Si Man Ogen
1 Raja-raja 2: 1 – 4Pesan Daud yang terakhir sebelum meninggal
2:1 Ketika saat kematian Daud mendekat, ia berpesan kepada Salomo, anaknya:
2:2 “Aku ini akan menempuh jalan segala yang fana, maka kuatkanlah hatimu dan berlakulah seperti laki-laki.
2:3 Lakukanlah kewajibanmu dengan setia terhadap TUHAN, Allahmu, dengan hidup menurut jalan yang ditunjukkan-Nya, dan dengan tetap mengikuti segala ketetapan, perintah, peraturan dan ketentuan-Nya, seperti yang tertulis dalam hukum Musa, supaya engkau beruntung dalam segala yang kaulakukan dan dalam segala yang kautuju,
2:4 dan supaya TUHAN menepati janji yang diucapkan-Nya tentang aku, yakni: Jika anak-anakmu laki-laki tetap hidup di hadapan-Ku dengan setia, dengan segenap hati dan dengan segenap jiwa, maka keturunanmu takkan terputus dari takhta kerajaan Israel.
“PEMIMPIN SI ERKEMALANGEN MAN TUHAN”
TUJUN: Gelah Moria:
a. Ngangkai maka Daud mpersiapken anakna jadi pemimpin si erkemalangen man Dibata.
b. Encidahken ketutusenna ngikuti MUPEL milih pemimpin si erkemalangen man Dibata.
Musyawarah Pelayanan Moria GBKP
METODE PA: Diskusi / Sharing
Kata Penaruh.
“Periodesasi” ras pergantian i bas kerina organisasi pasti terjadi. Pemimpin seumur geluh lit i bas sistem kerajan ngenca, selain e lit kerina aturen kerna proses pergantin kepemimpinen. Presiden Indonesia ipilih lima tahun sekali, anggota dewan i bas kerina tingkatenna pe ipilih lima tahun sekali. I bas organisasi subuk Gereja ntah pe persadan si lit kin kepengurusenna tetap ngelakoken pemilihen pengurus guna ndalanken dahin-dahin si itetapken persadan ntah pe organisasi e sue ras aturen aturen si lit. Kerina anggota si terdaftar rikutken aturen (kriteriana) banci lit hakna guna milih dingen ipilih. Pertua Diaken, pengurus PJJ bagepe unit ras kategorial i tengah-tengah Gerejanta ngelitken aturen organisasi si bage rupa. Janah tahun enda Moria GBKP i bas kerina wilayah pelayanenna ngelakoken si enda : Pusat, Klasis, Runggun seh ku sektor. Ibenaken Musyawarah Pelayanen (MUPEL) i bas wilayah pusat kenca sie iumputi seterusna. Tole kita ersikap guna musyawarah-musyawarah enda maka i bas bahan PA minggu enda radu ras kita ngorati Pustaka Si Badia dingen ikut notoken pelaksananna.
Mpebagesi Pengangkan Kerna Ogen.
Daud eme raja si peduaken i Israel. Saul raja si pemena ipengadi Tuhan erkiteken la patuh nandangi perentah Tuhan. Sabap sistem pemerintahen paksa eme ‘teokrasi’, Dibata si ngaturkenca, Dibata arah Imam ntah Nabi milih pemimpin i bas bangsa e dingen nangkuhkenca. Emaka i bas kepemimpinenna arus ndalanken sura-sura Dibata adi lang pasti Dibata ngukumsa. Daud sebage raja meteh maka geluhna terbatas, nggo ndeher waktuna ia nadingken doni, emaka isikapkenna si nerusken kepemimpinenna alu nikapken anakna eme si Salomo. Tentuna e sue ras sura-sura Dibata, la sitik persoalen si jadi i bas proses nggantiken keduduken Daud i ja anak- anak Daud sideban pe merincuh guna nggantiken bapana jadi raja. Bahan PA enda nuriken kuga Daud mpetetap ukur anakna Salomo guna nerusken dahin selaku raja nandangi bangsa Dibata.
a. Nehken kata ajar (pedah), pedah iakui kerina budaya i doni enda jadi sada proses pendidiken si singkat tapi mbelin ulihna dingen jangka panjang. Biasana pedah-pedah isehken orangtua ‘sesepuh’ guna arapen nandangi anak kempuna i bas paksa si reh.
b. Mpetetap ukur, i bas erbage dampar kegeluhen perlu lit si mpetetap ukurta, ntah e teman, orangtua, pemimpin ras sidebanna. Ketetapen ukur enda biasana i bas ndalani wari si pepagi si langa si eteh sabap banci aru ate, mbiar, erguapa ndia. Enda me si iukuri Daud, banci saja perukuren enda jadi i bas anakna Salomo.
c. Ngikutken perentah Dibata, i bas sie kerina, kata kunci si tuhu-tuhu enggo igelem, inanami ras isaksiken Daud eme patuh nandangi perentah Dibata. Enda pe isusurkenna dingen iarapkenna ilakoken Salomo i bas mimpin Israel.
d. Nerusken ketetapen Dibata kerna kasa kai kalak si ipilihNa mbiar dingen patuh man Dibata, ngaloken pasu-pasu i bas Dibata nari. Janah ningetken man kesusurenna maka ulih kinilapatuhen eme rawa Dibata (ay.4).
Bageme Daud selaku bapa, raja si nehken pedah man sinerusken kepemimpinenna eme Salomo. Mbelin arapenna maka Israel reh belinna dingen reh mbarna guna kemulian Dibata si enggo milih nini-ninina nai jadi sada bangsa si mbelin. Kegeluhen bangsa enda iendeskenna man pemimpin seterusna janah erkemalangen man Tuhan jadi syarat mutlak sekalak raja Israel.
Pengkenaina.
Bagi Daud si nikapken pemimpin si erkemalangen man Dibata guna jadi raja Israel maka kita pe arus nikapken pemimpin ras pelayan i tengah Gerejanta kususna Moria GBKP. I bas jaman Daud, pemimpin e kesusuren dingen si ngena ate Dibata, adi Tang ipengadi Dibata. I bas konteks kegeluhen er-Gereja ras ernegara paksa enda, pemimpin e lahir i bas rakyat nari emaka proses pemilihen e ilakoken alu milih bersama sue ras syarat si enggo isepakati. Si pasti dingen arus maka i je si milih ras si ipilih radu ras erkemalangen man Tuhan maka jumpa i bas pelayanen si ngena ate Dibata.
Bageme i bas tahun enda ilakoken me musyawarah pelayanen (MUPEL) Moria GBKP si ilakoken tep-tep lima tahun. I je pesta iman man kerina Moria rikutken utusen-utusen i bas pengurus Moria Runggun, Klasis, Pusat ras undangen bagepe konsultan (P2P Moria Bab VI Pasal 15). Radu ras ngevaluasi pelayanen si enggo ibentasi dingen ngukuri pelayanen i bas paksa si reh sue ras kecibal dingen kebutuhen doni enda khususna Moria GBKP. Emaka kita si jadi utusen tutuslah ateta guna ngelai Dibata arah Moria GBKP i bas kehadirenta i MUPEL. Subuk i bas ngidah bentuk-bentuk pelayanen si perluken bagepe milih pengurus guna ndahiken dahin si icakapken i je. Man banta pe Moria i belang-belang pelayanen GBKP si dukung dahin enda alu notokenca, gelah proses si ilakoken i MUPEL e ngena ate Dibata dingen maba kemalemen ate man kerina Moria.
Sharing ras Aksi:
- Kuga nge pengidahta kepemimpinen sinilakoken Daud kerna (perbedan ras perserina) adi ibandingken ras kepemimpinen si genduari enda?
- Turiken arapen-arapenta i bas proses periodesasi (musyawarah) i tengah-tengah Moria GBKP menai i Sektor, Runggun, Klasis bagepe ku
Pusat! - Sitotoken panitia ras kerina proses MUPEL i bas tanggal 17-20 Juni enda. (Erbahan pertoton kusus ras-ras pulung i bas sada ingan guna notoken MUPEL Moria e. Kerna tanggal ras waktuna iarihken i bas Runggun masing-masing).
Pdt. Suenita Sinulingga
