RENDE MERITAKEN KELENG ATE DIBATA
Mazmur 92: 1 – 5
TUHAN, Hakim yang adil
(92:1) Mazmur. Nyanyian untuk hari Sabat.
(92:2) Adalah baik untuk menyanyikan syukur kepada TUHAN, dan untuk menyanyikan mazmur bagi nama-Mu, ya Yang Mahatinggi,
(92:3) untuk memberitakan kasih setia-Mu di waktu pagi dan kesetiaan-Mu di waktu malam,
(92:4) dengan bunyi-bunyian sepuluh tali dan dengan gambus, dengan iringan kecapi.
(92:5) Sebab telah Kaubuat aku bersukacita, ya TUHAN, dengan pekerjaan-Mu, karena perbuatan tangan-Mu aku akan bersorak-sorai.
Kantate/ Rende Alu Mehuli I Gereja
Rende eme salah sada cara nuriken isi pusuh subuk i bas situasi meriah entah i bas erceda ate. Arah rende banci situduhken ateta jadi man sekalak jelma, man sukunta, bangsanta, gerejanta terlebih man Tuhan. Kesemalen kalak Jahudi lit ende-enden sini iendekenna teptep wari rikutken urutenna: Masmur 24, 48, 81, 92, 93, 94.
Renungenta Masmur 92 me sada ende-enden tupung pembukaan wari Sabat sini iendeken mulai Jumat karaben, ntah pe kenca sundut matawari. I bas ende-enden e lit pitu kali gelar Tuhan (YAHWE) ibelasken e me ayat 2, 5, 6, 9, 10, 14 ras 16. Masmur enda sada bentuk ende-enden pengataken bujur sekalak si enggo nggejapken penampat Tuhan, si mulahi pemasmur arah sada tekanen ntah pe penindasen.
Radu ras ende-enden e isehken pe persembahen pengataken bujur man Dibata alu dem keriahen ukur. E sada bentuk puji-pujin man Tuhan si tetap engkelengi kita suari ras berngi. Rende ras ngataken bujur man Tuhan e ilakoken tupung erpagi-pagi ras berngi. Dage, rende e jadi dalanta lako muji Tuhan dingen meritaken kekelengen Tuhan, e me Dibata si meganjang si ngerunggui kerina manusia (bdk. Msm.7:8). Ende-endene iendeken alu ngkuit gitar si sepuluh tinalina bage pe alu gambus ras kulcapi, iendeken i bas Rumah Pertoton.
Mbelin kal gunana rende e i bas kegeluhenta. Arah rende e si gejapken perbahanen Dibata si mehuli, Dibata si adil, si mereken gegeh ras kepentaren i bas geluhta. Em erbahanca kita terjemba lako muji Dibata. Kerina perbahanen Dibata si mehuli man banta mpegegehi kita ngendeken ende-enden meritaken keleng ate Na.
Lit min penggejapenta maka Dibata e jine erbahanca kita ngasup melasken kata-kata ende-enden e, guna kemulianNa bage pe si gejapken maka Dibata e lit i bas pusuh ukurta. Alu bage, rende la banci mekarus, perlu nikapken pusuh ukurta bage pe kula nta maka banci kita rende alu mehuli. Perlu tetap si gejapken maka kita manusia e itepa Dibata guna muji ras mpebadiaken gelarNa arah perukuren, pengerana ras perbahanenta.
Rikutken kelender gerejanta minggu enda bengket kita ku bas Minggu Kantate, ibabai kita lebe nggejapken ras ngidah keleng ate Dibata si jadi ulu keriahenta guna nehken puji-pujin. Sabab kalak si ngidah kiniulin Dibata nge si ngasup muji ras mpermuliaken gelarNa. Bage pe, i bas kita ngendeken ende-enden i tengah- tengah dahin-dahin gerejanta, subuk Kebaktin si ilakoken bas Gedung Gereja, i jabu-jabu, i lapangen, i jambur ras japa pe, mehuli kal dikune si sikapken ende-endenna alu mehuli.
Ende enden e jadi kesaksinta. Emaka, kerina si muat bagin bas rende e arus nikapken dirina. Umpamana, song Leader ras pemusik. Arus min lit latihen guna ngendeken ende-enden e. Gia pe ikataken song leader ola ka min sora na si terbeginakal. I bas ende-enden si kurang iangkai perpulungen e perlu song leader megang rende tapi i bas si enggo semal iendeken, labo perlu megang kal sora na. Pemusik pe mbue latihen kerna jenis lagu ras musik si lit bas ende- enden e. Ola min sanga Kebaktin e ipake waktu guna latihen.
Ibas Kebaktin Pemasu-masun Perjabun pe perlu ka nge si atur buena Koor, vocal group ntah pe vocal solo si iendeken. Buena 3 seh ku 5 lagu saja guna njagai kiniulin perdalanen Kebaktin e. Sope Kebaktin erdalan, enggo min lebe iarihken jabu pekepar ras Runggun gereja maka ola lit ende-enden si bali itampilken 2 kali. Janah, perlu si inget maka i bas kita rende e terberita min kerna perbahanen ras kekelengen Dibata nandangi jabu si mbaru e.
Mehuli ka pe, rikutken Kebaktin Minggu, PJJ ntah pe PA siilakoken kita, gelah sipakekenlah usul ende-enden si enggo isikapken. Janah tambah ka ulina dikune teptep Runggun enggo nikapken sada buku panduan ende-enden guna keperlun Kebaktin e. I bas Tata Gerejanta iaturken maka Runggun Gereja arus ertanggungjabab kerna ende-enden si ipake i bas kebaktin eme arah Kitab ende – enden GBKP, Kidung Jemaat, Pelengkap Kidung Jemaat, Kidung Ceria, Dua Sahabat Lama ras Nyanyikanlah Kidung Baru. I darat e, Runggun Gereja ertanggungjabab milih lagu sue ras ajaren GBKP
Ingetlah, kita rende e i lebe-lebe Tuhan, guna Tuhan janah ma kemulian Tuhan dingen arah si e teridah me kekelengen Tuhan e bas geluhta. Erkiteken si e ola kita mekarus, ola menggo, dingen si pakelah paken si ncidahken kinitunggungen muji Tuhan. Paken e labo arus mbaru dingen meherga, labo arus seragam tapi bas kerina si ilakoken ras ipakeken kita e sicidahkenlah kemeteruken ukur ta maka termulia Tuhan arah ende-enden e bage pe arah dirinta.
EVALUASI
Ma sidalanke aksi 1 kg beras/Rp 10.000 guna nampati program komisi HIV/AIDS?
DISKUSI
- Si bagiken kita si reh bas PJJ enda ku 3 Kelompok janah masing masing kundul bas kelompokna.
- Emaka si buka KEE GBKP No. 372 1-3
- Tugas kelompok eme nuratken kerna sada perbahanen ilakoken Tuhan bage pe sada perbahanenta si arus si lakoken sue ras si tersurat bas ende-endenta e.
- Kelompok 1 mperdiateken ende-enden bait ntah pe bagian 1
- Kelompok 2 mperdiateken ende-enden bait ntah pe bagian 2
- Kelompok 3 mperdiateken ende-enden bait ntah pe bagian 3
- Kenca kerina kelompok nggo ndungi dahinna emaka salah sada
nuriken hasil kelompokna, janah la perlu itanggapi kelompok si deban. - Nutup kegiaten kelompok e ilakoken alu ngendeken KEE enda sue ras bagin kelompokna.
Adi la memungkinken erban kelompok, cuba cakapken uga gelah reh ulina perendeta i bas gerejanta? Kai usulta?
AKSI
I bas kegiaten PJJ nta mehuli dikune lit sipakeken alat musik ntah
pe musik digital GBKP guna mengiringi kita rende. Cubaken si
arihken i bas PJJ nta kerna pelaksananna si melibatken ngawan PJJ nta.
Si usahaken maka i bas PJJ lit min alat musik gelah reh riahna
siakap rende muji Tuhan.
USULEN LAGU
- KEE GBKP No. 003: 1, 2, 5
- KEE GBKP No. 243: 1 – 2
- KEE GBKP No. 471: 1
- KEE GBKP No. 183: 2
TOPIK PERTOTON SYAFAAT
- Kerina kekelengenta si enggo menciptaken bage pe ngelitken KEE GBKP No. 1 – 500.
- Kerina Song Leader, pemusik ras pelatih Koor si lit bas Gerejanta.
Pdt. Agustinus Ginting Manik, M.Th.