BIMBINGEN PA MAMRE TANGGAL 17-23 MEI 2020

May 19, 2020 Writer-1 Mamre 0

Tema: Doni Si Mehuli

Tujun: Gelah Mamre:

  1. Meteh maka Dibata si nepa doni enda alu mehuli
  2. Njaga doni enda gelah tetap mehuli
    Metode: Diskusi

Ogen: Jesaya 45:18-19

45:18 Sebab beginilah firman TUHAN, yang menciptakan langit, –Dialah Allah–yang membentuk bumi dan menjadikannya dan yang menegakkannya, –dan Ia menciptakannya bukan supaya kosong, tetapi Ia membentuknya untuk didiami–:”Akulah TUHAN dan tidak ada yang lain. 45:19 Tidak pernah Aku berkata dengan sembunyi atau di tempat bumi yang gelap. Tidak pernah Aku menyuruh keturunan Yakub untuk mencari Aku dengan sia-sia! Aku, TUHAN, selalu berkata benar, selalu memberitakan apa yang lurus.”

KATA PENARUH
Pertibi (alam) enda eme bagin tinepa Dibata si bali ras tinepaNa si deban. Pertibi enda pe itepa Dibata jadi sada pemere si mbelin bas kegeluhen manusia. Sabab Dibata nepa pertibi ntah pe alam enda gelah banci erguna man tinepa si deban secara khusus manusia. Doni enda me jadi ingan man manusia ndalanken kegeluhenna. Janah la terjeng ndalanken saja ngenca, tapi doni enda me jadi ingan man manusia lako naksiken kegeluhenna subuk arah pendahin si ilakokenna bagepe alu ngiani doni si jadi pemere Dibata man manusia. Em sabapna maka doni enda jadi bagin si penting bas kegeluhen manusia. I bas doni enda ka me manusia nerusken kegeluhenna. Ije nari ka me ialokenna kerina si iperlukenna i bas geluhna alu ndahiken dahinna. E maka doni ras manusia bagepe ras tinepa si deban labo kepe terpesirang. Kerinana ia jadi sada bagin si utuh si membutuhken sada ras si debanna. Doni enda butuh manusia, bagepe manusia pasti butuh nandangi doni enda. Enda me si ikataken simbiosis, siertina lit hubungen timbal balik i bas kerina tinepa Dibata e. Janah i bas piga-piga dampar tinepa e justru “bersimbiosis mutualisme”, ertina hubungen si saling menguntungken sada ras si debanna. Gelah seh ku tujun sie tentu iperluken me keselarasen ntahpe keharmonisen.

URAIAN
Sada bagin si jadi perenungen si isehken i bas kitab Jesaya enda ngerana kerna kuasa Dibata nandangi kerina tinepaNa. Ras i bas Jesaya 45:9-19 enda, Dibata mpersingeti bangsa Israel kerna ise kin Dibata si isembahNa e ras kuga belinna kuasaNa nandangi doni enda. Engkai maka ituriken Dibata kerna sie? Sabab i bas perikop si jadi bahan ogen enda ituriken kerna protes bangsa Israel kempak Dibata. Lit kepe ije “perasaan tidak puas” i bas bangsa Israel kerna Dibata. Janah erkiteken perukuren si bage me maka ipetangkas Dibata ise kin IA ras kuga belinna kuasaNa man bangsa Israel. Isaksiken Jesaya maka Dibata nuriken kuasaNa si mbelin e arah kerina perdalinen kegeluhen bangsa Israel. Menaken i bas Dibata nepa doni enda (ay. 12), jenari i bas ia mbentuk bangsa Israel (ay. 11; bnd. Terjemahen Alkitab), bagepe tupung Dibata mpekeke ukur dingen nuruh Raja Kores jadi dalan lako mpetangkas rencana keselamaten man bangsa Israel (ay. 13). Kerina si jadi e ituriken Dibata alu anding-andingen tukang kudin. Alu bage bangsa Israel meteh maka kuasa Dibata mbelin kap bas kegeluhen si lit i bas doni enda.

Guna ngidah kuasa Dibata si mbelin arah kerina tinepana e, lit piga-piga hal si jadi penekanen kerna doni enda eme tinepa si mehuli, emekap:

  1. Kuasa Dibata si mbelin i bas kerina tinepaNa I bas kitab Kejadin 1 ituriken maka Dibata kap si nepa kerina si nasa lit bas doni enda. Janah kerina sinasa lit enda itepa Dibata alu make kuasana si mbelin e E maka kerina sinasa lit e bekas tinepa Dibata nge. Termasuk pe ije manusia si itepa Dibata i bas wari pe-enemken. Enda ngertiken maka manusia labo pemilik tunggal tinepa si lit bas doni enda. Aminna pe i bas Kejadin 1:26-29 Dibata mereken “mandat (kuasa)” man manusia lako engkuasai doni enda, labo berarti maka kuasa e negasken hak mutlak manusia nandangi kerina tinepa Dibata. I bas Kejadin 1:26 ikataken maka manusia e tempas Dibata, ertina maka i bas diri manusia e lit nge nggeluh biak-biak Dibata. Biak-biak Dibata e tentu mabai manusia arus ngasup ngergaken ras njagai tinepa sideban. Janah kata engkuasai ras naluken labo berarti maka manusia banci meng-eksploitasi alam guna kepentingenna. Justru manusia pe arus nge njagai kelestarian tinepa Dibata e. Alu bage, tetap prinsipna kuasa Dibata si erdahin i bas doni ras kerina tinepaNa. Enda me si ipetangkas Jesaya. I bas ayat 18 nina: “Tuhan kap si nepa langit, sekatan la, Dibata lalit”. Ertina maka arah kesaksin Jesaya alu tangkas ituriken kerna kuasa Dibata si mbelin nandangi tinepaNa e. Ije me teridah maka tetap nge lit kemutlaken Dibata i bas pemahamen kiniteken bangsa Israel.
  2. Dibata nepa kerina sinasa lit guna kiniulin Teptep Dibata dung nepa, ikatakenNa maka si itepaNa e tuhu-tuhu mehuli kap (bnd. Kej. 1:4,10, 12, rsd). Arah ayat enda teridah maka kerina si itepa Dibata e labo gelah enggo ntahpe labo tinepa si lalit gunana. Justru Dibata nepa sie kerina erkiteken ngidah maka mbelin kal ulih ntahpe dampak si mehuli arah kerina tinepaNa. Puncak kiniuline tentu teridah kuga belinna kuasa ras kemulian Dibata. Janah enda me kerina si arus ituriken manusia i bas tengah-tengah doni enda. Kuasa ras kemulian Dibata si mbelin e arus sendalanen ras fungsi pertibi enda si jadi tinepa Dibata. Lit pe ije keselarasen ras keharmonisen gelahna kerina tinepa e banci erkawiten sada ras si debanna guna encidahken kiniulin geluh si mehuli. Janah enda me si ipetangkas Jesaya i bas jamanna man bangsa Israel, maka taneh e itepa Dibata la burbar, la mesuni tapi mehuli gelah banci iiani (ay. 18). Kata mehuli enda nekanken kerna fungsi taneh (tinepa) e banci erguna man kalak si tading ntahpe ngiani pertibi enda. Erpalasken pengertin enda, arusna manusia sadar maka pertibi enda bagin si labo banci ipesirang i bas ia nari. Adi pertibi enda la ijaga alu mehuli, tentu lit ka nge ulih ntahpe dampakna si la mehuli man manusia ras tinepa si deban.

Jenari ipetangkas Dibata man bangsa Israel maka labo pernah isuruhNa manusia lako ndarami IA ku bas ingan si burbar ras si mesuni. Tapi Dibata tetap kap lit i bas ingan si mehuli e. Dibata labo pernah erbuni-buni bagepe sura-suraNa pe labo pernah terbuni. Ertina maka i bas Dibata mbelin kap keterbukan. Ipetangkas Dibata kap kerina si nasa lit e. Termasuk pe doni si enggo itepaNa e. Ipetangkas Dibata maka IA kap si erkuasa nandangi doni ras kerina isina. E maka manusia pe arus nge mpertanggung jawabken kerina sinasa lit e alu tangkas ilebe-lebe Dibata. Sabab la ngena ate Dibata dina lit si terbuni. I bas Dibata kerina ipetangkas gelah mehuli. Ipetangkas Dibata tanggung jawab manusia nandangi doni enda gelah banci maba kiniulin nandangi doni enda.

APLIKASI
Njaga doni enda gelah tetap mehuli jadi bagin pergumulen manusia secara khusus kalak si tek man Kristus. Mbelin kal dampakna adina doni enda la kin ijaga alu mehuli. Erkiteken perbahanen piga-piga kalak si la ertanggung jabab, situhuna enggo lit ras enggo mbelin kal si gejapken dampak kecedan alam enda. Melala persoalen-persoalen si terjadi si enggo si alami, umpamana: akibat pembalakan liar terjadi banjir bandang, akibat pembakaran lahan hutan terjadi bencana asap si berdampak man enterem jelma, akibat penebangen pohon secara ilegal enggo terjadi pemanasen global (gobal warming) si mengakibatken naikna suhu panas bas doni enda, ras erbage-bage dampak si deban. E maka perlu kal si benaken sada geraken mulai i bas jabunta, sektorta, gerejanta, sinodenta bagepe geraken lingkungen masyarakat si sekelewetta guna engkelengi doni enda. Peturahlah semangat si erbahansa maka rurat ateta keleng nandangi doni enda. Sigejapken min maka doni enda rumahta ras-ras kap. E maka kerina nge kita ertanggung jabap guna niagai “rumahta” enda. Carana tentu banci alu mengurangi pemakaian plastik i bas jabunte. Sebab plastik merupaken sampah si mesera kal pemusnahenna. Plastik la minter hancur aminna pe enggo ertahun-tahun iabekken ntahpe enggo itutung. Cara si deban umpamana hemat energi. Alu bage kita pe banci mengurangi pemakaian energi berlebihen guna hal-hal si la erguna. Tentu melala denga nge cara si banei ilakoken Mamre guna njaga maka doni enda tetap nge mehuli.

DISKUSI

  1. Erpalasken bahan ogen ndai, turikenlah kai maksudna Dibata nepa doni enda guna kiniulin?
  2. Alu cara rukur global tapi bertindak lokal, turikenlah upaya si banci ilakoken Mamre guna njagai kelestarian lingkungen hidup bagepe guna njagai kiniulin tinepa Dibata e?

USULEN ENDE – ENDEN

  1. KEE GBKP No. 3:1,2,4,5
  2. KEE GBKP No. 260:1-5
  3. KEE GBKP No. 372:1-3
  4. KEE GBKP No. 262:1-5

Pdt. Dicky A. Bangun, M.Th

Post Views: 296