Bimbingen Bahan PA Moria, 05 – 11 Juli 2020

Si Man Ogen

Amsal 21
21:19 Lebih baik tinggal di padang gurun dari pada tinggal dengan perempuan yang suka bertengkar dan pemarah.
21:20 Harta yang indah dan minyak ada di kediaman orang bijak, tetapi orang yang bebal memboroskannya

Kuan-kuanen 21
21:19 Madin tading i gurun pasir, asangken tading ras ndehara si perjengil ras perdegil.
21:20 Kalak pentar tetap bayak dingen nggeluh i bas kemewahen tapi kalak bodoh ikerikenna duit si mbaru ialoken.

METIA (KEUGAHARIAN) MAKEKEN DUIT

TUJUN: Gelah Moria:
a. Meteh maka i bas jaman Salono enterem diberu la pentar makeken duit.
b. Pentar Makeken duit.

METODE PA: Diskusi

Kata Penaruh.
I bas kegeluhenta megati kal si jumpai ras si idah maka nterem kalak erdahin, erjuang ndatken duit guna ngelitken keperlun keluargana, Tapi i bas sie enggo pe erdahin alu erbintuas tetap saja ka nge la tercukupi keperlun nggeluh si teptep wari. Si tuhuna, labo uga buena kita ngaloken duit tapi uga caranta i bas ngelitken ras makeken duit si lit e alu pentar ras tetap ngataken bujur.
Tema PA Moria-nta wari enda: Metia (keugaharian) makeken duit, kita erlajar uga nggeluh i bas kesederhanan, encukupken kai si lit alu pentar bage pe makekenca. Metia i bas kata tia nari si ertina: nisaken (menyisakan), tidak menghabiskan. Kata enda megati si pake ku bas dua ingan eme ku bas pangan, sisaken pangan e, guna si kari, ula mis keriken sekali pan, Bagepe ku bas perduiten, hemat, cermat.
Metia (kata sifat) eme hemat, tapi usur ka pe ikataken man kalak pelit la pedah metiasa “tidak usah terlalu hemat.” Teptep jelma rukur uga ngaturken perduiten gelah banci erguna. Lit deba ersura-sura nukur rumah entah mobil, lit deba guna nekolahken anak entah pe guna keperlun si deban si erguna. Teptep jelma ersura-sura sue ras gegeh perduitenna i bas pengaturen ras pemaken perduiten alu payo ras mehuli.

Mpebagesi Pengangkan Kerna Ogen.
Kitab Kuan-kuanen isina eme kerna ajaren Agama dingen ajaren kegeluhen si payo. I bas kegeluhen si payo e mbue pedah-pedah si sehken Salomo si erkawiten ku bas keluarga, kethamaten erteman, ngasup ngampar bana, urusen perbinagan, la ketadingen pe ajaren kerna uga ngaturken/makeken perduiten, I bas ndalanken kerina sie ibenaken alu “mehamat dingen erkemalangen man Tuhan (ay. 17)”. Kalak si erkemalangen man Tuhan pentar ia encariken/encukupi keperlun gelunna ras pentar ia makeken ulih pencarinna e. Tapi kalak si la erkemalangen man Tuhan (bodoh, bebal ay. 20) engkeriken duit ngenca itehna, ersenang-senang, erpesta-pesta guna kesenangen dirina jine (ay. 17). Enterem jelma nggit nukur barang si ngena atena alu rutang/kredit, lenga dung sada, enggo ka iutangina sideban. Em sada perbahanen si erbahanca ceda. Sabap usaha kai pe ia tentu labo ia nggit la dat untung apai ka rugi nggo pasti lang. Emaka perlu kal pentar i bas ngaturken perduiten gelah ula sempat ketunduken i bas erti lalap kurang, la pernah cukup. Dibata ngena ate man kalak si pentar ngaloken kegeluhenna aminna pe teridah meteruk, asangken rutang alu cara nggeluh si lebih asa ngasupna.

Pengkenaina.
Megati si idah keluarga si ngenanami persoalen perduiten si lalap ngataken kurang, la pernah cukup deba seh rutang, aminna gia si tuhuna pemasukenna mbue. Emaka i bas sie si jadi penungkunen eme: uga ia makeken duit e, kuja ibanna? Kepeken persoalenna eme i bas kelangasupenna makeken perduiten/ makeken duit. Galang entah kitik pemasuken sesekalak jelma si tuhuna perlu kal metenget makekenca, adi lang banci kita lalap ketunduken i bas perduiten. Si inget min maka i bas kengasupenta ngaturken perduiten alu payo erbahan kita banci ngenanami ulih pencarinta e ras ngasup tetap ngataken bujur man si empuna kinilitenta eme Dibata. Duit si lit e igejap min e sekerajangen Dibata ras kita ipercayaken ngaturkensa guna keperlun geluhta si tep-tep wari. Boroswati ras Hematina ersenina (kakak beradik) si dahinna eme pengusaha si cukup rulih ras sukses i bas usahana pekepar. Boroswati usahana eme bisnis online shop (erbinaga online), agina si Hematina bergelut i bas bidang bisnis properti (perubahan). Aminna ia duana i pebelin-belin ras ididik alu cara si seri tapi lagakna la seri. Boroswati nggit kal nukur barang-barang meherga, erbelanja, agina Hematina pangen akapna erinvestasi (menanam modal). I bas piga-piga paksa usahana erdalin alu mehuli, tapi i bas sada paksa jadi krisis moneter si seh kal mbelinna pengaruhna ku bas usaha kalak e. Tapi erkiteken Hematina kebiasanna nggeluh sederhana ras lit piga-piga investasina, situasi e la erpengaruh ku bas usahana emaka tetap banci erdalan. Beda ras kakana Boroswati, erkiteken la lit simpanenna si deban maka pemasukenna pe reh dekahna reh urakna seh keri kerina (bangkrut). Arah pengalamen si dua kalak e perlu kita erlajar ngaturken perduitenta bagi tema-nta: Metia (keugaharian) makeken duit.

Si gejapken min maka uga gia buena pas-pasu Tuhan sialoken kita sia – sia, adi la si aturken alu payo. Adi kita terjeng engkeriken saja kai si lit ibereken Tuhan man banta apai ka adi si pekeri-keri, e seri kita ras kalak si ngaloken pemere Tuhan tapi ibunikenna i bas ingan si pultak/bocor, Reh dekahna keri, lanai ternanami pasu-pasu Tuhan e. Wari-wari enda la banci bagi ate-ateta, kita perlu mpesikap dirinta guna ngalo-ngalo rehna wari udan ras wari perlego. Lit 10 tips/cara ngaturken Perduiten Rumah Tangga alu payo ras mehuli si banci erguna man banta i bas pengaturen perduitenta:

1. Tetapken keperlun sebulan alu payo. Ula gelah mpedarat sen saja alu la perhitungen.
2. Tetapken duit guna keperlun si la nentu rehna (soniarap). Banci reh situasi si la iarap. Bahan anggaren si la ersada ras keperlun bulanen.
3. Biasaken nabung. La arus alu beligan si galang. Gia kitik beliganna umpamana Rp 5.000/wari tapi tiap wari maka reh dekahna enda mbue jadina.
4. Usahaken nikapken pangan i rumah, balengi nukur pangan tasak. Pangan si i darat enggo tentu ergan asangken si itanggerken i rumah ras pe kebersihenna terjamin.
5. Ula rusur erbelanja apai ka nukur barang si labo perlu. Genduari enda enggo murah kal belanja barang-barang, alu mbuka online bas HP, ngena ate, iklik, tukur, transfer, enggo dung. Menukah tapi si jadi
   persoalen megati isalah gunaken erbahanca lit si nagih belanja ntah pe nggo jadi kebiasan, piah keri belanja si arusna ku dapur. Ope belanja perlu kal iukuri lebe mbages-mbages kegunanna.
6. Bahan aturen irit listrik. Buen peralaten rumah tangga make listrik, mulai i bas lampu, pompa lau, rice cooker, TV, AC, Kipas angin, charger HP, gosoken ras sidebanna.
7. Ban dahin sidebanna si la perlu modal galang. Enda banci arah bisnis Online, usaha erdaya jus, jajanen, kue-kue alu itamaken ku kede-kede (warung-warung).
8. Pertimbangen guna investasi. Adi lit simpanen si lebih banci ipake guna erinvestasi i bas nampati perduiten wari pepagi (masa depan) umpamana: nukur emas, taneh, rumah ras sidebanna.
9. Tulisken perputaren/sirkulasi perduiten alu cemet (rinci). Mulai i bas
   pemasuken bagepe anggaren-anggaren perduiten si debanna. Alu bage banci terawasi perduitenta alu mehuli.
10. Asa bancina ula ngit rutang. Ula kataken sitik nge utangku, gia Rp 50.000 tetap e utang. Mulana kitik tapi baci jadi dungna lanai mbiar rutang. Adi nggo mbue utang banci turah penakit, stress.

Pindolah gegeh, kepentaren man Tuhan i bas ngaturken kita perduitenta ka kita pentar makekenca, banci si nanami kerina pemere Tuhan e alu ngataken bujur katawari paksa pe. Arah kinilitenta banci mereken ketenangen nggeluh man banta, jadi pasu-pasu man kalak si deban terpuji gelar Tuhan.

Diskusi:

1. Cuba si diskusiken uga nge caranta ngaturken perduitenta sedekah enda? (bdk. ay. 20)
2. Mari si gargari kai-kai saja usaha si kreatif si banci nambahi perduitenta. (tapi ula seh kebablasen inget temanta tahun 2020 “Metenget ras Megermet.)”.

Pdt. Erni Yanti br. Pinem