Lebih Asa Pemenang
Roma 8:37-39
(Paskah Ras Ngaloken Ulih Pemilu)
8:37 Tetapi dalam semuanya itu kita lebih dari pada orang-orang yang menang, oleh Dia yang telah mengasihi kita.
8:38 Sebab aku yakin, bahwa baik maut, maupun hidup, baik malaikat-malaikat, maupun pemerintah-pemerintah, baik yang ada sekarang, maupun yang akan datang,
8:39 atau kuasa-kuasa, baik yang di atas, maupun yang di bawah, ataupun sesuatu makhluk lain, tidak akan dapat memisahkan kita dari kasih Allah, yang ada dalam Kristus Yesus, Tuhan kita.
Kemenangen eme sada si iarapken, sierbanca meriah ukurta, apai ka adi enggo mentasi sada perjuangen si dem alu kinigenggen. Piga-piga hal si tangkas iidah kita kerna kemenangen, eme kap asum kita ngasup ngelupaken kegagalen i bas paksa si lewat dingen tetap semangat ras maju. Paksa kita engkuasai diri i bas perbeben. Bage pe paksa kita ngasup ngaloken kerina situasi si jadi i bas kegeluhenta. Emaka situhuna melala kemenangen si tergejap i bas kegeluhenta enda. Labo terjeng menang i bas perlumban entah prestasi si meningkat saja tapi i bas erbage kecibal kegeluhenta.
Surat Rasul Paulus enda itulisken sekitar tahun 55-56 M alu tujun guna mpetandaken dirina man perpulungen Roma. Bage pe nuriken kerna kalak si erkiniteken i bas persadanna ras Kristus i tengah-tengah kiniseran tupung kekaisaran Romawi. I bas oratenta Roma 8:37 “Tapi i bas si enda kerina…” ertina ngingetken uga sangatna pe perbeben si jadi, tapi kalak si erkiniteken man Kristus ikataken: “Kita enda lebihen asa kalak si permenang”. Kemenangen kai nge si imaksudken i jenda? I bas cakap Junani kata menang ipake kata (Niketes) si iertiken kalak si enggo ngaloken perkuah ate Dibata alu kinitekenna nandangi Jesus Kristus si tetap ipelimbaruiNa alu naluken dosa. Kalak si enggo menang encidahken tanda maka ia lanai seri ras doni enda (bdk 12:1-2). Kemenangen kalak si erkiniteken eme i bas ia tetap njaga kiniersadan ras Kristus.
Iterusken ayat 38-39 “…Sebab aku enggo tek….” Ngatakenca kalak si lebihen asa pemenang e kinitekenna dingen kerembakenna ras Dibata nge si utamana. Kalak si lebih asa pemenang labo ngerana soal gegeh kula, labo kalak si la lit kekurangenna. Persadan ras Kristus nge erbanca ia megegeh.
Melala i bas doni enda si banci erbanca kesirangen ras Dibata adi lenga paguh erkiniteken. Umpamana, kepiceten, uruk-uruk kalak, kurang pangan entah uis, ancamen, kematen, rsd. Kematen i bas pemahamen Pedah si Ndekah eme nirangken kalak ras kalak si ikelengina. Bage pe banci nirangken kalak i bas persadan ras Dibata. I bas Padan si Mbaru Rasul Paulus nuratkenca maka kematen eme keuntungen (bdk Pil 1:21)
Paskah sirayaken gerejanta teptep tahunna eme sada perentah i bas Dibata nari (bdk Kel 12:14). Nginget maka Dibata kap simbebasken bangsa Israel i bas Mesir nari. Paskah i bas Padan si Mbaru eme mperingeti kerna kekeken Tuhanta Jesus Kristus. KekekenNa i bas i si mate nari eme kemenangenta i bas kuasa dosa. Kalak Kristen si enggo menang jadi saksi guna tetap ngerembakken dirina ras Tuhan i tengah-tengah perbeben kegeluhenna.
Janah istimewana April 2019 enda Paskah radu ras Pemilihen Legislatif (Pileg) ras Pemilhen Presiden (Pilpres) i bas tanggal 17 April 2019 si lewat enda ndai. Masa kampanye si enggo ilakoken singkat, 6 bulan ngenca (13 Oktober 2018-13 April 2019). Teptep pemilihen pasti lit si menang lit ka si la menang. Uga kita ngasup ngalokenca alu nggejapken Dibata tetap erkeleng ate dingen ngergai kerina usahanta. Adina terpilih, enda jadi kesempaten guna ndahiken si mehuli i bas pemerintahen. Tapi, bicara lenga menang pe labo e erbanca maka la kita ikut pesikap kutanta. Sabab kalak si pemenang ngasup ngaloken situasi si ugapana pe erkiteken maka gegeh Kristus. Bage pe ngawan perpulungen teruslah notoken si menang gelah ngasup ndahiken dingen nehi kai si eggo ijanjikenna i bas kampanye ras notoken dingen mereken pergegeh man si langa menang.
Tanda-tanda kalak pemenang eme:
- Meteh maka Kristus tetap erkeleng ate man banta i bas kerina kecibal kegeluhenta
- Rusia (Rahasia) kemenangenta emekap kematen Kristus i bas kayu persilang si nebusi kita janah maba dame man banta.
- Nandai diri selaku kalak si erkiniteken man Kristus. Kita eme anak-anak Dibata si isuraken guna ndahiken dahin si mehuli.
EVALUASI
Turikenlah ulih aksi i bas HUT GBKP si lepas
DISKUSI
- Bas kai-kai saja nge kita enggo menang i bas kegeluhenta?
- Kai si ban i bas nuduhken kita kalak pemenang?
AKSI
Si totoken i bas sada minggu enda kerina calon si menang ras lenga menang gelah tetap megegeh ras berkarya.
USULEN LAGU
- KEE GBKP No. 102:1
- KEE GBKP No. 183:1,4
- KEE GBKP No. 282:1-3
- KEE GBKP No. 374:1-3
Pdt. Kristiani F. Br. Tarigan, M.Th