GELUH SI MBARU I BAS KRISTUS
(Ngelakoken Kebaktin Kamis si Badia, Jumat si Mbelin, Sabtu Pengarapen ras Paskah)
Roma 8:9- 11
8:9 Tetapi kamu tidak hidup dalam daging, melainkan dalam Roh, jika memang Roh Allah diam di dalam kamu. Tetapi jika orang tidak memiliki Roh Kristus, ia bukan milik Kristus. 8:10 Tetapi jika Kristus ada di dalam kamu, maka tubuh memang mati karena dosa, tetapi roh adalah kehidupan oleh karena kebenaran. 8:11 Dan jika Roh Dia, yang telah membangkitkan Yesus dari antara orang mati, diam di dalam kamu, maka Ia, yang telah membangkitkan Kristus Yesus dari antara orang mati, akan menghidupkan juga tubuhmu yang fana itu oleh Roh-Nya, yang diam di dalam kamu.
Dibata tetap ikut muat bagin i bas perdalanen geluhta make lit kengasupenta lako ndalanisa. Emaka melcik ukurta lako ngataken, “Ngasup aku ngalaken kerina keadan erkiteken kuasa si ibereken Kristus man bangku” (Plp. 4:13). Erkiteken si e si dalanilah kegeluhen e ras Tuhan.
I bas ayat 9, selaku anak-anak Dibata si amin ken maka kita nggeluh rikutken sura-sura Kesah Dibata, janah si lit bas kegeluhenta e me kekelengen, keriahen, kemalemen ate, kesabaren, ndalanken perbahanen si mehuli, mehuli, setia. Bage pe meteruk ukur dingen ngasup engkuasai diri ras pe lanai lit si jadi kebiarenta i bas nggeluh.
Jesus pe seh i bas paksa nandangi kematenNa tetap ngelakoken si mehuli man ajar-ajarNa. IbahanNa Lakon Persadan si Badia sada pada wari sope IA ipakuken. I je iturikenNa maka enggo seh paksana IA ngenanami kiniseran guna kiniulin manusia. Enda me siilakokenNa si jadi peringet-ingeten man banta rikutken Kebaktin Kamis si Badia si ilakoken kita,
Tentu si enda banci jadi bas Jesus erkiteken Kesah Dibata e ringan i bas IA (bdk. Mat 3:16). Bape ka me pe kita, si gejapken maka Kesah Dibata e nge mereken kepentaren ras kengasupen man banta gunamentasi dalin kegeluhenta. Kesah Dibata e erbahanca kita tetap jadi sikerajangenNa. Bagi Jesus, seh mateNa pe tetap nge IA nggeluh bas kebenaren, la isubukiNa kerina perbahanen kalak si enterem man baNa.
Paksa si e Jesus nehken pengajaren guna ngantusi erti kekelengen, kiniteruken ukur ras kesetian. Enda me biak sekalak ajar-ajar si maba kiniulin ku bas doni enda. Emaka, asa banci min bas Kebaktin Kamis si Badia e si lakoken pe murihi nahe ntah pe basuh kaki bagi silakoken Jesus murihi nahe ajar-ajarNa (bdk. Joh. 13:1-20).
I bas pelayanan Jesus, ietehNa erbage-bage perukuren kalak si ngikutken IA; lit si terjeng ngikut-ngikut perdalan Na tapi la ngantusi pusuhNa, lit si ngarapken Jesus jadi tokoh pembaharu alu make kinimbisanNa, tapi la iangkana maka Jesus maba pembaharun arah kiniteruken ukur ras keleng ate. Lit ka pe si teridah mejingkat ras megegeh tapi minter nilah di kune lit perbeben. Deba ajar-ajar ngikutken Jesus gelah sura-surana tersehi, janah lit ka pe si ngikutken Jesus di kune tudu ras perukurenna.
Erkiteken si e, kematenNa jadi dalan Jesus ngajar gelah kerina kalak si tek pe meteh maka kiniseran ras baban nggeluh si mberat arus kap idalani. Jesus sendiri pe pernah ertoto nina : “O, Bapa, adi banci pedauh min calung kiniseran enda i bas Aku nari. Tapi labo peratenKu, peratenNdulah jadi.” (Luk. 22:42). Tapi kematen Jesus e jadi kahulta gelah si dat geluh si mbaru, mabai kita jera i bas dosa-dosanta. Ngingetken maka kita rutang man Dibata alu nehken kekelengen man doni enda dingen ikut mersan kayu persilang Kristus. Enda me ertina kita mperingeti wari Jumat si Mbelin.
I bas ayat 10 isingetken, ngaruh Kristus i bas geluhta erbahanca tendinta tetap nggeluh sabab Dibata enggo ngerembakken kita kempak diriNa. Ulihna, labo kita mbiar sitik kal pe kerna kematen, Janah pangen kal siakap nadingken kula enda gelah banci kita serumahen ras Tuhan (bdk. 2 Kor. 5:7-8). Enda me pengarapenta selaku anak-anak Dibata.
Rikutken ayat 11 tangkas ikataken maka arah perbahanen kekelengen Tuhan man banta anak-anakNa emaka Kesah Dibata erbahanca kita ndatken kegeluhen si mbaru.
I bas Kebaktin Sabtu Pengarapen kita ngerenungken erti keleng ate Dibata arah kematen Jesus Kristus. Mbiar kerna kematen erbahanca tambah ateta mesui di kune kalak si ikelengi kita lawes nadingken kita. Kebaktin e mereken pengertin maka pengarapen geluhta e me bas Tuhan janah geluhta e tetap ipelimbarui Tuhan bas erpengarapen pe kinitekenta reh belinna. Kematen la ngasup nirangken kita i bas keleng ate Dibata nari. Kematen Kristus e me maba keterkelinen man banta ras man si enggo mate i bas Kristus
Emaka, seh me kita ku bas Kebaktin Paskah, eme pendilo man banta gelah kita mulihi nginget maka Jesus ngenca ngasup ngelawan dosa, darehNa si nebusi kita i bas dosa nari njemba kita lako naluken kuasa dosa, ras lanai kita nggeluh i bas kuasa dosa. Janah, kekeken Jesus e la terjeng guna nelamatken manusia, tapi pe guna mpekena-kenasa. Paskah jadi kesempaten banta guna nggejapken maka arah geluh si mbaru si iberekenNa kita ngasup ngelakoken si terulin i bas geluhta.
EVALUASI :
Lit nge kita muat bagin notoken Sidang Majelis Sinode i bas jabu ntah dirinta?
DISKUSI :
Benang merah ntah pe kawiten Kebaktin Kamis si Badia, Jumat si Mbelin, Sabtu Pengarapen ras Paskah siidat kita eme : kuasa Dibata tetap erdahin bas kerina dampar geluhta erbahanca kita ndatken kemenangen ras geluh si mbaru. Bagilah si pulung jadi 4 kelompok eme kelompok Kebaktin Kamis si Badia, Jumat si Mbelin, Sabtu Pengarapen ras Paskah. Kenca si e diskusikenlah uga nge penggejapenndu i bas ngelakoken kebaktin rikutken gelarkelompokndu? Turikenlah! Adi la terban kelompok maka cuba diskusiken kai nge kawitenna kerina kebaktin enda?
AKSI:
Ertekad guna muat bagin bas ngelaksanaken Kebaktin Kamis si Badia, Jumat si Mbelin, Sabtu Pengarapen ras Paskah.
USULEN LAGU
1. KEE GBKP No. 213:1-3
2. KEE GBKP No. 264:1-3
3. KEE GBKP No. 199:1-5
4. KEE GBKP No. 307:1,2
TOPIK PERTOTON SYAFAAT:
1. Pelaksanaan Kebaktin Kamis si Badia, Jumat si Mbelin, Sabtu, Pengarapen ras Paskah gelah erdalan alu mehuli.
2. Bangsa ras Negaranta Indonesia enda mengalami kebangkiten erkiteken kuasa Tuhan janah jadi lebih mehuli.
Pdt. Agustinus Ginting Manik, M.Th.