(KETEDEHEN ATE IKUT KU GEREJA, PJJ RAS PA)
Ogen: Masmur 84 : 1-8
Tema: : Sangap Kalak Pulung Muji Tuhan
Tujun : Gelah Mamre:
1. Meteh maka kerehen ku rumah pertoton palasna eme ketedehen ate
2. Tutus pulung i bas gelar Tuhan
Metode : Diskusi
84:1 Untuk pemimpin biduan. Menurut lagu: Gitit. Mazmur bani Korah. (84-2) Betapa disenangi tempat kediaman-Mu, ya TUHAN semesta alam! 84:2 (84-3) Jiwaku hancur karena merindukan pelataran-pelataran TUHAN; hatiku dan dagingku bersorak-sorai kepada Allah yang hidup. 84:3 (84-4) Bahkan burung pipit telah mendapat sebuah rumah, dan burung layang-layang sebuah sarang, tempat menaruh anak-anaknya, pada mezbah-mezbah-Mu, ya TUHAN semesta alam, ya Rajaku dan Allahku! 84:4 (84-5) Berbahagialah orang-orang yang diam di rumah-Mu, yang terus-menerus memuji-muji Engkau. Sela 84:5 (84-6) Berbahagialah manusia yang kekuatannya di dalam Engkau, yang berhasrat mengadakan ziarah! 84:6 (84-7) Apabila melintasi lembah Baka, mereka membuatnya menjadi tempat yang bermata air; bahkan hujan pada awal musim menyelubunginya dengan berkat. 84:7 (84-8) Mereka berjalan makin lama makin kuat, hendak menghadap Allah di Sion. 84:8 (84-9) Ya TUHAN, Allah semesta alam, dengarkanlah doaku, pasanglah telinga, ya Allah Yakub. Sela
KATA PENARUH
Rumah Tuhan man kalak Israel eme sada ingan perjumpan ras Tuhan bagepe ras teman sada kiniteken. I bas rumah Tuhan eme kerina perpulungen nuriken isi pusuhna ras pengalamen-pengalamenna si teptep wari. Pengalamen i bas erdahin, pengalamen bas keluarga, terlebih pengalamenna ras Tuhan. Meriah kal akap bangsa e tupung jumpa i bas rumah Tuhan sebab igejapkenna tuhu-tuhu maka Tuhan e lit i tengah-tengahna. Tuhan erdahin bas kegeluhenna, masu-masu kerina pendahinna, anak jabuna, janah Tuhan si ncukupi kerina keperlun geluhna. Di kune lit perbeben ras persoalen si mesangat, idahina Tuhan ku rumah pertoton, Igejapkenna maka Dibata mereken serpang pulah, la gia pedas ijawab tapi pasti. Enda me si erbahansa maka bangsa Israel ermetedeh ate kal ku rumah pertoton.
URAIAN
Masmur 84:1-8 enda isina nuriken ketedehen ate ringan i bas rumah Tuhan si ituduhken arah ende-enden. Ketedehen ate pemasmur labo terjeng ringan i rumah Tuhan tapi tedeh atena man Tuhan e jine. Ketedehen atena e i bas pusuhna si mbages nari. Ngerana kerna pusuh e nuriken kecibal geluh, kula, tendi ras perukuren, janah kerina e ermetedeh ate man Tuhan. Ban tedehna ate pemasmur man Tuhan, pusuhna e tempa-tempa kelungunen, lenga akapna sikap adi la jumpa ras Tuhan. Tedeh atena e singgur ras keleng atena. Tapi bas dampar sideban, teridah keriahen ukurna tupung ia erlebuh man Tuhan, rende ia alu sora si mejile (merdu).
Ipebelinna kal Tuhan bas ende-endenna, nina ‘tendingku ras dagingku ersurak nandangi Dibata si nggeluh.’ Nuriken maka Dibata e tuhu-tuhu atan i tengah-tengah perpulungenNa janah ije me IA nuduhken perbahanen-perbahanenNa si mbelin, Erkiteken Dibata e lit i tengah-tengah perpulungen ietehna kerina kecibal perpulungenNa, emaka isampatiNa, iarak-ngarak dingen ipekena-kenaNa. IcukupiNa kerina keperlun geluh perpulungenNa.
Seakatan pemasmur, iidahna pe perik tuan ras kalimpines namaken anakna I deher batar-batar rumah Tuhan padahal lit nge kerina asarna. E nuduhken ketedehen ate kerina perik-perik ringan i rumah Tuhan dingen nuduhken keriahen ukurna alu ngendeken puji-pujinna man Tuhan. Nina pemasmur maka labo ia saja ermeriah ukur tapi pe kerina perik-perik si mewakili tinepa Dibata. Tole nari, iidah pemasmur kerina kalak si tading i rumah Tuhan eme imam-imam bagepe tim si rende (bani korah) ermeriah ukur, sebab teptep wari ia rende muji Tuhan. Metedeh ate pemasmur muat bagin rende radu tim si rende e, emaka nina pemasmur, seh kal sangapna kalak si tading i rumah Tuhan. Teridah maka tedehkal ate pemasmur nandangi Tuhan ras muji IA.
Tapi, labo saja kalak si tading i rumah Tuhan si kataken ermeriah ukur. Kalak si sangana bas perdalanen ku rumah Tuhan i Sion, epe ikataken ermeriah ukur. Sebab kalak si sangana bas perdalanen melala nge tantangen si man alanken, dalan si erbatu-batu, uruk ras kelbung man bentasen, banci ka lit binatang si merawa man alanken. I bas kerina tantangen e gegeh Dibata jadi gegehna. Nina pemasmur, sangap kal kalak si ndatken gegeh bas Tuhan nari, janah gegeh e ertambah-tambah teptep wari seh ia jumpa ras Tuhan i rumahNa si Badia i Sion. Em nina pemasmur e jadi keriahen. Ulihna, pasu-pasu Dibata simpar alu mpenusur udan seh maka taneh dem alu ulu lau dingen tambak-tambak. Kegeluhen kalak si reh ku rumah Tuhan tetap ngaloken gegeh ngalaken tantangen ras perbeben, bagepe ngaloken pasu-pasu, cukup keperlun geluh.
APLIKASI
Pernah nge kita ertedeh ate man kalak si ngena ras keleng kal ateta? Uga nge penggejapenta di kune lenga jumpa ras si ateta ngena e? entah e nge maka lit judul lagu “tedehku e si tedeh-tedehen” melungun tempa niakap bas jelma enterem e. Gambaren kalak si ngenan, si keleng kal atena, lenga jumpa sada wari nanam setahun akapna dekahna. Ise pe temanna jumpa lenga malem di la kin si atena ngena ndube. Penungkunen, bage nge ateta tedehna nandangi Dibata si enggo leben engkelengi kita? Uga maka banci tedeh ateta Dibata e? Kirai kerina pasu-pasu Dibata si enggo lalokendu, gegeh ras kesehatenndu, kecukupen nggeluh si teptep wari, janah tiap wari ertambah-tambah gegeh i bereken Dibata. Dibata lit itengah-tengahta janah meteh kerina perbebenta, iberekenna kita gegeh ngalaken kerina persolenta la terjeng kita, jumata ras pendahinta pe kerina ipasu-pasuNa. Kesangapen ras keriahen kal man banta si reh tiap wari ndahi Tuhan. Kita reh ndahi Tuhan arah perjumpanta secara pribadi; ertoto, erpaksa teneng, ngoge pustaka Si Badia, reh ku perpulungen Jabu-jabu, PA Mamre, bagepe reh ku gereja, eme rumah Tuhan si Badia Kalah sangana erdalan ku rumah Tuhan pe ndatken pasu-pasu. Dibata erngena ate nandanagi kalak si ertedeh ate man baNa.
DISKUSI
1. Turiken alasen sierbahanca pemasmur ertedeh ate nandangi rumah Tuhan
2. Usaha kai si bahan gelah kerina mamre ertedeh ate dingen reh ku rumah Tuhan?
USULEN ENDE-ENDEN:
1. KEE GBKP No. 62 :1
2. KEE GBKP No. 278 :1-2
3. KEE GBKP No. 385 :1-
4. KEE GBKP No. 360
Pdt. Nurbety Br. Ginting, M.Th