BAHAN PJJ 2019
MERE PERSEMBAHEN ALU UKUR ERSURUH
KELUAREN 35:20-29
(TEOLOGIA PERSEMBAHAN)
Perjumpan bangsa Israel ras Tuhan sanga bangsa enda erkemah di teruh deleng Sinai (mulai bindu 19). Secara khusus Musa idilo Tuhan nangkih ku deleng Sinai guna ngaloken perentah-perentah Tuhan man bangsa Israel. Kejadin enda nentuken kegeluhen i bas bidang agama bage pe sosial. Paksa e isehken Perpadanen antara Tuhan ras bangsaNa Israel dingen itetapke aturen-aturen keagamaan ras hubungen sapih sapih manusia si isuratken i bas 2 lembar batu, si igelar Sepuluh Pedah Dibata.
Kenca Musa nusur deleng Sinai nari iperentah Musa man bangsa Israel gelah maba persembahen guna mbangun Kemah si Badia. Keluaren 35:20-29 enda, nuriken bangsa Israel maba persembahen e ibabana alu ukur ersuruh, arah pusuh peratenna nari, janah buena asa ukurna meriah.
Lit ka nge kalak si la nggit, si lebih engkelengi erta-ertana asangken Tuhan. Kalak si bage, la ia ikut muat bagin i bas mpekena ingan si Badia e. Mungkin la radu kerina ersuruh ukurna, emaka silebe-leben nehken persembahen e. I bas Keluaren 36:2-7, ikataken maka: kerina persembahen-persembahen e teptep erpagi-pagi ibereken man Musa, janah Musa merekenca man tukang-tukang. Persembahen-persembahen e erbage-bage bentukna, tergantung ku bas kai si lit i bas sekalak-sekalak. Lit simaba kancing perhiasen, anting-anting, cincin, bura ras erbage perhiasan emas, lenen halus,wool biru, ungu, megara, uis i bas mbulu kambing nari, kulit bajar biri-biri si icelup megara, kulit halus, pirak bage pe tembaga, kayu jati. Deba maba benang guna itenun sendiri, si secara nominal labo meherga ibandingken perhiasan emas. Tuhan ngidah pusuh ras ukur kalak si ersembah, lebih asangken jumlah ras jenis persembahan e jine.
Enterem si mpersembahken erta si meherga, tapi lit ka nge diberu-diberu si mpersembahken ketrampilenna, kengasupenna erbahan benang i bas bulu biri-biri nari, ras bage pe ertenun guna keperlun ingan si Badia e. Enda ncidahkenca maka la lit manusia si teridah musil ibas muat bagi ersembah guna Rumah Pertoton.
Ise si idilo Dibata erdahin guna IA, pasti iperlengkapiNa gelah ngasup ndahikenca, idemiNa alu KesahNa. Kengasupen i bas dahin-dahin doni pe rehna i bas Dibata nari, emaka banci ipersembahken man Dibata guna mbangun gerejaNa.
Kai kin ertina persembahen? Erti persembahen i bas kerina kalak si tebek subuk kalak Jahudi bage pe kalak Kristen e me “Pengataken Bujur” man Dibata. Engkai maka arus sikataken bujur man banNa? Erkiteken kerina si lit ibas kita subuk gegeh ras pencarinta sialoken i bas Dibata nari. Jadi, ngataken bujur man Dibata eme “kewajiben” keru a kalak si tek.
I bas tradisi kalak Jahudi lit piga-puga erbage persembahen, si biakna wajib e me: Persembahen tutungi (bdk. Im 1:3-17), Persembahen Persadan (bdk Im 3;7:11-36), Persembahen pengalemi dosa (bdk. Kel 29:14,36; Im 5:14-6:7). Bage pe lit persembahen si biakna meriah ukur (voluntary offering bdk. Kel 35: 20-29; 36). Jadi, persembahen si ipersembahken bangsa Isarael ibas bahan PJJ nta sendah e me persembahen meriah ukur.
Ibas gerejanta GBKP pe, persembahen si ipersembahken perpulungen guna pembangunen Rumah Pertoton biakna meriah ukur. Ise si nggit ras ersuruh ukurna, janah bilangenna pe itentuken kalak si mereken persembahen e. I bas Gereja Kristen lanai lit persembahen persembahen tutungen bagi i bas Israel nai, enaka umumna tep tep persembahen biakna meriah ukur. Tapi lit ka nge persembahen si biakna sada kearusen i tengah-tengah Gereja, termasuk GBKP, e me si mbarenda igelari “Iuren Ngawan”.
Persembahen-persembahen silit i bas GBKP, e me Persembahen Kolekte ibas teptep Kebaktin, Persembahen Perpuluhen/Bulanen, Kerja Rani, Persembahen Pengataken Bujur erkiteken meriah ukur, Persembahen pembangunen gedung Gereja ras gedung KAKR ras rumah Pandita. Persembahen si iendesken ku Moderamen arah Klasis e me kap: 40% Kolekte kebaktin-kebaktin, 40% Persembahen Perpuluhen/bulanen ras 40% ulih Kerja Rani. Persembahen-persembahen si iendesken ku Moderamen gunana e me kap man pelayanen kerina program-program kerja si ilakoken secara Sinodal ras i bas Klasis, bage pe guna gaji kerina Pandita. Kolekte Natal 100% iendesken ku Moderamen guna Dana Pensiun GBKP.
Ibas Sidang Sinode tahun 2015 iputusken maka presentase setoren ke moderamen iubah, si sedekah enda 50% tading i Runggun janah 50% siendesken ku Moderamen, jadi 60% tading i runggun janah 40% iendesken ku Moderamen. Tujunna gelah runggun jadi pusat Tritugas gereja alu bage reh ulina perdalanen kegeluhen perpulungenta.
Evalusi
Nggo nge kita tepat waktu ibas kebaktin dingen ngikutisa seh asa dung?
Diskusi
- Turiken pengertinndu sedekah enda kerna persembahen i bas Gereja, sebagai “sumbangen”,nge entah sebage “pengataken bujur?” Kai nge bedana sumbangen ras pengataken bujur?
- Kai nge si perlu silakoken gelah reh ulina persembahenta ku waeu si reh enda? sistem keuangan nge perlu ipekena entah persembahen nge si perlu itingkatken?
Aksi
Ibas wari Sabtu enda sisikapken persembahenta ras anak-anakta guna kebaktin minggu
Usulen lagu
- KEE GBKP NO 15:1-2
- KEE GBKP NO 385:13
- KEE GBKP NO 471:1-2
- KEE GBKP NO 450:1-3