DEWASA KEGELUHEN PERTENDIN
(GBKP Njayo)
1 Korintus 2: 13 – 16
2:13 Dan karena kami menafsirkan hal-hal rohani kepada mereka yang mempunyai Roh, kami berkata-kata tentang karunia-karunia Allah dengan perkataan yang bukan diajarkan kepada kami oleh hikmat manusia, tetapi oleh Roh.
2:14 Tetapi manusia duniawi tidak menerima apa yang berasal dari Roh Allah, karena hal itu baginya adalah suatu kebodohan; dan ia tidak dapat memahaminya, sebab hal itu hanya dapat dinilai secara rohani.
2:15 Tetapi manusia rohani menilai segala sesuatu, tetapi ia sendiri tidak dinilai oleh orang lain.
2:16 Sebab: “Siapakah yang mengetahui pikiran Tuhan, sehingga ia dapat menasihati Dia?” Tetapi kami memiliki pikiran Kristus.2:13 Dage asum iterangken kami kebenaren pertendin man kalak si enggo dewasa kegeluhen pertendinna labo kami ngerana alu kata-kata si iajarken kepentaren manusia, tapi alu kata-kata si iajarken Kesah Dibata.
2:14 Tapi kalak si la lit i bas ia Kesah Dibata, labo ngaloken kasa kai si asalna i bas Kesah Dibata nari. La ia ngasup ngangkasa, janah si lang-lang nge e iakapna, sabap arah cara pertendin nge ngenca maka si e banci iergai.
2:15 Kalak si enggo dewasa kegeluhen pertendinna, ngasup ia ertimbang kerna kai pe, tapi la lit kalak si ngasup ertimbang kerna ia.
2:16 Bagi lit tersurat i bas Pustaka Si Badia, “Ise kin meteh perukuren Tuhan? Ise kin ngasup ngajarken IA?” Tapi i bas kita lit kap perukuren Kristus.
Njayo eme pengkebet ras biak si erbahanca sekalak jelma banci lit i bas perbahanen si payo, ras erguna; erusaha ngelakoken kerinana alu bujur arah penjemba dirina jine erkiteken kengasupen ngaturken diri, sue hak ras kewajibenna. Emaka, sekalak si njayo ertina e me ngasup ndungi masalah si lit paksa ialakenna ras ertanggung jawab nandangi kerina keputusen si enggo ibuatna erkiteken reh arah pertimbangen si tasak. Raduken ras si e, rikutken Buku Liturgi 52 Minggu GBKP isingetken man banta maka arah peringeten GBKP njayo enda kita ibabai guna nggejapken pengarak-ngarak Tuhan seh enggo 79 tahun GBKP njayo selaku tanda gerejanta enggo reh dewasana i bas ndalani pendilo Dibata.
I bas perukuren sibage, ogen renungen PJJ nta ngingetken kita maka GBKP enda banci njayo lit kawitenna ras kebenaren pertendin si enggo iajarken alu makeken kepentaren Dibata eme arah kata-kata si iajarken Kesah Dibata. Kesah Dibata e si mpengasup kita lako nggeluh i bas kebenaren dingen ngergai kerina pemere Dibata bage pe ngergai kalak si deban i bas persadanta selaku anak – anak Dibata.
Kesah Dibata nampati kita lako makeken pengajarenNa janah enda me si erbahanca kita ngasup ertimbang kerna kai pe. Kesah Dibata e jadi asamta lako nggeluhken kegeluhenta sendalanen ras perukuren Kristus, eme tetap nggeluh bas pembabai ras pengkuasai Kesah Dibata e.
1 Korinti 2 menaken ayat 6, ngerana kerna kepentaren. I bas Pustaka si Badia isingetken lit 2 (dua) kepentaren eme: kepentaren doni ras kepentaren Dibata. Paulus erpengakap penting kel nuriken kerna si e erdandanken perpulungen Korinti lit i bas paksa nandangi perpecahen. Itengah-tengah perpulungen enggo terjadi pengelompoken. Perpecahen enda jadi erkiteken lit perbedan pengangkan, Paulus la nggit mpeteruk kalak Korinti si tersena kalak erpemeteh. Kalak si erpemeteh arus itegu-tegu Kesah si Badia. Alu kepentaren Dibata ngenca maka manusia banci ngangkai sura-sura ras pendahin Dibata.
Kepentaren si tuhu-tuhu labo reh i bas doni enda nari. Iberitaken Paulus kepentaren Dibata si terbuni ras rusia. Isingetken Paulus terbuni ras rusia erdandanken kepentaren Dibata ngerana kerna paksa si reh eme rencana keselamaten si enggo irancang Dibata. Kepentaren Dibata lit i bas kalak si ngaloken ras ikuasai Kesah si Badia. Kesah si Badia ngasup nuriken kempak manusia lako ngantusi kerina sura-sura Dibata. Alu Kesah si Badia ras kepentaren Dibata maka manusia ipengasup ngangkai kerina pemere Dibata man manusia.
I bas konteks perpulungen Korinti, Paulus erbahan kategori pertendin perpulungen jadi dua bagin eme kategori anak-anak ras dewasa. Dewasana pertendin anggota perpulungen labo itentuken umurna tapi teridah arah perbahanenna. I bas ayat 15 isingetken Paulus maka kalak si dewasa kegeluhen pertendinna, ngasup ia ertimbang kerna kai pe tapi lalit kalak si ngasup ertimbang kerna ia. Ayat enda eme pembelan i bas Paulus. Paulus si ikuasai Kesah si Badia, la banci itimbang kalak Korinti selaku manusia doni si ikuasai kepentaren doni. Manusia si enggo dewasa pertendinna lit i bas ja kengasupen guna ngangkai kerinana. Tapi ia jine la banci itimbang kalak si deban (kalak si la ikuasai Kesah sĩ Badia). Enda jadi erkiteken kalak si la dewasa pertendinna lalit kawitenna ras Kesah si Badia si mpengasup ia ertimbang kerna kalak si dewasa pertendinna, Enda ka me si erbahan maka megati kalak si dewasa pertendinna mamang ate kalak si deban erkiteken kiniulin si ilakokenna.
Kalak si lit i bas ia perukuren Kristus meteh kerna peraten ras rencana bage pe sura-sura penebusen si enggo ilakoken Kristus. Perkatan enda mereken erti ngergai ras ngidah kerina masalah sue ras cara Dibata ngidahsa, nimbang kerina masalah sue ras cara Dibata nimbangsa, ngkelengi si ikelengi Dibata jenari ernembeh ate nandangi si la ngena ateNa. Kerina enda banci jadi adi tuhu-tuhu itandai kinibadian Dibata ras nggesuhna dosa. Alu ngaloken Kesah si Badia ras patuh nandangi Kesah, perukuren ras pengidah kalak si erkiniteken tuhu-tuhu petembil ras cara bage pe kepentaren doni enda.
I bas tahun enda enggo 79 tahun GBKP njayo i bas gereja Belanda nari (23 Juli 1941 – 23 Juli 2020). Ikataken njayo erkiteken menaken paksa e, GBKP enggo jadi gereja si dewasa dingen tetap empelimbarui diri erjuang selaku gereja si dewasa (mandiri) i bas teologi, daya ras dana. Kerina urusen gereja enggo mulai iurus kalak Karo. Emaka pandita enggo lit kalak Karo dingen Tata Gereja pe iterjemahken ku bahasa Karo.
Si jadi perayaken GBKP i bas empelimbarui diri eme:
a. Reh tambahna persentase perpulungen GBKP muat bagin alu aktif ras proaktif i bas kegiaten-kegiaten bidang Koinonia (Kebaktian Minggu, PJJ, PA ras si debanna) i bas kegiaten koinonia si mpeteguhi kiniteken, persadan dan ketedehen ate guna ersada.
b. Reh tambahna persentase anggota GBKP encidahken orat nggeluh si ermasyarakat Kristiani ras patut lusih bage pe aktif ras proaktif i bas kegiaten-kegiaten marturia.
c. Reh tambahna beligan anggota GBKP muat bagin alu aktif ras pro-aktif i bas erdiakonia i bas ras ku darat lingkungen GBKP. Spontanitas anggota perpulungen guna kepate i bas kegiaten kemanusian misalna bencana alam, kemusilen, pinakit sosial, disabilitas ras si debanna tuhu-tuhu teridah.
d. Reh tambahna beligan perpulungen GBKP si erwirausaha alu profesional.
e. Reh tambahna pengalon perbeliten gereja subuk arah usaha produktif gereja bage pe arah kontribusi ngawan perpulungen.
f. Reh tambahna program-program pembinan man Serayan Tuhan alu perayaken
1) Meningkatna kualitas kotbah
2) Meningkatna kualitas Pertua ras Diaken i bas pelayanen. Reh tambahna beligan ngawan perpulungen ras beligan dana si uluna arah kontribusi aktif ras pro-aktif (kolekte kebaktian, pengataken bujur, kerja rani, persepuluhen, pepulung dana khusus ras si debanna) guna pendanan program ras kegiatan gereja.
g. Reh urakna persoalen ntah pe konflik-konflik i bas gerejanta.
h. Reh tambahna partisipasi perpulungen GBKP i bas proses politik (milih ras ipilih) alu ermartabat subuk i bas wilayah nasional bage pe wilayah daerah.
i. Reh tekna ngawan perpulungen nandangi laporen keuangan GBKP subuk i bas wilayah Sinode, bage pe Klasis ras Runggun.
Alu perayaken si bagenda teridah maka GBKP ngelumbaken ngawan ni perpulungen dewasa i bas kegeluhen pertendin, muat bagin alu mehuli i bas kegeluhen gereja, ernanam man jelma si enterem jenari nehken pujin kemulian man Tuhan Dibata. Tempas kegeluhen si njayo tuhu-tuhu teridah.
EVALUASI:
Enggo me lit perhatianta nandangi pendidiken TK-PAUD i bas sektorta?
DISKUSI:
- Kai nge tanda-tanda ngawan perpulungen enggo dewasa i bas kegeluhen pertendin?
- Kai nge si banci si lakoken gelah gereja reh dewasana i bas teologi, daya ras dana?
AKSI
Minggu si reh ngawan perpulungen nuriken Kata Dibata i bas PJJ ntah PA Kategorial (khususna man si langa pernah ngelakokenca).
USULEN LAGU:
- KEE GBKP 209 – Perpulungen Ersadalah (1 – 5)
- KEE GBKP 296 – Man BaNdu Yesus Tuhanku (1 – 3)
TOPIK PERTOTON SYAFAAT:
- Gelah ngawan GBKP dewasa kegeluhen pertendinna.
- Gelah GBKP encidahken orat geluh si dewasa/mandiri i bas
teologi, daya ras dana. - Siturah i bas Perpulungen.
Pdt. Christopher Sinulingga, M.Th.