NDAHIKEN DAHIN PELAYANEN
(Periodesasi Kepengurusen)
1 Kronika 26: 29 – 32
Pendahin kalak Lewi si deban
26:29 I bas kesusuren Ishar nari Kenanaya ras anakna si dilaki tetap ndahiken tugas administrasi: muniken surat-surat ras mberesken perkara bangsa Israel.
26:30 I bas kesusuren Hebron nari e me: Hasabia ras 1.700 kalak keluarga, kerina kalak si beluh, itamaken jadi kepala administrasi agama, ras perkara-perkara rayat i Israel arah Barat Lau Jordan.
26:31 Jeria e me peminpin kesusuren Hebron. I bas tahun peempat puluhken Daud jadi raja, ibahan penelidiken kerna kesusuren Hebron enda. Ijumpai maka lit tentera-tentera si terberita i bas keluarga enda si tading i Jaser i daerah Gileat.
26:32 Ipilih Raja Daud 2.700 kalak kepala keluarga si terberita i bas keluarga Jeria nari jenari itamakenna kalak enda jadi kepala pengurus kerina soal agama ras perkara rayat i Israel arah Timur Lau Jordan e me daerah Ruben, Gat, ras Manase Timur.
I bas umur si enggo metua rukur Daud, rumah pertoton si i bangun anakna Salomo arus seh kel jilena janah terberita ku belang-belang doni enda. Engkai maka seh kel kuje i ukurken Daud? Perbahan la i bere Tuhan ia majeken rumah pertoton perban enggo enterem jelma si ibunuh Daud bage pe enggo melala erbahan perang. Kenca bage i pepulung Raja Daud kerina pemimpin – pemimpin Israel lako nampati Salomo alu makeken sada motto: Genduari erdahinlah guna Tuhan Dibatandu asa ukurndu lit ras tendi…(1 Kronika 22: 19). I bas raja Daud enda eme pengajuk gelah gelar Dibata ermulia e me arah keberhasilen bangsa Israel maba mulihi peti perpadanen ras perkakas Dibata bengket ku rumah pertoton si ipajekken e. Dahin enda seh pentingna, enda labo dahin main-main si banci ilakoken alu mekarus. I bas ndalanken dahin enda perlu ketutusen. Emaka itekanken raja Daud gelah i bas ndahiken dahin enda ieteh jelma min maka enda dahin si mbelin, si adi la idalanken alu tutus banci ncurnai gelar Dibata. Emaka nina : “… erdahinlah guna Tuhan Dibatandu asa ukurndu lit, asa tendindu lit”.
Semangat ras palas si bagenda rupa si arus iajarken jadi penekanen man pengurus-pengurus gerejanta GBKP, gelah ietehna min maka dahin enda eme dahin si meherga ras mbelin, emaka arus idahiken alu ukur ras tendina. Alu kata si deban ketutusen ate jadi kuncina. Imam – imam ras kalak Lewi si ertugas khusus i bas rumah pertoton lit si jadi pengawal Rumah Pertoton, lit jadi bendahara Rumah Pertoton ras gudang.
I bas bahan ogenta lit si erdahin tugas administrasi, si muniken surat – surat ras si ndungi perkara bangsa Israel. Kesusuren Hebron ndahiken dahin administrasi agama. Dahiken dahin e kerna soal – soal agama ras perkara-perkara kalak Israel si tading arah Timur Lau Jordan. Tapi kenca tahun peempat puluhken Daud jadi raja iban pendidiken kerna keluarga Hebron. langkat Daud 2700 kalak kepala keluarga si terberita i bas keluarga Jeria nari jadi kepala pengurus kerina soal agama ras perkara bangsa Israel si tading Timur Lau Jordan. Bage me pendahin teptep terpuk lako ndahinker dahin-dahin janah teptep terpuk ndahinkenca alu dem tanggung jawab ras malang man Tuhan. Banci si idah maka bage me teremna kalak Lewi ras si labo kalak Lewi terlibat ikut erdahin. Dahin e labo muat belin kitikna si e kerina jadi dahin pelayanan.
Tengah-tengah gerejanta maka melala dahin pelayanan, emaka arus enterem keterlibaten anggota jemaat guna ndahiken dahin pelayanen e. Tata laksana Bab 1 pasal 8 Tata gereja GBKP 2015 – 2025 eme perpulungen jabu-jabu. Poin 3 tiap perpulungen jabu – jabu lit badan pengurus i bas anggota ngawan, bage pe pelayan khusus i bas perpulungen jadi pendamping man pengurus perpulungen jabu jabu. Pengurus perpulungen jabu-jabu cukup penting guna kiniulin ras kemajuan perpulungen jabu-jabu. Pengurus perpulungen jabu-jabu eme tiang gereja si turah ras rurat. Tole pe maka perpulungen jabu-jabu turah semangat membangun kula Kristus. Pengurus perpulungen jabu-jabu banci min kerjasama ras Pertua, Diaken, anggota jemaat i bas perpulungen e. Lit kerjasama si mehulí maka saling pegegehi, saling membangun ras si debanna. Jenari selaku pengurus perpulungen jabu-jabu arus nggeluh i bas spritualitas si mehuli.
Pengurus perpulungen jabu-jabu, pengurus kategorial enggo kap ikut ipilih jadi si ndahiken dahin Dibata. Adi enggo ipilih Dibata tentu meriah siakap, sabab kita kalak perdosa idilo ras ipilih jadi aron Dibata. Selaku pengurus perpulungen jabu-jabu, pengurus kategorial perlu si eteh maka Dibata si mereken dahin e. Emaka dahiken dahin pelayanen e alu tutus. Tujunta erdahin e me “lit min buah si mehuli pagi kutadingken kenca keri periodeku,” bage min si Suanken i bas pusuhta. Ernanam ras erguna min geluhku kidekah jadi pengurus guna mpekena-kena perpulungen Tuhan. Bagi nina Paulus i bas Pilipi 1:22a : “Tapi adi banci mbue kubahan dahin si mehuli i bas geluhku enda.”
EVALUASI
Uga kesaksinta sada minggu enda kerna ketedehen ateta man Tuhan?
DISKUSI
- Uga nge sedekah enda I bas sektorta kerjasama pengurus PJJ, Kategorial ras Pertua Diaken?
- Kal usulta guna ningkatken kerjasama pengurus PJJ, Kategorial
ras Pertua Diaken i bas sektorta?
AKSI:
Ban program ras anggaren guna pembinaan pengurus PJJ, kategorial ras Pertua Diaken sektor (ikut pendamping).
USULEN LAGU
- KEE GBKP. 020: 1 – 3
- KEE GBKP. 205: 1, 2
- KEE GBKP. 273: 1 – 2
- KEE GBKP. 188: 1 – 2
TOPIK PERTOTON SYAFAAT:
- Notoken pengurus perpulungen jabu-jabu gelah semangat, ertanggung jawab i bas ndahiken dahin pelayanan.
- Notoken segelah ola lit kelompok-kelompok i bas perpulungen jabu- jabu.
Pdt. Elisa Terulin Barus, S.Th.