(Karakter Mamre-Kesabaren)
Ogen : Jakub 5:10-11
Thema :”Sabar Ate lbas Kiniseran”
Tujun Gelah Mamre:
- Berkarakter sabar ibas kerina dampar kegeluhenna
- Ngasup ncidahken Biak kesabaren ibas jabu, gereja, ras masyarakat
Metode : Diskusi ras aksi
| 5:10 | Saudara-saudara, turutilah teladan penderitaan dan kesabaran para nabi yang telah berbicara demi nama Tuhan. | |
5:11 | Sesungguhnya kami menyebut mereka berbahagia, yaitu mereka yang telah bertekun; kamu telah mendengar tentang ketekunan Ayub dan kamu telah tahu apa yang pada akhirnya disediakan Tuhan baginya, karena Tuhan maha penyayang dan penuh belas kasihan. |
KATA PENARUH
Sabar itu memang berat, karena hadiahnya surga, coba kalau gampang, paling hadiahnya kipas angin”. Enda me sada ungkapen si muncul ibas media sosial piga-piga waktu si lewat. Sabar eme sada hal si menukah guna ibelasken tapi mesera ntah pe mberat guna ngelakokenca. Adi siperdiateken ibas sekelewetta, lalan si idah perbahanen-perbahanen si nuduhken ketidaksabaren ibas kegeluhenta, subuk ibas jabu, ibas dalan, ibas ingan erdahin, ibas pergaulen, bahkan ibas gereja/ perpulungen. Melala kel ulih kesabaren si mungkin si enggo sigejapken bagepe melala ka tuhu ulih la saber si enggo sigejapken, si banci jadi maba kecedan man banta bagepe kalak si deban. Uga kin situhuna saber? Terlebih-lebih ibas kita ngenanami kiniseran. Apakah saber e terjeng kem/ pasif, la erbahan kai pe? Apakah saber e tanda kelemahen? Mari terbagesen erlajar kita kerna saber ibas kiniseran arah Surat Jakobus si jadi bahan oratenta minggu enda.
URAIAN
Surat Jakub sekian lama ibas sejarah gereja ianggap sebagai surat jerami, ianggap kosong/ la meherga sebab itekankenna kiniteken tanpa perbahanen mate kap, sementara surat-surat si deban, khususna surat-surat Paulus melala ngerana kerna doktrin-doktrin teologis, misalna saja keselamaten erkiteken perkuah ate. Tapi perpudi enda kenca ipelajari ras iteliti, surat Jakub enda tuhu-tuhu meherga kel, sebab Kinteken e penting tapi perbahanen e pe tuhu penting kel, sebab eme respon ntah pe bukti kiniteken si lit bas kita.
Jakobus mereken sada sikap si tepat ibas menghadapi erbage-bage percuban si ngkenai kita. Surat Yakobus itujuken man kalak Kristen Yahudi si tading tersebar I daerah-daerah perantauan. Kalak enda eme kalak si mbaru bertobat si jadi kalak Kristen janah harus nadingken kutana Jerusalem erkiteken ancaman dingen tekanan ibas kalak Jahudi paksa sie. Uga kondisi kalak enda si jadi pelarian, pengungsi kenca lawes Jerusalem nari? Kepeken sikap/ karakter kalak enda la jadi kalak Kristen si dewasa secara kiniteken ibas ngalaken percuban/ kiniseran si reh. bas ingan perantauen enda me muncul melala masalah si banci siidah ibas surat Jacobus e.
Perp. e la sabar ibas percuban, la nggeluh alu benar, rayo-ayo, kurang ngasup mengendaliken dilah, mulai rubat, bagepe serakah ndarami kebayaken. Kerina e adi sinen bas surat Jakobus erkiteken lanai megenggeng menghadapi situasi si mberat, dungna erbanca kiniteken lanai ipake ibas kegeluhen tep-tep wari.
Jakobus pasal 5 si jadi oratenta, eme pasal terakhir si jadi penutup surat Jakobus. Ibas bagin terakhir enda Jakobus ngerana kerna saber ras ertoto. Mulai Jakobus 5:1-12 lit 6 kali Jakobus ngerna kerna saber ate. Pemaken istilah saber ate ras megenggeng she 6 kali enda nuduhken maka Jakobus tuhu-tuhu ngajuk kerina perpulungen si lit ibas kiniseran e tuhu-tuhu mempraktekken kesaberen ibas kegeluhenna. Kata saber ras megenggeng si ipake ibas perikop enda eme uaKpo@uuÉw (makrothumeo, have patient) ras Ütouovh (hupomone, patience, endurance). Secara sederhana kata saber e berhubungen ras daya tahan, kengasupen ngalaken erbage-bage situasi sulit alu tetap erkemalangen man Tuhan.
Jakobus mpersingeti perpulungen maka kesaberen eme gegeh ibas ngalaken erbage-bage percuban ras kiniseran sebab kesaberen e nuduhken lit denga pengarapen kerna wari pepagi si terulin dingen pengarapen maka Dibata tetap nampati. Jakobus nuriken telu usihen simabai perpulungen gelah nggeluh alu saber. Pemena, eme perjuma si saber nimai seh jumana mereken ulih si erguna. Perjuma bergantung ibas ulih peranin, emaka ia alu saber nimai ulih juma e, alu pengarapen maka ulihna la mengecewaken. Perjuma si saber labo hanya nimai alu pasif, tapi ia erdahin alu dem kinijingkaten, ndahiken si jadi baginna. Emaka alu usihen enda, Jakobus situhuna ngajarken maka saber ibas kiniseran labo berarti pasif, ngadi, tapi alu aktif, erdahin, ngusahken, ndahiken dahin si jadi sikerajangenta alu tutus ras maksimal.
Peduaken, usihen ibas nabi si ngerana ibas gelar Tuhan. Hampir kerina nabi-nabi si ngerana ibas gelar Tuhan ngenanami kiniseran ibas jamanna erkiteken ia nuriken kebenaren kata Tuhan. Tapi, ibas kiniseranna e tangkas teridah uga Dibata erdahin ngarak-ngarak, mulahi, dingen ncukupken kai siniperluken nabi-nabi e. Nabi Elia misalna, ngenanami kiniseran ibas jaman Raja Ahab seh maka ibas kelegon 3,5 tahun ia harus lawes ku tepi Lau Kerit tapi je pe ia icukupken Dibata alu roti si ibaba perik-perik. bagepe ibela Dibata perkarana ibas ia “erperang” ras Nabi-nabi Baal ras Asyera. Enda nuduhken, maka ibas kiniseran kalak si tek, aminna pe Dibata maun teridah absen tapi Dibata erdahin alu cara si la terantusi manusia.
Peteluken, usihen ibas Jop. Jakobus memperkiraken maka perpulungen e enggo meteh kerna turi-turin Jop emaka nina, enggo ibegindu kerna saber ate Jop. Jop bergumul hebat ibas geluhna kerna kiniseran si jadi man bana, jabu, ras kerina dampar geluhna. Jop berdebat ras teman-temanna si reh ngapuli ia, seh maka melala si idah kata-kata buah pergumulen Jop ibas kiniseranna. Turi-turin Jop jadi usihen man perpulungen maka lit upah man kalak si setia dingan tahan uji (megenggeng). Prosesna memang menyakitken, tapi ulihna ndauh belinen asangken kiniseran si jadi. Emaka kiniseran e labo nuduhken Dibata la erkeleng ate, sebab nina Jakobus, kedungenna isampati Tuhan Jop, nuduhken maka Tuhan e perkuah dingen dem keleng ate.
APLIKASI
Saber ate ibas kiniseran eme sada pengarapen maka Dibata e perkeleng, dingen pasti isampatina anak-anakna si lit ibas kiniseran. Saber labo ertina kita pasif, kem, pasrah tanpa usaha, sebalikna saber eme ngasup rukur alu payo seh maka keputusen-keputusen si ibuat la nambahi kecedan, tapi jadi solusi ibas perbeben si lit. Banci jadi ibas kegeluhenta paksa enda, kita sangana ngenanami kiniseran erkiteken sakit-pinakit, persoalen ibas jabu, pendahin, itipu dingen ipersalahken kalak ibas kita ngelakoken si benar. Banci jadi pe kita enggo cukup ndekah nimai penampat Dibata, tapi asa gundari lenga si idah dalan si banci maba kemalemen ate seh maka dungna kita saling menyalah kan janah banci jadi terbersit ukurta muat dalan pintas si deban.
Kalak si la saber ngalaken persoalen ibas jabu ulihna banci kesirangen, inemen keras, penyalahgunaan Narkoba. Si la saber ngalaken pinakit ras kegagalen, banci jadi nundalken Dibata janah ndarami tambar ras kesuksesen alu kuasa-kuasa kegelapen. Si la saber nimai penampat Dibata banci jadi mpersalahken Dibata kerna kerina si jadi ibas geluhna, seh maka ibas kekecewanna lanai ia ku gereja, lanai perpulungen, lanai PA Mamre, lanai ertoto, rsd, seh maka tambah kiniseran si mbaru ibas geluhna Tapi, adi saber kita ngalaken kerina si jadi e, kerina e jadi kesaksin man kerina kalak, iinget dingen ikenang selaku kalak si setia, janah tangkas kemulian Dibata arah kita. Saber ate tuhu terbatas adi ernalem kita nandangi gegeh manusia, emaka rusur sikataken kesabaren e pe lit batasna. Saber ate la lit batas adi kita ngidah pengarapen si ibereken Dibata ibas kerina kiniseran si jadi gundari enda.
DISKUSI
- Oge mulihi Jakub 5:10-11, kai nge si erbahanca maka Nabi Tuhan bagepe Jop ngasup ersaber ate ibas kiniseranna?
- Kai nge tekad/ komitmen si banci si lakoken ibas kita ersaber ate ibas perbeben kiniseran ibas kegeluhenta sekalak-sekalak? Cuba sibereken pengalamenta sibanci jadi kesaksinta!
USULEN ENDE-ENDEN
- KEE GBKP No. 271:1-3
- KEE GBKP No. 59: 1,4
- KEE GBKP No. 273: 1-
- KEE GBKP No. 303: 1.3
Pdt.
Eben Karosekali, S.Th
HP. 081223718778