tuhan! Sebab kamu tahu, bahwa dalam persekutuan dengan Tuhan jerih payahmu tidak sia-sia.15:51 Perdiatekenlah, kuturiken sada rahasia man bandu: labo pagi kerina kita mate, tapi kerina pagi kita iobah.
15:52 I bas sada detik, i bas singkemirep mata, asum terbegi sora terompet si perpudina. Sabap asum ersora terompet e, kalak si enggo mate ipekeke i bas tempas si la ermasap-masap, janah i bas paksa si e iobah me kita.
15:53 Sabap si ermasap-masap janah si banci mate arus makeken si la ermasap-masap ras si la banci mate.
15:54 Dage kenca si ermasap-masap dingen si banci mate e enggo makeken si la banci ermasap-masap dingen si la banci mate, maka seh me si tersurat i bas Pustaka Si Badia, “Kematen enggo itelen, kemenangen enggo seh.”
15:55 “O kematen, i ja kemenangenndu? O kematen, i ja bisandu?”
15:56 Bisa kematen e me dosa, janah dosa ergegeh erkiteken Undang-undang.
15:57 Tapi bujur ninta man Dibata si mereken kemenangen man banta arah Tuhanta Jesus Kristus.
15:58 Erkiteken si e, o senina-senina si kukelengi, tetaplah ukurndu, ola mbewat-mbewat. Mejingkatlah kam rusur i bas ndahiken dahin Tuhan, sabap ietehndu maka labo percuma dahin si idahikenndu i bas Tuhan.
TEMA: Doni Kematen
TUJUN: Gelah Moria:
- Meteh maka Jesus nggo naluken kematen ras mereken kemenangen.
- Ngangkai maka kematen e la man kebiarenken.
METODE PA: Mengisi Eulogy ras Sharing
Kata Penaruh.
Umumna kisat kalak ngarana kerna kematen, ianggap pantang ras mbiar kita melaskenca. Encakapkenca saja pe kita mbiar, mbiar kita kai si belasken kita e jadi. Umpamana: lit sekalak si sakit, nina man keluargana: “nande-bapa mate ndai nge aku, ku pindo bandu kelengi pagi kempundu e.” Mis nge nina nande e: “ula bage ngerana nakku la tengka bage ibelasken.” Ertina ngerana kerna kematen eme hal si tabu man banta. Mesera kal si akap jujur nangdangi kinata geluhta si ermasap-masap, mate. Umumna engkai maka kalak mbiar mate? Kai nge si ibayangken kita kerna kematen? Lit kalak erpengakap adi enggo mate enggo dung, enggo titik, lanai lit kai pe si man arapenken. Kiniteken kalak Karo si pemena maka kalak si enggo mate lawes jadi begu, emaka lit kalak mperumah begu entah pe si ngasuhi begu jabu. Pengangkan kalak Karo si ndekah pe maka kalak si enggo mate lit denga kawitenna ras kalak si nggeluh emaka ibahan cibal-cibalen i bas kuburen. Erkiteken sie lit kalak si erbahan kuburen jilen asangken rumahna tupung ia nggeluh denga. Perukuren si bage megati lit denga ngaruhna man ngawan perpulungen. I bas perpulungen Korinti pe lit pemahamen si la sue kerna kedungen manusia kenca kematen. Tupung Paulus meritaken Berita Si Meriah i Korinti enggo iajarkenna kerna keselamaten i bas Kristus ras kegeluhen si rasa lalap. Tapi reh ka pengajaren si papak ngataken maka labo lit kinikeken i bas si mate nari (ay.12). Tole pe nina bicara lit kin kinikeken e, uga dalanna kalak mate keke mulihi? Uga tempas kulana? Arah suratna, Paulus mereken pengelayasi kerna kecibal kalak si tek kenca mate.
Mpebagesi Pengangkan Kerna Ogen.
Arah kitab 1 Korinti 15 Paulus mereken pengajaren si mbages man kalak Kristen kerna kematen. Nina Paulus dosa reh arah sekalak manusia, Adam; dosa e engkenai kerina kesusurenna. Dosa mabai ku kematen, bicara la min ndai Adam ndabuh ku bas dosa labo lit kernaten e. Erkiteken dosa Adam kerina manusia erdosa ras mate. Bagi kematen e reh arah sekalak jelma (Adam) emaka kinikeken i bas kematen nari pe reh arah sekalak jelma eme Jesus Kristus. Jesus Kristus eme Manusia si pemena keke i bas si mate nari. KinikekenNa eme jadi jaminen kinikeken kerina kalak si tek. Ibukaken Paulus sada rahasia si mbelin kerna kegeluhen si rasa lalap. Si pemena si perlu si eteh maka i bas wari kerehen Tuhan si peduakaliken labo pagi kerina manusia mate, tapi kerina pagi iobahken. Kita si nggeluh denga pagi bagepe kalak si enggo mate si tek man Jesus, kerina pagi iobahken Tuhan, iberekenNa kula si mbaru. Kula si mulia dingen tahan rasa lalap. Engkai maka kita arus iobah? Sabap kulanta i bas doni enda la seri ras kulanta i surga pagi. Adi kulanta si i bas doni enda ermasap-masap (fana) ras banci mate, tapi kula si arus ipakeken i surga eme kula si tahan rasa lalap (kekal) ras la banci mate. Jadi kulanta i bas doni enda la banci bengket ku surga, emaka iubahken Tuhan me kula ras tendintanta pe iobahNa jadi kula ras tendi si mbaru; kula si mulia, si badia, si banci bengket ku surga. Emaka kematen e jadi pintu bengket ku bas kegeluhen si rasa lalap.
Tupung kulanta pagi iobahken, kentisik ngenca prosesna, sengkemirep mata ngenca. Langa pe sempat manusia rukur kerna sie kula doni enggo iobah jadi kula surga, kula si mulia. Emaka labo terukuri manusia uga cara Dibata ngobahken kita. I bas paksa e pagi terbegi me sora terompet si perpudina. I bas tradisi Israel, terompet iembus guna ndilo umat guna pulung. Bagepe i bas wari kerehen Tuhan e pagi terbegi me sora terompet erdilo guna mpepulung kalak si tek. Kenca bage kerina kalak si enggo mate si tek man Tuhan ipekeke. I je kuasa kematen lanai ergegeh, kematen lanai erbisa sabap kematen enggo italuken. Kemenangen ras geluh si rasa lalap jadi sekerajangenta. Erkiteken sie kematen lanai man kebiarenken. Kematen enggo jadi ende-enden keriahen, sabap kematen jadi pintun bengket ku bas kegeluhen si rasa lalap.
Pengkenaina.
Konfesi GBKP ngataken: “kematian merupakan realitas kehidupan. Melalui kematian tubuh kembali ke tanah dan roh kembali kepada Allah. Kematian disebabkan oleh dosa.” Arah konfesi enda si idah maka kematen eme realita geluh. Amin bage gia kematen la man kebiarenken. Paulus mabai kita ku bas sada kepastin maka lit kegeluhen kenca kematen, kegeluhen si rasa lalap, kegeluhen si terulin asangken kegeluhen si lit i bas doni enda. Ipekeke Tuhan kita i bas kematen nari. La terjeng je ngenca, kalak Kristen arus nginget wari kematenna ras ersikap kerna wari kematenna e. Persikapenta labo persikapen doni misalna mpersiapken kuburen, acara dat, mpesikap maneh-maneh ras sidebanna, perlun asa sie persikapenta me persikapen kiniteken, gelah tetap setia seh mate, la mbewat-mbewat, makeken kesempatan guna erbahan si ngena ate Dibata tupung kita nggeluh denga. Megati mbiar kita mate, sabap si bayangken adi mate kita eriabu ka perbulangennta, mbiar ka kita ulihta latih e kalak sideban ngenanamisa, mbiar kita anakta terlantar ras sidebanna. Sie kerina la man arunken sabap aminna pe kita mate, kematen la ngasup nirangken kita ras Kristus. Aminna pe sirang kita ras kalak si ikelengi kita ras engkelengi kita erdandanken kematen tetap e jadi ende-enden pengataken bujur sabap kematen mbabai kita bengket ku bas kegeluhen rasa lalap.
Aktivitas Mengisi Eulogy.
Eulogy ertina terakhir, perpudi kegeluhen. Eulogy isina kerna diri sekalak jelma si enggo mate janah iogeken i lebe-lebe jelma si nterem tupung jenazah i rumah denga. I bas kesempaten enda si bahan eulogy guna dirinta. Si bayangken tupung kita mate uga kecibalta, kai kesan keluarganta ras temanta kerna geluhta ras teladan kai si dat kalak i bas kita nari. Kai si langa si bahan i bas geluhta. Tujun ngisi eulogy enda, gelah kita ngidah geluhta ras mateta sada hal si utuh. Kai si langa si lakoken i bas geluhta lit denga kesempaten guna ngelakokenca ope kita mate.
Isi eulogy-nta
Gelar: …………………………… Tanggal lahir: ……..
Mate i bas Tahun: ……….. Tutup usia: ……… tahun
Gelar perbulangen (adi lit denga): ….. Jumlah anak: …. kalak
Jumlah kempu: …. kalak Penyebab kematian: …….
Ise saja si ngelilingi peti jenazah: ……………………………..
Ritual/acara si niarapken: …………………………………………
Pencapaian si enggo idat (subuk i bas jabu, Gereja ras karier): ……….
Sura-sura si langa tersehi (tercapai): ……………………………………
Rasa kecewa/menyesal si pernah terjadi: …………………………….
Kesan si niarapken i bas anak-anakta/kemputa man banta (kata-kata, pengajaren si icikepna): ……………………………………………………….
Pedahndu si terakhir man anak, kempu/si ikelengindu: …………….
Kenca dung isindu, turiken uga perasaandu, kai si banci ipelajarindu ras kai atendu ibahanndu ope kematen situhu-tuhu reh.
Pdt. Sariyani Barus MTh.
