Si Man Ogen
Kolose 3: 18 – 25Erbage-bage pedah man keluarga Kristen
3:18 O, kam ndehara, patuhlah man perbulangenndu, sabap bage me arusna ibahanndu selaku kalak Kristen.
3:19 O, kam perbulangen, kelengilah ndeharandu janah ola kasar man bana.
3:20 O, kam anak-anak, kalak Kristen, patut kam tetap patuh man orang-tuandu sabap bage nge si ngena ate Dibata.
3:21 O, kam orang-tua ola rusursa junguti anakndu gelah ola bene ukurna.
3:22 O, kam budak-budak patuhlah man tuanndu i bas kai pe. Labo saja tupung ia i je tempa-tempa kam ndarami pujin i bas manusia nari saja; tapi bahanlah e alu ukurndu bulat, erkiteken kemalangenndu man Tuhan.
3:23 Kai pe si ibahanndu, dahikenlah e alu tutus, tempa-tempa kam erdahin guna Tuhan, labo guna manusia.
3:24 Ingetlah, i bas Tuhan nari kap upahndu. IAlokenndu me kai si enggo isikapken Tuhan man anak-anakNa. Sabap Kristus nge Tuanndu si tuhu-tuhu, janah kam budakNa.
3:25 Janah kalak si erbahan salah, ise pe jelmana iukum rikutken salahna, sabap kerina manusia la erndobah i lebe-lebe Dibata.
JABUKU KEMEGAHENKU
TUJUN: Gelah Moria:
a. Banci njelasken hubungen antara anggota – anggota jabu sue ras teks, janah banci nuriken kai-kai saja si jadi kemegahen i bas jabuna.
b. Tetap mbangun hubungen ras komunikasi alu mehuli, rikut pe makeken TI guna mpeteguhi kiniersadan jabu.
METODE PA: Nuriken Pengalamen Nggeluh (Sharing), Nonton bersama (nobar)
Kata Penaruh.
Jabu eme organisasi si kitikna i tengah-tengah masyarakat. I bas sada jabu lit i je perbulangen (Mamre ntah perbapan), ndehara (Moria ntah pernanden) bage pe anak janah Dibata si ngkuhisa kerina. Sura-sura Dibata nandangi jabu kalak Kristen e me jadi jabu si sempabu (harmonis). Salah sada kunci kesempabun i bas jabu eme tutus erkiniteken man Dibata. Seisi jabu arus erlumba nehken keleng ate rikut pe mujikensa. Antara perbulangen ras ndehara arus ngakui ras ngaloken kelebihen rikut pe kekurangen pasangenna. Selaku anak pe arus patuh dingen mpehaga orangtuana, janah orangtua pe tetap ncidahken arah perukuren ras perbahanenna maka ia tuhu-tuhu bangga nandangi anak-anakna. I bas kinatana kegeluhen jabu-jabu kalak Kristen arus ncidahken kesempabun sue ras sura-sura Dibata. Kesempabun e la banci tersehi adi kerina anggota keluarga la si angkan sada ras si debanna. Arus lit hubungen si mehuli perbulangen ras ndehara, orangtua ras anak-anak bage pe sebalikna. Konsep jabu kalak Kristen secara teologis iajarken rasul Paulus i bas bahan PA gabungenta sendah.
Mpebagesi Pengangkan Kerna Ogen.
Kolose 3: 18 – 25, lit i je pedah si arus ilakoken jabu kalak Kristen, selaku perbulangen, ndehara ras anak-anak rikut pe budak-budak (si nampati i bas jabu), Sekalak-sekalak arus ndalanken peran sue ras kecibalna alu mehuli seh maka lit hubungen ras komunikasi alu mehuli. Si enda me erbahansa maka jabu e banci harmonis. I bas ayat 18, selaku ndehara arus patuh man perbulangen, amin pe jabaten entahpe penghasilen ndehara belinen asangken perbulangen sabap perbulangen eme pemimpin i bas jabu e. I bas ayat 19, perbulangen selaku pemimpin arus ibabaina jabuna alu dem kekelengen ras lemah lembut. Ayat 20 – 21, anak-anak arus nuduhken kepatuhenna nandangi orangtua sabap bageme Pedah Dibata. Janah orangtua pe ula usursa jungut-jungut tapi sehkenlah usihen ras keleng ate nandangi anak-anak. Ayat 22, selaku budak (si nampati i bas jabu) pe arus ngelakoken tugasna alu mehuli, setia dingen bujur. Rasul Paulus ningetken maka erdahin eme tanggungjabap man Dibata si tutus ndahiken dahinna, tutus kap ia ngelai Dibata. Jadi erdahin e labo jadi beban si mberat. Ulihna kemalemen ate si rehna i bas Dibata nari. Man si la erdahin alu tutus ukumen ibereken Dibata man bana.
Lit dua konsep jabu kalak Kristen si iajarken Rasul Paulus sue ras ogenta sendah: Si pemena, teptep anggota jabu arus leben ipelimbarui geluhna i bas kiniteken man Jesus Kristus. Si peduaken, geluh si mbaru i bas Kristus arus teridah arah hubungen si sehat ras seimbang sada ras si debanna sue ras sura-sura Dibata. Selaku tuan (si mada jabu e) arus mereken keleng ate dingen kesejahteran man si nampati e. Seh maka i bas jabu e termulia gelar Tuhan.
Pengkenaina.
Tema: “Jabuku kemegahenku.” Adi jabu si enggo erpalasken keleng ate dingen Dibata si jadi sukut i bas jabu e, tentu saja meriah si akap dingen megah si akap mbelaskensa: “jabuku kemegahenku.” Sabap melala kemegahen-kemegahen si banci ituriken ras isaksiken i bas jabunta si jadi usihen kalak si deban. Umpamana: Mamre tuhu-tuhu jadi perbulangen man ndeharana ras tuhu-tuhu bapa man anak-anakna ras jadi imam si mabai seisi jabu erkemalangen man Tuhan. Seisi jabu e tutus ku perminggun, PJJ, PA kategoria ras dahin-dahin Gereja sidebanna. Bapa si jadi usihen si mehuli man anak-anak i bas pengerana ras perbahanenna. Pendahinna pe ncidahken tanggungjabap ras kebujuren si jadi usihen ras sidebanna. Orangtua man anak-anak si nuduhken keleng ate alu nggit megiken sora pusuh anakna dingen jadi pendidik si mehuli man anak-anak ras sidebanna. Moria tuhu-tuhu jadi nande man anak-anakna ras tuhu-tuhu jadi ndehara man perbulangenna. Nande alu pentar ngaturken kerina tugas tep-tep anggota jabu (berbagi tugas). Nande si banci jadi usihen i bas pengerana ras perbahanenna si ngena ate Tuhan. Anak-anak pe tuhu jadi kemegahen man orang tua, i bas ia nggit megiken kata ajar orang tua, tutus bas nehken persembahen, pengeranana pe mehuli. Perbahanenna pe la njuruken. Anak-anak si erkeleng ate nandangi senina turangna. Anak-anak i bas ia erbahan salah, nggit ngakuken kesalahen ras mindo gelah ialemi. Melala tuhu si jadi kemegahen i bas jabunta, janah jadi pengalamen si banci ituriken labo guna ndarami pujin nandangi keluarganta tapi gelah termulia gelar Tuhan si jadi sukut i bas jabu e. I bas kemajun Teknologi Informasi (TI), melala si banci ipakeken i bas jabu guna mbangun hubungen ras komunikasi reh ulina. Janah pe adi pentar kita makeken TI enda, banci mpeteguhi kiniersadan i bas jabu. Tapi adi la pentar, banci erbahan perubaten, enggo beluh erbual, janah kedungenna erbahan kesirangen. Emaka tep-tep jabu arus makeken TI alu pentar rikutken keperlun jabu e. Umpamana: erbahan group WhatsApp (WA) keluarga (i bas keluarga inti rikutpe keluarga besar) guna mbangun kiniersadan nuduhken keleng ate. Arah group WA e banci si bagiken Kata Dibata, kata pergegeh, kesempaten ingan erdahin, guna ngingetken dahin – dahin i bas keluarga besar ras sidebanna. Teknologi Informasi sidebanna misalna handphone (HP), enda pe banci sipakeken guna komunikasi ersukahna. Guna orangtua ras anak si ndauh erkiteken sekolah, erdahin, tuhu terakap kal lit handphone enda. Gundari enggo ka banci video call (idah gambarna/fotona tupung kita nelpon). Adi pentar makeken TI, tuhu erguna man seisi jabu. Janah megah si akap pe, sabap amin pe la ndeher kita ras isi jabuta banci ngerana ras meteh beritana. Teruslah kita naksiken maka jabuku kemegahenku.
Nuriken Pengalamen Nggeluh (Sharing):
- Tep-tep jabu asa bancina nuriken (sharing) kerna kemegahen si
inanamina i bas jabuna. - Tep-tep jabu asa bancina nuriken (sharing) kerna ulih TI (WhatsApp,
handphone, entahpe lit sidebanna) si ipakeken guna mbangun
hubungen ras komunikasi i bas jabu reh ulina. - Erbahan perlomban/permainen perjabu si iaturken rikutken situasi tep-
tep Runggun. (umpamana yel-yel, dress code, kuis keluarga rsd).
Judul: Aku dan keluargaku
Film: https://www.youtube.com/watch?v=HQBwTkOmj-M
Pdt. Mira Mutianta br. Sinulingga, S.Th