“ERGAKENLAH DIRINDU”
Si Man Ogen
Ibrani 12: 15 – 17
12:15 Jagalah supaya jangan ada seorangpun menjauhkan diri dari kasih karunia Allah, agar jangan tumbuh akar yang pahit yang menimbulkan kerusuhan dan yang mencemarkan banyak orang.
12:16 Janganlah ada orang yang menjadi cabul atau yang mempunyai nafsu yang rendah seperti Esau, yang menjual hak kesulungannya untuk sepiring makanan.
12:17 Sebab kamu tahu, bahwa kemudian, ketika ia hendak menerima berkat itu, ia ditolak, sebab ia tidak beroleh kesempatan untuk memperbaiki kesalahannya, sekalipun ia mencarinya dengan mencucurkan air mata.
TUJUN : Gelah Moria:
- Meteh maka meherga iakap Dibata dirina.
- Ngergaken dirina alu la nggit erlagu la mehuli.
METODE PA : Ngargari biak si mehuli i bas diri
Kata Penaruh.
Manusia megati kal erbahan belat-belat i bas kegeluhen enda. Kita nge erbahansa bagin-bagin i bas tingkaten geluhta. Lit iban kelas utama (VIP: very importan person), kelas menengah ras golem (Golongan Ekonomi Lemah). Perban lit jelma gedang maka si eteh kita gendek entah pe sebalikna. Perban mbiring kita maka si eteh lit jelma si bentaren asa kita. Jadi perayaken kal adi jelma langsing, emaka kalak si mbur rusaha gelah dirina banci jadi kertang entah pe langsing. Kita nge si erbahansa belat- belat i bas kegeluhenta. Tapi adi i bas Dibata kerina kita bali mbiring ras mbentar, kitik entah galang, mbur ntah kertang, bayak ntah mesera. Kerina meherga iadepen Tuhan. Ula min la si akap meherga kalak adi kune lain ras kita. Mari si gargari arah renungenta sendah uga kerna konsep dirinta. Kerina manusia meherga iadepen Tuhan. Adi kalak si ngergai dirina (penandainta kerna dirinta) pasti ia pe ngasup ngergai kalak sideban.
Mpebagesi Pengangkan Kerna Ogen.
Surat man kalak Heber enda itujuken man terpuk kalak kristen si sangana ngenanami kiniseran si mesangat kal. Si nulisken surat enda mpegegehi kiniteken kalak enda alu ncidahken maka Kristus Jesus kap kebenaren Dibata si tuhu-tuhu. IA me anak Dibata si rasa lalap, IA me Imam si mbelin si rasa lalap. Arah IA kalak si erkiniteken iselamatken i bas dosa kebiaren ras kematen nari. Sinulisken surat enda pe mindoken man kerina si ngoge suratna gelah tetap erkiniteken man Jesus seh ku kedungenn jaman. Janah i bas ndalani wari-wari ope seh kedungenna, perpulungen e perlu tetap metenget. Emaka iberekenna pengajaren-pengajaren man perpulungenna. Jagalah maka sekalak pe ola surut i bas lias ate Dibata (ay. 15a). Antusenna, perpulungen kalak Kristen e enggo ngaloken keselamaten i bas Dibata nari, dosa-dosana enggo ialemi, janah kegeluhen si rasa lalap jadi sikerajangenna. Emaka ola surut, tetap paguh i bas mpertahanken kiniteken, tupung e kalak Kristen rusur iayak-ayak. Sabap la meriah ukur pemerintah natap kalak Kristen tutus erkiniteken man Tuhan Jesus. Nina pemerintah paksa e, kaisar eme tuhan, la ngenca patut isembah. Emaka adi terdat kalak kristen ersembah man Jesus itangkap, isiksa ras ibunuh.
Jaga maka sekalak pe ola bagi sinuan-sinuan si pagit uratna si tura nuhsahi enterem jelma alu rananna (ay.15b). Perkatan enda lit pe itulisken i bas Ulangen 29:18. Sinuan-sinuan si pagit uratna nuduhken kempak kalak si nundalken Tuhan ras pernembeh man berhala-berhala, emaka iajukna ka kalak ngikutken ia. Perbahanenna e maba ngaruh si banci meneken kiniteken kalak sideban. Pengajaren kalak si pagit uratna ngataken maka labo perlu tutusina kal ndalanken Kata Dibata. Asal enge Kristen enggo me banci. Enda me ikataken pengajar-pengajar sesat paksa sie. Situhu-tuhu jadi racun i tengah-tengah perpulungen kalak Kristen bage pe masyarakat. Jagalah maka ola sekalak pe erlagu la mehuli entah la ngergai si meherga iakap Dibata (ay.16). Erlagu la mehuli ituduhken kempak kalak si tujun geluhna ras kesenangenna terjeng doni ngenca, sitik pe la lit ukurna kempak Dibata. Doni enda ingan kesenangen, ingan meriah-meriah, nanamilah!
Contoh si itulisken i jenda eme Esau si mindo bubur kacang merah man Jakub, erkiteken selera lanai iukurina paksa si reh, si penting gundari lebe
enggo besur.
Bage me perbahanen si la mehuli, la ngukuri paksa si reh. Emaka nina penulis surat Heber enda, mehergalah akapndu bandu, sabap Dibata pe ngergaken kam tuhu-tuhu, alu nelamatken kam i bas pengajuk doni enda.
Situhuna, doni enda labo ingan si rasa lalap, Dibata enggo nikapken ingan si payo, ingan kegeluhen si tuhu-tuhu. Jadi kalak si meherga akapna geluhna eme si encikep enteguh kinitekenna man Tuhan Jesus, si la ngikutken pengajaren si pagit uratna ras la ngayaki kesenangen doni.
Pengkenaina.
Engkelengi diri jine ibenaken arah engkelengi erta si mehergana pemere Dibata eme kegeluhenta, sabap kegeluhenta enda ergan asangken erbage tawaren doni. Megati kal bas geluhta adi lit nembeh ateta si susun i bas pusuhta, la si dungi si erbahansa turah menek ukur i bas pusuhta, dungna dirinta pe lanai si akap meherga. Kegeluhen si pagit e bali ras kinirawan si ibuniken mbages i bas pusuh si la pernah ipedarat. Tapi encedaken hubungen antara kita ras kalak sideban la ngenca kempak si ateta nembeh. Banci saja nembeh kal ateta ia padahal ia labo ietehna nembeh ateta sabap la pernah si turiken, nembeh ate banci jadi urat si pagit i bas dirinta erbahansa turah konsep diri (penandai diri) la si akap meherga man banta. Adi i bas perjabun si pejangjang biak si bage maka dungna turah kinilasetian bas kita ras dungna lanai kita mbiar ngelakoken lagu langkah si la mehuli. Cakap si pagit pe banci erbahansa pusuh kalak luka emaka perlu pe si pekena pengerananta man kalak sideban. Kesimpulenna: kalak tutus bas kiniteken, meherga akapna dirina ras meherga iakapna kalak sideban. Emaka si ergailah dirinta sabap Tuhan pe meherga iakapna kita.
Nggargari Si Mehuli I bas Diri.
- Turiken pengertin “sinuan si pagit uratna si turah nuhsahi nterem jelma alu racunna” i bas ogenta.
- Gargari 5 sifat si mehuli si lit i bas dirindu kenca sie petala-tala kam ras
temanndu. Janah turiken ka 5 sifat temanndu e si mehuli iakapndu.
Dungi alu erbahan perbandingen.
Pdt. Natallidna Tarigan, M.Th